Search This Blog

Wednesday, May 25, 2011

Pathian zarah eng eng emaw ka zir belh ve zel.


White Water sports lama ka hna nghetlo (part time) kha Nipui (Summer) lai chauh thil anih vangin, kumkhatah thla reilo te chhung hnathawh hun kan nei a. Kan hun neih tawp lamah chuan thil zir theih awm tur ka dap ve reng thin. Tunlai khawvelah certified nihna neih loh chuan eng hna mai pawh hi a har vek tawh mai si a, chuvang chuan certificate neih theihna tur ang chi ka dap ve kha a ni a.

Chanchinbu atanga ka hriat, professional body guard tura train theihna hmun ka hmuh chu belhchian chi niin ka hre ta a. All American Executive Protection Training, Virginia lamah chuan Personal Protection Specialist Entry Level Course ti tur chuan ka in register ve ta a. Kan bel chiang tan deuh a, "Afghanistan lamah.." an ti tuah hum ta mai a, ka chhunzawm duh talo a ni. Middle East lam hi ka hriat nial nual avangin ka ngaina lo ve tlat. Engpawh nise, security lam tho chu Maryland state chhungah train chhuah tumin ka inziaklut leh ta a. Heta tang hi chuan October ni 27, kum 2008 khan certificate neiin ka zir chhuak ta a ni. Kan zir dan chiah hi chu sawi zau vaklo mai ila a tha zawk awm e! Tichuan, hote mah nise, silai te chi lampang him taka enkawl danah pawh Maryland state pulit hnuai atangin certificate ka la ve ta zel bawk a. A ho tham viau nangin kan sawi lang ve mai mai ani e.

Tichuan, ka hna ngaihsan ber te zing ami, "Fire fighter" hnaah enchhinna (Physical ability test) an nei dawn a, chuta tling te chu a nghet turin training an pe dawn tih ka hre leh ta hlauh mai. Ka hnathawh pangai pahnih ah te khan thlakhatah ni 8 ve ve zel dan angin chawlh ka khawl zel a. Chawlh la ngai lemlo ta chu kum hnih kum thum hnu chuan kalo khawl ve nual hman mai. Physical ability test neih hma hian High School Diploma - graduate paper kan pek luh hnuah written test kan nei ta a.

Written test nei tur hian high school pakhat kawtah zing atangin kan intlar put mai a. Athen te phei chu zing dar 2 atang te pawhin an lo awm lawk tawh a. Hemi hi a chhan chu mi 300 chiah exam hall an luhtir dawn avangin a kal hmasa sa an vannei ani mai. Keipawh zing dar 4 pelh hretah ka kal ve a, 14na nita in ka inhria. Hemi tuka intlar zat hi mi 3000 kan chuang niawmin ahnuah chuan an sawi ka hre nghe nghe. Tumah innek buai emaw, hmasa zawk nih tuma inchuh an awmlo, a kal tlai te pawh,"Engemaw thulah" ti niawm takin an intlar ve vek mai. Ka rilru te te chuan, "Mi 300 lek an luhtir dawn si a," ka tia mak ka ti zawk viau nghe nghe.

Zing dar 8 ah chiah kawngkhar an hawng ta a, felfai takin line siam ang ang chuan kan inzui lut ta hlawm a. Exam hall ah chuan dawhkan ah zawhna leh chhanna tur lehkha, chu bakah pencil leh nawhreh an lo dah sa thlap tih ka hmu thei. Exam hall kawngkaah chuan kan inghak khawm a, kan thutna tur nambar kan neihsa min kawhhmuh tu an awm zela, ka thutna tur chu ka pan ve ta a. Exam tan hun anih hma chuan kan hmaa lehkha te chu khawih loh tura hriattir lawk kan nih angin tuman khawih enah pawh kan enlo niin ka hria. Exam tan a hun ta, zawhna kan en thuak thuak a, ka thiam awm ang ang chu chhan hmasakah ka nei phawt a, chhut ngai chi deuh chu a hnuhnung lama tih atan ka dah hrih hlawm a. Zawhna te hi general knowledge, simple arithmetics, leh English grammer te anni hlawm. Darkar khat aral chuan chhuah ahun ta a, tichuan exam hall atang chuan school chhunga theater lamah chuan min luhtir vek hlawm a. Kan chhana lehkha kha computer a thlunzawm theih chi anih avangin kan thutfel hnu mai chuan envelope uk (brown envelope) ah kan result inkhung chu min rawn pe ta nghal vek a ni. A tling zawng te chu kan kalzel dan tur inziak te chu uluk taka chhiar turin min chah hnu chuan a tling zawng te chuan chumi lam pan tur chuan kan chhuak ta a; keipawh ka tling ve hram.

