Search This Blog

Thursday, February 10, 2011

Eng eng emaw


Tum khat chu ka thianpa Eddie-a nen Bairabi lama kan leilet chhete zuk thlithlai pahin, ram kal kan inrawt phur alawm mawle. Patling pahnih ram kal turah chuan silai kan keng hnem ber hial awm e. Kan silai ken te hi Laiphir pahnih, .315 rifle a tel bawk a, Pu.AV Pakunga ta kan hawh a ni nghe nghe. Enkawl ngai loh tih hriat takin a kua (barrel) chu tuiekin a hnawh nasa lutuk tawh a, zan hnih khawnvartuia ka chiah hnuah tlem chuan a fai ve thei ta deuh. Tichuan, .22 rifle kan keng bawk a, Pu.Zohminga s/o Pu.Nithanga (IAS retd) Ulhbun tan tawi a ni leh a, .32 Llama pistol kan pai bawk a ni; kan bawr hle mai (enga tan zozai nge maw khati zat silai kha kan ken reng reng ni!)

Zing atanga Kulikawn chhuahsan e tilo chuan zan reiah Kolasib kan thleng thla hram. Ka thianpa hmelhriat te inah zanlaiah kawngkhar kan kik a, kan riak ta a. Kawngkhar arawn hawn tirh cuan silai kan ak teuh mai si a, HPC emaw min lo ti zui mawle. A tuk lamah chuan Bairabi chu kan pan thla dawn ta a.Kolasib Diakkawn Bung bulah chuan Kulikawn pa, Pu. Hlira,f/o Laldawngliana, Sainik Board lama an hotu chu kan hmu hlauh mai a, Laiphir leh pistol tih loh chu Aizawl lamah kan thawn kir leh ta zawk a. Hemi kum hi HPC hran zual lai kha niin, 1989 vel bawr niin ka hria.

Bairabi kawnga Meidum khuaah chuan ka hmelhriat hlui, ChhekChhek Kumari laizawn inah kan chawl lut a. Tak tak nge phei chu ka hre kim vek lova mahse, an ni unau hian chanchin an ngah hle thin. A u zawk Chhekchhek Kumari hian chanchin ngah zawk mahse, a laizawn pawh hian ngah ve tak chu a ni. Pakhat han sawi ila, tlang hriat a ni thin bawk a, pawi ka sawi em lo turah ka ngai. Tum khat chu driver pakhat hian mutpui a tum a ni awm e. Ani chu a mood ah a lo awm vaklo ni ngei tur a ni, midang awm thep thawp lai chuan, "Vawi khat ka thar tem ve dek dek che a, ka ta tak emaw i ti elaw. A beh hawlh pherh tham lek i neih kha," a ti ta hrep a ni awm asin. An unau fiamthu hi a sanga an kianga han hahchawlh te hi anuamin hahdam thlak thei viau reng a ni.

Bairabi chu kan lut thla ve ta a, Pu Gerarda (fam) b/o Anthony, Pi Zohmingi (MCS) pasal te inah kan inghat a. Pu.Gerarda hi pasaltha tak (ram lamah)Sakei pawh kap tawh, "Sanghal leh Sakhi ka chhiar tawh ngailo," ti khawp a lo kap nasa ve thin ni mahse, in lamah chuan nupui zah thiam tak leh hawihhawm em em mai, inchhung sekrek tih hreh nei chuang hauhlo mi a ni. A hnu phei kha chuan Pathian lamah in hmuchhuakin Kohran leh khawtlang tan atangkai zual viau nghe nghe. A dam rei talo em mai pawh a, angaihawm thin hle mai; mi tha mualliam hi chu an lo uihawm zual thin viau a ni.

Ka thianpa nen chuan kan leilet chhete pan chuan kan chhuak phei ta a. Hemi pah hian u anga ka neih Bairabi Police O.C. GB Gurung chu kan tlawh phei nghal bawk a. Ani pawh hi ramvah peih ve thin tak leh silai kah lamah pawh Mizoram police chhuanvawr a ni nghe nghe. Leilet hmun vel kan thlen chuan kan Vaua vai pakhat chuan kan vaipa hming ko chuan ring takin, "Mazawn aise," tiin a au ta luah luah a. Midang an in au chhawng zel a, a hmun kan va thlen chuan kan thutna tur leh hmaizah (fan) an bathlarah chuan an lo chhawp chhuak sa thlap tawh a ni; anuam ve phian zel ania.

Khawi ar hi nge kan ei tur tih pahin, arpui lian ber chu pistol chuan vawi 5 lai kan kap thelh thuak thuak phawt a, a hlau ngei mai. Chutah a tlanchhia chu Laiphirin ka phuh thal tawp a, musep (Buckshot) emaw ka dah ka tih chu SG a mupui chhuan zawk lo niin, ar chu ei tur pawh awm manglo chuan a pherh niaih reuh a, a dang kan talh phah nghe nghe.

