Search This Blog

Wednesday, January 25, 2012

Keima chhunglam!

Mitinin mahniah theuh hian mize hrang, chhunglam leh pawnlan zia kan nei niin ka hreve ngawt pek a! Pawnlam ziaah hian mi tamzawk chuan reitak kan mize dik thup kan ching awm e. Han thup tingtang mah ila, inkawm rei chuan kan ze dik alo lang chhuak leh nge nge thin niin ka hre bawk.

Engpawh chu lonise, a langah pawh hian ka mizia hi ka thuplo thin khawpin ka inhre ve mai mai a. Tuna min hmutu chuan nakin hnua min hmuh dan tur a hmusa a tih ngam awm e. Internet nise, ka zia a dangin ka hre chuang bawk heklo. Zaidam tih a sawi ka ni fo nangin thinrim chang ka nei ve thin tho mai. Mahse ka thinrim dan hi midang nen inang emaw chu ka hre lova. Ka thinrim ve pawhin ka ti deuh hluai a, minute reiloteah ka thinrim a reh leh mai thin.

Ka ât vang anih em chu ka ring bik hauhlo nangin, ka nihna diktak leh rilru a awm ang ang hi ka puahchhuah pui leh phawng phawng mai thin. Mahni chhiatna tur emaw mimal chhiatna tur emaw, an zah theihna anih lemloh chuan thu zep vak lah ka nei heklo. Mimal anga lang thei tho, anihna takah chuan ram leh hnam thil anih vanga mimal zah miahloh ka nei nual thin bawk a, ka tihlan zeuh chang a awm thin bawk.

Chutia puak chhuak phawng phawng mi leh fiamthu duh tak ni a, fiamthu dawl viau e tilo chuan, miin min fiamnaah emaw ka chhungte an telh erawh chuan ka rilru ana hma angreng viau lawi si. Hetiangah hian insum har tih chang ka nei tep thin, ka insum theilo ka tihna erawh ani hauhlo thung.

Miin ka chungah thil tisual sela, ngaihdam inpeih rengin ka awm a, ka nghak thin bawk. Mahse, ngaihdam min dil hma chuan an lam pawh ka en/thlek ngai tawhlo reng reng. Ka huat vang erawh ani hauhlo. Ka sual vang zawk emni dawn? Ka tih dan tur kha an mahni atangin ka phut rilru tlat zel nia mawle! "Ka chungah thil tisual" kan tih pawh hi, a nihna takah chuan, tih palh thilthu a ka lungawi lohna sawi emaw ang chi nilovin, min tih mualpho hrehlo taka tawng thlahdah emaw, min tihnat luih duhna rilru nei ang chite ka sawina a ni. Mitên, "A pawi sawi a hlauhawm," an tih ang chi ka ni miah lova ka pawi sawi hi a har khawpin ka ring bawk!

Fiamthu hi ka duh em em a, thian ngainatna chhan pakhat ani hial awm e. Thian ngaina han tih hian ka ngaina satliah thin em aw, tih chang ka ngah thin. A chhan chu, thian anga ka ngaih tawhte chu pianpui unau ang maiin ka ngaina a, an lakah ka pangchang hreh lova, ka vui hreh hek lova, ka ring bur tawh mai thin a. Chutiang tho chuan ka chungah rilru pu sela ka duhthusam a ni bawk. Chutiang mi ka nih vang chuan pawnlamah ri phawng phawng thin mah ila chhunglam ngaihtuahna hi a nem leh duai thin.

Ka awmna hmun apiangah ka tlei thei mai zel niin ka hria. Heihi a chhan nibera ka hriat chu hmelhriat siam ka awlsam a, zaktheilo erawh niin ka inhre hauhlo thung. Ka inthlahrung ve thei phian lawi si! Chutia hmelhriat thar siam e tilo chuan ka thianhluite ka theihnghilh ngai hauhlo thung. Fel lohna ngah viau mah ila, thiante phatsan ngai loh thilah chuan ka hawipir ve ngam khawp mai. Mual minliamsan tate thlan han kalpelh mai hreawm timi ka ni bawk. Kalpelh hreawm ka ti thin ania'ng, an thlan kiang ka kalin tifai lovin ka kalsan khat khawpin ka ring.

