Search This Blog

Thursday, July 5, 2012

System tha

Ram hrang hrang hi ka awm kual tamlo nangin tlawh erawh ka nei ve ta nual mai. Hetiang ram ka hmuh ve chinah te hian (country ani emaw state a ni emaw) ram rethei ho hian dan leh hrai an zah lovin, an palzut hrehlo zual niin ka hmu fo mai. Chutih karah, a chengte chuan chhuanlam fahrah te te an nei ve far hlawm a, belhchian erawh a dawl ngai lem hlei lova!

Ka pianna ram, Mizoram hi han thlurbing  ta ila. Mizoram state-ah hian dan leh hrai fumfe tak tha tak tak kan ngah kher mai. Mahse, chu dan leh hrai awmte chu a siamtute thleng maiin palzut a zahloh an ni tlat hlawm si. Chu mai a ni lova, vantlang pawhin dan leh hrai awmte chu a hming mai a awm ang deuh lekin kan ngai a, inhawrkhawm nikhuaah phei chuan zahna chhete mah kan nei tawh ngailo. Khawvel hmun hrang ami te'n min rawn thlir reng a ni tih pawh kan ngaihtuah pha tawh thinlo nite'n ka hre thin. Kan pi leh pute ngaihtuah dan kan la chhawm zel te pawh a ang lek lek fo mai. An ni kha chuan an ramri piah khawthlang lamah khuan mihring chêng an awmlo emaw anti hial a nih kha!

Ram tha leh dan leh hrai tha nei tur chuan dan leh hrai awm sate zah thiam a, theih ang tawk a zawm peih leh zawm duhna rilru neih a pawimawh. Kan ram kan hmangaih  anih chuan dan leh hrai kan hmangaih tur a ni ang. Tawngkam-in "Ram ka hmangaih," ti ti mah ila, dan awmsa te kan zah lova, kan palzut hreh miahlo anih chuan kan lei (tongue) kan vial thlawn, kan tawng thlawn tihna a lo ni dawn a ni.

Han sawi ta lawk ila, nimin, July ni 4, 2012 khan kan chenna khua, Frederick, MD ah chuan United States piankum 236 na lawmin Baker Park-ah kan chhung kal ve a. Chuta ka thil hmuh leh kan chik zual deuh pakhat chuan rualawhna nasa tak min pek bakah, "ram anlo van hmangaih tak em," tihna rilru min pe zual sauh mai.

Chutia USA kum 236 tlin lawmnaah chuan zan lamah halmawi (fireworks) mipui en turin nasa leh ropui takin an hal a. Hetia mipui kalkhawm hi 50,000 atanga 60,000 vel kan niin Frederick chanchinbu chuan a chhuah nghe nghe.
 http://www.fredericknewspost.com/sections/news/display.htm?storyID=137817

Chutiang zat mipui kalkhawm te halmawi siper emaw laka an him nan tiin, police lamin, "Police line do not cross" tih an thlung kual duah mai a ni. Chumi line an thlun kual duah pel a thu mi 2 chu ralkhat atangin chiang tak maiin ka hmu thei a. Ka rilru te te chuan "hispanic an ni ngei ngei ang," ka ti niap niap a, ka pan hnai ta ngat a... anlo ni ngei bawk a. Ka rilru bawk chuan, "Border pawh dan lovin an rawn paltlang (cross) ngam a, hetiang police hrui zam mai mai zahna chang hreawm pawh an nilo reng a ni," tihna rilru negative angreng tak ka neih phah ta nghe nghe a.


Thlalak kual pah chuan ka teikual deuh chiam a, kan hawi vel thin a, nichin a hispanic 2 ka hmuhte bak kha police hrui thlun pel a awm tumah ka hmu derlo nia mawle. A rammite chuan,"Dan a awm a, kan zawm tur a ni," ti niawm takin felfai takin hruithlun pawnah an awm vek mai. Hetiang a vantlangin dan leh hrai an zawm chuan 'SYSTEM THALO" neih a harsa khawpin ka ring. 

