Search This Blog

Tuesday, March 8, 2011

Mumbai lamah


Delhi atang chuan Mumbai lam pan chuan ka thlawk thla ve ta. Mumbai airport ah chuan pre-paid taxi Kolkata ami ang chi kha a awmlo nge ni ka hmu der lo mai a. Tichuan airport pawn boruak chu kan dawng lum uap huam mai a. Taxi chu a tam khawp mai mahse, an tihdan ka hriat lemloh vang leh thu zawh chhang tha duh mumal (rin tlak) ka hmuh loh avangin hotel hnai berah min hruai turin taxi pakhat chu ka la ta a.

Hotel fianrial angreng tak mai, reh ngawih ngawih maiah hian ka thleng a. Chutah Mumbai chinchang kan zawh chuan US consulate chu khaw lehlam, ka awm lohna lam Mumbai hmawr tawp, tuipui bul chu alo ni tih min hrilh ta a. Mumbai guide book vela ka en aia tlawm, ka thlen ve phakna tur tawk tawk hotel te chu ka hriat phah ta zel a, chumi pan tum chuan ka inpuahchah ta a.

Taxi driver hnenah chuan ka thlen tumna hmun chu hresa tâk angin ka khawsa ve hmak mai a, a man te sawifel sa vekin a tlawm thei ang ber turin kan indawn thla hmasa te te a ni. A awmang tawk awm vel chu hotel clerk khan min hrilh sa rêng bawk a. Tichuan, tourist ho hmunpui pakhat, Colaba kawtthlerah chuan vairam ri chitinreng karah ka thlenna tur hotel, Apollo Guest House, Colaba police station lehlam ah chuan ka lut ta a. Hotel tlawm ber pawl e tilo chuan zan khatah cheng 600 an chhiar teu mai a, a dang chu a aia sang a ni hlawm bawk si, ka inghat phawt a, a tuk lamah a aia tlawm zawn ka rilruk ta zawk a. Salvation hoin thlenin tlawm takin an neia chu lah chu ni reilo te bak thlen an remti bawk silo. Engtia rei nge Mumbaiah cham angaih dawn ka hriat loh avangin inrenchem taka ka khawsak thiam chu thil pawimawh ber pakhat a ni dawn!

US consulate chu ka pan vat a, chinchang hriat tumin theih ang ang a thawk te ngei zawh ka tum a. Hetiang thil pawimawhah hi chuan mi sawi mai ni lovin, website pawh ring tha ngam lovin, a hmun thu te ngei mai han zawh hian thil a chiang duh zawk fo reng a ni. US immigration lam ngat phei chu an dan an thlak ngun em avang hian website pawh thuthar dah zung zung thin mahse, dah hmanloh palh a awm theih a hlauhawm avangin, an mahni ngei rawna zawh ngai zawh chu athat zawk a rinawm. A hmasa berah taksa pumpui, chhunglam leh pawn lam min enfiah phawt angaih thu min hrilh a. Chumi ti tur chuan consulate kiang maiah chuan damdawiin, US sawrkarin pawmtlaka an ngaih a awm a chumi chu pan ka tum ta a. Chumi ka pan pah chuan consulate leh damdawiin kiang maia awm, US Visa processing center ah chuan an duh ang thlapin thla ka laktir a, form la thehluh ngai tur te chu ka la paha, damdawiin lam chu ka pan leh ta a.

