Wednesday, May 23, 2012
Aizawl - Washington kir leh lam (avan buai theih vele!)
India lam kan haw chu zinkual reng rengin hun kan hmang ral a. Chhungte leh thianthate pawh tlawhkim hman lek lovin kan khawsa ani ta ber a! "Kan haw chhan ber ka pizawn ani miau mai si a," tiin ka inthiam lui hram hram zel a. Kar 4 chawlh neiin kar 3 dawn motor a chuangin hun kan hmang ani deuh ber a!
North America lam kir leh a hnai tawh hle mai. Kanu chuan kan unau kimin chawei-khawm a rawt ta a. Chu erawh chu kan ti hman hram. Naupan lai atanga thiante nen kanlo tum lawk, chaweikhawm erawh kan puitlin thei ta nganglo a ni. Chutia May ni 10, 2012 zanriah unau a kanu kan kilpui mek lai chuan kapa-in min rawn phone ta rang rang mai a. Ani chuan tunlai khua a chhiat avangin Aizawl atanga Kolkata lam thlawhna a a thlawh that loh hle thu a rawn sawi duh chu alo ni a. Tichuan a thurawn angin Silchar atanga Kolkata thlawk turin chawplehchilh takin ticket kan la ta chung chung a, anlo tito em em mai lehnghal a kan nu leh ka fanu ta tur chu Jet Airways ah chuan Rs.30,000 chuang kan seng ta lawih mai.
Bungrua kan nei ve nual si nen ka farnute motorah kan leng dawn leh talo, thianpa Pu Sama Khiangte ka kova, ani chu lo phei vatin ro min relpui ta a. Ani chuan a motor leh a khalhtu min pe tawp mai a a chunga kan lawm zia kha. Zanah la la chuan Silchar lam panin kan chhuak ta a, kan cousin Ronny Singson petrol pump a thawkte kaithovin car tui kan thunkhat a, kan chhuak ta zel a.
Silchar kawng chu kum reilote liam lekah alo chhe hle tawh mai. Tlan that ngaihna a awmlo a ni ber e, hmun thenkhatah chuan bawngtawlailir leh car tlan chak zawng a inthlau vaklo tawpin ka ring! Silchar chu khawvar hnuah kan lut a, ala hma bawk a tiin Mizoram House-ah L.O. kan tlawh zawk a. Ani chuan min duhsakin breakfast tui tak min buatsaih sak nghe nghe a, a lawmawm viau a ni. Silchar airport kan thlen dawn chuan eng milian emaw hi police escortna hnuaiah minti muang hrepin an kal ta pek a. Tichuan leh, airport kan thlen meuh chuan kan hlauh ang ngei ngein kan thlawhna kan chuangve hman talo. Minute reilote mah nise, kawngkhar an khar hman ta tlat. Kolkata kal tur ticket dang lei turin ATM kan zawng, airport chhung ami alo chhia, pawnah chak tawkin ka vei kual leh ta. Chawplehchilh a thlawk tur kan nih vangin a to leh kher tho mai. Air India chuan cheng 20,000 chuang min chawitir leh ta, thinlung ati changel hmun duh hle mai.
Kolkata chu tluang takin kan thleng ve mai a, mahse thlawhna atanga chhukna tur laihlawn nghakin kan ding thup a. Reife hnuah alo thleng a, a hnuailamah bus nghakin nisa hnuaiah kan ding leh vang vang bawk a, Janis zunchhuak tawh nen a hahthlak viau a ni. Kan thlenin tur neitu Catherine Khiangte, kan monu u fanu chuan hlim hmel putak hian minlo hmuak a. Ani hlim hmel han hmuh chu a hahdam sawng sawng theih tak tak a ni. Khawlum nen engkim mai diklo vel vek mai han tawn hnuah kan nau nui sang hmuh chu a hahdam thlak viau reng a ni.
Kolkata-ah nuber ni hnih a bazar zak zak hnu, April ni 13 zanlaiah chuan April ni 14 zinglam dar hnih bawr vel a thlawkchhuak tur, Qatar Airways ticket tihfelna lam kan pan ta a. Kolkata atang hian Qatar khawpui Doha-ah darkar 7 hnuah kan tum anga, chuta tang chuan darkar 12 emaw thlawh leh hnuin Dulles Washington International Airport kan thleng dawn a ni a (tum dan chuan).
