Search This Blog

Thursday, May 19, 2011

Hna ka thawk ve zel (Thursday, March 31, 2011 "United States ka pem" chhunzawmna)

Tichuan  US Navy ho bomb mitnei kaihhruaina (Aegis Missile Guidance Systems) lam kaihhnawih siamna thilah chuan ka thawk ta zel a, kan pu te ho sipaia kum tam lo tang tawh anni hlawm bawk a, tawngkam hman leh fiamthu pawh a tha thei ham ham khawp mai. Chutiang karah chuan red neck tawngkam thlahdah ve tak tak lah bo lo, kan kim viau zel a ni. Awle, chutia hna pakhat lek thawh chu thawh loh chhung a ninawm ta riau mai a. Heihi inlama tul thawh tur atam lem loh vang pawh ani maithei. Chupawh chu inluah (rent) kan nih vangin chhia emaw tul chu a enkawltu ten an siam vek zel mai si a.

Tichuan le, kum 2005 kum thar kan kai hnu lawk chuan kan awmna apartment enkawltu pakhat, Greg chu a room ah alo inkap thlu reng mai chu niin. Biak nuam leh tlawmngai thei tak anih avang khan, hre em em lo mah ila ka ui ve hle mai. A thawhpui pa chuan, apa nen an inkar a fuh theih thin loh a rilru ahah thin thu leh zan lamah a ina len a that loh chu a sawi thin ka hriat hnu chuan, a inkah chhan pawh chu a rin thiam ve theih mai a, a pawi thin hle mai. A thawhpui George chu a hnaa a buai zual changin (amah chauh anih tak avangin) thil han hlankai pui lawp lawp chang ka nei thin a. Ani Greg inkaphlum ta chu midang rawih an mamawh ta anih chu. Chumi hun remchang chu chuh vatin, ka hna pakhat zawkah zan duty tura min sawn theih chuan min sawipui turin ka be tlawn ta a.

Vanneih asiamin kan pu ten zan lama duty turin phalna min pe ta hlauh mai, ka hmalam thlirin ka hah dawn tih hre mah ila ka phur rilru viau. Tichuan, kan chenna apartment ah chuan chhia emaw a awm te, thil thlak ngai emaw a awm te a chutiang ti tur chuan a nghet lo vin ka thawk ve ta a. A tlangpuiin khawiah pawh a nghet lova kan thawh hian thla 3 emaw thla 4 emaw hi chuan a nghetin an in ruai (hire) tlangpui awm e. Engpawh nise, ka hna pakhat zawk atang khan atul chuan chhunah pawh emaw, kan thawhna lampang tho hmun dangah kaltir theih thut thut ka nih avang chuan ka hna nghetlo thawh tel mek pawh chu ngheh loh ka duh zawk a ni. Kan ngheh hnu hi chuan bang leh ila khami kha work history, record a en theih vek avangin, hnadang zawn pawhin harsatna a awm thei thin. Nghet lova ka thawh chuan ka thawh zat ang ang a darkarin min pe mai a, ka thawh tlem leh ka hlawh a tlem mai a, chhungkaw lamah erawh min pui teh e.

Kum te aliam zel a, kartawpah len chhuah peihlo mi kani nangin, ina awm ngawt ngawt mai chu ka ning leh tho bawk si. In sakna/ cheina bungrua an zawrhna hmun, Home Depot dawrah chuan kar tawp ni 2 thawk turin dilna ka thehlut leh ta a. Ka thawk chhunzawm leh ta a ni.

Kum 3 chuang ka hna hmasa bera ka thawh hnu chuan, zan lam chauha thawk tur leh koh mai theih (on call) a awm lo vin ka thawh hun min siam sak ta hlauh mai, ka lawm kher asin. Tichuan hmunthu in, Aegis Missile Guidance Systems lam kaihhnawih department ah chuan ka awm ve ta zel a ni. Chutah chuan apartment lamah pawh chuan chhunah a nghetin ka thawk ve ta a. Hna 2 a nghetin darkar 8 ve ve ka thawk a, kartawp lamah ka thawk bawk si, mut hun ka nei tlem ta kher mai. Kar khatah darkar 100 thawh chang a awm a, nikhatah darkar 1 leh a chanve mut chang a awm ta fo mai. Ka hriselna lamin a tuar hlau viau mah ila, tum ruh luhlulna chuan min nawr lui a, mut hun ka neih chhunah hun khawhral lo vin ka mu hmak zel a, a zia phian mai. Ka chhun hna pawh thawh bawrh bawrh reng anilo bawk nen, mahni awmna apartment complex a thawk nih bawk chuan chhun chawlh nan ber kan apartment kan hmang a, mutthlukna hun ka nei bawk thin (darkar 1 break a ni).

Home Depot kha Fork Lift nen khawl chi hrang hrang khawih leh rih chawi atam avangin, hna dang nen chuan min ti chau thei riau mai a, min dah ngheh an tum hmain chhuahsan ka tum ta a. Tumkhat chu West Virginia lam ka len naah White Water Sports lama eizawnna hmunka hmu hlauh mai. Hetiang lam hi ka tuina em em mai leh ka thiam neih ve chhun ber ni nghe nghe a ka hriat avangin an pisa (office) ah chuan lutin hnaruak a awm em tih ka zawt ta chawt mai a ni. International hriatpui zirna hmun atanga certificate nei ka nih thu ka hrilh hnu chuan anni chuan, an dan angin ni 15 chhung an kalna thin luidungah a lui awmdan leh lui dunga hnimhnah leh ramsa leh nungcha hrim hrim zir phawt turin min ti ta a.