Maryland Police Training Center ni bawk, Fire Fighters ho training na ni bawk, Frederick khawdaiah chuan ziak lama (written) tling ho chu kan kalkhawm leh ta a. Hetah hi chuan kan tlem ta pharh mai, 50 awrh kan ni ta. Phurna leh zauthauna chuan min hnawh ut ut hian ka hria a, ka thin pawh a phurang kher mai. Ka châk ber te zing ami, an zinga tel ka chak em em thin, ka hna ngaihsan thawk tute, "American Fire Fighters" te chhungkuaa awm theihna hun ka nei ve dawn ta a nih chu. Tichuan, kan "Mentoring class" neih dan tur te leh thil chinchang min hrilh hnu chuan trainingna hmun-ram te min fankual pui a. Chumi hnu chuan rilruah nuam ti takin mittui parawl teuha Pathian hnenah lawmthu sawi chungin inlam pangin ka inkhalh haw ta a ni.


Mentoring class (Physical ability test nei tura inpuahchahna) kan neih hian, PT kan ti nasa thin hle. A hmasa berin kan ruh chuktuah te leh kan tihrawl te kan sawizawi (stretching etc) hnuin, Mel 3 (Km 5 tlinglo hret) kan tlan a. Chumi zawh chuan push-up leh sit-up nasa takin kan ti leh a. Push-up leh sit-up kan tih zawh hian training nan hrim hrima sak, inchhawng sang tak bulah chhukthla in, tui inna hun kan nei. Chumi zawh chuan excalator ang deuha kal rengah chuan 75Lbs (Kg 34.9) kawr ha chungin minute khat leh a chanve min kaltir a, step chhoh paha kawr rit tak hak chu thawk aharin minute a rei duh hle mai. Chumi zawh lehah chuan, "Fire hose" min hnuh tira, meter 50 kan tlanpui hnuah kan tlan tlang zela, laihlawn sei chi kan pawt dawka, kan dah tha leh a, "Attic Crawl" an tih mai, bawm thim zet mai, a chhung han luha kikawi tak leh fimkhur lova intauh bur theihna tam em emah chuan kan kawr kg 34 chuanga rit ha chung chuan kan bawkvak lut leh a. Chumai ala nilo, kan chhuak chiah chu mihring lem rit zet mai hi meter 50 kan hnuk leh a, ceiling pawhchhiat dan kan ti leh thin. Chutah le, inchhawngah khan chhawng 7 kan tlanlawn a, pawnlam banga thir stepah chak takin kan chhuk leh a, hetah hian a kar laka kan din chuan, "Come on come on push on you're the man, motivate motivate" tiin min lo au seka a hahthlak duh kher mai. Lei kan thlenin vawi 20 push-up emaw ti tura min lo ruatsak chu zawm zatin kan ti leh thin. Chutiang chuan physical ability test nei turin kartin thla 3 chhung inpuahchah nan hun kan hmang thin anih chu. Mentoring lai hian luhaia tlu te an awm fo bakah, chauh lutuk vanga thi te pawh an awm zeuh zeuh thin. Pakhat thih chhanah phei chuan kum 2009 khan court in trainer pakhat vangin County lamin $300,000.00 (Rs. 13,500,000.00) an chawi phah nghe nghe a ni. Hei erawh chu trainer fimkhur tawk loh vang anih hmel e.


