Search This Blog

Saturday, January 21, 2017

United States President 45 na nemnghehni-ah ka tel ve hlauh mai!

United States-ah hian kum engemaw zat awm ve tawh mah ila ram hruaitu luber, President lakluh-niah hian kumin hmalam khan kala kal ngailo. President Obama lakluh nawn a nih tum khan telve theihna ticket chu ka nei ve ran mai a, mahse, a term hmasa ka ngaihtuah letin han phur tehhurhna tur tlingah ka ngailo a ka tel talo niberin ka hria.

Kumin 2017 a US President nemnghehni erawh ka phur ve ngang mai. United States President tur rampum inthlanna a ka vote hmasak ber a ni bawk. Kan state Representative, a biktakin keimahni 6th Congressional District changtu, John K. Delaney (D) office chu Presidential Inauguration ticket ka zuk dil ve chawm mai a. Diltu anlo tam deuh vangin thum vawr angin an tih dawn min rawn hrilh a, a hnu chuan a hmulo zingah ka tel thu min rawn hrilh leh ta mai bawk a!

Tichuan le, engtin nge ka kal theih dan tur ni ang tia ka ngaihtuah buai lai, ticket neilo chuan hmun tha ka chang awm silo ti vela ka inngaihtuah lai tak chuan, Washington DC fire department chuan an tih thin dan ang thoin, DC hualtu state hnenah puihna a dil thin chu an rawn ti lehta ngei mai a. Hming pekluh theihna a awm a, tah chuan ka hming pawh mi tam tak zingah chuan ka ziaklut ve ta ran mai a ni. Kum li awrh ka la volunteer ve liuh leuh chauh mai si nen chuan ka tan a harsat viau ka ring hle. Kar khat emaw hnu chuan kan hotu ber chuan, "Henry i pianna hmun ka hreta derlo mai khawngaihin min hrilh thei em, US Secret Service hoin nasa taka background check an neih theuh a ngai a?" a rawnti ta -- ka van phur tak em!

Ni 20 nghah nan kar khat ala awm tihah chuan US Secret Service ten min chhuina lam engmah vak kan la hre derlo mai a, khawiah nge chumi unit chu an duty dawn tih bak. Hna lamah chawlh lak a ti khaihlak zo tep tihah chuan ka background check an neihna ("nasa tak" an ti kher) an duhthusam a ni tih ka hre ta a -- ka helhhawlh miahlo, ka phur zek zek thung! :)  Hmunpui lam a hming pekluh zingah kaldawn a tel talo pawh an awm, a chhan kan inzawt lemlo, rindan tawk kan nei theuhin ka ring -- a pawi khawp mai!

January ni 18, Nilaini zanah chuan Maryland lama kan fire department hotuten, kan kalphung tur felfai takin Sheriff office  nen a kan trainingna hmun intawm, PSTF (Public Safety Training Facility) https://frederickcountymd.gov/3550/Public-Safety-Training-Facility pindan pakhatah chuan min neihpui ta a ni. Keini station atang hian ambulance leh engine pakhat kal tura tih kan ni a, a lawmawm takzet.

Pic: Debbie Stiffler te chuanna, United Fire Company #3 ambulance  a ni:

January ni 19 zan chu thawhhai hlauh leh helhhawlh ve deuhroh vangin muttui a har angreng phian mai. Zing dar 2-ah ka tho a, ka insiam a kan firehouse lam ka zuk pan ta a. Ka thleng hmasaber dawn emaw tih naklaiin kan hotuber chu alo buai hle tawh mai a, a chuanawm thin ngawt mai ( kan fire chief hi volunteer tho a ni). Tichuan, kan fire engine (fire truck) ET 34 ah chuan kan fire thuamhnawte kan hlangkai sap sap a, ambulance lam pawh chuti tho. Ka chuanna, ET 34-ah chuan a khalhtu-ah Frederick, MD Sheriff office a mi Rick, officer atan kan fire chief,  zirna hmun pakhata hotu ni bawk Marc, tichuan keimah leh, sikul pakhat a zirtir hnathawk Mike te kan ni a, ambulance-ah chuan Staci, Jake, leh Debbie te an chuang thung a. Kan chuah hma chuan Frederick county chhung chin a min escort-tu tur Deputy Sheriff chuan kan thla min laksak a -- ka hmuzui ta lem hleilo a!


Washington DC chu vai pathian thawhhmain kan lut a, kan innghahna ber tur fire station, Engine 18 an tihah chuan kan lutfel a, briefing te kan nei leh a, kan radio te chu Washington DC milin kan han set tha nawk nawk hlawm a. Tichuan tul apiang a first responder kan nih angin inpeih at chuan kan duty tanta a ni. Kan ambulance lamte nen kan inbe pawp zel a, anni khawchhung a kan lehlam daihah an awm thung.

