Search This Blog

Thursday, July 22, 2010

Early life 1 (Azl, naupan lai)





Aizawl Civil Hospital ah chuan, ka thianpa ber pakhat nita, Lalchhuankima (fam)(L.Ch.K.A), a nun a hrinna khum an chhuahsan ni chiah, February ni 5, chuan ka nu'n thihngam a harin, a letling zawngin min hring a. Kum aliam ve zel a reilo teah chuan sikul lut rual kalo ni ve reng tawh mai a, Mary Mount Convent, Aizawl ah chuan ka lut ve tan ta a. Ka sikul luhpui ka ngam loh te hian nitin deuh thaw hian min vel thin. Kei lah chu sikul ban veleh ka tlan hawng a, kan kawmchhak, Phulraw hung kar atang hian Sairawkherhin ka lo perh ve ziah a a tukah min vel leh nge nge thin; chutiang reng reng chuan inkawm/invel in kan khawsa thin. Pawl thum emaw kan nih chuan mei zukruk kan ching tan a, Lalpuii (MCS) te thianzaho hian min rawn enthla thin. Tum khat phei chu Babita Smith (Anglo Indian) tuna Shillong a awm ta nen kan infiam chu an mit alo kham deuh aniang sister Kiran chuan min hnawt chhuak a, chhungten min dil sak leh avangin inline naah ngaihdam dilna lehkha min chhiar chhuah tir nghe nghe.


Ka pa chuan Employment Exchange a thawh lai chuan MCS te examin a lo tling ve hlauh mai a, N.Vanlaiphai ah AO pisa an enkawl tir ta a. N.Vanlaiphai ah chuan 1977 khan han zin ve in, Pa Kulh-a (Lalkulha, inchaichak) Sakawr, Pate-a! chu ka sakawr chung chhuan hmasak ber a ni ta a ni. N.Vanlaiphai supply tlangah te chuan Dakota thlawhna hian sipai ho ration tur parachute in a rawn thlak thin a, a hmuhnawm kan ti thin hle mai. Kulikawn atang pawh khan Reiek tlanga an thlak thlir thin mah ila, N.Vanlaiphai ah hi chuan bawnghnute tin (dut) tla darh te kha kan chhar thin a, a nawm dan a dang khawp mai. E.Lungdar piah Leng khua ah kan zin a, an khaw kawng chu motor kal zen zen ni heklo le, kan kal pahin kan sam phei zel a, chutia kan chet vel naah chuan ka nau Sangtea chu hnim karah rei vaklo chu kan hlauh nghe nghe a ni.

Leng khua kan luh dawn hnaih chuan, a khawmi ten motor thawm an hre pha tihah, 'haw haw' chungin motor an rawn hmuak a, a hmuhnawm hle mai. Zanah chuan petrol hnim tur ruk tum an tam avangin, tlangval tlawmngai te chuan Mizo pa Sairawkherhin motor chu an veng ta nghe nghe a ni. Hetih lai hian an khawsak dan hmanlai Mizo ang mai kha a la ni ber a, Hrikhrah te pawh an la in Vam sak pek pek mai, thil dang pawh hmuh tur a tam ngei mai.

Aizawl lamah chuan MNF leh Vai sipai an in kap zeuh zeuh reng a, kawtthler ah pawh armored car hian khawchhung a fang thin, awm an ti nuamlo thin hle a ni. Vai sipai ho lah chuan an duh duh hunah kan kawngkhar te hi an rawn chhir hawng a, nu leh pa te hmai ah te an han nawr nawk nawk mai thin kha chu, tih theih neih siloh chuan rilru a na duh vawng vawng thin kher mai. Tum khat chu kan thianpa u hian pistol lem hi Kulikawn phei ah a vaivir a, Pu Mat-a (fam) in piah a CRP duty chuan MNF emaw tiin (chhunah) a kap pawp mai a, a kah thelh lai chiah chuan, Pu.Thanthuama (fam) te in kiang CRP camp atanga lo chhuak an Captain chu lu phel phawk hian a kap ta. A ni let reng chu a thluak bua chu ar te chuan an chuk a, Salvation ho in luah te fapa, Rozama nen kan phiat fai ta nghe nghe a ni. Ka thianpa Vel-a u, MNF Captain Lalhleia pawh chu vai sipai kutah pasaltha thihin a thi ve ta a, Tuikual Excise office chhak, rangva inchhawng sei zet chung, a pa te chenna ah chuan a ruang nghatin kan sikulin kan va vui liam ve a, ka mitthla ah hian a la lang thei reng thin.