Mentoring kan zo ta a, physical ablity test kan zo leh ta bawk a, training hun ani ta. Meialh chi hrang hrang, inchhan chhuah dan chi hrang hrang, Arithmetic, physical, gas ilo lut theilo thuamhnaw ha chunga khawlum lutuk laia meialh (In chhung an hal) kara kal te etc. chu kan zir ta tlut tlut mai anih chu. Nuam ka tiin ka rilru avan hlim tak em. Tanpui ngaite tanpui thei turin, hna tak taka nei thei turin ka inzir mek ani si a. Ka tluang viau a, ka hna pangai lamah pawh duhsakna min hlan lawm lawm lai chuan, "Ka tawnah vanpui a chim," an tih ang mai kha alo thleng ta hlauh mai le. Cancer awm thei mai tura an ngaih avangin zai (surgery) ka ngai ta tlat mai. Inzaina pindan lamah lakluhin ka awm ta anih kha. Tichuan, ka thawh chakna em em, khawvel hna a zawnga ka zah leh ngaihsan ber te zing ami chu thawk theilo vin ka zirmek lai (training) chu ka tlingzo loh phah ta a ni.

Pathianin mal min sawma, engmahlo mai kha, khawvela ram ropui berah fate enkawl theiin min dah. Chu mai ala nilo, nupui fel tak mai, fa pakhat bak hrin belh duh lova ka fa hmasa te min hmangaih sak tu min pe a. Ka rilruk phak ngailoh zirna lama ka temchhinna hrim hrimah pawh ka lawm tawh reng reng e. Azarah kan dam zel anga, zir theih ala awm zel ang chu... Ropuina chungnungbera hnenah awm se, a zarah thil hrang hrang a tih ve theih zel ang chu...

CHHUNZAWM ZEL TUR...

Thursday, May 19, 2011

Hna ka thawk ve zel (Thursday, March 31, 2011 "United States ka pem" chhunzawmna)

Tichuan  US Navy ho bomb mitnei kaihhruaina (Aegis Missile Guidance Systems) lam kaihhnawih siamna thilah chuan ka thawk ta zel a, kan pu te ho sipaia kum tam lo tang tawh anni hlawm bawk a, tawngkam hman leh fiamthu pawh a tha thei ham ham khawp mai. Chutiang karah chuan red neck tawngkam thlahdah ve tak tak lah bo lo, kan kim viau zel a ni. Awle, chutia hna pakhat lek thawh chu thawh loh chhung a ninawm ta riau mai a. Heihi inlama tul thawh tur atam lem loh vang pawh ani maithei. Chupawh chu inluah (rent) kan nih vangin chhia emaw tul chu a enkawltu ten an siam vek zel mai si a.

Tichuan le, kum 2005 kum thar kan kai hnu lawk chuan kan awmna apartment enkawltu pakhat, Greg chu a room ah alo inkap thlu reng mai chu niin. Biak nuam leh tlawmngai thei tak anih avang khan, hre em em lo mah ila ka ui ve hle mai. A thawhpui pa chuan, apa nen an inkar a fuh theih thin loh a rilru ahah thin thu leh zan lamah a ina len a that loh chu a sawi thin ka hriat hnu chuan, a inkah chhan pawh chu a rin thiam ve theih mai a, a pawi thin hle mai. A thawhpui George chu a hnaa a buai zual changin (amah chauh anih tak avangin) thil han hlankai pui lawp lawp chang ka nei thin a. Ani Greg inkaphlum ta chu midang rawih an mamawh ta anih chu. Chumi hun remchang chu chuh vatin, ka hna pakhat zawkah zan duty tura min sawn theih chuan min sawipui turin ka be tlawn ta a.

