Search This Blog

Thursday, March 17, 2011

Thil thing fe fe

Upper Khatla kan tih tak, Maida lane nihlai khan kan leng ve fo thin a, zu zuar kha an intlar phei put kha a ni ber. Chutih lai chuan nuthlawi zu zuar emaw, nu pawh nise, naupang deuh leh hmeltha deuh kha kan duhsak bik nge pawh ka hre love, kan leng ngun bik thin riau a. Mahse, "Zu zuar hmuh that/taih tawh chin hi chuan haw a hun tihna," tih kha kan tawngkam lar tak pakhat a ni thin.

Tuikual lam, Salvation temple thlanglam kha kan leng nasa thin bawk hle. Lenna bik kha kan nei thin a, a chang leh bat an phal that loh chuan kan tihtauh san a, hmun dangah kan insawn leh daih thin bawk a. Tuichhunchhuah bul chiahah chuan Malsawmi hi a awm thin a, keini ang rualpui alo ni bawk nen inleng angah thei ngei mai, choka nen hian kan khat mup reng mai a ni. Tumkhat chu nula chhelo terh turh deuh mai hi alo awm ve a, kan inbe tui viau a, zu te chu min leisak ta bawk a. Hetih lai hian Malsawmi ina leng te hi a hmei apain kei tih loh chu mi awmthei fa anni tlangpui. Ahnu chuan a pawisa ba te ka thinkual pui thin a, Tanhril panna kawnga a in luahtu te luahman te chu ka lakpui ta fo a. Ka lenna thin Malsawmi pawh chuan a pawisa alo bat sak nual mai a, han thin lah chuan min pe tha duhlo zek lehnghal a. Mi thenkhatin, "Thiante hmelma asiam duh chuan pawisa puk tir rawh," an tih te pawh chu ka hre chhuak rum rum thin.

Chu nula nen chuan kan inkawmngeih ta phian mai a, a hnu chuan a scooter chuan Lokicherra lamah te an leilet tlawh ten kan zuk kal dun ta a. Chutianga hun engemaw chen kan zinkual hnu chuan North Vanlaiphai lam kal kan rawt leh ta a. Hetih lai hi fur lai a ni nghe nghe. Khawlailungah Health Dept' quarter, kan chhungte inah kan lut zawk e kan tia. Chutah chuan a inbual, an bualin phulraw phel mawih a raptliak, a tlahawlh ta zuah mai anih chu. Nuih loh a har si, nuih chi vak a ni silo, pumna urhin ka awm deuh put put ta reng a.

Khawlailung atanga kan chhuak leh tur chuan nula pakhat kan chhungte quarter thenawm chiah ami chu ka hmu thut mai a, hmana Pu.H.Thansanga te kawmthlanga a awmlaia kalo kawm tawh thin min zuihaw tawh kha alo nia, anuam duhlo hle mai. Tichuan kan chhuak ta a, khua kan pel awrh tih chuan ruahpui vanawn a sur ta tak tak alawm mawle, ava han hreawm berkher em vele. Ka thiannu scooter lah kha Kinetic Honda te ve tak kha ania, kawng diak sa an chiau zual tak tak mai chu, Jeep velin an rah khuar sa chirh leh chirh inkar ah chuan kan innawr chhawk ta zak zak mai anih chu. Tluang pangaia North Vanlaiphai chawhmaa thleng thei tur kha zanah pawh kan la innawr zak zak anih kha. Vawikhat phei chu ka nawr lai khan a tlan chak ta phut roh a, phek thlawrh hian chirhah chuan ka tlu a, chauh tawh nen ka bawk thlawr reng mai.

