Search This Blog

Tuesday, January 11, 2011

Heroin zuar chu an thi tur a ni.

Ngaihzual Nang Nen tih film a chhuah hnu mai chuan, kan naupan laia kan thenawm thin leh kan unau min enkawl thintu ber te zing ami, "U Mama" kan tih, Biakthansanga (BTS-a) chuan Mizo film dang siampuiah min sawm leh ta a. He movie tur erawh hi chu drugs zuar te leh Excise ho inbeihna lampang daih a ni thung dawn.

Film chang tur hian, Venghnuai ami, Dusti-a te, Rahsi Veng (Thakthing tlang) Pu Zolawra fapa Kaia te leh Miss Mizo hmasa ber Lalbiakzuali (Ma-i) leh midang lemchan thiam tak tak an tel hlawmin, Biakthansanga chu misual hotu tur a ni. Cameraman atan Pu Zolawra fapa, Kaia nau Zonuna chu niin kan phur tlang viauin ka hria. He movie ah hian, misual driver ka nih bakah, Excise inspector lem ka chang a, Mizo filmah double roll playna hmasa ber anih ka ring!

Pachhunga University campus ah chuan lecturer pakhat awmna NEHU quarter chu kan nupa (lem) Biakzuali nen chuan kan in angin kan hmang ta. A in neitu te hmuh laiin an khumpuiah a changtunu nen chuan nupa angin kan mu a (chesual tihna a nilo) a inthlahrunawm duh kher mai. Chumi ni vek chuan, a thawnthu a nakin hun ami tur scene kan chang nghal bawk a. Ka nupui Biakzuali chu keima motor khalh hmang chuan kan ruchhuak ta a nih kha. Heta kan motor hman hi cameraman Zonuna Maruti van niin, Mizorama Maruti van hmasa ber ani nghe nghe in ka hria. Tichuan, Excise inspector (keimah) lehkha tur kan hnutchhiah hnu chuan kan tlanliam ta a. Keipawh chu excise inspector ni leh tawhin, kan nu bo chu au vak vakin, ka tlankuala, ka zawng buai hle mai.

Tichuan, Pu Zolawra huan Lawibual ram lamah chuan shooting nei turin kan chhuk leh ta. Drug smuggler turu lutuk BTS-a te chu ramhnuai kawngtum zawha an lo kal lai chu kawng chhak atangin kawng thlang lamah leng thla dawrh khawpin ka bawhthla ta. Tichuan, athlang kawrte ah chuan kan insual zui ta zel a, kan lungtum siam chuan a lu kan chhu ta nghek maia, a chalchang chu tuiah chuan ka hnim hlum (der) ta a. Kalo hnim rei deuh aniang chu, alo tho chhuak hlawl mai a, "Min hnim hlum dawn alawm," a rawn ti, kan nui tha ngam silo, lehlam hawia sai hlarh hlarh ani tawp.

Kaia leh Dusti-a pawh an lo insual buai nasa mai a (film) Dusti-an hreite a hman laiin Kaia chuan Nanchaku (twin stick) ahmang thunga, an hmang thiam dun ngei mai, hmuhnawm tak an ni.Chutia kan buai nuaih nuaih hnu chuan ka nupui (lem) Biakzuali pawh chu kan chhan chhuak ta a, drugs zuartu te chu kan that mang thak a ni. Stuntman leh camera trick nei ve hek lovi, tlai lamah chuan pilh pheng phungin, kan sil them thum reng mai a nih kha maw.

Shooting neihlai vel, ramhnuaia chaw kan han ei te hian Dusti-a chuan chaw ah hian engmah dang ahmeh ve duh ngailo. A ni kha chu ahlawh lak pawhin a senchi ngat chaw a chawm thin a ni bawk a, chu ngei mai chu a hmeh chhun a ni thin. A sawi dan chuan, "Rakzu chawm chu tuilo tak a ni," tiin ha uingho chiah nei khan a nui heu thin. Bawkbawn kan han khai kang a, a hreite keng chuan lehlam a rawn hawi thut pahin an vawm thina, a ek siah siah thei tlat thin, dangdai ve tak chu a ni.

21 comments:

  1. first na ava tam ve...he he hengaihnawm kher mai a mahse a tawi deuh....Mai ..hmmm special hmel khawp mai

    ReplyDelete
  2. tha don hle mai.....!!! hmuh chakawm!! really great!!