Damdawiinah chuan US kaltum an lo thu hmur mai a, chutiang lam khawihna bik in (building) an nei hrang ni berin ka hria. Min han khawih tak tak ta ale, pawnlam ngawt pawh nu ten kan senlaia min hmu chianga min hrechiang ang mai khan min zutin min thlir chipchiar ngei mai le. Thisen an enfiah tur an lak teuh hnu (burte 5) chuan, ka ha, ka beng ka mit an enfiah leh a. Ka mak tih angreng pakhat chu ruakin min muttir a, ka zahmawh chu doctor chuan tuboh kilthum nei te hian a khawng kerh kerh kha a ni; neih loh a har kher mai, then thain ka tuar chhuak ve mai bawk a. Ka rilru chuan, "Enge khatia a khawn keuh keuh khan a hriat ang aw," tih ka ngaihtuah neuh neuh a, tun thleng hian a chhan tur ka la hre ta chuang lem hlei lova! Engpawh chu nise, an rama pem lut tur meuh chu natna thalo lakah theih tawpin an fimkhur hle tih ahriat; zin tur ringawt hetiang em em hian an enchiang ngailo. Hetah bawk hian ani tattoo kalo paih ka lawmna chu. Ka ban ser chhan kha zawh satliahin min zawt a, ka hrilh chuan, pem hlen tur te tattoo nei an duh loh thin thu min hrilh ta a ni.

PG an tih ang, pindan luah hawh theih tur chu Mumbai lama lehkha zir mek, Naomi Hmar chuan min zawnpui a. In lianpui maiah kan lut a, tah chuan Manipur lam leh Mizoram lam Mizo zirlai leh hnathawk te chuan room te reuh te te, Japan rama an apartment tiat lek lek chu an lo luah fir fer hlawm a. Kan zawt chiang a, thla khatah cheng 1500 in ka luahtheih tur thu min hrilh a, ka lawm rilru viau mai. Mahse, chhut chian chuan alo tlawm awzawng lo mai chu niin. Khami hmun atanga US consulate ka pan fo na thin tur kha taxi chuanman nen, thil dang han chhut neuh neuhin Colaba ka awmna khan hun min khawhral tlemtir dawn bakah a lo remchang ber zawk tih ka hre ta a, a dang ka hmuh nual te pawh chu awm talo chuan angaiah awm mai chu ka rilruk ta zawk a ni.

US consulate nitin kal angai silo, Mumbai chhuahsan dawnin koh thut ka ni thei bawk si, tihtur avan vang thin tak em vele aw. Mizoram house ah a khat mawi tawkin damlo ka va kan a, tlai lamah Mizo hmel hmuh tumin Colaba kawtthler ka fang thin bawk a. Chumi tih loh chu US lam phone abiak leh internet cafe Muslim zak rimchhe pa dawra hman a ni leh mai; ninawm thei tak a ni. Hotel pawh ka cham rei ta deuh aniang, senral tam tawh nen keimaha rawng inbawl min phalsak ta hial a, an choka chu ka ta chei titih ani ber awm e, thu lah ka intithu bawk.

Mizo inkhawmna thin te ka hre fuh ve ta zel a, ka thian pakhat Delhi lam atanga lo zin, cham mek te nen chuan kan va inkhawm ve ta nghe nghe a. Chutia kan inkhawm bang Colaba kawtthler a tlailam kan teihawi mai mai chu vai sipai hian ka kalpui pakhat hnute chu arawn tham thlarawk pek a. Ani hmeichhia lah a khek tuar mai a, enge a awmzia tih kan hriat chuan vai sipai kalsawn mek chu tham hawi sawkin Mizo hmeichhe thlavang chu ka hauh ta a, vaipa chu kawngah chuan a thal ta hawl hawl a. Ani vaipa lo tho chu a thinrim a khur nasa ngei mai, nuih a tiza tep zawk a ni.

A sipai ID a rawn phawrh a, tunge anih a sawifiah ta vel a. Vairam tih takah min bawr hneh teh e, kei lah vai sipai chu ka chhang tha duh derlo thung. Mipui lam chu hawiin, "He sipai hian hmeichhe hnute hi thamsak theihna thu a nei em ni. Hemi hmeichhia kawng kallai hi a hnute a rawn tham ringawt a, a sipai nihna sawiin thiam chan a tum anih hi," tiin theih tawpin mipui lamah chuan ka zualko ta daih a. Hetih lai hian vaipa chu a ang bawrh bawrh mai a, kei chuan, "Lo ngawi hrih teh," tih bakin alamah tawngkam ka nei duh lemlo, mipui kha an pawimawh ber zawk. Tichuan leh, vainu pakhat chuan, "Hmeichhia ivan zah love," tih pahin sipai luah chuan a rawn hlap pawp mai a, an vuak rawn ta luai luai a, keini chu kan inthiar fihlim ta daih a.

