Search This Blog

Wednesday, August 3, 2011

Ka exam leh ta!

"Pathian zarah eng eng emaw ka zir belh ve zel," Nilaini, May ni 25, 2011 ami chhunzawmna!


Kum 2011 February thlaa ka zir zawh tak,  Steam Engineering lam kaihhnawih tho exam tur remchang ka hmu hlauh mai a, (ka zirtirtu min hrilh a ni) exam theih hram ka rilruk ta a. Chumi chu Stationary Engineer exam a ni a, mechanical, general electric, power steam boiler leh refrigiration lam, chemical etc. subject te anni hlawm. Kan bel chiang a, examna tur lehkha vel chu Las Vegas, Nevada lamah daih thawn tur alo ni tih te ka hre ve ta zel a. Exam thei tur hian enge ka zir zawh tawh, engtia rei nge hetiang lampang hna kalo thawh tawh tih leh zawhna dang chhan tur bakah tihchianna (prove) thil tel angai nual mai. Fee leh exam dilna chu ka zuk thawn thla ve ta vawng vawng mai a.

Thlakhat ka nghah hnu chuan chhanna, dâk (post) atangin dawngtur emaw ka intih kha an lehkha kan bih chiang leh a, alo ni tawp lo mai. Keiman ka zuk biak anlo ngai alo nih chu, fimkhur loh theih mange! Tlaikhawhnuah, tihdan tur ka hriat veleh ka zuk be thuai a, biak anlo nuam phian mai lehnghal a, tul ang chu kan sawi fel nghal ta vek a. Lehkha thehluhna Las Vegas mah nise, exam chu kan awmna state ah tur ani thung. Ka exam hun tur te min hrilh hnu chuan, library ah te kalin tul ang ka chhiar ve thin a, ka lehkhabu neihsa te pawh ka chhiar nawn leh ta zel a.

Hnathawh lai neih bakah, a changa chhunlam hna, a changa zanlam hnathawk han nih chuan lehkha chhiar rilruah alo lut tha duhlo phian mai lehnghal a, tiril a za leh zak mai thin. Kum upa lam kan lo ni ve dawn tan mai tawh nen, "Rilru a muang churh tawh a," an lo tih zeuh chang te chuan nui vur vurin ngaithla mah ila, chhungril a nui lemlo fo; a fuihna tawngkam lo bawk em a ni! Chuti karah internet a thiante biak nuam lo tih bawk nen chuan zirna hun tak tak avang duh kher mai. Phek khat chhiar, internet ah minute 20 emaw... chutiang te chuan hun ka thendarh vel thin.

Exam hun alo ni ta a, kan awmna khaw piah Hagerstown khua, Km 49 vel ahla pan chuan ka chhuak ve ta a. Phone leh mahni pen thlenga ken luh phalloh anih vang chuan motor chhungah tullo thil chu ka dah vek a, ka lut ve ta chhak chhak. Ka pindan luhna tur ka thlen hmain zunin ka pan phawt a, zunin hi zahzel tha deuh mai ania!

Clerk chuan thutna min kawhhmuh a, reivaklo ka thut hnu chuan ka ID chihnih, ka drivers license (US ah chuan driving license an tilo) leh ka Social Security Number chu ka hmuh a. An enfiah hnu chuan, exam tur zingah ka hming a tel em tih an chian leh a. Ka ID pakhat min pekkir hnu chuan ka thla ala a, ka drivers license erawh chu exam hall ka chhuahsan dawna min pek leh turin a kawl tha thung a. Chhiarkawp te a tel avangin chawhhnawkna tur lehkha, clerk leh keima signature awm/chuang chu pencil nen min pe a. Exam hall chhunga awm dan tur min hrilh zingah chuan, bengchheng ka tih chuan benghnawhna tur dawhkanah a awm thu min hrilh a. Chutiang leh a kaihhnawih engkim chiang taka min hrilh hnu chuan, "Good luck" ti a chibai min buk hnu chuan exam hall chu min luh tir ve ta a.