Mipa ka nih angin pawnlam nunah bawraw chang neive thin mah ila, mi lungleng thei deuh mai ka ni thung. Ka chhungrilah hian nunhlui, thianhlui adt. ngaih kala na em em mai thin a, thuthiam ni ilang zawng, hla ka hril tam tawh awm mange! Tihtum ka neihin thulh ka tum lova, chutiang chuan thiante pawh beisei mi ka ni.

Ka hmaa inchhawp, ka thawh turah theih tawp a rinawm leh tha a tih tum mi ka nih laiin, hunawlah erawh thutak run emaw, thupui fun tak a awm peih hauhlo mi kani thung.

Patling, kum thu-ah phei chuan uaithla lam hnaih tawh nimah ila, nu leh pa la ngai em em mai, unaute ngai a chutiang ngaihtuah pah a muthilh chang nei ka ni fo bawk. Ka nunhlui sual tam takte ka ngaihtuahlet chang a tam a, hriat loh tumin chhuah chang a awm tho si. Tuma'n min hriatnawn tir lose tih hi ka rilruin a dil thin a ni fo bawk.

Ka pianna Mizoram hi tihtak zetin ka rilru luahkhattu ani bawk a. Kan ram enkawltute, mi chi hrang hrangte hian dimdawina nei hauhlo mai a an nghaisa hian ka rilru hi a tina em em thin. Nghaisa theia siamtu chu a chhunga chengte kan ni em, tihte ka ngaihtuah thleng thin bawk.

Tul huna ngaihdam dil hrehlo, loh theih lovah rikrum hreh biklo, rilru chhungrila ngaihdamna ngah ve tak, thiante ngai em em thin leh an thlavang hauh ngam tak, chhungte thlahlel a rilru pawh chutah chuan dah reng fo thin kalo ni ber awm e!

22 comments:

  1. Mahni nihna diktak pholang ngam hi kan tam lo khawpin ka ring. Nang zawng i nihna diktak i rawn thailang a, ka tluk lo hle mai che. Pa fiamthu duhtak i nih avangin i kianga awm a nuam hlein ka ring a, tawnhriat i ngah tawh avangin i titi a ngaihnawm hle bawk ang. Zoram i vei zia te, i hmangaih ziate hi i thuziak tawh atangin hai chi rual a ni lo bawk. Pa rilru tluang tak, mahni nihna ang anga lang ngam i nihna hi i awhawm thin khawp bawk mai.

    ReplyDelete
    Replies
    1. caribou, thalama ka luhlul thin ta hlauh hi ka vanneihna niin ka hria.

      Delete
  2. Mahni nihna ang taka lang ngam te aia mi huaisen an awmlo. Mahse mize thalo lai kan nei vek a, chu mizia chu a thup thiam apiang mi fing leh fel an ni thin, thup erawh a har thin khawp.

    Mize thalai in hmuh sak tel tel a kan awm hian kan lo khawsa ho thei mai mai chauh a lo ni.

    ReplyDelete
    Replies
    1. Ka nunhlui thalo tak takte hi ka ngaihtuah loh tum pawhin, "a chuti khatih thin kha ..." ti peih an awm leh zeuh thin hi chu a ninawm ve tep thin. Min chawk phur a an mahni nuih theih lova min awmtir chakna neitu anni fo thung.

      Delete
  3. OOPS! Nun hlui atanga inteh chhen erawh hi chu ka ngaithei baulo, nunhlui thatna awmchhun chu mi pangngai tan chuan "insiamthat nan leh hmalam hun a fimkhur nan" chiah.
    Kan past life leh kan mize thalo hmanga kan inteh fo chuan tumah kan inteh tlinglo ang. Chutiang ni ta se ropuina Lal pawh kha an khengbet lo tawp ang.