18 comments:

  1. Thianpa hi thu leh hla lam poh i lo tih mi zek hi mole.

    ReplyDelete
  2. Tuboh kil thum nei kher a hman nachhan chu engtak ni maw. Kan hnathawh hmain keini pawh purdah phenah min hum sak ang ren rawna, "Khuh rawh le" an tia kan khuh ve khak khak alawm. Hernia neih leh neih lon enna ania, hmeichhe daktawr chang fuh kan thianpa kha chu an in nuih liam ta anih kha :D

    Hetianga hmeichhia an khawih hian Vaiho hian min tan tlangpui - Bengal tih loh ah kha chuan.

    ReplyDelete
  3. Tuboh triangle, doctor ho ken vive thin hian mawle hahahahaa

    ReplyDelete
  4. khong kerh kerh.......kan lo hlim pui hle mai....jehu te nupa

    ReplyDelete
  5. Ngaihnawm thin hle mai. Vai style-a mipui lama zualko daih hi fu ve riau asin.

    Us awm tum chu va khirh teu teu ve lee.

    ReplyDelete
  6. E, tuboh khi chuan kan khawn sak ngai lo a sin mawle, a hmel in khawn a phu aniang! NOI.

    ReplyDelete
  7. Ngaihnawm lehpek ngei mai. US a pem chu a lo khirh hmel hle mai a. Khirh, harsa leh huphurhawm tia kan sawi thin te hian i nunkawng a khawihbuai ve thin ngeiin ka ring a, mahse i kawng an dal zo ngai miah lo anih hmel. Tumruhna leh tei rei peihna hi a lo pawimawh hle a ni tih hi i past life atang hian a lang chiang khawp mai.

    Tuboh kil 3 neia khawn keuh keuh hi, nuih loh a har kher mai...

    ReplyDelete
  8. Colaba vela tlai ni nema ke a kal mai mai kha nuam ..lunglen thlak!!!Mahse thlakhat vel chu ninawm dawn nih chu

    ReplyDelete
  9. mi dawh thei tak leh mi tum ruh tak lo tan chuan i thil tih ang hi chu an ti thei lo reng ani...congrats u have gone through n made it today

    ReplyDelete
  10. Mak deuh mai chu, vai ho, hotel kianga mi te kha a ni. Telephone booth (PCO) ah leh internet cafe ah khan ba hlirin ka hmanga, thla tawpah bill min pe vel lol

    ReplyDelete
  11. an khawn keuh keuh nachhan chu, a la neinung em? a tha hi a la tha em tih an en na a nih kha....an khawn sak na che kha lo perh sak auh auh tur che a lawm...hahahaaa...Tak tak a mi tumruh i nihna leh i rilru paukhauhna hi i ngaihsan awm thin e.

    ReplyDelete
  12. A ngaihnawm hle mai. Last para chu i intipa lutuk! :) He³. Thil i hre reiin i hre chiang ngawt mai. I hriatna leh chhinchhiah theihna hi a tha viau ni tur a ni.

    ReplyDelete
  13. Khawnsak keuh keuh... thil hi i lo tikim ka ti he he

    I nula hruai khian a va han ngaisangin a va han thlamuanpui dawn tak che em tih te ka lo ngaihtuah mai mai. Mizo tlangval mahni nula hruai te thlavang hauh vanga vai sipai hnek thal tawp khi ka ngaisang top che.

    -triplestar

    ReplyDelete
  14. I thuziak hi a ngaihnawm thin ka ti khawp mai. A vai hian uluk deuhin ka chhiar chhuak vek zel. I chanchin hi midang fuih nan sawi chhawn ka chak thin khawp mai. I ziak tha lutuk e, a hlimawm.

    ReplyDelete
  15. Ka ni dari te dawr bulah vel a tu pa zu khawn chang lo titi in lo ngaithla ani maw hehe

    ReplyDelete