Midum labor camp kan hmu hlauh maia, an bukah chuan rawng kan bawl a, dal leh chi chiah an nei a, uilo takin min tawmpuia, a lawmawm hle mai. Riltam tawh nen a ei theih hle a ni. North Vanlaiphai chu zanrei tawh takah kan lut a, kan chhungte indang tawh Mavala inah kan lut rawih a, a ni lah chuan a tapah chuan a lo chhuang kerh kerh zui chu niin. A haw hmasa ber (a 1st) chu chhawlhal tawh nen kan han khiat kiah kiah phawt a, chaw te tha takin kan ei a, kan mu ta a. Mizoram pumpui Kinetic Honda hian fan chhuah kha kan tum ani nangin, heta tang hian Serchhipah chawl haw lehin Aizawl ah kan kir leh ta zawk a ni.

Inru ang pawhin kan awm lova, chang leh an in lamah kan awma, achang leh hmun dangah, hetih lai hian ka chhungte chu Guwahati lamah an awm mek a ni. Pawisa kan tlakchham deuh leh a chhungte kan han dil zel mai a, mahse khatiang reng kha a tih chi bik silo, kan nunah chuan hlimna lam aiin ngaihtuah dang a tam dun ta viau mai tih a hriat khawp ang. Inleng thiante kan ngah thei ropui mai si a, kan vai mai chuan kan zu neih ang ang chu kan in tlang vek zel mai si, ngaihtuahna thalo deuh ka neih phah ta pek a. Nula rawn riak lah an tam, kan ri hut hut mai a, VDP pawhin engemaw kan tih tiin an rawn bih duk duk tawh nghe nghe.

Kan thianho zinga a naupang lam, zu la tura kan tirh ber thin chu kan lak tir leh chuan chumi chu inzo mai lovin, fun hran a, kan lak lehna daih tur chu hralh ka rilruk ta roh pek a. Tichuan a hma a kan lak ang zat tho liter 10 chu kan lak tir leh a, a vaiin kan chhung chhuak a, tui kan pawlh dal hret a, a zatve chu pawisa chawiin midang chu kan intir tan ta a. Kan tirhkah ber chu kawng lakah an lo chang fuh ta hlauh mai a, an man ta ran mai a, avan hreawm tak em vele. A chhungte nen kan indawr tlanga kan la chhuak ta a, chuta tang chuan kan inai hralh then chu kan sim ta hmak a ni ber. Chumi hnu chuan eng eng emaw vangin kan inhlat ta tawlh tawlh a, kan inthathen chu a ni ta der a.


Tumkhat chu he nula pa te nen hian Hawrtawki lamah sangha manin an motor kengin kan zuk kal a. Zanah chuan nula rim a rawt angin kan leng dun ta alawm mawle. Nula khan minlo be tha zawk deuh nge ni dawn ni, thlenin lamah min haw san ta daih mai a. Ka zui haw ve nghal mai bawk a, mahse ani chuan kawngkhar a kalh tlat chu niin. Lut thei ta hek lovi, ka thin a thawk thut a, motor khalhtu ber, chabi kawltu ka ni bawk a, motor ka ti nunga Aizawl ka haw san ta daih anih kha. A tukah Bus a Kawnpui rawn pan an tum, Hawrtawki piah maia lei (bridge) chhiat avangin ke in Kawnpui thleng an lo kal a, chumi hnu chuan motor dangah chuangin an rawn haw ta a ni. Ani motor neitu ber chuan, " A lungawi vaklo anih kha mawle," tiin a fanu chu a hrilh.

Mak ka tih em em pakhat chu chu nula-i nu leh pa chuan an fanu zu an inpui thin tlat mai kha a ni. Zu in zeuh zeuh anni silo, in apianga rui duh reng annih hlawm vang te pawh kha aniang e, an chhungkua a dam chhun pawh an darh vek a, an nun ka ngaihtuah hian kei a upa zawk khan engtin nge a chhungte siam that theilo mah ila amah tal kha kaihruaitu tha kalo nih loh tih ka ngaihtuah let ta fo mai.