    ReplyDelete
    Replies
    1. Chutiang an awm chuan hmalam pan min chaktir thintuah hman ka tum hram hram thin. An tawngkam negative viau mahse, encouragement min petu annih fona lai a awm ve thin tho mai.

      Ni e, mi nunhlui sawi sek hi a tullo khawp mai. Simna nun a nung tawhte an sim kha pawi kan tih sak te pawh a ang thei rum rum ang chu mawle.

      Mi hmanlai nun hriatsak lovin tunlai nun hriatsak emaw, a thalai inhriatsak hi a dawngtu tan avan nuam thin tak em!

      Delete
  4. Pu Hva, ka nihna i rawn sawi ta emaw tih mai turin kan inang a ni, chhungril nunah. Mi tlang tak i ni-a ka lo hriatna kha a dik chiah e. Sawi hreh i nei lem lo va, hlauh em em i nei lem lo bawk a, thahnem i ngai thei em em bawk a. A tha ka ti. Mi rilru tihnat erawh a awl khawp mai a; chutah pawh ngaihdam i dil hreh lo lehzel kha i ropuina a ni ka ti lo thei lo. A ngaihnawmin tha ka ti khawp mai.

    ReplyDelete
    Replies
    1. Diknaah huai ngam ila, dikloh naah ngaihdam dil hrehlo bawk ila. Tin, ngaihdam min diltu ngaihdam hi hrehlo ila, chutiang tho chu kan duh niin ka hria.

      Delete
  5. Pawn lam lan dan ai maha pawimawh chu, chhungril tak a ni. I sawi ang khian, mi thenkhat ze thup thei tak an awm. A hnuah an mize dik tak a lang leh mai thin.
    I mize dik tak i ziak ngam a, i huaisen khawp mai. Mi rilru tha tak i ni bawk in ka hria.
    A hmingin hostel ah kum 9 vel zet ka awm a, thian ka ngaina ve tak zet bawk.

    ReplyDelete
    Replies
    1. "Hmelhriat ngah tur, thian erawh tlemte," an tih kha :)

      Delete
  6. I mizia huai takin i rawn sawi ngam a, mi rilru tha tak leh paukhauh tak i ni e.
    Keipawn thian hi ka ngaina em em a, ka awm na apiangah ka tlei ve thei.

    ReplyDelete
  7. Ni tur awm anga ka ngaihdan che leh i inhmuh dan a danglam lutuk lem lo ve.

    ReplyDelete
    Replies
    1. Tlem danglam hret a awm ani maw hahaha, min lo hrilh law law la ti nia :)

      Delete
  8. "Mipa ka nih angin pawnlam nunah bawraw chang neive thin mah ila, mi lungleng thei deuh mai ka ni thung. Ka chhungrilah hian nunhlui, thianhlui adt. ngaih kala na em em mai thin a, thuthiam ni ilang zawng, hla ka hril tam tawh awm mange! Tihtum ka neihin thulh ka tum lova, chutiang chuan thiante pawh beisei mi ka ni."

    He paragraph hi ka va han duh em. Hetiang mizia nei hi an luck duh lutuk tih ka hria :)

    ReplyDelete
  9. Hmmm...Huatthu hi ka ngah em em lova, mahse ka huatzawng ani tih an hriat tawh hnua an sawi leh talh anih chuan tumah ka ngaidam ngailo, khawvel ramzau takah kan pahnih tan hmunzau tak a awm alawm. Taka, damchhung hun tawite ah hian huat em em hi ka lo nei tlem khawp mai e...

    ReplyDelete
  10. Hei tlang takin i mizia i rawn puang chhuak a, rin (guess) ngai lovin, a hahdam thlak e.

    ReplyDelete
    Replies
    1. Mind game khelh hi ka peih velo alawm. Mitmei ven ngai kiangah te hian ka awm peihlo hrim hrim, theih hram chuan awm loh pawh ka duh.

      Delete
  11. Pu HV, ka rin dan vel chiah i ni e!! I bula awm a hahdam ang!

    ReplyDelete
  12. Mahni nihna hrechiang leh ziak chhuak chat ngam nih pawh hi a ropui e.

    ReplyDelete