Search This Blog

Monday, November 18, 2013

Ka ngaihtuahna a awm thin thenkhat

 


1. Hmangaihna hian chatuan a daih a, zaidamin dawhthei viau mahse hremna pawh a neive thin tho mai.
 
2. Mipa chuan hmeichhia a zah tur a ni a, chutih karah hmeichhia chu zah turin a khawsak a ngai ve bawk.
 
3. Mihring che muang tak mai thiltihpui an hreawm duh phianin a rinawm. Mihring che vawt vawt pawh an thiltih a phelh pheng phung duh hmel. Viak-ṭha tak erawh thatchhia an vang phian thung awm e!
 
4. One’s dream may falter but to give up is a failure.
 
5. Rilru hah em em tihrehna ṭha tak chu thil ṭha leh lawmawm lam ngaihtuah tlat a ni.
 
6. Politician-te inkar ni lova midang hnehsawh hmang deuhte hi mawl tak an nih loh vek leh intifing chhaw veh vawh tak an ni duh viauin ka hria. Pi leh pu ten, “ṭawngkam ṭha-in sial a man,” an lo tih thin kha a dik chho zel dawn niin a lang.
 
7. Mi rinawm chuan midang pawh chutiang turah chuan a ruat fo thin. Mi diklo leh mi lepler-te chuan midang pawh chutiang tur chuan an ring rilru ve tho bawk thin awm e. Mahni rilru put ang hi midang put tir tumna hi mihring tam tak zia zuk ni thin tlat pek a!
 
8. Midang kan ṭanpui hian thinlung chhungril a hlim a, chumi chuan kan thiltih tur hmachhawn zelnaah phur tak a tih theihna pawh min pe ṭhin a lo ni.
 
9. Thank God humans are born “somebody” and not something else!
 
10. Inzahtawnna neih hi mi pangai nihna a niin ka hria. “Nangmah I inhmangaih ang bawkin I vengte hmangaih rawh,” tih nen pawh a inzul viau awm e!
 
11. I hriat chu hria la, I hriat loh chu hrelo ngam bawk ang che. I rilru-in dik a a ngaih kha a diklo thei tih hria la, i hriatna (source) pawh chhuikir hmasa fo ang che. Tichuan rawn tlak i ni fo dawn nia.
 
12. Mahni ṭawng chin umphak tum zel hi mi puitling nihna niin ka hriat tlat pek chu!
 
13. Thawhrim rah chu a hlu a, thawh loh rah chu a hlu lo!
 
14. Harsatna kan tawh hian kan nihna, kan chhungril kan phawrh chhuak fo ṭhin. Thlasik khawro lai a ram leilung a lang chiang zual ṭhin ang bawk hian, kan nihna, tunge kan nih leh enge kan nih theih tih chu harsatna leh hreawmna tawrh lai hian alo lang chhuak thin!
 
15. Ka upa tawlh tawlh a ka chhungte leh ṭhiante hlut zia ka hre zual zel e.
 
16. Mipa chuan “Pa” takin zaidam a zir. Mipa chuan pa takin mawhphurhna hlen a tum hram ṭhin a. Mipa chuan bialnu emaw, nupuite emaw a vau khur khur ngai lova, pa takin an thusawi a ngaihthlak sak zawk ṭhin. Mipa chuan mipa a nih a hria a, inchhung chetah hmeichhia ten puih an ngai a ni tih hriain hlim hmel pu takin a pui fo ṭhin.
 
17. Chapona tel lova induhna te, hmuhsitna tel lo leh thawhlawm thawh hnem be tlawn lova Kristianna te, party ruih chilh lova mi ṭha thlan duhna te, development pawisa eiru lova ram tan a hnathawh duh tlatna te, Mizoram pawn a kan chipuite mihrang ang a en lova, vai, Takam leh Tuikuk-te mihrang an nih zawk hriat duhna te, a lang a tuai nuihzat a thimtham kar a kawp leh hreh hauh siloh simna te, hawihhawmna vawng tlat a NGO enkawlte, ngaihsamna aia thil chik peih-te, dan leh hrai zahna chang hria a kan khawsak hunah te leh, dan kengkawhtute pawhin an tih turah hlauh nei lova an thawh ngam hunah chuan Mizoram hian lemchang nun a nung lovin Pathian nung bia tiin ramdang mi ten min la fak hle tur nia!
 