President lakluh a nih vel lai chuan, ri eih pawh kan hre pha velo, khawpui a zau bakah a kawthler thlibeng dan a fuhloh chuan lehlam ri hriat harsa tak a ni reng a ni. Tichuan, radio lamah te leh phone message lamah-te chuan Hillary tantuten buaina an tichuak tih thawm kan hre tanta a. An buaina siamna hmun hi K Street lam, keini awmna atanga  hmar lamah daih a ni. Kan awmna hmun hi a sen chin, a eng (yellow) chin, a hring chin tiin thenhran a ni a, ka duty vena hi a eng chinah a ni. A sen huam chhung hi ven uluk ngai ber laite a ni a, a eng chu ven uluk ngai tak mahse tlem a zalen theihna deuh tura duan niin, a hring chin huam erawh chu ven vak ngailo tluk a ngaih theih a ni thung.

Kawngpui dalin kan lirthei kan hung (ka thianpa ke langin) :D

Kan awmna lehlam a National Guard duty te:


Tichuan chawhnu dar thum a rik meuh chuan Hillary tantute chuan fire station pakhat tichhiain, car pakhat an hal a, bawlhhlawh bawm pawh an hal tawh bawk. An ngaihtuah thuilo ka tihna em em pakhat chu, Hillary tlinnan a tangka tam tham tak thawhtu Bank of America an tichhia kha a ni. Inring rengin kan awm nachungin, vawi tam tak tirhchuah  kan nita lemlo. Kan ambulance erawh a buai zak zak viau awm e. Kan motor kenah te chuan DC fire department lamin rang taka kalna min kawhhmuh thei turin mi pakhat zel navigator min pe a ni. Mahse,  ambulance a mi kha a bota daih mai a, a hlau a tlanchhia chu a ni emlo ang chu maw -- an hotu te atangin thu lawmawmlo erawh a hmuh ngei ka ring thung.


Khua a thim awrh tih chuan, keimahni min chhawk turin unit hnih an rawn thleng a, kan haw thei ta. Kalo mangnghilh hlauh pakhat erawh a zialo thui teuh hle -- kan fire chief gear (fire kekawr) keiman ka dahlut mai ang ka tih chu ka dahluh theihnghilh a, kan kalsan teuh hle. Mut a chhuak tlang aniang, hawlam chu a hnunga ka chuanpui nen thlen dawnah bak kan inbiak pawh ka hrelo -- a hnar ri ngher ngher mai.  Kan fire house, United Fire Company #3 chu zan dar 7 a pelh hretin kan thleng a, kan pu ber chuan lawmthu min hrilh theuh a kan tin darhta a ni.

Khawvel awm tirh ata tawh a ram ropui ber mai hruaitu lakluhni a official taka ka zuk inhnamhnawih ve thei  hi, a thulo ber pawl mah ni ila ka damchhung hriat reng thil a ni tawh ngei ang le.

Washington DC kan chhuahsan tep. Hnunglamah Washington Monument tlemte ala lang fih feih:
Thlalakna hun ka nei nganglo a ni e. 


Monday, January 2, 2017

"Vote thlak" chungchang a kei leh United States.

Kum 2007 atang tawh khan United States-ah hian "vote thlak" thei dinhmun a insiam ve thei ni tawh mah ila ka phur tehchiamlo bawk nen ka ngaihsak ngailo. Thiante hnenah pawh ka tumloh thu ka sawi zeuh zeuh tawh thin bawk. Kum 2008 a United States President thlanna a awm khan, ram tan a mi tha a ni dawn a ka hriat vangin (a campaign auhla vang a ni ang), vote thlak tumna lam nei chuang hauhlo chuan ka nupui hnenah Barack Hussein Obama vote ngei ngei turin ka fuih. Ka fuih mai pawh nilo-in ka tur zawk mah awm e. Vote tumna lam neive lem rihlo mah ila, awmna ram atan chuan mi dik leh ram tan a tha tur ni a ka ngaih chu party politics a buailo-in kalo tan ve em em ringawt mai a nih chu.

A campaign auhhla a ropuiin a ukil nih hriat tak a tawngkam thiam Hussein Obama chu President a nita ngei a, a lawmluh ni pawh a pui hep hep teh e! Mahse, kum khat pawh a ral hma chuan kalo tanta kha inchhirna leh inngeina deuh ka neita tlat pek a. A rei zel a, mihring lem tak leh America ram chakna haw tak (he seem to hate strong America), khawvel a chak bik nih duhlo niawm taka engkim kalpui a ni chhota zel mai a ni. America hmelma Iran a thlawp a, remchang a hmuh apiangin America hmingin ngaihdam a dil a, middle east a America thiantha ber leh Democracy ram awm chhun chu a hawta em em mai a nih kha. Tichuan, kum 4 a ral dawn... 2012 a inthlan awm leh turah Hussein Obama a ding leh chu a lungchhiat thlak lek lek zawk a ni. Tin, hna a thawh hma a Nobel Peace price an pek khan a lawmman siamtute a ti nep sawtin ka hre nghe nghe. Hussein Obama leh Romney te chu ram tan a tha lo tur nia ka hriat ve ve vangin vote thlak lam ka ngaihtuah leh talo a, ka nupui pawh chuan a tu zawk mah chu a vote ta lo a, kan chhungkua atangin 2012 inthlan khan vote a tla talo a ni. 