Vanneih asiamin kan pu ten zan lama duty turin phalna min pe ta hlauh mai, ka hmalam thlirin ka hah dawn tih hre mah ila ka phur rilru viau. Tichuan, kan chenna apartment ah chuan chhia emaw a awm te, thil thlak ngai emaw a awm te a chutiang ti tur chuan a nghet lo vin ka thawk ve ta a. A tlangpuiin khawiah pawh a nghet lova kan thawh hian thla 3 emaw thla 4 emaw hi chuan a nghetin an in ruai (hire) tlangpui awm e. Engpawh nise, ka hna pakhat zawk atang khan atul chuan chhunah pawh emaw, kan thawhna lampang tho hmun dangah kaltir theih thut thut ka nih avang chuan ka hna nghetlo thawh tel mek pawh chu ngheh loh ka duh zawk a ni. Kan ngheh hnu hi chuan bang leh ila khami kha work history, record a en theih vek avangin, hnadang zawn pawhin harsatna a awm thei thin. Nghet lova ka thawh chuan ka thawh zat ang ang a darkarin min pe mai a, ka thawh tlem leh ka hlawh a tlem mai a, chhungkaw lamah erawh min pui teh e.

Kum te aliam zel a, kartawpah len chhuah peihlo mi kani nangin, ina awm ngawt ngawt mai chu ka ning leh tho bawk si. In sakna/ cheina bungrua an zawrhna hmun, Home Depot dawrah chuan kar tawp ni 2 thawk turin dilna ka thehlut leh ta a. Ka thawk chhunzawm leh ta a ni.

Kum 3 chuang ka hna hmasa bera ka thawh hnu chuan, zan lam chauha thawk tur leh koh mai theih (on call) a awm lo vin ka thawh hun min siam sak ta hlauh mai, ka lawm kher asin. Tichuan hmunthu in, Aegis Missile Guidance Systems lam kaihhnawih department ah chuan ka awm ve ta zel a ni. Chutah chuan apartment lamah pawh chuan chhunah a nghetin ka thawk ve ta a. Hna 2 a nghetin darkar 8 ve ve ka thawk a, kartawp lamah ka thawk bawk si, mut hun ka nei tlem ta kher mai. Kar khatah darkar 100 thawh chang a awm a, nikhatah darkar 1 leh a chanve mut chang a awm ta fo mai. Ka hriselna lamin a tuar hlau viau mah ila, tum ruh luhlulna chuan min nawr lui a, mut hun ka neih chhunah hun khawhral lo vin ka mu hmak zel a, a zia phian mai. Ka chhun hna pawh thawh bawrh bawrh reng anilo bawk nen, mahni awmna apartment complex a thawk nih bawk chuan chhun chawlh nan ber kan apartment kan hmang a, mutthlukna hun ka nei bawk thin (darkar 1 break a ni).

Home Depot kha Fork Lift nen khawl chi hrang hrang khawih leh rih chawi atam avangin, hna dang nen chuan min ti chau thei riau mai a, min dah ngheh an tum hmain chhuahsan ka tum ta a. Tumkhat chu West Virginia lam ka len naah White Water Sports lama eizawnna hmunka hmu hlauh mai. Hetiang lam hi ka tuina em em mai leh ka thiam neih ve chhun ber ni nghe nghe a ka hriat avangin an pisa (office) ah chuan lutin hnaruak a awm em tih ka zawt ta chawt mai a ni. International hriatpui zirna hmun atanga certificate nei ka nih thu ka hrilh hnu chuan anni chuan, an dan angin ni 15 chhung an kalna thin luidungah a lui awmdan leh lui dunga hnimhnah leh ramsa leh nungcha hrim hrim zir phawt turin min ti ta a.