A hun takah kan thlawk-chhuak a, Doha pawh a hun takah kan thleng niin ka hria. An airport chhung kan lut chu kal lam ang bawk khan anlo zi leh nuai nuai mai a. Mite chu an tlan hlawk hlawk a, tlanlo ate pawh chu an ding cham pet put hlawm mai a ni. Washington lam thlawk turte kalna tur kawngkhar (gate) no. chu a hma ang bawkin hmuh mai a harsa leh hle mai. Kan ipte ahlai (hand baggage) an enfiah nawn lehna te chu an in nek tulh tulh ani ber a, an thil kalphung a fumfe lo hle mai.
Washington lam thlawk tur ticket an enfiahna kan va thlen chuan kan luh phalna (boarding pass) chu min en sak a, a thawktunu chuan a computer an hmeh kual hnu chuan, "kapu a pawi hle mai, in thutna a hrang vek dawn a nih hi," a rawn ti roh pek a. Kei chuan ticket pawh kumtir a kan lak tawh anih bakah engkim felfai thlap a neisa kan nih thu sawi pahin kan ticket a kan thutna tur no. te chu ka kawhhmuh a. Ani chuan, "in tlai lutuk a, bakah thlawhna chuang duh an tam em avangin tih ngaihna a awmlo a ni," tiin min chhang leh thlarawk pek a. Thlawhnaah an lut mek si a, tih ngaihna dang awm tawh vak heklo, kal lamah lah thlawhna nang hman lovin an mahni tho hian min tumpui tawh bawk si. Huiham ka tih ngaihna hrelo chuan, "Qatar Airways ah hian kei leh ka chhungte vawikhat mah kan chuang tawh ngai lovang. US atanga kan kal lam pawh flight min miss tir tawh bawk, ka duhlo reng reng," tiin ring takin ka sawi chhuak a; mi pawh anlo hawi thap reng a... ka tum reng a ni bawk! Ticket buaipuitu chuan hun a awm tawh loh vangin thlawhna chhungah flight attendant ten min buaipui turin alo hrilh tur thu a sawi ta a, thlawhna lam kan pan ve ta a.
Thlawhna chhung kan lut chu flight attendant hnenah kan thuthmun inanglo nuai mai leh, ka fanu kum6 mi lek amah a a thu hrang tur chu ka duh loh thu ka sawi a. Ani chuan airport office lam atangin anrawn hrilh tawh thu min hrilh pah chuan, mahni a thlawkte hnenah an thutna thlengpui turin min dilsak tur thu min hrilh a; tlem chuan ka thawveng deuh! Keimahni mai kanlo nilo tawp mai, midang pawh chhungkua a zinho an thut hran tir nuai mai alo ni a, an nep kati hle mai. Thlawhna a thlawk chhuak tep tihah chuan ka chhungte pahnih chu thudun thei turin min ruahman fel sak thei ta hram a, kei erawh a hrangin fal deuh nalhin ka thut angai ta a ni.
Tlipna: Qatar Airways thlawhna te hi an thar hmel hlawm khawp mai, a thuthleng inkar pawh a zau tha. Bakah TV program a tha a, tin, video games a tha a, seat tinah phone hman theih a awm bawk. A hnathawkte hi hnam hrang hlir anni mai a, chumi chuan a tinuam viau mai. Mahse, zuang lo tur, direct flight atan chiah a chuan tlakin ka hria. A chhan ber chu, tum lailawkna a an tum hun leh thlawhna dang kan man leh tur thlawh chhuah hun a inhnaih hlawm lutuk a, flight miss a hlauhawm em em ringawt mai a ni. Tin, engemaw thuhlaah medical emergency lam mithiam an neilo niin alang. Kan kal lam pawhin mi pakhat phungzawl buaipui ngaihna an hre derlo mai, airlines dangah nive tho tak maw?!.
Keimah ringawt chuan ni ila a zia tak pawh a awm ang chu, mahse nu nau nen kan ni bawk si, zin kual hah nen phei chuan a chi loh lehzual ani tawp mai.
Tichuan tluang takin Dulles Washington International Airport chu kan thleng ta a. Kan nau pakhat chuan phur takin minlo hmuak a...ka inthiar te te a, kan haw ta vang vang a. A tawp ta a.
Subscribe to:
Post Comments (Atom)
i lo zin leh hun chu inhmu ve ngei tawh ila a tha ang! A ngaihnawm e!
ReplyDeleteKan dam anga kan inhmukhawm ang chu!
DeleteZoram i rawn chuang chhuak zet chu i hun a tight si, i zin kual nasa bawk nen, sum leh pai lamah i va insengso nasa dawn e aw. Zin hi tih mai mai a lo ni lo anih dawn hi. I buai rem rem em mai. In thlawhna ticket lakna ber kher khi, an va che nep em em ve maw le. Dawr nawn tawh reng reng suh. An nep em mai. Engpawh nise, himdam takin mahni inah in lawilut leh thei ta a, a lawmawm e. A ngaihnawm, a dang pawh rawn ziak zel rawh.