Home Depot lam pawh ka bang ta bawk a, West Virginia lamah chuan kartawp apiangin ka kal ta a. Hlawh nei lo vin, mahse mahni nuam tihna ber pakhat ti tur chuan ka pan ziah anih chu. Shanandoah luiah class 3 leh class 4 suar (rapid) kan paltlang pah chuan, chunglaia sangha awm te, sava awm te leh an hming te, thingkung hming nen lam min zirtir thla ta a. Hetiang an tihna chhan hi tourist ho suara inkarthlak duh te hruai tur kan nih vang a ni. Ahnu chuan alo pawimawh zia pawh ka hre chiang hle. Zin veivak te hi anmit alo ler khawp mai a, zawhna lah an ngah, kan hriat thata, an mahni kan tih hlim thiam khan lawmman (tip) lah min pe hnem, thahnem ngaih ana thei khawp mai...mahse anuam kavan ti thin tak em!

Ka thiante lah chuan hna ka thawh nasat avang chuan ka tluk tawp lo hlau te an lo awm ta thin a, a lawmawm nangin min tihthaih dan a ngaihnawm loh ka ti thin hle. Ka chhuanlamah lah chuan, hmana Washington, DC a engineer pakhat side job ka puih thin Greg Rohrer ka hmang ve mai thin. Ani hi chhunah engineer hna pangai a thawk a, chumi leh ama private remodeling/construction hna chu thawh tak te a thawk kumkhua ani a, a hrisel reng mai chu kei paw'n mak ka ti tep thin reng a ni.

Ka naupan lai atanga kapa in engmah thawh hrehlo tura min lo fuih thinna te, mihring eitura siam anih chuan ei theih loh neih tum loh tur anih thu te kha alo van tangkai ta em. A hnu lamah Shillonga ka ni (kapa u) Biaknemi te ina awmze nei tak maia min lo enkawlna te kha tun hnu hian ka chhawr ta hle mai. Naupan laia kan lo phun nuah nuah thin kha kan tan vek alo ni tih ka chiang ta. Nu leh pa te thurawn ngaih pawimawh hi alo van tangkai tak em. Khawih kan ngah chuan engkim zir pawh alo awl zel mai alo ni.


"De oppresso liber"

10 comments:

  1. I van taimaiin, i van thawkrim em !! I entawntlak e.

    Keipawh China kalna tur intuakin ka inhlawhve nasa thin.

    ReplyDelete
  2. Seki, i thatchhiat hi ka ring ngailo. I adventurous bawk a Pathian zarah i hrisel pawh ka ring viau.

    ReplyDelete
  3. va ngaihnawm ve...musings of a Vangchhia hairehai

    ReplyDelete
  4. Hna i lo va thawk nasa em em ve maw le. I taima hle mai. Taihmak hi hlawhtlinna bul a ni. I thawh tam poh leh pawisa i hlawh chhuak hnem dawn a ni tih a chiang reng mai si a. Mahse sipai ni chung hian engtin nge hnadang i thawh peih zawk le? Helamah chuan, sipai emaw police emaw nih chuan, tumah hnadang thawk peih an awm lo, thawh enah pawh an en lo hrim hrim.

    Mahni ka han inbih chiang a, ka hnathawh loh chhung hian inlamah, duhtawkin hna ka thawk thei. Mahse, thawh ka tum chuang reng reng si lo.

    ReplyDelete
  5. caribou, Sipai lam thilah kan thawk ani mai a... ka va han sawi chak tak em, kan sawi thiang silo. Ho taka lang, sawilo tura ngen kanni lawi si. Chumi "battalion/unit/platoon" tih lam anilo ania. Sawi thuilo mai ang.

    Hnathawh chu anuam alawm, keini ang hlawh tlem tan phei chuan thawh nasat angai em bawk a ni.

    ReplyDelete
  6. A va ngaihnawm em ve aw.. I lo thawk nasa ngawt mai. Tlangval hrisel tha pangngai pawh ni khatah dar 8 tal mut loh chuan a tukah kan nguai vek zel a nia. Kawng lehlam takah chuan i hriselna lamin chuti vaka a tuar lem lo chu i vannei zawk khawp mai. I ngaihsanawm takzet.

    ReplyDelete
  7. Sirjee..a ngaih nawmin i ngaihsan awm hle mai..mahni hrehawmna te, sapram a nih vanga zahpui miah lo a i puang ngam hi a ropui thlawt.mi tam tak chuan easy deuh turahj kan ngai thin..a ni bik hauh lo..a ni lo leh zual sapram ah chuan..hlawhtling tlak i ni tak zet. Han ziak zel teh. A ngaihnawmin i ngaihsan awm thlawt. burgerstud2005

    ReplyDelete
  8. I blog hi chhiar a manhla in a hlawkthlak thin hle mai. Entawn tlak, mi taima leh tumruh i ni meuh mai. Ka ngaisang hle mai che. han ziak zel teh khai.

    ReplyDelete
  9. I thawh ang hian tu pawhin thawk se intodelh lo a awm theih loh hrim hrim, i entawn tlak hle mai.

    Kan ramah hi chuan ni khat darkar 12 chhung hian hna tak tak hi darkar 5 pawh hi kan thawk meuh em maw ni le. Office ah nise a thawktute tibuai khawp hna hi a awm lo emaw tih tur a ni, la phiar, zuma khel leh titi mai mai hmuh tur an tam thei em mai.

    ReplyDelete
  10. mi fate hi chuan hna in lo thawk nasa e...keini ka buai ka buai kan ti ve hi lo nep em mai....

    ReplyDelete