Home Depot lam pawh ka bang ta bawk a, West Virginia lamah chuan kartawp apiangin ka kal ta a. Hlawh nei lo vin, mahse mahni nuam tihna ber pakhat ti tur chuan ka pan ziah anih chu. Shanandoah luiah class 3 leh class 4 suar (rapid) kan paltlang pah chuan, chunglaia sangha awm te, sava awm te leh an hming te, thingkung hming nen lam min zirtir thla ta a. Hetiang an tihna chhan hi tourist ho suara inkarthlak duh te hruai tur kan nih vang a ni. Ahnu chuan alo pawimawh zia pawh ka hre chiang hle. Zin veivak te hi anmit alo ler khawp mai a, zawhna lah an ngah, kan hriat thata, an mahni kan tih hlim thiam khan lawmman (tip) lah min pe hnem, thahnem ngaih ana thei khawp mai...mahse anuam kavan ti thin tak em!

Ka thiante lah chuan hna ka thawh nasat avang chuan ka tluk tawp lo hlau te an lo awm ta thin a, a lawmawm nangin min tihthaih dan a ngaihnawm loh ka ti thin hle. Ka chhuanlamah lah chuan, hmana Washington, DC a engineer pakhat side job ka puih thin Greg Rohrer ka hmang ve mai thin. Ani hi chhunah engineer hna pangai a thawk a, chumi leh ama private remodeling/construction hna chu thawh tak te a thawk kumkhua ani a, a hrisel reng mai chu kei paw'n mak ka ti tep thin reng a ni.

Ka naupan lai atanga kapa in engmah thawh hrehlo tura min lo fuih thinna te, mihring eitura siam anih chuan ei theih loh neih tum loh tur anih thu te kha alo van tangkai ta em. A hnu lamah Shillonga ka ni (kapa u) Biaknemi te ina awmze nei tak maia min lo enkawlna te kha tun hnu hian ka chhawr ta hle mai. Naupan laia kan lo phun nuah nuah thin kha kan tan vek alo ni tih ka chiang ta. Nu leh pa te thurawn ngaih pawimawh hi alo van tangkai tak em. Khawih kan ngah chuan engkim zir pawh alo awl zel mai alo ni.


"De oppresso liber"

Tuesday, May 10, 2011

Judy nu (Pali na)



Champhai chho tur chuan kain buatsaih leh ta a. Champhai bus ticket chu va lain, chumi chuan ka chho ta a ni. Ka chhoh tur hi Judy nu chuan alo hriatsa avangin midang paw'n min hriain min hmu mahse pawi em em turah ka ruatlo ani ber.

Champhai chu kan lut chho ta a, IB lamah thlenna ka tihfel hnu chuan inhmuh kan tumna chu rang takin ka pan nghal a. Hemi hmun hi Champhai IB inhlui leh a choka inkara thingkung bul chiah a ni. Hemi thlang chiah hi an in anih avangin a remchang berin kan hriat avanga helai hmun hi thlang kan ni a. Ani Cyndi (Judy nu) pawh chuan a bag pakhat min rawn pe thuai a, "Thil ka theihnghilh lawk," tiin a lut leh zawk chu a rial ta vang vang mai. Keia ngaihna hrelo chu chutah chuan tlai atang chuan chaw pawh ei ta chuanglo chuan ka thu/nghak tlaivar ta thak a. Hun akal muang hle mai, chutiang chuan ni 2 leh zan 3 ka awm a, ka tamchhawl ta reng mai. IB luh dawnah hian hmelhriat an awm nawk a, chumi te hnenah chuan ka kal ta a.

IB luhna bul lane phei hi zu zawrhna vek anih thin avangin chuta ka lut chu an chawhmeh ka temsak bakah, zu liter 5 ka lei a. Zu chu in lo vin, Judy nu (Cyndi) te kawmthlang chiah Mabiaka (buhherkhawl nei, Sangthankima TNT te in lane chho) ami te inah chuan ka khailut ta a ni. Mabiaka chu thil chinchang ka sawipui pah chuan kan thli zel a. Mabiaka chuan Judy nu chu a rukin an inah ka awm thu a han hrilh thei hram a, a lawmawm khawp mai. Judy nu hi an inchhung zunina a zung tur pawh an zui zel tih kan hriat avangin Mabiakan a han hrilhru thei pawh kha lawmawm a tling a ni.

