Early Life 9 ( Aizawl lamah)

Hun te aliam ve zel a, Chawngte atang chuan Aizawl lamah kan phei ta a, pianna khua mah nise mikhual deuh duk a awl ngei mai. Tichuan, ka thiannu Rebecca Saimawii channa tur movie ah chuan sawmna te ka dawng ve ta zel a, tawiawm turin ka puahchah ve ta a. He movie hi Pi Hlimpuii (Chawngthu Sweet) leh Pi Mamawii w/o Dr.Rema (Durtlang) te buatsaih niin, a hming tur pawh, "Ngaihzual Nang Nen," tih a ni nghe nghe.

Tichuan, Mizo movie hmasa ber dawttu tur chu Rebecca Saimawii, Nghilhlova (drummer), Diana Zonunsangi, David (Bungkawn) te leh midang tam tak te nen chuan shooting chu kan nei ve ta zak zak mai a. Tum khat chu Tuirial ah film shooting kan nei zo chu haw kawngah, David te thiandun chu kawngkawi a an truck tawk thut chu an tleng ta a, David a ke chuan truck ke hma chu va hlapin, a ngal ruh chu a ti tliak ta hlauh mai. Motor atanga zuang thlain, a ke chu kan her rem saka, tichuan midangin an lo bawihsawm lai chuan kawngthlangah mau ka zuk sat a. Ka kawr haklai pawtthlerin, a ngal chu kan cher ta a, damdawiinah kan phur chho ta a ni. Hemi avang hian hun engemaw chen chu kan thil tihlai pawh kan buaipui theih loh phah ta nghe nghe. Tih thanloh leh angaihna hriat loh zawng tak a inhnamhnawih ka ni bawk a, lemchan chu a lo har ngei mai!

Hetiang vel karah hian Zonunsang Handlooms leh a dang te puan tah chu faknaah telin, Vanapa hall leh hmun dang dangah modeling zei lo fahran hian kalo ti ve zak zak reng bawk a (khang hunlai a mi mipa modeling ti kha chu mipa thah kan ni, tuai kan awmlo). Pu Hrangmuana hoin, Rosy te nen, "Thlahleinga Zan" chu kan zir zak zak bawk a. Tin, Biakthansanga (BTSA)hoin, Miss Mizo hmasa ber Biakzuali (Ma-i) te nen chuan, "Drugs zuar chu an thi tur a ni," tih kha kan siam bawk. Hei bakah pawh hian Electric veng Masawma te nen martial arts movie kan siam nghe nghe bawk. Heng lai vel hian inleng awm ve ta nual chu kapa ngaihna hrelo chuan, kan in chhoh dawnah chuan, "Henry's In/ Henry's Out," tih tar chang a nei thin.

Heng lai chho vek hian, Aizawl nula pakhat chu a thiannuin kan pahnih tan hla a lo phuah saka, H.Lalthakima an sak tir ta nghe nghe a, a hming chu, "Ma-in a hmangaih che asin" tih a ni. Hetiang hunlai vel hi nuam ti thin viau mah ila, mahni nunah insumtheihna ka neih loh thin avangin ka tan chuan hun tihbaiawm intanna tur a lo ni reng mai!