18. Thawhrim rah chu rilru hlimna, eiruk rah chu mi huat ruk hlawhna.
 
19. Pawisa hlutna hre tur chuan thawhrim rah a nih a ngai ṭhin.
 
20. Dâktawr ten natna chi hrang hrang anti dam thei, mahse thinlung na erawh chu a neitu chhelna leh beiseina neihah a inghat thung si!
 
21. Hringnun a pawimawh 7 te:
a. I hun liam tawh ngaihtuah run lo la, I tun hun I hmang ṭha thei zual sauh ang.
b. Miin an ngaihdan cheah buai suh, I thu a ni lo.
c. Hun hian engkim deuhthaw a liampui thei. Hun pe fo rawh!
d. I nun leh midang nun khaikhin ngai suh la, an nunah ngaihdan nei bawk hek suh. Eng thil chiah nge an paltlang I hre lo.
e. Nun kalphung chhut buai lutuk suh, hriat loh kha a pawi hrih lo thei. A hun takah ṭul chu I hre tho ang.
f. I hlimna kawng daltu leh siamtu chu nangmah chiah I ni.
g. Han nui seih mai teh khai, khawvel a harsatna I ta vek a ni lo tlat!
 
22. Hnam inlungrual nitur chuan tawng hman zau ber (majority) chuan, tawng hman tlem zawkte (minority) chu a huikhawm a ngai thin. Chutiang chuan hnam zahawm tham, hnam lian leh chak tak anni thin.
 
23. Chhungkua a awm hi a hlu em em a, chhungkhat-laina kan nei hian a ti phuisui zual awm e. Mahni chhung leh khat hrelo, ngaihsaklo leh inhrelo an tam ta hle mai, a pawi takzet. Chhungkhat chu kan tu leh fate thleng hian inhre tawn turin kan intlawhpawh zeuh zeuh a pawimawh; hun kan insiam mai tur niin ka hria. Hnam darh/ṭhendarh a hlauhawm ang hian chhungkhat pawh hi kan darh I hlau viau zel ang u. Mimal tinah ṭhianṭhate an hlu, chhungkaw tan chuan chhungkhat lainate an pawimawh em em thung.
 
24. A tu a mai pawh hian tlin lohna kan nei ṭheuhin ka ring. Chutia "tlin lohna kan nei ṭheuh" han tih chuan, tlinna kan ngah zawkin ka ring lawi si. Tlin lohna lai tlemte inhriat sak ai chuan kan tlinna lai zel hi inhriat sak ta ṭhin zawk ila "ngaitnatawm" kan ni zel mai awm e!

Thursday, July 11, 2013

Gettysburg indona rapthlak kum 150 tlinna.

July 1863 chu  Gettysburg leh a chhehvel a American civil war lai a mihring nunna hmun khat a channa rapthlak ber a ni.  Tun kum, kum 2013 hi chumi kum 150 na denchhenin, khami hmun vel a thil thleng chu a ang thei ang ber a lemchan an tum thu chu chanchinbu chi hrang hrangah tar a ni chiai chuai a. Kei pawh chuan chhiar vein, ka fanu zirlai tan American history a zirna tha tak tur a nih theih ka beisei bakah, hetiang han hmuh ve hrim hrim ka lo chak bawk nen chuan ka chhungte chu hruai ve ngei ka tum ta a ni.

An lemchan (reenactment)  hun alo thleng dawn ta a, an program duan dan kan en chian chuan , Gettysburg kiang mai, Hanover hmun a indona nghawng nei thui tak mai chuan ka rilru a lak tlat avangin chutah chuan kal kan tum ta a. Tunkum a reenactor-te hi mi 13,000 lai an tling awm e.



