Search This Blog

Wednesday, May 9, 2012

Ka pawl zawm pakhat inhmuhkhawm leh inthlanna

Mihring han nihve takah chuan awmna khua leh tui tan emaw ram tan a pawl pawimawh tak tak zinga engemaw ber han zawmve tehi chakna a awm thin a. Chutiang pawl han zawmve ka chakna thin pawh rualpawl nan a tha ka tih bakah, khawtlang tan kan tangkai theih vena a awm theih vang a ni thin. Tichuan, eng eng club emaw ka zawmve ta ngei a, chuta ka pawl zawm pakhat chuan thu-relkhawm (meeting) an neih dawn bakah member thar lakluh chungchang  sawikhawmna leh vote lak anih dawn avangin ka member puite chuan telve ngei turin min ngen avangin kava telve ta ngei a ni. Hemi tum a kava telve na chhan pakhat erawh chu an inrelbawl dan ka hriat belh duh vang a ni ber awm e.

Tichuan, April ni 24, 2012 alo nih chuan ka member nihna hmun, Fraternal Order of Eagles, Hagerstown khua a  Aerie 694 ah chuan tlai dar 7 (April thlatawp atang hian dar 8 ah ni ala tlalo) meeting thleng hman turin kan awmna khua, Frederick, Maryland atang chuan Hagerstown lam panin ka inkhalh chhuak ta a. Hagerstown hi  Frederick atangin mel 29 (Km 47) bawr vel ani a, minute 28 emaw tlan a ni.

Kan aerie ah hian bar, restaurant, dancing hall, karaoke tihna hmun bakah pool dawhkan 4 leh snooker dawhkan pakhat kan nei ve nghe nghe a. Memberte tan dancing hall zau tak, Vanapa hall tiat thuak tur chu $100 lek chawiin thil tihkhawm nan a hman hawh theih bawk a.

Engpawh chu nise, dar 7 a rik chuan inchung lamah conference room (!) ah chuan kan lut chho ta dial a. Kawngkhar kan luh chiah chuan ticket minlo pe a, thawhlawm $1 kan pe zel bawk a. Thawhlawm kan pek akhan ticket min lo peve zel kkha ania. Khami ticket kha meeting zawh hnua duh duh pakhat in theihna ticket anih bakah meeting zawh a lucky ticket anga thum-vawr ani bawk dawn a ni.

Member nawlpui thutna hmun ka pan phei a, ka thu ve ta a. Hall lianpui maiah chuan Order of Eagle hmuchhuaktu te leh chumi aerie 694 hruaitu hmasate thlalak leh milem mak pui pui a intar thlar bung mai a. Kawngka zawn bang hnunglam lai takah chuan thuthleng lianpui, a chunga mu (eagle) thla zar duai lem chuang chu a awm a. Chumi chu president thutna a ni. A ep chiahin pindan kil lehlamah Vice-president thutna a awm leh a. Kil lehlam lehlamah Chaplain leh advisor an thu bawk a, president hnaih takin a dinglamah secretary a, secretary piah lehah chuan tul tul a puibawmtu (!) a  thu thung a ni. a pindan lai takah hian pulpit ang deuh a siam a awm bawk.


President chuan rorelna hmun tuboh an khawngri a, kan ngawi ta thap a. Eagles thuchah a sawi zawh chuan puibawmtu pakhat chuan American flag rawn  keng pheiin, pindan lai taka dawhsan kiangah chuan a tungding a. Tichuan Mu (Eagle) lianpui, dar (brass)a siam chu rawn la lehin dawhsanah chuan a dah leh bawk a. Tichuan meeting a tel zawng zawngte chuan  Pledge of Allegiance kan nei ta a. Hemi hi America flag hnuai a rinawmna thu-tiamna a ni. Tichuan Aerie chaplain alo kal leh a dawhsan kiangah chuan dingin tawngtaina a nei a, lawmthu sawina a ni ber.

Meeting naah hian topic tlangpui an siam dan chu: 1. Pawl kalphung 2. Minute hmasa chhiar.3. Minute hmasa atanga thil tih tur tih tawh sawina/ tih loh a awmin enge a chhan? 4. Tih tum thar hrang hrang saihona. 5. Hmalak dan tur hrang hrang te leh thil tul pawimawh tak tak bakah, thawhlawm tlingkhawm zat leh mi tanpui nan a semdarh anih dan tur te sawi a ni a. Tin, surveillance camera thar vuah anih tur thu leh, pawl pawisa hmang lova  member ten an mahni pawisa an thawhkhawm mai tur thute kan ngaithla a, a ngaihnawm kher mai. Kan pawl hian kumtinin dollar maktaduai tam tak an thawhkhawm chu mamawh zualte tan a sem darh chur chur thin a. Tin, naupang rualbanlo tan thil tihkhawm leh infiamna leh inelna te a buatsaih kumtin thin a ni.