Exam chu kan tan ta a, ka bulah chuan mi thu ve nual mahse, an hmel ka hmuh awm pawh ka hrelo. Zawhna lah chu a ingelh zawngin an siam thiam khawp mai a, thu tluangtlam awm thei reng kha a ingelh deuh a zawhna siam an thiam khawp mai. Han ngaihtuah chian erawh chuan kan thil zirah kan chiang em tih a hriat khawp ang le! Khavang kha aniang chu a tumkhat nan ka fail tak reng mai kha!

Exam that leh hi thlakhat hnuah an remti hlauh mai a, ka ti nawn leh ta a. Hetah pawh hian electric lam kha ka tichhe hle mai a, mark 1 in ka tlingzo lo leh ta a. Harsa ka tihna chhan pakhat chu steam boiler a algebra formula hi electric lamah hman theih zeuh2 mahse, an formula a danglam vang khan ka hriat pawlh leh thin. Thluak a chawlawl deuh tawh ani mahna. Tichuan, tum hnihna atan lehkha hlai tawkah thlalak chuang kulhin, FAILED tih chu ka dawng leh ta a ni.

Tih tak vekah tiin ka dil nawn leh a, tichuan a vawithum nan exam hun min siam sak leh ta a. Hemi tum hi chuan an clerk pawhin ka hmingin min koin min lo welcome tawh nghe nghe a ni. Ka lang ngun tlut tlut bawk atin a ni. Hemi tum zet hi chuan ka zam ve tawh khawp mai, ka tiril a khur ve deuh der der mai. Exam kha ka hlau nilo vin, fail leh ka hlau tawh lutuk zawk a ni. Ka thiam chian em em ho ka chhang char char a, ka thiam chian bal nilo kha chu ka chhan kan hrih zel a. Ka thiam chian ka chhan zawh vek hnu chuan ka kir leh a, ka kalsan ho kha muang changin, fimkhur lutuk tak maiin ka thlirin zawhna te chu ka chhiar nawn sek tawh mai a ni. Chhanna thiam ngei tur pawh zawhna chhiar sual vang hian a tihsual theih tih hi ka chiang khawpin ka hria.

Tuntum zet chu PASS tih ka dawng ta nawlh mai le, ka lawm ve vur vur hle mai. Mi fa te anga zirna sang nilo mahse, ka phak tawkah Pathian hian tumna rilru leh zir thatho theihna, ka chhungte min pe a, ka lawm a ni. Zanriah kil alo hun a, kannu in Pathian hnenah lawmthu a sawi a, Chingit bai tuitak nen lawm takin laipawng thlebawihin chaw kan ei ta a ni.


Enge hriat duh chuan link hi click mai nise:


Thubelh: Steam engineering class, Zalco engineering school ka kal lai khan chhungkaw lamah motor indaih lohna kan nei hlauh mai a. Mahse, vanneih thlak tak maiin, Saithangpuia Sailo te veng alo ni remchang leh hlauh zel a. Ani motor chuan thla 3 lai mai class kal theiin ka awm phah a, a chungah ka lawm tak zet a ni.

22 comments:

  1. Beidawng mai lo leh tumruh nasa zual sauh a i nun/i hun hi hmang hi chu i fakawm thlawt a ni. God bless u all

    ReplyDelete
  2. A ngaihnawmin chhiar a manhla hle mai. Mihuaisen chu tlu mahse a tho leh thin; mitumruh chu vawi tamtak hlawhchham mahse beidawng duh lovin a bei hram hram thin a, a tawp ah a hlawhtling leh nge nge thin. Chutiang mi chu i ni e. I passed life atang hian zir tur ka va ngah tak em.A ngaihnawmin chhiar a manhla hle mai. Mihuaisen chu tlu mahse a tho leh thin; mitumruh chu vawi tamtak hlawhchham mahse beidawng duh lovin a bei hram hram thin a, a tawp ah a hlawhtling leh nge nge thin. Chutiang mi chu i ni e. I passed life atang hian zir tur ka va ngah tak em.

    ReplyDelete
  3. Ka comment teh tuarh chu leh...Ka comment teh tuarh chu leh...