Frederick khua a ka awm tirh hian tumkhat pawh petrol ka thunna hmunah tum lemlo takin engemaw leiah ka paih palh zeuhva. Nu pakhat chuan hla deuh tak atangin minlo hmureng chu niin, a rawn kal nal nal a, "tinge tawih theilo leiah i paih a, i ram i hmangaihlo em ni," min rawn ti chhak mai. Ka zah dan zia kha ka theihnghilh mai mai tawhin ka ringlo.

Ram tha leh system tha nei tur chuan dan leh hrai awmsate kan zawm that peih a pawimawh a, dan kengkawhtute kan thlawp that a pawimawh bawk ang. Chutih karah dan kengkawh tute pawhin mipui zah leh fak an hlawh zual theih nan dan chu khauh takin an kengkawh tur a ni bawk ang.

Dan leh hrai zawm leh zawm loh hi dawt sawi ang deuh ani awm e. Dawt sawi laklawh tawh chuan a khuhna tur a ngai a emaw, dawt dang sawi a harsa tawh ngailo. Chutiang deuh chuan dan hotê kan zawm peihloh hian a dang chu zawm loh mai harsat lohna a awm tawh ṭhin niin ka hria.  Ram a awm chuan dan leh hrai a awm a. Dan leh hrai zahna hmun a piang ram nuam leh zahawm, chenna tlak, radang thik phak anlo ni thin.

11 comments:

  1. A dik khawp mai, pawl hrang hrang a kan hotu te hian kan dan neihsa palzut a, dan siamtu emaw, a kengkawhtu emaw nih vanga dan chunga leng anga in ngaihna a awm ta fo mai. A tha lo khawp in ka hria.

    ReplyDelete
  2. Traffic rules, duty awm loh vang mai mai a kan zawm that loh fo thin zia en hian dan kan zawm that peih loh zia a lang khawpin ka hria.

    Dan hi chu kan nei tha, mahse kan zawm tha peih thlawt lo a ni. Hnamdang dan zawm lo palh erawh kan ngaithei lo hle lawi si.......

    ReplyDelete
    Replies
    1. caribou, a dik ka ti hle mai, ka hmuh dan a nive tho mai. Insiamthat kan ngai khawp mai :( huiham

      Delete
  3. I thil post chu a van tha em! Ka ngaihtuah ve fo ka ziah ve thiam loh a ni. Indian mi reng reng hian dan kan zawm uluk lova, mahse vaiho ai pawh hian Mizote hian dan hi kan zawm lo lehzual.

    Midangin awlsam taka dan an palzut lai a zawm bik nih chu mi mawl nihna a ni lehzel a, Mizote lah hian mawlbik nih hi kan duh der si lova. Chuvang chuan dik lo takin hna hmuh kan tum a, kal hun aia tlaiah kan kal a, ban hun hmain kan bang a, sumdawngin a hlep tur ai a tam hlep a tum a, damlovin a bill theih aia tam bill a tum a, fel hlel takin gas lak kan tum a,gas agent te lahin gas an tichingpen a etc, etc. Kan buaina zawng zawng hi chhuichian chuan dan kan zawm loh vang hi a ni nge nge thin. Mizote min chhanchhuak thei awmchhun ni a ka hriat chu dan diktak a kenkawh leh zawm hi a ni in ka hria.

    ReplyDelete
    Replies
    1. diary.... dikna hian lalna chang se ka ti thin teh asin!

      Delete
  4. Dan te chu bawhchhiat tura duan mai mai anni alawm :D

    ReplyDelete
  5. Replies
    1. Ram hmangaih vangin mahni ramah kher awwm a ngai hauhlo mai. Ralkhat atanga han thlir hian alo chiang ber zawk fo asin. Chutiang chuan, fuihna kan inhrilh thei zawk ngai e.

      Delete
  6. article puitling leh tha tak a ni.

    ReplyDelete