Hanover hmun a an indona hi, "The Battle of Hanover" an ti a. Hemi tum a an indona hian American civil war kha a her danglam tir takmeuh niin historiante chuan an sawi a ni. Maj. Gen J.E.B. Stuart, Confederate cavalry ami chuan, helai hmunah hian Union sipai regiment kal hual a, Gettysburg a Gen. Lee fin tum chuan, fin tum e tilo chuan a bei ta thut mai a. Hanover kawtthlerah te chuan a umlut zel a, an inkap nasa ta mai a ni. Union lam a tangin Brig. Gen. Elon Farmworth-a brigade chuan an rawn bei let ve ta, Gen. Stuart chu an man lek lek ta zawk  mai a ni. Hetiang vang hian Gen. Stuart chuan a fin tum, Gen. Lee awm mekna, Gettysburg thlang lam hret, Cashtown Gap an tih a panna chu a kual vak phah ta a. Chumi chuan Gettysburg indona a thil thleng tur a her danglam nasa hle niin historiante chuan an sawi a ni. Gen. Stuart khan an tumsa angin Gen. Lee kha fin hman ta sela chuan  Gen. Lee khan Washington thlengin a lak theih mai ring an tam hle. Gettysburg indona an tih mai, Gettysburg leh a chhehvel a July ni 1-3, 1863 khan Union leh Confederate sipai 50,000 vel thiin, American civil war a an thih tamna ber a ni ta a ni.


The Battle of Hanover an chanlemna (reenactment) en tur chuan kan kal ve ta a. Heta an reenactor ho hi historian te, sipai tanglai mekte leh sipai bangte, America ram hmun hrang hrang atanga lokal khawm hlawmte an ni. An lemchan hma hian an camp-ah te kan kal kual a, a hunlai a an khawsak ang theiber turin an theih ang angin engkim an sawngbawl a, a hunlai a chengve ang maiin ngaihtuahna pawh a kal ding thei a ni.





Reenactment an tih tan hmain, historian pakhat chu mipui hmaah lokalin, chulai indo chanchin chu fiah tawi fel takin a sawi a. An tawtawrawt (Union/Confederate) an ham rik dan hmang a sipai an inbiak (signal) dante chu a sawi a, tawtawrawt chu an ham angin a ham zel bawk a. Hmun hrang hrangah chuan civil war lai a an inthuam ang a inthuam a history sawitu leh an sipaite ralthuam te chu hrilhfiahtu an awm zel bawk a, a manhla hle mai.



Mak ka tih em em mai erawh chu Asian hmel awm ka zawng ka zawng a pakhatmah ka hmu lo. Hetih hunlai a kalkhawmte hi mi 700,000 vel lai niin chhut a ni. Kan chenna khua, Frederick thleng pawhin hotel a khat hneh hle a ni awm e. Gettysburg, PA leh Frederick, MD hi Aizawl leh Saitual aia inhlat a ni ang.


Saturday, June 15, 2013

Emergency Medical Technician

Kan awmna khua, city of Frederick, Maryland state a Fire & Rescue station-ah chuan member ka ni ve a, ka member nihna station chu United Fire Station #3 a ni a, downtown Frederick a awm a ni. A awmna hmun hi a khawmite leh zin veivakte tlai lenna'n a hmun lar tak, Carroll Creek an tih kiang chiah a ni nghe nghe a, awl deuh chang pawh a khaw hawi nuam tak a ni. Fire & Rescue station a a nghet a thawkte leh volunteer a thawkte hi Fire fighter te, rescue technician te, emergency medic lamte etc. kan ni nuaih mai. Chu'ngte chuan an mahni zir chhuah chinah an thawh tur ang bituk sak (a nghet a thawk) emaw, mahni a in ziak lut emaw an ni ber a, an hun neih tur zat nen volunteer-te chu an inziak lut mai thin a ni.





Mi tu emawin, emergency nambar #911 an koh hian an sawi dan takah 80% chu ambulance lam kaihhnawih a nih thin avangin firefighter lam ngawt chu thiam tha dawnin ka hre lova, emergency medic lam, EMT (Emergency Medical Technician) nih chu tumin zirnaah ka inziaklut ve leh ta a ni. Keini ang volunteer, station zuk kal ve tak lem a, thut tlawk tlawk mai leh fire truck, squad truck etc. silfai emaw, station thenfai a puih ngawt mai (kangmei chhuak a awm loh chuan) kha a ninawmna chen a awm ve reng mai. Tichuan, University of Maryland hnuai a awm, Maryland Fire & Rescue Institute-ah chuan ka zir ve tan ta a ni. EMT te hna ber chu emergency pre-hospital care pek a ni a, chumi awmzia chu damlo emaw, hliam na tak emaw etc. kha thi lova damdawiin thlenpui a ni ber.