    ReplyDelete
  3. SD- tha dawn i tih, 1987 vel bawr ami daih tawh alawm hehehhe

    ReplyDelete
  4. Haha...A film en a va chakawm ve mawle....kan nui sai hlek2 mai thei ani...

    ReplyDelete
  5. Ngaihnawm leh phian mai. Mizo film changtu te hian hlep an nei ngai lo an ti. Nang pawh i hlep chu, a hunlaia milar nih kha a ni mai lawng maw? Khalamah te khan han chhunzawm la chuan hlawh tam tak i nei tur a nia. Han tih zawm leh teh.

    ReplyDelete
  6. "Tichuan, Excise inspector (keimah) lehkha tur kan hnutchhiah hnu chuan kan tlanliam ta a. Keipawh chu excise inspector ni leh tawhin, kan nu bo chu au vak vakin, ka tlankuala, ka zawng buai hle mai."

    Kan Nu ka chhiar rik sauh lauh lauh a, ri lo in kan nui char char. I tlanliam tur mawngtam i chhuih hman lek lek niin ka hre ber mai :D

    "Drug smuggler turu lutuk BTS-a te chu ramhnuai kawngtum zawha an lo kal lai chu kawng chhak atangin kawng thlang lamah leng thla dawrh khawpin ka bawhthla ta."

    Huiha, drug smuggler tupa ka nilo chu ka va han lawm tehreng em...he he he...

    Hairehai, i ziakthiamin min tihlim hle mai. Eagerly awaiting for the next one :)

    ReplyDelete
  7. He film hi ka en tawh in ka hria. BTS-a i hnim, rawn tho chhuak thinrim hmel vel tur chu ka mitthla in ka hmu, ka nuih za fuuu ni.

    ReplyDelete
  8. >>Stuntman leh camera trick nei ve hek lovi, tlai lamah chuan pilh pheng phungin, kan sil them thum reng mai a nih kha maw.

    lol. Hit thei eeee!! action film chu chang fo lo la a thra ang!! lol

    ReplyDelete
  9. A lo ni maw? Mizo film hi en ka nei tlem khawpa, Sensiari tih film hi ka en hmasak ber chu ni maiin ka hria! In film chan te chu en a van chakawm ve tak!

    ReplyDelete
  10. "drugs zuartu te chu kan that mang thak a ni"... Steven Segal awm hle mai.

    ReplyDelete
  11. Unsung, kan manlo, kan that vek mawle hahahaha

    ReplyDelete
  12. Mi turu tak i lo ni!! Film pakhta role / character p2 play kawp thei!

    ReplyDelete
  13. En ava chakawm ve, naupan laia ka en ve chu 'Sual man chu thihna a ni' tih a ni ta in ka hria. kha filmah khan i chang ve lo maw?

    ReplyDelete
  14. bon-a ni awm reng i lo ni e....lolzzz

    -wonderboy

    ReplyDelete
  15. a lehpekah chuan hei aia tlema sei aw.....heh!

    sihal

    ReplyDelete
  16. A va ngaihnawm pek ve le..! A thupui atanga kan en mai chuan a va dengkhawng deuh ve aw.. ka ti a. Mahse, a lo ni hauh lo! Ka va hlimpui ve le aw.. Han ziak zel teh khai.

    ReplyDelete
  17. I film chan ho hi ila kawl thra kiau hlawm awm sia, tawi te te in a clip siam la rawn youtube teh aaa..... en ka chak khoops mai.

    ReplyDelete
  18. Ka kawl tlat lo, pawi tak a ni. Lo la kawl ni ila nuih kur kur nan an that dawn vei nen a :D

    ReplyDelete
  19. hmm.. ngaihnawm theih hle mai.. :)

    J

    ReplyDelete
  20. Lo ropui riap riap hle mai.Chhiar man hla hle mai.Mizo zingah chuan film puitling siam hmasa berte zingah i lo tel reng a nih hmel hle mai.Rory pawh Pastor a ni ta..Khasi Veng mawngah a awm tawh bik lo ve

    ReplyDelete
  21. U henry i dam thin em? He blog hi thil ka zawnna lamah ka hmu fuh a ka hlimpui khawpmai tlaivar thak thakin ka leng thin ania rawn updts zel ang che...

    ReplyDelete