Search This Blog

Sunday, February 12, 2012

Chheile -2 !

Visa dilna ka thehluh khan, "darkar 24 leh 48 inkarah beisei tur tih kha enge a awmzia," tiin ka zawt tawh a. Ka zawhna chhan pawh chutia sawi chung khan zinglam a dilna thehlut ho chuan tlai lamah an lam leh theih thin vang a ni a. Clerk chuan, "chawhhma dar 11 hmaa thehlut tan chuan tlai dar 4:30 hnulamah an beisei theih thin. Nang chu tunah i thehlut chauh a vawiinah chuan beisei chi ani lovang," tiin min chhang a. Kei chuan, "anih chuan hei, thehluh hun tawp dawn, tlai takah ka rawn thehlut si a, naktuk atan chuan chawhma dar 11 hmaa thehlut ang ka ni dawn tihna a ni maw. A nih chuan naktuk tlai lamah ka beisei thei ang em," ka ti zui zat a. Ani chuan, beisei a pawi loh tur min hrilh mai a, a chian ngamloh thu leh e-mail/txt a min rawn hrilh zel dawn bakah ka chhui theih dan min hrilh a. Tichuan ka hawsan ta kha a nia.

Nilaini apiang hian ka fanu Janis shot (injection) tur a hruai a ngai thin a. Visa dilna thehluh ni kha Thawhlehni, ni 7 ani a, a tuk chu Nilaini anih tak chu. Tichuan, visa/passport lam tura kal a ngaih tak thutin tiin, ka fanu shot lakni chu Ningani atan ka sawn tir ve mai bawk a. A tuk Nilaini chuan ka fanu skul ban (chawhnu dar 3:30) chuan, nidang a shot la tura hruai nghal thin chuan a putea tein lam ka panpui ta a ni. A putea hi a hma nia khan Janis alo awmpui lawk hman dawn em tih kan zawt hmasa tawh a. Anu hnabang lo haw in rawn lamkual mai turin kan inbia kha a ni a.

Midang hnenah mahni fanu va dah meuh a 'visa an peih tawh' tih thlir reng a ka nghah chu tlai dar 5 a pelh hnu, ka fanu te in an rawn thlen leh hnu pawh chuan ka dawng thei ta reng reng lo mai. Huiham, Nilainiah chuan a chhuak dawn talo anih chu, ka nghak thlawn e. Ka thehluhna thiamloh a ni lova, ka thiamloh nipawhin ka hrelo. A 'beisei theih' tih a sawi a, ka tan kar a hlat em avangin an khar hman loh nan chhuah vat ka duh vangin kalo inpuahchah ve ni maiin ka hria!

Ningani alo thleng leh ta. Visa an peihfel tawh tih min rawn hrilh ta bawk. Hemi ni hian allergy lam doctor hnenah ka hruailo thei tawh lova, ka hruai ta a. Chutia a shot lak hnu, darkar chanve nghak tura kan thutlai chuan ka fanu ha-nghing tan chu ana ta a. Kar hmasa lam khan dentist-in a ha nghing a phawiin pakhat zawk chu a na a tih loh chuan a phawi hrih dawnlo tih min hrilh bakah, a nat chuan ko turin min chah kha a ni a. Janis-i nu min rawn chhawk hun nghah pah chuan dentist chu ka ko ta a. Janis-i nu pawh lo thlengin inbe hman lovin, kan invai liam a, ka kalsan ta a. Motor helkual pahin dentist pisa clerk nen chuan kan inbe zel a, appointment chu ka siam fel ta a, tlai dar 4:45 bawr vel chuan Washington, DC lam chu ka pan ta a ni.

Washington, DC helkual pawp kawngpui I-495 thlen hma zawng, I-270 kawngpui (highway/Freeway) chu pangai takin ka tlan vei par par a. Tichuan le, Maryland leh Virginia state inrina, Potomac luipui chunga 'American Legion Memorial Bridge' ka thleng dawn chiah tih chuan motor kal reng reng a awm talo, kan ding thup ta mai! Radio kan ngaithla a, accident na tak kan hmalamah alo awm chu niin. Visa/passport lam hnuah in ka haw anga ka mu-sek (nap) ang tih nak laiin, ka thil lam tur pawh chu ka lam hman ang em tihlam a ni ta.