Kum 2016 inthlan lo awm tur chu Republican party a candidate an tam hle mai a ( mi 17), mi tha deuh hlir nia ka hriat anni hlawm nghe nghe. Democratic party candidate te erawh: pakhat chu kan awmna state, Maryland governor hlui, a mayor nihna a record chhe fahran, governor a nih pawh a record tha nei lemlo a ni. Pakhat dang lah chu Democratic hming a ding independent candidate leh Socialist a ni. An hmeichhe neih chhun lah chu dawt sawi avanga a hna lian thawh hmasak ber atanga an ban, record tha reng reng kum 30 vel chhung  neilo a ni. Republican lamah chuan politics lam a hming la nei ngailo pakhat, frank tak mai,  mi pawisawi palh hlauhna neilo a thil a nih ang ang a sawi chhuak phawng phawng mai chu an chuk rawn ta luai luai mai a -- a chanchin chhui chian chakna ka neita tlat!

Donald J. Trump, New York billionaire chanchin chu behchian dawl nia ka hmuh theih ang ang ka chhiar ta char char a, chutih pah chuan Hillary Clinton leh Socialist Bernie Sanders chu ka chhui thiam ang tawk tawkin ka chhui ve bawk a ni. Donald Trump a record chuan min hnehta em em mai a, liberal chanchinbu leh professional politician ten an beihrawn nasat em avang chuan ram tan a mi tha a nih rinna ka nei zualta sauh bawk a ni. Amerian politician ho hi (Republican & Democratic), an campaign lai a pawisa tam tham thawhtute hian an thuhnuaiah an dah vek a ni ber a, chumi chu ram tan a pawi telh telh mai a ni.


Kum 2016 inthlan lo awm tura vote thlak tur chuan inbuatsaih a ngaihna zawng zawng chu ka tifel ve ta hluai mai a, mak tak maiin ka phur ve nek lehnghal a! Vote thlak ni, November ni 8, 2016 hma chuan vote thlak hma duhte tan state 37 leh District of Columbia-ah vote thlak hma (early voting) phal a ni a. Inthlan ni (election day), November ni 8 a ka hman dawnloh vang ni hauhlo chuan Donald J. Trump ka tan em vang chuan November ni 2 chuan vote thlak turin phur fahranin ka inkhalh chhuak ta a ni. A hma a voters registration tilo ka nih vang chuan polling station a duty te chuan Republican angin nge Democratic angin register ka duh minlo zawt a. Kei chuan, independent rih phawt ka duh thu sawi pah chuan, "tun tum chu in register pawh ka tumlo, Mr. Trump ka vote hmu tur a ni tho tho," kan ti hram pek a, duty nu pahnih chu an nui nasa teh asin! 


Inthlan ni, November ni 8, 2016 zanah chuan vote chhiar ka nghak ran mai a, state hrang hrang an chhiarte chu ka thlir zel a. Politics lam a lehkhathiam te chu Pu Trump-a chuan dawt a sawi chhoh tirta zel mai chuan ka lawmna an siam hle. Zing lam a liberal media hoin phurlo zet a, "Mr Tump is going to be the next President of the United States," an rawn tih te, Pennsylvania state, Democratic party lam hmun him chu 100% vote chhiar  tlin dawn tepah pawh chak zawk anla puang duhlo tlat maite chuan ka nuih anti za a, an che naupang chhia ka ti hle. Tih ngaihna thlawt an neihloh hnu, November ni 9 zing dar 2:30 a a tlin thu an rawn puang chiah kha chu "America-ah hian Kristian nih a nuam leh dawn e," tihna te chuan ka rilru a luah nghal a, "Obama  chhuak chiah anga ISIS lam hian America an rawn bei zui zat ang em le?" tihte pawh chuan ka rilru a luah tel ve bawk. Ka nupui muhil chu ka kaitho a, Trump a tlin thu ka hrilh chu, "Tinge a tlin hma atangin min kaihthawh loh..." ti chung chuan lawm hmelpu takin min rawn kuah (hug) a... "a tling ang ka tih reng kha," a ti sap a.

United States of America a ka vote thlak hmasak berah hian ka tisual emlo turah ka ngai, ilo thlirleh phawt ang aw. Tihsual tak leh inthan leh tikah thlan nawn tawhloh a ni mai. Tihsual loh erawh ka inring viau thung.

Thubelh: University professor tam takte hi liberal zealots an ni a, chutiang zinga mi, North Carolina professor pakhat, Andrew Raynolds chuan Republican party chuan chakna an lak nasat em avangin USA chu democracy pawh ni tawhlo ( " they win so much, it is no longer a democracy...") hialin thu a chhuah a ni. California a hmu tello aniang e Democratic party chak lawrlakna a ni si a! Hairehai :D