Min rawk an tum!

United States ka luh tirh khan, min hruaithla tu, Pi Changliani te in lamah ka khawsa thin kha a ni a. An ni nupa khan min duhsakin min buaipui ta lo sela tun ang dinhmun hi ka thleng kher lovang! Hna lam vangin remchan zawkna avang chuan, Lianthuama Vangchhia te in lamah ka insuan ta kha a ni a. Ani ni nupa pawh hi Mizo rilru tak pu mi, mikhual  neih hrehna nei hauhlo, hlimlo hmel hmuh tur awmlo an ni a, an fakawm ngei mai.

Engpawh nise, kum 2002 kum tir lamah chuan  kan u ( ka 1st cousin), u Valtea (Joseph Lalchhuana MPS) chu India aiawhin USA lamah, Antiterrorism Assistance Program hnuaiah, "Critical Incident Management Course" zirna neiin alo chhuk hlauh mai a. A tih tur a tih zawh hnu chuan ka khawsakna lam Maryland state  a rawn tlawh zawk hman tur thu  ka hria chu ka lawm ngei mai. Unau ram hlaa han inhmuh chu chakawm ve tak a ni.

Tichuan ani pawh March ni 15, 2002 hnu lam chuan a tih tur pawimawh a zo ta bawk a, Maryland lam a rawn pan ta a. Keimah min hruaithlatu, Pi Changliani te nupa chuan ngai pawimawhin, ka thisen zawmpui, Andrew Ngurdinga (2nd cousin) telin chawhlui kilpui min tum ta a. Kei motor la neive talo chu nau Ngurdinga (Andrew) car chuan Pi Changliani te awmna khua Bowie lam kan pan ta nal nal a. Pan nal nal han tihah ka awmna khua College Park nen in thenawm mai a ni a, hla em em pawh a ni hran love!

Pi Changliani te in kawtah car kan park fel a, kan chhuk ta a, hlim takin an kawngkhar lam chu kan pan tlang ta a ni. Kawngkhar dar (door bell) ka hmet-ri fel chiah tihin car dum lam lianpui a rawn ding nghing lawih mai a. Chuta tang chuan midum 3 an rawn chhuak a, pistol an keng a, min tinzui ta.

Midum tangrang ho chuan, "In pawisa 'bag' min pe vat rawh u, chulo chu kan kap ang che u," tiin, movie a pistol he deuh ha a an tin ang hian min han tin ta vel anih kha. Ka ngaisanglo mai mai teh a sin!

Engpawh nise, pawisa bag kan neih loh thu ka sawi hnu chuan, "In wallet phawrh vek rawh u, vat vat..." tiin silai chuan min tin sawk sawk zui a. Ka u Valtea (Joseph Lalchhuana) thin tuarlo chuan pakhat chu an khawih nghal nawk nawk ta mai a. Mahse, mi 3 silai keng an nih vangin chet zui chi ni heklo, a ninawm duh hle mai. Silai hi movie ang a nilo, in tin meuh chu a dan a dang zar ania, he deuh he hu a intin pawh kah fuh harsa viau mahse a hlauhawm tho. A fuh palh thei tlat!

Kan nau Ngurdinga (Andrew) chu ka phenah a biru zar zar mai a, a wallet erawh hnim buk karah alo paih hman zauh, a che rangin a tha ka ti khawp thung! Ka u Valtea nen chuan thingthi turin min ti a, ka thingthi duhlo chu ka lu-ah pistolin min chhu bur mai a, ka nghawng a nghing ve lawih. Mahse, a hnu lama kan sawi dan takah, silai an keng zeilo a ania'ng e, zak kau hawk a min chhu si kha, min chhu thlu tlat lo. Min chhutna hi a pawng lova, a khuar hlauh thung a, tun thleng hian ala hniam deuh bui. A vunpui chu an chhu chat ve a ni mahna!

Chutih lai mek chuan in chhung-lam atangin Pi Changliani kawngkhar hawn tum chuan mi'n rawn hmu. Ring tak a auvin, "Police ko ru, police ko ru" (Call 911, call 911) a ti ta chul a. Chumi thawm hlau chuan kan midum tangrang ho chu an tlanchhe ta a ni. Engmah min laksak lova, kei tih loh chuan kut pawh an tuar ta lo, a vanneihthlak khawp mai.

Police an lo thleng tuk tuk a, detective alo lang nghal bawk a. Pi Changliani-te dinning room-ah interview kan nei a misual man tum chuan an chhuak leh ta a ni. Kar engemaw zat hnuah an mahni niawm tak man an nei ta a, mahse an ni chiah em tih ka hre thei ta tlatlo.

Engpawh nise, wallet nilova, 'pawisa bag' kher min dilna chhan tur kha hetiang hi ani maithei! Pi Changliani hian vending machine engemaw zat a nei a. Tlai lamah chu'ng vending machine atang chuan pawisa nawi chu la khawmin in lamah a hawn thin a, keipawhin ka kalpui zeuh zeuh tawh thin a ni. Chutiang a Pi Changliani te che vel chu anlo thlir thin anga, remchang zawngin an  veh fo thin anih ka ring ta ber. 

Chaw ei a hun tawh si, min sawmtu te nupa lah chuan nuam an ti chiah tawhlo. Keini lah chawei lam a lang tawh chiah bikin ka ring hlawm heklo. In atangin kan chhuak ta rawih a, restaurant nuam takah an fapa Jimmy te nen vawksa nakruh hem hmin min va eipui ta a. A tui bawk a, min sawmtute chhungkua an fel bawk nen, hlim leh tui ti takin kan ei puar ta leng tho mai. :)