Han pen chhuahna mai tur lah a awm der ilo. Peng awm hmasaber chu ka kal tumna panna kawngpeng, George Washington Memorial Parkway kha a ni mai a. Chumi lah chu mel hnih (Km 4 vel)emaw lekin thlenglo mah ila, kan chetsawn that duhloh em avangin ka thleng hleithei der silo.

Khua pawh a thim ruai tawh a, tlai dar 6 a ri thuak ta mai. Visa/passport lam chu khami ni atan chuan beisei tur a awm talo. Ka ngaihtuah ber chu, "khawilam atangin nge haw tum ila tha ang aw," tih ngaihtuah lam a ni ta. Ka penna tur lamah chuan ka peng ta thova, chuti lam atang chuan remchang hmasaah hawna tur lamah pen chhuak leh ta ila ka ti a ni.

"Chhei" Km 5 emaw lek kan tlan hman tihah chuan chuti lam pawh chu kan ding leh ta tlat maile. Radio vêk chuan motor accident a awm tih a rawn puang leh ta. Hun khawhral nen, zun a chhuak tan tawh bawk, kannu lah chuan chanchin min rawn zawt ta deuh deuh. Ka penchhuah tumna peng lah chu lehlam an inhnawhkhah vek avangin Washington chhung, Georgetown a lei pakhat, 'Key Bridge' thlen a, veilam a kual a 'Canal Road' lam atanga haw tum chu ka rilruk ta zawk a. Chumi lai (bridge) ka thlen chuan zan dar 7 a ri der tawh mai, "A-si". In ka thlen meuh chuan zan dar 8 ari tawh a, mut-sek (nap) chu khawilam. Chaw ka ei a, hnalam kal turin ka inbuatsaih zui ta a ni.

Zirtawpni chu kannu a chawlh vangin thinthiin ka muhil thei a. Tichuan hahdam takin ka thova, chaw eikham hnu chuan inlam tul ilo ti a kannu ka puih hnu chuan Washington lam bawk kal turin ka chhuak leh ta a. Ka chhuah hun hi dar 2:30 bawr vel a ni. Ka chhuah hma chhan pawh, 'engemaw kawng lakah a awm leh pawhin ka tlai tawh lovang, money order ziah dikloh pawh an hming anih vangin pawisaah min chantir sak theih takin' tih vang ani ber awm e.

Dar 4 rik hma hretah tluang takin ka thleng thla a, money order a an mahni agency hming lo inziak tawh chu kan pe a, ani clerk chuan pindan-ril lam a panpui vei vut a. Nur nang nangin alo chhuak leh, "sir, keini chuan kan thleng theilo tlat mai. An mahni, money order lamah thawn mai ta che, avan pawi ve aw," a rawn ti zawi deuh sup a. 'Sarigama papa, hairehai!' love tak ani awm e. Chutah le dar 4 alo ri a, inchhungah tumah awm an phal talo. "Nakin dar 4:30 ah kawngkhar kan hawng leh anga, chutah chuan visa/passport a lam theih ang," tiin nui sangin min chhuah tirta hlawm e. Nui sang thlir nuamlo pawl tak ani awm e.

Pawn lah chu a vawt vur mai si, .C phei chuan minus hial ani ang chu mawle. Awmna ngai renga awm chuan ka khawngzo mai dawnin ka hria a, dawr velah chuan ka lutkual ta a. Dawr hmasaberah chuan kan lut tawl mai a, an thil zawrh chuan min tinui chhuak huk nghe nghe. Mipat hmeichhiat hmanna lam atana hmanraw chi hrang hrang zawrhna alo nia, then tha in ka chhuahsan leh ta a. A chhak maiah chuan thuamhnaw dawr a awm a, kan lut ve rawih a. Nalh tih ve tak (lei dawnlo mah ila) ka hmuh chu kan thlek kual vel a, "chheile" avan to tak em! Tshirt pakhat chu $119+tax (Rs 6000 dawn) anih pek chu mawle. Rilru tete chuan "vel mai mai che u hian aw," tiin ngaisang lemlo tak chuan ka chhuahsan leh a. Dar 4:30 a rik dawn tawh avangin ka kir thla a, Afghan nula pakhat alo tawng zet zet a, ngawi rengin ka ngaithla ta a.