ReplyDeleteCaribou, min chhiarsak fo thin a ka lawm e. Ni e, ziak zel ang :)
Deletechhiar ringawt pawn min ti hah hlui mai! :-) kei ni ila ka ang nasa leh dawn rem rem lutuk a! hiiihii
ReplyDeleteA hlat a tihreawm zual!
DeleteTun tum i lo haw chu buai leh harsatna tawk reng rengin hun i hmang a, i khawngaihthlak ngawt mai. In hah dawn tehreng nen, in hahdam hman miah lo mai a. I haw chanchin ka chhiarte hi a hahthlak mawlh mawlh ka ti khawp mai. Tunah chuan hahdam takin awm tawh teh! :)
ReplyDeleteTS, han buai deuh vut vutte hi a chang chuan a nuam alawm. Tei kual fua fua mai ila hahahaha
DeleteTak2 a ni e hei ka hahdam tawh khawp mai. :)
Buaina tawha talchhuak zel thei khawpa pa tumruhte chanchin hi a ngaihnawm bik a ni, vantlang chung lam an ni zel bawk a.
ReplyDeleteThianpa, i thusawi tawite hi ka tan fuihna tha tak a ni e. Ka lawm e
DeleteVa tluang lo em em bawk ve, mahse dam takin in thleng a, a lawmawm e. In unau zawng em ni khi pic. chung ber khi?
ReplyDeleteUnau, nupui pasal te nen
DeleteI va hah dawn em, ka hriatthiam ve zawng tak. International Connecting flightah hian flight miss a hlauhawm avangin, a karah hun extra inpek/siam hram hram a tha.
ReplyDeleteHun chep lutukah ka ti sual tawh..Haggai Institute in Hyderabad atanga Kathmandu haw tur Air Ticket minlo laksak a, Delhiah International flight man turin darkar khat chauh hun anlo dah a, Delhiah khan (khatihlai khan) Domestic atanga International kal chhung kha Airport service bus in darkar khat vel alo duh si a.
International ka va thleng chu thlawhna anlo khar fel ta si, chumi ni atan Jet Airways dang Kathmandu thlawktur a awm tawh si lo. Jet Airways in kawng min han dap sak ngial a: A tuka thlawh nge ka duh, flight la awm chhun thlawhnate, Cosmic Air a thlawh a ni ta.
Zan riah ngawt ai chuan tiin, Cosmic Air a thlawh chu ka thlang ta a. "Airport ah thil a to to nen, reilote ah kan thlawk ang a, ei tur an sem mai dawn tho va" tiin, Aitport ah thil ka ei duh lo vel a.
Darkar hnih hnu-ah,kan thlawk chhuak ta ngei a, ril pawh a tam ta raih mai..eitur an sem dawn tawh ang chu...tiin ka han hawi vel a. Chutah an rawn in nawr chhuak ve ta a, 'Peanut pocket te khat..chu pawh dawr pangngai a, Rs 15 vel a kan lei thin kha, Rs 300/- in lei a ngai. Ka tlawmngai a ka lei duhlo, a hnu-ah ka ril a tam ta deuh si, ka han ko lo a, anlo hralh zo hman tawh si....ril ava han tam duhtak em aw....
2005 a, USA kan lo kal tum khan, Qatar Airways a kan thlawk a, chumi tum chuan min ti tha viau a sin keini chu...ka lo fak ve viau a. Thlawhchhuah lehnan Darkar 9 lai hun kan neih avangin..Airportah transit visa minlo pe nghal a, Air Conditioned Car in Five Star ah min phur phei a, luch leh dinner min free bawk a...room nuam takah kan hahchawl bawk a. Mahse tui (mineral water)bur te (350 ml) kan lei ve ngawt a, dollar 3 a ni talh thung. A hun ah Airport ah min dah leh thlap.
In vanduai hle a ni....Zoram lamah holiday an hmang nuam tho an ti deuh che u nge maw ni le...?
(thianpa i blog a ni bawk a, ka han rak ve chiam a nih hi aw..see you in October.
Kan va inang love hairehai :P
DeletePu Sama chu a van fel ve! Chhungkua a zin hi chu bawr a awl ngawt mai. By the way, i van cher ve--i van in fit ve :-) I in diet ami ;-)
ReplyDeletePu Sama leh midang reng reng, kan chungah an tha thlawt e. Cher? ka pangai reng niin ka hria... Aizawl ka haw tlemin ka ritzual.
DeleteThis comment has been removed by the author.
ReplyDelete