Kan class kal dan hi a dangdai angreng riauin ka hria. Hun reilo te, thla 6 emaw lek chhung a zir zo hman tur kan nih vangin an mi nawrna a rura hle mai a (demanding) min tur nasa-in kar tin mai kan tla phak phak ta mai reng a ni. Keimahni pawl (class) bikah khan a tir chuan mi 57 kan awm a, kar tin exam kan nei a, chutah chuan an duh ang a thiam hman lo chu an tla tawp zel mai a nih ber chu. Module 10-ah then a ni a, module 9-naah pawh thlawn an la awm ta cheu mai, an zawh hnaih tawh nen an khawngaihthlak khawp mai. Kartin written exam leh practical test kan nei thin a, an fir (strict) si a, thiam hle loh chuan bahlah pawh awl tur tak a ni reng mai. A ngai tlat reng a, thiam tak tan lo chuan hliam nasa tak tuar emaw, mi thi lek lek emaw han enkawl khan hamhaih leh hmaih neih a hlauhawm reng a ni.


Asian keimah chauh ka awm thin laiin, a hnu chuan Chinese tleirawl county dang atangin a rawn lut ve ta a, Asian pahnih kan awm ve ta tleng a! Emergency medical technician zirte hi hnathawh pangai nei vek kan ni. Pakhat chu Bechtel company a electrical engineer a ni a, a dangte chu Navy officer te, Navy recruiter, Army officer te, registered nurse 2 an awm bawk a, nurse pangai 3 an awm a, mechanical engineer pakhat a tel bawk a, school football coach te an ni nawk hlawm mai. Kan vai hian kan tum a inang tlangpui ang a, chumi chu, khawtlang tan a thawh (contribute) neih duh vang a ni hlawm.

Hetih karah hian FEMA (Federal Emergency Management Agency) hnuaiah Introduction to Inident Command System ICS-100 leh ICS for Single Resources and Initial Action Incident, ICS-200 min in certified tir bawk a. Emergency helicopter koh a, a tumna tur buatsaih dan leh helicopter a damlo dah dan thlengin min zirtir a ni.



Module #5 kan thlen meuh chuan mi 30 bawr vel chauh kan awm tawh a. Exam a lo hun leh ta ngei mai a, "Critical thinking and decision making" ah chuan an duh ang ka hmu zo ta lova, mahse percent 2 lek a pha lo ka nih vangin re-test min phalsak hlauh mai. Re-test tur chuan khaw dang kan awmna atang a hla vak lo, Mt. Airy khua a trainingna hmunah chuan ka inkhalh thlak a ngai ta a ni. Pindan lai takah keimahin min thut tir a, zawhna min rawn lak sak a, chhanna tur lehkha nen. Tichuan ngawi rengin keimah chauh chuan re-test chu ka nei leh ta a ni. An khawl leh chhanna lehkha (answer paper) kha computer hmang a inenfiah thei tur a duan a ni bawk a, ka re-test zo chu an khawlah ka chhanna an barh lut a, computer screen-ah chuan ka mark hmuh zat a lo lang nghal ta mai a ni. Tunah chuan 82% hmu phain module #5 chu ka pass ve ta hram a ni. Tlem a tlemah ka thlawn ve lo chauh chu a ni e.




Module #6 kan kai tak hnu chuan internship kan nei ve a, mahni station zelah ambulance koh anih hunah 3rd rider angin damlo kan buaipui a ngai ta a ni. Ambulance inventory kan neih phawt a ngai a, ambulance a awm zawng zawng, an awmna nen kan hriat chian a pawimawh hle. Accident ilovah, medic ten "traction splint ka mamawh" han ti sela lak tur leh a awmna hriat loh chuan kan fail a ni dawn tlat a ni. US a ambulance reng rengte hi hospital emergency room kal thei an ni ber awm e, mamawh engkim a awm vek mai.

Ambulance a call kan hmuh leh damlo kan enkawl dan chu chipchiar takin, kan zir ang thlap a report pek a ngai leh thin. Baltimore khua a Trauma center lar tak mai, damlo satliah pawh admit theih miah lohna, damlo serious tak tak, amblance leh helicopter-te rawn phurh luh chiah an enkawlna hmunah te chuan internship chu kan zuk ti bawk a ni.

Terrorists Incident lampang min zir uluk tir hle a, CBRNE agents an tih mai, chemical agents, biological agents, radiological agents, nuclear leh explosive agents te leh chutiang lam hawi  kan zir ngawrh hle bawk a. Tin,  "Hazmat" an tih mai, Hazardous Material Incident an ngai pawimawh hle bawk. A tak a min train mai bakah on-line course min la tih tir leh hram!