Kei, ni 3 chaw ei tawhlo chu no tlemte ah engmah hre lo vin ka lo let der mai chu niin. Chutah le, ani Judy nu (Cyndi) lah chu anu hmuhloh lai remchang a hmu a a rawn chhuk thei hlauh mai. Kei lah beidawng thinrim zuin engmah hrelo chuan ka lo let reng mai si, atan avan beidawn thlak dawn tak em! Mabiaka nen chuan tuisikin min leih ngat ngat mai a, min kaitho hleithei bawk silo. Chutih lai chuan anu ten a awmlo tih hriain a awmna an rawn chhui chhuak leh hman ta si. Ka thangharh chuan kalo huh phung a, thil awmzia ka hriat chuan inchhirna hlir inchhirna hlir ani ringawt. Rilru beidawnna neih deuh avanga thil tum neihsa puitlin loh nana hman pawizia hi aw. Beidawnna hi kan rilru siam ania, kan rilru siam chu kan rilru vekin kan hneh thei, mahse khalam kha ngaihtuah thleng turin rilru fim ka pu silo, a pawi zo ta anih kha.

Hun leh ni te a herliam zel a, Judy nu lah la chhuak thei ta chuanglo chuan hun aliam a. Ani pawh a beidawng ta aniang, chuti em em a ven uluk mai bawk chu atan pawh a ninawm zozai lutuk hrim hrim awm e. Tichuan lehkha kan dawng leh ta a, tuntum erawh a tawpna tur ani ta! Kan 2 ah a beidawn tawh avangin tlangval pakhat duhtu deuh ahmuh chu, "Ka chhang mai dawn em ni," tih dilna leh inhriattirna (a ni ber ang chu) lehkha a ni ta tlat mai. Han aih ngawt chi ni heklo, ani nun ka tih khawtlai ngawt kha a fel chuang bik lova, ui tak chuang chuan, "Ni e..." tihna lehkha tlar khat emaw lek chu ka thawn kir ve ta a.

Pasal fel tak mai Thenzawl lam chhuak Hualzika a nei ta a, ani hi J.E hna chelhlai a ni nghe nghe. Tichuan hlim takin an khawsa dun a, kan fanu chungchang pawh kan inhrilh tawn zel tho a. Chanmari West lamah, apa Sena te ina an riak tih ka hriat te hian nula hruaiin an inkiang chu ka zuk kal vel thin a, avan chauh thubarawh thin tak em. Tun hnua kan ngaihtuah leh hian kalo inthedere mai mai thin alo ni tih ka chiang hle mai. Tichuan, fa pawh 2 lai a hrin sak hnu chuan Thisen cancer a nei ta tlat mai le. Natna khuma a awm lai chuan min rawn chah ta a, chu thu chuan min thawn na kher mai. Tuncha chuan Champhaiah awm tawh lo vin, Chaltlang lamah an rawn insawn tawh a, chutah chuan daktawr lam an beidawn tawh avangin amah chu an enkawl mek ani a.

Judy nu te chhungkaw chenna in Chaltlangah chuan ka neih ve phak tawk, artui tray khat te mai keng chuan inthlahrung takin ka han kal ta a. An kawngkhar ka kik a, an pa chuan min lo hawn sak a, Judy nu mutna roomah chuan min hruailut ta a. Kha mi rilru zau leh puitling tak niin ka hria, " Lo inkawm rawh u aw, tih tur ka nei e..." tiin min chhuahsan ta daih a. Khata kan titi na khan tun hnu thleng hian ka tan nghawng tha anei ta anih hi.

