Search This Blog

Sunday, April 12, 2020

Tum Angin Thil A Awmlo!

Kumin kum 2020 kan chuangkai ta kha chu in chhete lei thar hlim nih nen rilruah tih tum leh hlimna khan ka khatliam a ni ber awm e. Phak ang tawk chhete te lehkha ka zir ve leh thinte pawh chhunzawm leh ka phur khawp mai a, kan hotu ten min sponsor thei dawn tih ka hriat phei kha chuan ka lawm teh asin aw - mahni a intum tur chuan kei ang tan chuan thil harsa a ni. Spring Semester sikul kal tumin ka inbuatsaih a, clinician recert pawh chumi rual tho chuan darkar tibuai lovin kalna hun kalo nei reng pek a - ka phur kher mai.

Tih dan thin pangngai ang bawkin ka eizawnna lamah (Washington DC chhungah) ka kal reng a, kan khua a fire station lamah firefighter leh clinician (EMT) angin ka duty chhunzawm ve zak zak reng bawk a. America a firefighter 72% emaw hi hlawh nei lova volunteer an ni hlawm a, fire station tam tak phei chu a enkawl leh engkim mai an kuta awm anih vangin volunteer te kan buai thei hle a, eizawnna neih a ngaih bawk si avangin - indaih loh a na ta hle bawk.

China leh Europe lam atangin coronavirus chi thar, COVID-19 sawi a awm avangin kan fire chief leh hotute an fimkhur thiam nghal em em mai kha an fakawm ka ti hle mai. Nidangah te chuan pawnlam mi - a duh duh, scout te leh zirlai te leh khawtlang mite pawh rawbn luhchhuahna reng kha a ni thin. Coronavirus chi thar thawm kan hriat hnu kha chuan pawnlam mi tumah station chhungah luh khap bur  anih mai bakah, member te pawh duty tur lo chu engemaw pawimawh tak lovah chuan lut lo tura hriattir kan ni ta nghal bur mai a ni;  tha ka ti khawp mai - safety saves!

Fire station a duty turte chu an luh chiahin kawngkhar bulah taksa lum zawng enna hmangin an in endik hmasa te te a, chutah mahni phone emaw hmangin thuawl pawimawh dah khah a ngai leh te te phawt a ni. Fire station a ambulance te hi damlo phurh zawh apiang a natna hrik awm thei laka tih thianghlim ziah ni mahse - tun hripui thlengah meuh chuan fire truck te, rescue squad truck te thlengin uluk lutuk tak mai a tih thianghlim an ni ta thin a ni. Hmaikawr vuah lam hi kan tithang hlawm fu emaw ka tih laiin englai mai pawh a N95 emaw tal han vuah reng mai chu a ninawmin thlan a titam ngei mai - keini leh anni himna tura ngaih a ni miau si ale! 

Eizawnna lamah kal ziah ngai ka ni a, chulamah pawh thiam ang tawk tawkin protocol an siam a - kan zawm tha viau. Chutih karah chuan ka hnathawhna a kan hmun tifai a remfel, hnathawhna nuam a min siamsak tu te zinga pakhat chuan in lama a chenpui pakhat COVID-19 a test positive tih thu a rawn sawi - a thawh ang thawk dang  pahnih, pindan khat a hahchawl tlang thinte chu ni 14 chhung awm hrang turin an haw tir nghal. An vanduaina em em mai chu an ni kha pawnlam cleaning company hnathawk an ni a, an danah hetiang thila an chawlh pawn engmah hmuh an beisei theilo alo ni awm e. Keini lam pawh pindan khatah inhnaih angreng taka awm ho thin chu pindan hran hman ka dil hnu chuan ka ngaih a tha ve ta sawt - midang khawih hnu hru zet zet peih (COVID-19 awm hnu) ka nih vangin a ninawm nep deuh - mi him hram hram duh vete! 


Kan chhehvel khua a firefighter/medic te COVID-19 an test positive nual hnuah pawh kan chenna khua, Frederick, Maryland state ah hian firefighter/medic tih vel April ni 9, 2020 thleng kha chuan tumah chutiang natsa nei kan la awm ve lo. Vanduai thlak takin April ni 10 kan chuan kai meuh chuan kan station ami ngei positive a awm ve ta hlauh mai - ani kha hlawh nei a thawk a ni. Mithiam ten an chhuinaah chuan volunteer tumah  tan hlauhawm awmlo angin an sawi thung - hlawh nei ho hian bunker hran an nei hlauh chu volunteer  te venneihna a ni maithei. 

Maryland state Governor thupek angin kan chenna khuaah hian Maryland state a khaw dang ang bawkin mamawh zual - eitur leh damdawi lam tur emaw, "essential job" an tih mai, loh theih lova thawh ngai ang chia an pawm thawk tur lo chuan tumah chhuah phal a ni lo. Thuawih lova chhuak lui an man chu dollar 5000 chawi emaw kum 1 lungin tan emaw, hremna pahnih tawrh kawp an hmabak  a ni. Chutia hremna a nat viau rual chuan police lam chuan kawngah mi an tiding dawn lova - engmaw palh tawng erawh an vanduai khawp ang - a che che sih hlawkah!

Pathianin chenna in min pe a, chhungkaw tha tak min pe bawk a - ventilator hman ngai lova boruak thianghlim hip theia kala awm hi ka lawm em em mai a ni. Fimkhur hian tawhsual tawh a harsa - tawh loh tawpna tur erawh a ni lo. Tum ang zel hian thil a awmlo a ni e!