Chhungkaw chawmna tur eizawn ngai bawk, zirlai pangai bahlah miah lova skul kal bakah intern tih zawh a ngai ta bawk si chu thaw a pik ve lek lek thin. Chu a chhapah, kan in lei tum mek buaipuitu kan realtor lah chuan min lo be buai sek mai lehnghal a. Kan in lei tum neitute nen final settlement kan sign hun tur an rawn sawn sek mai bawk nen, chu mai a ni nang, ka fapa Aizawl atanga hruaithlak ka tum lampang chu buaipui tur a tam em em mai lehnghal a. Ka rilru te te chuan, "patling ka ni ve tak tak dawn ta aniang e, ngaihtuah tur reng mai a kat nek nuk mai a lawm mawle," te ka ti niah nuah thin. Ka EMT zirlai chu zo hman lova India ka haw angai maithei ( ka fapa hruai turin) tih kan immigration lawyer rawihin min la rawn hrilh leh zui. Thinlung hi a changelhmun nuaih mai a ni ber e!

Maryland Fire & Rescue Institute hnuai a kan zirlai kan zawh dawn meuh chuan mi 27 awrh kan ni tawh a, zirtirtu pahnihin min enkawl thin pawh chu pakhatin mi enkawl tawh a ni. Tichuan eMeds an tih mai, medic ho laptop tetakte hmang a report pek dan chu urhsun tak, hmanhmawh tak siin min zirtir ta bawk a (a hma kha chuan lehkhaah report min ziah tir), radio (wireless) hmang a hospital biak leh medical consul dan min zirtir tawh bawk a ni. May ni 5, 2013 chuan kan institution (MFRI) hnuai atang chuan ka pass chhuak ve ta hlawl mai a, ka lawm ve hle mai. Mahse, thawk tak tak phalna nei tur chuan state license ka lak leh phawt a ngai a ni. Practical exam kan neih hma hian kan pawl (class) ho chuan kan practise ngawrh ve hle, kan instructorte pawhin an hun hlutak min rawn pein min pui chho zel a, min zirtir uluk a, thahnem an ngai bawk a, a lawmawm takzet a ni. Kan thiam loh a awm chuan phone/txt message emaw e-mail thlengin kan zawt thei a, zirna pindan lovah chuan thian ang maiin kan be ngamin kan kawm ngam bawk a ni.
State license exam chu kan nei ta ngei a, a hma angin result erawh a chhuak nghal lo thung. Kan awmna khua atang a km 65 vel a hla Howard County a Fire & Rescue training na hmunah chuan practical exam nei turin June ni 2, 2013 chuan ka inkhalh chhuk ve leh ta a ni. Howard county hi Maryland khaw lian ber Baltimore thlen hma mai a ni nghe nghe. Motor parkna hmun ka thleng chu exam hun a damlo buaipui dan tur (patient assessment) ringawt ka rilruin a mitthla aniang e, ka hnung a electric ban chu ka tauh dawt pek a, motor erawh vanneih a siamin a khem lo hlauh!

Pindan lianpui, zau takah min luhkhawm tir a, kan haklai bak ken luh an phal miah lo. Hemi pindan zau tak hi kan examna hmun tur a ni lo. Hetah hian Emergency Medical Services lam a hotute an thu a, kan mark hmuh zat an chhutna hmun tur leh exam na hmun tur a in kal darh tirna tur hmun a ni. Kan class kal lai khan cheng 15 ($15) theuh kan thawh khawm a, chumi hmang chuan kan zing ami hmeichhe firefighter fel tak pakhat Britney chuan exam zawng zawng leh exam min buaipuitute breakfast leh lunch tur a lo buatsaih chu hun tlar dul a ni bawk. Fire & Rescue lam hrim hrim hi tlawmngai awmkhawmna hmun (ka tel chak chhan pakhat) a nih angin Britney chuan tlawmngai takin chhum chawp ngai a awm chuan chhum chawpin chutiang chuan alo buatsaih vek mai a ni. A tan kut kan beng dur dur reng a, a zak deuh chu a sen ap ap a, a cute reuh khawp mai, an pa a lo lai vel bawk :)

Examna hmun hi station pathumah an then a, ie., medical patient, trauma patient, leh Cardiopulmonary resuscitation (CPR) lampang tihna turte an ni. Nambar min pe theuh a, chumi nambar an koh chhuah velah, min kotu kianag kalin nambar min lo pe a, chumiah chuan kan kalna tur station a lo inziak a, chutah chuan kalin kan tih tur ang ang chu kan thiam tawkin kan partner te theuh nen kan va tita thin a ni. Partner kan nei theuh a, partnerte nen kal mah ila, mi 2 a damlo enkawl (two person assessmemt) leh mi pakhat a damlo enkawl (one person assesssment) kan ti zel a ni.