    ReplyDelete
  4. caribou, i ti mah mah thin... entawn tlak ka awm love. Nangni ang mi dik te nun atang hian fuihna thu in sawilo vin ka dawng nasa thin em zawk a ni.

    ReplyDelete
  5. I expi tang hian zirtur tam ta a awm thin, beidawng lova ti hram hram te hian hlawhtlinna an hmu nge nge thin tih a tichiang hle mai.

    I hna thar tluang taka hawk turin duhsakna kahlan a che.

    ReplyDelete
  6. triplestar, entawn tur fel tak tak in awm hlawm avangin kan ti ve hram hram zawk thin alawm.

    Ka hna chu angai ka thawk, a remchang a ka exam ani ber awm e. Kei ve teh mai exam tur ka nei ve leh thin ta hi ka lawm ngang thung mai.

    ReplyDelete
  7. Adventure a chhum hmin, hrehawm pawh in tuar tir tum tlat mi, beidawnna beidawng a siam tum tlat mi. Khawmual nghate, tunah erawh cyber-nghate ti a koh phu i ni e. :)

    ReplyDelete
  8. ka chhuang khop mai che. Lehkhazir hian lai luat anei lo antih hi a taka lantirtu i ni. zirtur i hnen atang hian ka va ngah tak em..

    ReplyDelete
  9. A ngaihnawm hle mai, I fakawm takzet e thianpa, I hlawhtlinna ka lawmpui che.

    ReplyDelete
  10. good job

    -zualbonez

    ReplyDelete
  11. A ngaihnawm ka ti hle mai. I thuziak atangin leh i nun atangin zir tur ngah hlein ka inhre thin. Beidawng lova i beih tauh tauhna leh tumruhna kha ka awt tak meuh. I hlawhtlinnaah ka lawmpui che a, i hma lam panna turah duhsakna ka hlan che.

    ReplyDelete
  12. i va lawmpuiawm ve aw!! i bei nasa hle mai tak a. Thil i han zir kual leh peih hi ka fak hle mai che.

    ReplyDelete
  13. @Ts & Rp : Hun tha ka hlauh nasa lutuk tawh a, remchang umin, phak ve ang tawk2 in thiante kan um chawn chawn anih zawk hi. Kei zawng fak tlak ka awmlo, ka tih loh tur kalo ti nasa thin em mai.

    ReplyDelete
  14. nangmah ang hian tum ruhna hi nei ilang chuan ka in hlangkai sang ve th ngot ng.....proud of ya'

    ReplyDelete
  15. Ekhai...A va ropui ve. ka lawmpuina sangber ka hlan a che. Kei chu engmah ka zir peih tawh lo asin, M Phil. chhunzawm tur emaw ka tia, mahse hei ka la inngaihtuah zui zel chu anih hi, ka tluklo hle mai che :)

    ReplyDelete
  16. Congrats! Khawl leh maths thiam ho chuan lo thiam belh zel teh u!

    ReplyDelete
  17. A va tha ve le....

    Pu HV..i blog hi mobile site enable teh...mobile atang chuan a rit mah mah a ni e....A va tha ve le....

    Pu HV..i blog hi mobile site enable teh...mobile atang chuan a rit mah mah a ni e....

    ReplyDelete
  18. I tum ruhna hi a entawn tlak hle mai. Mahse, kei chu exam lam hi ka peih tawh meuh lo. In zir pah reng hi nuam chu ka tia fail awm ang chi hi chu ka ning hluah hluah tawh mai..hehehe..

    ReplyDelete
  19. eL, ka enable tawh kha aw :)


    Noddy, tu pawn an tih theih alawm. Thianten min tlansan zung2 zel a, phak ang tawk2in ka um ve tiang tiang anih hi. Mi te angin zirna sang em em nilo mahse, upat lamah ka lawm ve khawp ania.

    ReplyDelete
  20. He nun thlalera tuihna tlemte awmna ruamah hian min cho phur thar leh ta. Kudos mawlh mawlh k'u Vangchhia.

    ReplyDelete
  21. Mi thatchhia te banphak ah hlawhtlinna a awm ngai lo. Nang chu i ngaihsanawm thlawt e.

    ReplyDelete