Search This Blog

Friday, February 18, 2011

Bairabi lama ramvah

Ka sawi tawh angin Bairabi ah hian pasaltha Pu Gerarda te in hi kan innghahna ber a ni. A ni hian tul a awm chuan kan leilet te pawh tlawmngaiin alo buaipui thin. A in a thleng ta chu ramvah peih ve ve kan ni bawk a, kan titi pawh a inmanin, kan phusa dun thei viau.

Tum khat chu sikul naupang hoin, "Zawhte lianpui, Kel aia lianin kel a seh," an rawn tih chu kan va thlithlai dun a. A hnu atang chuan Kelral (Sakei chikhat) emaw Keite emaw niin ka hria a mahse, Pu Gerarda chuan Keite hniak anih thu min hrilh a. Mihring a hnaih em avangin mihring a tihnat hmaa kah kan rilruk ta a. A sa seh chu khai kangin, Tawktarh (bait/lure) atan kan hmang ta a. Zanlai kan chan thlen zak hnu pawh chuan alo lang ta reng reng si lova, min chanpuitu lah chuan a zu ah (Tuikuk zu) tlak pawp pah chuan, " Alo chhuak dawnlo aniang, keimahniin zawng mai ang," a ti ta roh pek a, anuam duh vaklo khawp mai.

Ka thuthmun atanga ka thawh chhuah pah chuan, Sakhi angin a mit a hring dawn nge, Sanghal angin a sen rum dawn, tih ka zawt a. A ni chuan, "I hai lo tawp ang, a vam (Meiling ang)ham mai ania," a ti awlsam et a, ram lam pan chuan kan chhuak ta. A ni (Pu Gerarda) chuan, veilam hlir en kual (Hmehen/Flashlight in) turin min ti a, a ni chuan dinglam hlir a enkual thung a. Mak deuh mai chu a silai ken hi Laimal(Ulhbun mal) niin, ulh bungin a pu vu a. Chutia kan kal hrep hnu chuan, keite chu a lo kir tawh dawnlo anih a rinthu a sawi pah chuan, a hnar a len vut vut a, "Umm hetah chuan a awmlo tawp ang, Sihal a zung," ati a. Hnim chu min han hnim tir ve a, alo thang vei hiam reuh a, "kha kha sihal zun rim anih kha," tih pahin a kal leh daih a.

Mel engemaw zat kan kal hnu chuan vawilehkhatah, "Saw" tih pahin a silai chu hnim buk che lawih chuan a hmetpuak ta. Keima lam rawn hawiin, "Nawn rawh nawn rawh," a rawn ti, hnimbuk che luih luih bak ka hmu thei si lova, kah tur ka van kher asin. Keite em ni ti a kan zawh chuan a ni chuan anih loh thu sawiin, fimkhur takin kan panm phei zel a. Tlumpui lian zet mai hi alo thal hiang reuh a, kan zawng haw ta a. He Tlumpui sa kan chan lai hian a ramvah pui thin chuan Pu Gerarda ramvak hi zu a inloh chuan a hlawhchham ziah thu min hrilh ta a.

Tumkhat chu, a tia lawm. Sanghal kan chang dun a, a ti. A zurui chu a muhil tlat mai si, sanghal lah chuan mak tih hmel tak hian thle ha hian a rawn melh phei thin a, a tlanchhe miahlo thung, a ti. Tichuan, silai keng ve silo chuan a rukin ka sik ta vak mai a, a ni lo harh zawk chu silai a puak nghal thawr ni berin ka hria, sanghal pawh chu a vir nghal chawi chawi mai nia mawle, tiin tui takin an ramvah chanchin min hrilh zel a.

Tumkhat pawh Sakhi tlan Sunhlu an chang leh a. A sunhlu rahtlan chang chu a tih dan pangaiin a chatthla leh pek a ni awm e. Chutah sakhi chu pakhat pawh ni lo vin, pahnih an lo chhuak, an channa thingkung zar chung zawk atang chuan a lu ah a zuk rap vak ani awm asin mawle. A ni lo thangharh chuan sakhi chu a thal tawp a, pakhat zawk hamhaih lai chuan silai mudang thun lehin akap thlu leh bawk tih te chu thiam takin min hrilh. Pu Gerarda pawh kan thutna lamah lo pheiin, zu in lova a hlawhchham ziah mai chu mak a tih thu a rawn sawi ve ta bawk a.

10 comments:

  1. Sunhlu kunga han chhahthlak chuh !! :-)

    Angaihnawm e, meigou ren.

    ReplyDelete
  2. He he he..Magic Potion ang deuh anih dawn chu...

    Sihal zun rim...A expi tawh hmel hle mai a...Cowboy film-a hnuchhui thiamin ek ro an tep chep chep lai min ti hrechhuak e :D

    ReplyDelete
  3. ha ha ha zu in lova hlawhchham ziah...

    zb

    ReplyDelete
  4. chhangte_ll, Eng eng emaw tihah khan ka ziak tawh alawm... Sakhi leh Sanghal tih vel a chhiar tawh ngailo.

    ReplyDelete
  5. A zurui chu a muhil tlat mai si, sanghal lah chuan mak tih hmel tak hian thle ha hian a rawn melh phei thin a, a tlanchhe miahlo thung, a ti.

    ka nuih hrep chu le lolzzzzzzzzzzzzzzzzzzzzzzzzzzzz

    ReplyDelete
  6. Tawnhriat ngah nge nge chu i titi pawh a ngaihnawm bik thinkhawp mai. I titi ngaithla tur hrim hrima lo zin pawh a chakawm rum rum mai.

    ReplyDelete
  7. ngaihnawm thin ee,,,,,,

    ReplyDelete
  8. ngaihnawm thin hle mai, mumbai a kan in zui dan vel te pawh kha i la ziak dawn nia aw :)

    ReplyDelete
  9. iverson, a then chu ka dah tawh maithei . A hmasa lam han enchhin teh.

    ReplyDelete
  10. I hming tharah Pasaltha Henry auh/

    ReplyDelete