Kan sawi zawng zawng hre vek tawhlo mah ila, a thu min chah hnuhnung ber khan min va han hneh tak em! " Judy pa, kan fanu hian a damchhung zawngin pa dang tumah a nei dawnlo. Chuvangin khawngaih takin tumah kut thlak tawh lo la, insual tawh lo la... zu rui buaiin awm tawhlo thei la ka ti ber mai. Kan pathum min pawt then tu pawh zu in chintawk i hriat loh vang a ni ber. Khawngaih takin insual leh zu ruih i fanu vangin i sim thei angem?" tiin ka chhanna nghakin min melh ran ta mai a. Ani lah damlo cher tak maiin khumah chuan amut bal mai a, a kut ka vuana kan mittui chu aluang dun zawih zawih ta mai a. Ka rilru chuan, "Thu tiam ngawt ila, ka tiam anga ka awm leh siloh chuan.." tihna rilru chuan min chhan tir a harsat ngei mai. Thi mai tur lakah ngat phei chuan thutiam chu alo har ngei mai, ka fanu Judy nu, ka hmangaih alo ni kher bawk nen. Huiham, mahse ka thinlungin "Tiam rawh" ati aniang chu, "Awle, miin min tihbuai paw'n khawih let ka tum tawh lo ang e," tiin ka chhang a. Ani chuan ala duhtawk loh avangin min zawt nawn leh a, min zawh nawn lehna, "Zu ruih buai tawh loh," pawh chu ka fanu vangin ka tum tawh dawn thu ka tiam ta a ni. Ka kalsan hma chuan kan fanu min hmangaih pui thei tur nupui nei ngei turin min chah lawm lawm bawk a ni.

Tunah chuan Judy nu chu a pasal te khua Thenzawl thlanmualah, thingbuk mawi tak kiangah hahdam takin a hahchawl ta. Rilru hah leh thlaphanna hmun, khawvel a chhuahsan a. Hun tawp, Pathian in muhil a kaithawh leh hunah atan a kaihthawh ngei ka beisei.

NB: Kapu Laldailova khan, "Mi rinawm te tan intiamkam angai velo, an sawia an bawhzui mai thin," a tih kha kala hre reng. Mahse, bawhzuina hun ka nei tawh dawn silo, tiam tul chu ka tiamta a ni.

Wednesday, May 4, 2011

Judy nu (Pathumna)


Hlim takin kan innei chho zel dawn emaw tih lai chuan puitling rilru pu lova nupui/pasal neih pawi theih zia keimah atang chuan alo lang chho tan ta, avan pawi tak em.

Mizo film hrang hrang kan chang zo hlim, Mizoram handlooms lamin fashion show lamah te an puantah fakna atan te min lo hmang ve zel bawk nen chuan, kei ang rilru puitlinglo tak tan chuan insumtheihna tlakchham alo awl ta riau mai a. Hetiang te anih takah chuan inlam paw'n a tuar tan ta a ni.

D.C office (Aizawl) ah chuan hna ka thawk tawh lova, Tlangnuam sikul 3 ah nghet lovin ka thawk ve leuh leuh a. Guwahati lamah kapa sawrkarin an sawn avangin ka chhungte chuan min liam thlak san ta vek a, kan chhungkua te chuan inpui kan lo nghak ta a ni. Naute (fanu) te kan neih ve tak avangin indaih te alo harsa a, chhungte puihna ka dil ve ta chawt mai a. Kapa chuan a pawisa khawl ve chhun ang ang chuan sikul naupang hman chi pen, ziaklohbu leh thil dang dang kan zawrh chhawn tur min rawn thawn ta nghe nghe a ni. An bungraw min rawn thawn chu bei tham hle mahse, hralhna uluk taka chhut chuan inpeipungin bungraw lakna pawh kan neih belh zel turah kapa te chuan min chhut pui a ni.

Tichuan le, sikul lamah theihtawpin tang mah ila, sikul banah haw paha zu in ka hmang leh ta tlat mai a. Duh tawk lah ka nei hleithei thin si lova, ngaihtuah lah a tawi tut zel mai thin si, Judy nu avan hah thin tak em! Kan inhnuaia a dawr nghah te chu Mary Mount leh St.Pauls kal hoin dawr tha viau mahse, hlep chu sawi loh pawisa reng reng a awm thei talo. A awm ang ang ka tham vek a, ka hmangzo vek zel a ni. In ka thlen hun awmah hi chuan lungphu dep depin nghakhlel lo takin min lo thlir thin tih ahnu ah ka hre leh.. ka va han suaksual tak em vele!