Meeting kan zawh hnu chuan member thar nih tumte kan duh leh duh loh  thlanna kan nei dawn  ta a. President chuan kan vote thlak dantur a sawi hnu chuan puibawmtu-in bawm chhungah crystal dum leh var mum chu a dah hlawm a, chumi chu dawhsanah khan a dah ta a. A crystal dah dan hi a duh duhin enfiah hmasak thiang a ni. Tichuan, thuang khat (line siamin) a kalin, dawhsan, vote thlakna tur bawm awmna lam chu kan pan ta a. Vote thlak tur apiang chuan mahni veilam awm khawih hmasa-in president lam hawiin kan phar phei leh thin a...chibai bukna a ni. Hetia chibai buk hi thusawi duh nei emaw pawhin tih zel tur a ni a, thusawi tur nei chuan, "Worthy president" tiin president kha zah takin a chibai (address) phawt angai nghe nghe.

Vote kan thlak chu mimal member ni tura kan duhlohvah khan crystal dum kan dah zel a, kan duh ate-ah khan crystal var kan dah zel thung a. Crystal dum nge a var tam zawk kha puibawmtu khan an en a, a tam zawk a sawi hnuah Worthy president, worthy vice president leh advisor ten an en leh a, member dangte pawhin duh chuan a en theih a. An en apiang khan an hmuh dan an sawi nghal zel bawk a ni.

Inthlan zawh chuan chaplain-in tawngtaina hmangin, "Engkim siamtu chungnung ber Ropuia" ( a tih dan) chu chawimawi chungin kan inhmuhkhawm chu a khar a. Lawmman mantu tur ticket number an vawr a, ka manlo chiang leh viau a, mahse a free-in ka duh duh pakhat ka inthei tlat. Motor khalh tur ka nih vangin intalo chuan midang ka pe a, Rolling Stones hla, "Waiting on A friend" ngaithla hmasa berin ka inkhalh haw leh ta a.

Tun atanga kar hnih naah trustee thar thlanna kan nei leh dawn a, chumi erawh chu kan meeting naa anlo duan lawk tawh angin, inthlanna buaipuitu tur ten engkim anlo peih fel vek anga, chhun dar 12 atangin tlai dar 7 thleng  duh hun hunah va thlak mai tur ani tawh thung. Eitur a thlawnin a awm reng bawk ang.

8 comments:

  1. A ngaihnawm e. In pawl tih dan chu a khirkhiap reuh hle mai...neuh neuh ngai a tam hmel ka ti...:D

    ReplyDelete
    Replies
    1. Club chhungah chuan tunge hotuber pawh hriat loh khawpin an ho hlawm a, an uang peih bawk. Meeting/committee anih erawh chuan dan ang thlapinan kal a, an thutak ropui. Hotute pawh inhrilh ngai lovin an hriat vet vet khawp mai.

      Delete
  2. A va BVT ve. Meeting-a in thiltih pakhat khi tha ka va'n ti tak em! "2. Minute hmasa chhiar." tih tak hi... hei hi Zoramah leh Zofate Pawl hrang hrangah kan ti vak lo, kan uar lovin ka hria. Reminder & Encourage-tu tha tak niin ka hria. Kar a lo awl rei deuh chuan mi tam tak chuan, kan hnung lama kan thurel leh kan thiltih engmah kan hre tawh thin lo. I expe hi Zofate tan zir tham a awm-in ka hria...

    ReplyDelete
  3. I pawl zawm kalphung chu an tih kher kher hmel hle mai. Eng pawh nise, nang meuhvin i zawm chu, pawl ropui tak anih ka ring hrim hrim e.

    ReplyDelete
    Replies
    1. Committee/meeting velah chuan an fir/strict khawp mai... pawisa a involve nasat bakah thil tihsual palh an hlau em bawk a ni. Tin, Fraternal Order of Eagles annih angin an dan ang thlap khan an kal kha a tul ve tlat alawm. Bar, restaurant, karaoke leh pawisa an hlepte hi mi mangang leh mamawhte tanpui nan a kalral vek, a ropui ka ti khawp mai.

      Delete
  4. USA a in RSS an ni maw? Tak taka mihring nun hi inkaihhruaina hian a tihpuitlin bakah a vawng khawp mai a, a tha e.

    ReplyDelete