Kan vai te hi a fate nen chhungkaw hnih angin an khawsa a, kan inchhawr dan hi a remchang a, anni leh keini pawh kan hlawkna ve ve niin ka hria. Kum khat atan Buh ilo hauh zat kan nei a, a dang zawng chu an mahni chuan an changa, thlai leh thildang pawh an duh duh an tuhin an ching tawh mai thin a ni. An chhungkaw hnih hi an taimak bakah nuih an tiza thin viau mai. Tumkhat chu a indang tawh zawk a nupui chu a pa kianga la awm chuan an pa hnathawh hlanin alo uire sak pek alawm mawle. VC court ah an inkhing ta a. VC chuan remna siam sakin, a u chuan a nau chu Bawng pakhat a pek angai ta anih chu. Bawng dang leina nei heklo le, apa te in hnaiha an bawng thlun thin chu a nau te in kiangah an va thlung ta a. Tichuan, lungawi takin an chhungkua chu an awm tlang leh ta a nih chu.

Ka thianpa nen chuan Tripura lam thingtlang khuaah Tlawng kanin kan va leng a. Chuta kan len naah chuan mi panga hi an lo awm ve bawk. Hmar tawngin an ti ti a, zu rui lam tawng an ni bawk a, an tawng kan hriat phak avangin in saseng vat a tha tih hriain kan chhuak ta tharh a mahse min rawn zui a ni. Kan pistol ken min chhuhsak an tum danah khan dan HPC annih kan ring ta ber. Tichuan Tlawng lui, tuilian mar pung mai chu ka thianpa chuan a hleuh phei ta a, kei chuan an lampang chu vawi hnih vel ka kap phei a, thiandang te lawngleng ral lehlam atanga hmanhmawh taka min rawn lam tu, Kulikawn a ka thianpa Hmingliana pa u fapa (Bairabi khua)te nen chuan Mizoram lam chu kan in kar kai ta. MAP ho bank a duty te lo tlan khawmin an umzui ta a, khami ni khan an man ta lo hlauh. Hun aliam fe hnu chuan khami te niawm tak HPC panga vel chu Lokicherra lamah an man tih kan hre leh bawk' ni tak maw?!

NB: PIC khi kan leilet vai te chhungkua leh tuna Mazawn ni mek, ka nau Rintea an ni e. CLICK PIC FOR LARGER SIZE.

12 comments:

  1. haq haha chhek chek kumari lolzzz

    ReplyDelete
  2. pa deng deng thin mange aw, chheng chheng kumari an ttia maw ka lo tia :)

    ReplyDelete
  3. ngaihthlnawm in min ti hlim khop mai...:)

    ReplyDelete
  4. A ngaihnawm hle mai. I past life chhiar hi chuan ka te chem chem thin.

    ReplyDelete
  5. caribou, em em thin a... min ti zak mai dawn alawm

    ReplyDelete
  6. "Khawi ar hi nge kan ei tur tih pahin, arpui lian ber chu pistol chuan vawi 5 lai kan kap thelh thuak thuak phawt a, a hlau ngei mai. Chutah a tlanchhia chu Laiphirin ka phuh thal tawp a, musep (Buckshot) emaw ka dah ka tih chu SG a mupui chhuan zawk lo niin, ar chu ei tur pawh awm manglo chuan a pherh niaih reuh a, a dang kan talh phah nghe nghe"


    ar talh dan va pui triah2 ve lolzzzzzzzzzzzzzz

    ReplyDelete
  7. Ram vah chanchin hi true story dang i hriat apiang han ziak teh a.. A bikin sa pel chanchin hi ngaihnawm riau.

    ReplyDelete
  8. Nunhlui i va ngaihnawm ve. Arpui chu mupuiin in kapa maw? ka va'n sawichhawng chak.

    Ka thianpa pawn in leilet lamah tho an sangha dil a mi a bomb a lawm, len den thiam hek lo.

    Han phawrh zel teh le...ngaihnawm fu ni!

    ReplyDelete
  9. Hahaha.. Hotupa chu va thawh tha thei ve! A dang pawh rawn ti zel teh. A ngaihnawm tlat.

    ReplyDelete
  10. Musep leh arsa kan hmeh muah muah ula ka va han ti em...Eng ual chu inkaphlum em lovang chu maw...he he he...

    ReplyDelete
  11. Nice Sharing. Latest Jobs in Asia, Europe and Gulf at http://toppakjobs.blogspot.com

    ReplyDelete
  12. a van ngaihnom em em. thil ziak i thiam anih hi. ziak thin roh.

    ReplyDelete