Search This Blog

Sunday, March 24, 2013

Remembering 9/11/2001



9/11/2001, zing nichhuak zung eng mawi tak dawng chungin Washington, DC lamah ka hna chhete thawhlai chu thawk turin ka kal leh a.

Zing dar 9 rik hma deuh emaw chuan “World Trade Center North Tower, thlawhna-in a su,” an rawn ti ta!. Chutih hunlai a ka pu, tun a ka thawhpui tak, building engineer Greg-a te office ah kan tlan lut a, TV kan tinung nghal. Kan en mek lai chuan thlawhna dang rawn thlawk leh nal nal chuan a ngher chhur chhur a, South Tower chu a su ta pa pawp mai le. Chutah zet chuan , ka pu chuan, “We are under attack, damn f..ing ass…,” a ti ta heu mai, dawhkan a chum, tih theih dang vak awm hek lo.

Chumi hnu maiah chuan, “Pentagon a puak,” an rawn ti leh. Kan hnathawhna in chungah kan tlan chho, alo khu chum chum chu kan hmu thei nghal mai thung a. U Saia Sailo pawhin kan hnungah a camera a rawn ak chho bawk a. In chung patio aṭangin Pentagon khu chum chum mai thla te chu an hmet pawp pawp a. Kan awmna aṭang a hla vak lo a nih vangin hre pha emaw te kha chu kan awmna hnuai kawngpuiah thlabarin an tlan hlawk hlawk te pawh kan hmu reng mai.

Chutah leh, “dar 10 bawr velah United Airlines Flight 93 pawh hijack niin, Somerset County, Pennsylvania-ah a tla,” an rawn ti leh…a va’n hrilhai thlak duh tak em.

A lunglen thlak loh hle mai. Hemi thu ka ziah lai mek hian History channel 2 ah Twin Tower a thita ten, an chhungte an phone a voice mail an dahte an tichhuak mek… rilru a van khawih thar tak em!

Hemi ni, mi sang telin nunna chan a, an chhungte an kalsan takte zawng zawng hre rengin kan theih hram chuan i tawngtai sak ang u. Anni chang ni lo vin, khawvel a rilru hreawmna tuarte tan zawng zawng… Lalpa chu ropui ber rawh se!