13 comments:

  1. haha..khawvel hi i enjoy lutuk mah2 ka ti :D

    Tiang Khawpa vanglai nun thawveng taka hmang ve si, pa fel leh puitling taka nupui fanau enkawl theih tura i nun i thlak hi i fak awm khawp mai Pu HV :) {i sual ka tina nilo a nia aw :) }


    Judd

    ReplyDelete
  2. Ka uuu tak hi chu awww ... Kulikawn tleirawl ho Guru kha nia ... mahse tha vek eee ... hahaha

    ReplyDelete
  3. "Thiante hmelma asiam duh chuan pawisa puk tir rawh," tih hi a dik khawp a, tin, "I chhungkhat lamhnai te nen kumkhua atana inhmelmak i duh chuan harsa taka i lo khawl ve tang tang, i pawisa neih chhun te kha, a bo a bang awm lovin i chhungkhat laina te puktir vek rawh," tih thu pawh hi a dik khawp mai. Puk hi kan awlsam a, a rulh leh lam erawh kan harsat thei viau thin a ni awm e.

    Chirhdiak kara in nawr Kinetic Honda kha chu i pu nawlh zo awm tho si a..... Khawvel hi chu i lo chen nasa in i lo dai thuk mang e aw... I past life nge nge, a ngaihnawm thin khawp mai. A dang pawh lo ziak zel teh.

    ".....an nun ka ngaihtuah hian kei a upa zawk khan engtin nge a chhungte siam that theilo mah ila amah tal kha kaihruaitu tha ka lo nih loh tih ka ngaihtuah let ta fo mai"

    Helai thu hmanga tlipna i siam hi a fuh khawp mai. I rilru that zia pawh a lang chiang e.

    ReplyDelete
  4. I thuziak chhiar hi chuan eng thawnthu emaw chhiar tlat hian ka inhre thin....

    ReplyDelete
  5. ha ha ha...va ngaihnawm ve...he he he/...bathrooma tlahawlh, motor drive haw daih.....he he he...nu mami te leh ni tawni te kha i hria em? :)

    Zualbonez

    ReplyDelete
  6. caribou, chauh tawh chuan ken mai a chi vak loh, inchuan chhawk a, innawr chhawk kha a hahdam zawk hahaahhaa

    zuala, tunge nu mami leh ni tawni chu?

    ReplyDelete
  7. Malsawmi hi ka hria, ni tawni chu an in chung ami kha..lol

    ReplyDelete
  8. Keipawh a tlipna hi mawi ka ti khawp mai, I inthiamlo viau a, mahse...khatih hunlai kha chuan in rilru a in chen tawk reng a, kum lama i upat zawkna avang khan kaihruaitu tha ni thei turin i nun khan a zir bik miau lo ani mai a..Tuna i ngaihtuahna ang kha pu phak la chuan Mizoram pum Kinetic Honda-a fan chhuah in tum kher nang mawle :)

    ReplyDelete
  9. unsung: Malsawmi bak kha chu an hming ka hre ta vaklo alawm mawle. Kawngkual chhaka mi, momo dawr neitu thin fanu phei kha chu ka thianpa nen an innei ta anih kha.

    Hmeithai sawi hi dik theihna lai2 atam mai :)

    Min chhiarsak thin a in chungah ka lawm e.

    ReplyDelete
  10. A ngaihnawm leh pek hle mai. Paragraph thumnaah khian thil inthup a awm ngei ngei ang! :-)
    Mahni fate zu inpui theih chu, a mak tak hle mai. Zu an duh tlàn luat vang nge ni anga, an inpawh luat vang te ka ti mai mai.

    ReplyDelete
  11. Va ngaihnawm lehpek tak em! Hetih laia i khawvel nawm tur zia hi ka hriatthiam pui deuh ruak mai che ka ti he he

    Kinetic Honda scooter khi gear nei lo chi kha a ni lawm ni, a chak vak lo niin ka hria, nang ni pahnih sa tha nelh nawlh inphurh nan chuan a khawngaihthlak awm mange, rit chu a ti ve viau ang chu :-)

    ReplyDelete
  12. ngaihnawm thei hle mai

    Ltlrascal

    ReplyDelete
  13. A thring hle tak mai a......hehehehehe

    ReplyDelete