Tawlailir siam nan thing tuai kan pu han pu a, a ke tur kan tuk chawp bawk a, a chhungphum tur pipe kan ngaihven a, chawhmeh kanna tel a hek duh kher mai. Tlangnuam atangin kan han intlansiak thin kha ania. Thakthing bazar ah puanthui hnenah kekawr kan han thui tir dawn a, a tlang arh lam 12" kan han ti ngei a, chumi chu ahnuah kan belh arh leh tho thin. Kulikawn Pc-a (Pachanga) phei chuan a kekawrbul thlengin a belh arh thin nghe nghe. Pheikhawk hnuai tur Pang thing te kha avan lar thin tak em!

NB: Parents Day pic ah khian tlar hma ber dinglam ber dawttu kut phar kak khi ka ni. Sikul lut tur chiah thlalak ah hian, kawrchung ha hi ka ni; ka sikul luh hmasak ber ni a ni e.

CLICK PIC FOR LARGER SIZE

24 comments:

  1. This comment has been removed by the author.

    ReplyDelete
  2. ziak zel teh... ngaihnawm ngaihnawm

    ReplyDelete
  3. Pu MeiGuo Ren :-) I hringnun zinkawng hi ngaihnawm tham a awm tih ka hria. Ziak zel rawh. A ngaihnawm khawp ang.

    ReplyDelete
  4. Auto Biography neihhi a that piah lamah miten hlawkna anchhar thin...keep on writng.

    ReplyDelete
  5. a tha khop mai....lo ziak zel la kan lo chhiar zel ang

    ReplyDelete
  6. I expi i ziah tam tak a trang hian a hunlai thil kan tel/hmuh ve phak loh pawh kan mitthla thei a,tin, ti ti lengvak mai2 emaw kan lo tih thrin te hi a tak2 a tawngtu ngeiin anziah han chhiar te hi beng a fah bik a....ziak zel mai teh

    ReplyDelete
  7. eh: bei nalh lehsi ve. hehehe

    ReplyDelete
  8. hahahaa: tawlailir hi chu kan hunlai pawh khan kan siam ve thrin, mahse bearing tekha a nei deuh ta kha cheng 5-10 ( a len dan a zirin) vel khan kan lei thrin. hehehe
    bearing dah loh kha chuan a ke a kua kha a zau duh khapmai, nangni chuan pipe dah nachang inlo hria a in fing zawk anih chu, keini bearing dah tur kan neihloh chuan pipe dah lampang kanlo ngaihtuah ngailo re re.. in hunlai hnu pawh nise.. hehe. mahse in tlan deuh chuan a pipe chu a chhuak pur thrin lo maw. lolzz

    ReplyDelete
  9. funny chu i biang a va puar ve....hi hi hi

    ReplyDelete
  10. E khai, min chhiar sak liam liam a ka lawm lutuk. Thurawn te min pe thin dawn nia, ziak hi a har em asin.

    ReplyDelete
  11. funny, Tawlailir chu repair ve reng angai alawm. :)

    ReplyDelete
  12. ngaihnawm khawp mai...lehpek chang khiau ang...keep on writing...

    ReplyDelete
  13. Hei mah mah a tan tir... I theme hi a gothic khawp mai, a dum khup mai a :)

    ReplyDelete
  14. henry hi iva bei gothic ve awww template chu... ngaihnawm e

    ReplyDelete
  15. Muante, gothic khups mai hahahaha

    ReplyDelete
  16. Leng khuaa kan kal tuma hnim sang pui2 kara ka bo kha chu ka tap nasa khop mai !!! Hahaa.. Hlauh namai lo khan ka hlau hman alom,ka bo hlen tur angah ka in ngai hman mole :)

    ReplyDelete
  17. Leng khua a kan motor petrol lo hnim ruk tum kha U Sanga Pa khan an perh pop2 mai anih kha ..:) CHATUAN sweet leh sweet tereute bial (a rang) hi ka nu te khan an sem a,min en tur khan tukverh ah te khan anlo dak thup mai anih kha !! :) Khua kan luh tirh a an lo haw2 dan kha chu a thluk nen phei chuan a nuihzatthlak lehzual ,ka la hre reng kei pon hahahaa....

    ReplyDelete
  18. Chhiar a nuamin a ngaihnawm khop mai..keep on the good work..its one of the best blogs I have had the pleasure of reading..its funny,informative and very very interesting..keeps you wanting for more..

    ReplyDelete
  19. ngaihnawm khawp mai. Lehkhabuah i la chan anga, chipchiar zawkin kum, ni leh thla te i la tarchhuak thlap turah ngai ila, lehkhabu thatakah i chhuah ngei ka beisei.
    way to go pu HV

    ReplyDelete
  20. A va ngaihnawm ve o. . Lu phel phawka han inkah mai chuh. . Tawlailir maw. . Ka hrat over leh pek kei pawn.

    ReplyDelete
  21. naupan laia i dawih hi chu ka awih thei thlawt lo...

    ReplyDelete
  22. I blog chhiar a nua, hle mai.Keep it up.

    ReplyDelete