Ka partner Kayley nen hian kan vannei hle mai, a tir atangin a tawp thleng partner ngai hmang awm chhun kan ni hialin ka ring. Midangte chu an partner an tlak tak vang a partner dang neita an ni fur. Practical exam chu kan nei ta a, damdawi pek dan, enkawl dan chi hrang hrang kan phaktawk tur a min zirtir ang ang chu mit khap tha duh miah lova min thlir kar hnuaiah chuan kan han ti ta vel chu a ni a, thiam chian loh, practise khat leh practise uluk chu a hriat khawpin ka ring. Ka thiam ve viau emaw ka tih laiin, thawhah chau tawh lutuk enkawlna lamah a damdawi ka pek hmain oxygen ka pek theihnghilh pek a, ka enkawlna ka zawh hmain ka hrechhuak leh hram. ka fail phah em lova, mark erawh ka hmuh hniam phah ngeiin ka ring.
Breakfast ei hun hma, zing dar 7 a tangin chawhnu dar 3 an thleng ta a. Hotute lam pawhin chawei pawh chawlh phah nan hmang lovin kan mark hmuhte chu an chhut buai hle mai. Mi 4 velin an ennawn zel a, enge an ziah leh an titi kan hre thei si lova, an che vel kan hmu kar hlawm mai si, tlem chuan a zamawm ve duh angreng viau mai. Result an puang tan ta a, kan partner te nen zel pindan hrangah min ko lut zel a, a then rawn kir chu hlim takin kut pharin an rawn au lut a, a thente erawh an mittui a tla par hlawm bawk a.

 Tichuan ka partner nen chuan min ko ve ta ngei mai a, ka rilruah chuan oxygen ka pek theihnghilh kha a awm reng mai a, ka zam ru viau, mahse dan pangaiin ka nui sang tho mai. A nih tur tur chu a ni dawn tho tho a, lo ngui lawk vel khan awmzia a nei lo viau awm e. MFRI instructor chuan, "Henry leh Kayley, written ah in pass ve ve a, mark ...% in hmu a, practical-ah chuan..." a tia min en a a nui tha duh vak lova, Kayley chuan ka kut a rawn hmer vak a... tah tak chuan instructor chuan, "in pass ve ve," a rawn ti a, a nui sang mai a, "Ka lawmpui lutuk che u. Khawtlang leh ram tan mi tangkai tak ni zel ang che u," tiin duhsakna min hlan ta a ni.

Kan lawm lutuk chu pindan zau tak, mi 100 chuang awmnaah chuan hlim leh lawm takin banphar meuhin kan lut a, tum lawk pawh awm lovin chunglam hawiin, "Lalpa ka lawm e," ka ti a, hnuk a ulh dawn dawn mai. Ka zirpui thinte chuan, "Henry kan tawngtai thin kha chhanna kan hmu," tiin min lo pawm chung chung bawk a.

Kan EMT state license chu dak (post) hmang a lo thleng tur a ni a. Kar khat a ral hmain ka thiante chuan an hmu vek tawh a, kei chiahin ka la hmu ve lo. Exam laiin kan insawn buai si, change of address ka pek kha an hmu hman lo aniang," tih ngaihtuahna te a lo lut rum rum a, kan address hlui lamah mail te ka va en vel thul. Kar 2 a ral hma chuan ka hmu ve ta a, uluk takin ka chul hleuh hleuh mai a ni ber e. License card bakah hian dar a bel tur, "Emergency Medical Technician, Maryland" tih mawi tak, Maryland state flag chung a thui beh chu ka dawng bawk.

 
Kan station (United Fire Station #3) hi November 22, 1845 a din a nih atang khan a hming tha em em reng mai bawk a, hmingchhiat an hlau hle. License ka neih vang ngawtin ambulance ah primary caregiver ka la ni thei hauh lo. A tlemberah vawi 25 tal ambulance a 3rd rider angin damlo ka enkawl leh te te a ngai a ni.