Kawngkhar an rawn hawng a, a thleng hmasate kan inhriat avangin tumah inchuhbuai lovin thlen hmasak dan indawtin kan lut a kan intlar ta a. Lak chhuah dawn a, hming ka sign lai chuan clerk chuan, "Stay safe, have fun" tiin nui ver verin min thlah ta a ni.

13 comments:

  1. A ngaihnawm leh pek hle mai! Buaina neuh neuh hi i va han tawk thei em em. Tun tumah pawh hian i tawk hnem khawp mai. Kei chu ni ila ka dawhthei thei lo hialin ka ring. I dawhthei ka ti. Chuan, a tawp lama i dawr luhna hi..hahaha. Fuh lo ve chiangkuang!!

    ReplyDelete
    Replies
    1. TS, kha dawr ami ho kha Azl ah rawn hawn ila lunginka tang chiang viauin ka ring hlawm ngial ngual hairehai :D

      Delete
  2. Traffic jama tan tlat chu a hrehawm ve fu ang a.... Laklawh thilah zun chhuak, ekchhuakin nangching ta phei che se chuan, a buaithlak duh fu dawn anih chu.

    T-shirt man, in pawisaa cheng za sawm pakaw man chu a to emaw ni le. Helamah chuan cheng za man bawr vel ka hak chang chuan chik taka min melhtu ka tawng fo asin....

    Passport leh visa buaipui ngawt pawh chu a lo hautak hle anih dawn hi, chhangchhepa tan chuan.

    ReplyDelete
    Replies
    1. Ka Tshirt hakte hi helam cheng 15 man emaw a ni tlangpui.

      Ni e, chhangchhepa tan chuan lamhla kal hi hautak deuh a ni. Ka hnathawhna hi zanlam a tam zawk hlauh a, kannupa kan inchhawk thei hlauh zawk. Zingah kannu a chhuak a, keiin kan fanu breakfast, skul kal tur ka buaipui a, ka thlah a. Chumi hnu chuan skul ban (dar 3:30) hma tul dang tih alo ngai a. Zanah hna ka thawh vangin reilo te tal ka chhinve angai thin bawk si, khirh ve thei tak chu a ni. Hun hian min daihlo ani ber.

      Delete
  3. Duh tawka i han che tak tak chu a ngaihnawm zauh zauh mang e. Tluang takin lo thleng chho teh u, chhangchhepa nih hi zawng a buaithlak a nih hi.
    Nui deuh roh si, ngaihnawm ti taka ka chhiar thlak pap pap chu le.

    ReplyDelete
    Replies
    1. Chhungkuaa lo hawna tur buaipuiin ka phi buai rei tawh bawk a, Mizoram lamah chuan hahdam theih han in beisei ila...ti ngawt ila ka ring chiahlo hehehe

      Delete
  4. Ngaihnawm buaithlak hle mai! Traffic jam vela i awmdan tur ka mitthla vel. ThaiBoy-a dila i hmel kha ka mitthla :D

    ReplyDelete
  5. Buai hle lo la chu he post hi chhiar tur a awm dawn si lo a. A sequence a awm zel beisei chungin.....buai zel teh...haha

    ReplyDelete
  6. Buai theia awm hi a va lo hlu em! I buaina erawh midang tan thungaihnawm a tling bawk si, a hlu double a nih ber chu. Lo buai zel phawt mai teh.

    ReplyDelete
    Replies
    1. Ni e, buai theilo nih ai chuan buaithei nih hi nun pawhin awmzia ala nei zawk alawm :)

      Delete
  7. Chhiar man a awm leh hle mai. Han sawi chhawn tur chi eng eng emaw hi i tawng thei hian ka hria. Narrator thatak i nih vang nge ni, adventurous tak ani phawt mai a. I tun dinhmun a awm tura i fight nasatzia ka chhiar hian i ngaihsanawm riau mai.

    ReplyDelete
    Replies
    1. Buai theia kanla nung hi Pathian malsawmna a lawm. :)

      Delete