Nula ka kawp san a, aniin a hriat chhuah lahin insawifel ka tum nasa mai thin a, ring tak takin aw ka ka chhuah khum thin. Kan thenawm te khan a rilru puitlin zia leh min hmangaih zia an sawi fo, kei paw'n ka hria mahse ka nun sim reng ka tumlo. Tumkhat phei chu keimah paw'n ka huat ber pakhat angin kut ka thlak ta a, chu pawh chu keima thiam lovah tho, insawifel ka tumnaah a ni. Tun hnu hian ka va han inchhir thin tak em, a sawt tawh silo. Ani naupang te mai, a nu leh pa kalsan tu kha tichuan hreawm leh thlabar reng rengin ka siam thin anih chu. A chhungte hnenah engmah a sawi ngailo, min fak theihna awm tlem hle mahse chung ang te chu alo sawi hram hram thin tih te a hnuah ka hre chhuak ta zel a ni.

Kan fanuin kal a zir tih chuan loh theih lovin a tlan ve ta a. Chanmari west ah a pa u, Pu. Sena Tochhawng inah an nufa chuan an lut a. Chutah pawh chuan riak phei ang mai maiin a lo insawi ani awm e. Chutah kei chuan kan kawmthlang pa, Upa. Pachhunga (fam) fapa Enga sawmin ka bike chuan kan va kal ta a. Ani Judy nu chuan zu ka nghei hunah alo haw dawn chauh tih min hrilh a. Keia thinrim chuan ka fanu nausen chu pawmin, "Hei chu kafa a ni, ka kiangah a awm ang," tiin ka chhuh sak ta a. Bike ah chuan hmathlaka pua in Kulikawn lamah kan inphur phei ta a ni. Ka enkawl leh thiam si lova atuk chuan anu chu kava pe leh ta a.

Judy te nufa hriat loh chuan a chhungte chuan sum an rawn chhuah ta. Kei lah ngaihsam zurui si chuan, "Min pe vat vat teh u, zu man ka neilo ania," te kalo tih khum vel; ka va han zahpuiawm tak em! Khata Cyndi pa Sena hnena ka sawi ang tawngkam kha tumah hian chhak chhuak ve lo sela ka duh a ni. Apa Senan naute lak an remtih dawn loh khan kei chuan, "Ka fa a ni a, ka ta a ni a, ka duh duh in ka ti ang, duh leh ka kangro anga, duh leh ka duat anga..." ka tih khum hrep a ni; Champhai lamah an hruai chho ta daih mai si a, hun a rei chuan ka lungleng chu awm ngaihna ka hrelo hi a ni ber awm e. Ka rilru hi a bing chuk chuk mai a, inchhir ve hle pawhin ka inhre nghe nghe a ni.

Judy nu pawh chu alung alo leng ve aniang chu, kanu hnenah lehkha a rawn thawn ta a. Kanu nen hian an inngaina em em mai a, kanu hian engkimah a tan em em ringawt mai kha ani reng reng; lehkha a thawn pawh kha a awm viau e. Engpawh nise, a lehkhaah chuan, "Henry khan khawngaihin min rawn ru chhuak mai teh se, kan fanu, pa lova a awm hi a tha ka tilo. Ka hmangaih a, a nun chu a insiam tha ve zel mai ang," tih hi a ni a. Kanu in chutiang thu min hrilh hma chuan nasa takin zilhna ka dawng a. Hrilh tlakah min ngai ta aniang chu a tawpah chuan a lehkha dawn chu min chhiar tir ve ta a ni.

Champhai lam chho tur chuan ka inpuahchah leh ta a.

CLICK PIC FOR LARGER SIZE