  Kan chhungkua a kan khawsakna khuaah hian ka theih ang tawk tawkin kangmei leh dam lohna lam emergency a awmin,  midang pui thei tur a Pathianin min enkawl zel ka beisei. Damlo na zualte, sawrkar-in phalna min pek, mitthi a puan a hun tikah, ngaihtuahna fim tak ka neih theih ka beisei. Ropuina A man chang zel rawh se.

Sunday, March 24, 2013

Remembering 9/11/2001



9/11/2001, zing nichhuak zung eng mawi tak dawng chungin Washington, DC lamah ka hna chhete thawhlai chu thawk turin ka kal leh a.

Zing dar 9 rik hma deuh emaw chuan “World Trade Center North Tower, thlawhna-in a su,” an rawn ti ta!. Chutih hunlai a ka pu, tun a ka thawhpui nita, kan senior engineer Greg-a te office ah kan tlan lut a, TV kan tinung nghal. Kan en mek lai chuan thlawhna dang rawn thlawk leh nal nal chuan a nger chhur chhur a South Tower chu a su ta pa pawp mai le. Chutah  chuan , ka pu chuan, “We are under attack, damn f..ing ass…,” a ti teng chhuai a, dawhkan a chum, tih theih dang avan awm silo em!

Chumi hnu maiah chuan, “Pentagon a puak,” an rawn ti leh. Kan hnathawhna in chungah kan tlan chho, Pentagon building dinglam  khu chum chum chu kan hmu thei nghal mai a. U Saia Sailo pawhin kan hnungah a camera a rawn ak chho bawk a. U Saia chuan in chung bathlar aṭang chuan Pentagon khu chum chum mai thlala chuan a camera chu a hmet pawp pawp a. Kan awmna aṭang a hla vak lo a nih vangin hre pha emaw te kha chu kan awmna hnuai kawngpuiah thlabarin an tlan hlawk hlawk te pawh kan hmu reng mai.

Chutah leh, “dar 10 bawr velah United Airlines Flight 93 pawh hijack niin, Somerset County, Pennsylvania-ah a tla,” an rawn ti leh…a va’n hrilhai thlak duh tak em.

A lunglen thlak loh hle mai. Hemi thu ka ziah lai mek hian History channel 2 ah Twin Tower a thita ten, an chhungte an phone a voice mail an dahte an tichhuak mek… rilru a van khawih thar tak em!

Hemi ni, mi sang telin nunna chan a, an chhungte an kalsan takte zawng zawng hre rengin kan theih hram chuan i tawngtai sak ang u. Anni chang ni lo vin, khawvel a rilru hreawmna tuarte tan zawng zawng… Lalpa chu ropui ber rawh se!


Thursday, January 31, 2013

Sapram zawlbuk!

Ka hmuh phak hauh loh, thlalak pawh chiang lo riai ruai tak  ka hmuh ve fih feih, a ang tur a an sak bak leh, a chanchin pawh mi sawi ka hriat chauh ni thin Zawlbuk, chutiang ang chu, sapramah hian alo awm reng mai hi a lo ni a! Chumi ka hmuh leh, a khawsate chanchin, an kalphung chu ka hriatbelh chak ta riau mai a, ka zawt a, hmuh theih a nih vangin ka thlir bawk a. Movie leh chanchinbu a ka hmuh ai mahin an ropui ka tiin ka ngaisang ta em em mai a, luhchilh ve law law duhna rilru ka nei ta a ni.

Chanchinthar hrang hrangah United States a Fire & Rescue Services te hnathawh ropui zia leh mipui ten an chawimawi thiam zia te, an ngaihsan zia te ka hre ve thin. An chanchin a phawvuak lek a ka hriat lai pawhin, a ngaisangtute zing ami ka ni reng fo. Ka'n zir chiang a, kan bel chiang tawlh tawlh a, "Mizo ten tlawmngaihna kan sawi vung hle a, anni chuan sawi sawi lovin, a takin an lo nunpui reng mai anih hi mawle," tiin an mahni zahna namen lovin ka neih zual phah a, an zing a tel ve theih ka chak zual ta sauh a ni. Tichuan, nu ber be rawnin, ani chuan min thlawp thu a sawi ta bawk a, kan awmna khua, city of Frederick, Maryland state a station lian tak pakhat, United Steam Fire Company #3 ah chuan zuk kalin, member nihna ka dil ve ta a. Chutah chuan, training tur leh ngaite chi hrang hrang min hrilh a, application form te ka ziah fel hnu chuan, pe lutin ka haw leh ta a ni.A hnuah chuan training te nei ve zelin, station-ah orientation te min neih pui a, member-ah min la lut ve ta a ni. 


Fire station tinah hian infiamna pindan a awm a, choka a awm bawk a, TV enna pindan te, a duh tan a insawizawina (gym), conference hall te leh mutna pindan a awm thin. Fire fighter te leh Paramedic te hi a tlangpuiin volunteer, hlawh nei lo va thawk an ni hlawm. Hnadang nei, ie., dâktawr te, engineer te, zirtirtute, nurse te, police leh sipai etc. an ni nawk a, hna dang hranpa neilo pawh an kat nuk bawk. An hunawl neih changin, an rawn kal a, station registerah chuan on duty Lt. hmuh leh turah, an hming leh an awm theih  tur chhung an inziak lut mai thin. 

Mutna pindanah chuan tuma'n mahni khum bik an nei lem lo. Riak lut duh chuan an mutbu rawn kengin khum ruakah an inphah mai thin. Mutna pindanah hian bulb de zawk zawk thei an dah a, kohna a awm chuan chumi chu a de zawk zawk a, a harh loh theih loh, chuta tang chuan fire truck emaw, ambulance-ah emaw an in detail-naah an tlan lut tawh mai thin a ni. Hmun tifaitu bik an awm lova, a awm awm tihfai tur a ni mai a, chutiang bawkin fire truck leh ambulance tihfai thlengin an vai a hnaah an nei mai thin. Ti ti khawm pawh a nuam nak nak thei viau mai, chhuak leh awm ngai hek lo. "Brothers and sisters" intih (ang a ngaih vek) an nih vangin, tu emaw thih chuangchangah pawh, sapram e tilo chuan an tuar tlang thiam khawp mai.



An luh chhan han zawt ila, "khawtlang tan tangkaina neih ka duh a ni," an ti deuh vekin a rinawm. A ni chiah lah tak a, mahni chenna hmunah theih ang ang, tam lo mahse, tih kan neih hi kan mawh niin ka hre thin. Chu bakah, khawtlang a inhman hian chumi hmunah chuan ta neitu nihna min pek mai bakah, hlawhtlinna rilru/hlimna min pe tu a ni thei chiang hle awm e. Fire & Rescue Services-ah hian 5% pawh a nghet (hlawh nei) a thawk an awm tling ang em aw, ka ti thin. Kum 2007 khan a nghet a thawh tumin ka bei ve chiam tawh a, min zai (surgery) tak avangin ka taksa-in a tlin ta lo kha ani a, a pawi ka ti viau nangin, tihian volunteer- a ka awm hi ka lawm em em tho mai.


An chet dan hi tun hma, kan pi leh pute hunlai a Zawlbuk tangkaina an sawi kalo hriat nen a inzul riau a hriatna ka nei a, min hneh zual phah em em mai a ni. Hetia, tlangval mai pawh ni lo, nu leh pa te thlengin, an hunawl neih chang chang a khawtlang tanpui thei tur a an rawn fuankhawm thin, a tul chuan riak lut a, thihchilh hial khawp pawh huam a inpe zo, khawtlang tan a mi inpete zing a min la lut ve ta hi ka va'n lawm tak em.



Hetiang deuh hian Mizoramah pawh hian YMA emaw hian tih rawt chhuak sela ka ti thin hle. Basic CPR emaw lek pawh training han inpe ila, kangthelh dan te a nihna tur ang thlapin han inzirtir ila, in kang leh mi nunna chu engemaw zat kan chhanchhuak theiin ka ring tlat a ni. US a paramedic te hna ber pawh pre-hospital care a ni mai a, damdawiin thlenpui an nih hma a mi nunna chelhdin sak a ni ber. Zunthlum nei,  stroke nei thei mai etc. kan tam tawh si a, kan electric wiring etc. a fuh ber lo fo bawk nen, fire dept. lah an indaih bik lovin, an awmna atangin in kang awmna a hla viau thei bawk si...