Search This Blog

Tuesday, April 19, 2011

Judy nu (pakhatna)


Ka fa neih hmasak ber hi hmeichhia niin a Kristian hmingah kapiin a sak, Bible a Judith hming a chawi a, a Mizo hmingah Lalfakawmi kan sa thung. August 16, 1990 chuan khawvel hmu vein kan lei lawmna a tizual chiang kher mai. Vanduai thlak takin anu hian thisen cancer veiin a thihsan ta a ni. Engpawh nise, kan pahnih chanchin tlem azawng kan ziak ange!

Judith, kohduat nan Judy tia kan hriat, anu hi Ramdinthari Tochhawng niin, I.B. veng, Champhai khua niin GM high school kal thin a ni. Kum 1987 khan Aizawl DC pisa hnuaia Election branch ah chuan enumerator angin thla sarih chhung ka thawk ve a. Inthlan dawn hnaih te anih avangin Champhai leh Mamit lam min bial tir ve a. Champhaiah hian VCP 6 nei siin polling booth 3 lek a awm mai bakah, anin kalthelh nuk hlawm avangin chumi siamtha tur chuan VCP te leh Civil SDO te dawr turin lehkha pawimawh kengin min tir ta a. Ahnu chuan VCP leh Civil SDO te zarah Champhai pawh polling booth paruk nei tain, a felfai ta thlap anih kha. Champhai IB ah chuan kan u Te-a (Daduhi u) jail kawng lo siam mek a awm avangin a room ka fin ve nghal mai a, hmelhriat sa lo awm chu a tihzia hle mai.

Hetih lai hian tlangval nive ta chu, Champhai tleirawl ho an hmeltha bawk nen mipa nihna tihlan loh a harsa hle thin. Chutiang karah chuan Ramdinthari (Cyndi tia koh) GM high sikula kal mek chu ka chhar ta a. Hmeichhe dang anga kawm mai kan tum chu a chezia leh min hnialna tawngkam mawi tak mai chuan min hneh ta tlat mai a. A hnu chuan, "Nakum lamah nupui neih ka inpeih hunin ka rawn lam ang che, min lo nghah peih chuan," ka ti ta a ni. Ani hi high sikul kallai mai e tilo chuan a puitling reuh em em mai a, a nunzia thatna chuan min hneh a ni ber awm e.

Kum chu aliam ve ta zel a, kanu Khumpuii fapa (kanu u) Frankie Lawmkima (fam) chu han ruk puiah ka sawm ta a. Ruk kher kan tihna chhan hi high sikul kallai a ni a, kum a tlin bawk loh vang a ni. Kan tum dan chuan ka motor cycle (Rajdoot Yamaha 350) kan keng chho anga, helicopter service lai ani bawk nen chumi chuan keini pahnih Aizawl kan chhuk anga, ka unaupa chu bike chuan a haw maiang tiin thu kan rel thlu ta a ni.

Champhai lamah lehkha ka han thawn ta a, ka thawn thui lo ve hle mai. Tlangval pakhat, amah hretu hnenah chuan Wills Flake kawrah, "Naktuk emaw kan lo chho dawn," tih te mai ka ziaka, a tlang ve ve ka char leh chu akeng ta a. Keini pawh a tuk zinga Champhai chhoh tum chuan kan inpuahchah ta a ni.

Khawfing achah meuh chuan Zemabawk kan thleng tawh ngei mai mahse, hma kan sawn thei ta reng reng lo mai a. Kan bike ken chu a nuar ta tlat mai a, ka unaupa lah kan thil tum avanga bike khalh zir chawp mai ani bawk nen, kei lah thiamin tawp chin alo nei ta bawk si a, kan siam tha thei talo a ni. Keimahin Champhai lam chu bus phar dingin ka chuang chho ta a, kawng tluangin min hre theitu an awm angem tih hlau reng rengin ka thleng chho ve ta. Champhai ka thlen veleh chuan ka thianpa pakhat, Cyndi (ti hlirin sawi tawh ang) u thianpa ber ni bawk chu min pui turin ka sawm ta chawt mai a. Ani lah chuan a thianpa nau ruchhuak tua a tang tur chu a inthlahrung kher mai.

Taxi Aizawl tlan thleng duh kan hmuhloh avangin, Khawzawl thleng tlan tur kan la ta a, hemi bak tlan tur hian a dang, Gypsy kan hire tel bawk a. Motor pahnih chu kan inzui dawn ta a ni. Heti deuh duaha kan tihna chhan chu Khawzawl kalduh kha Aizawl a thleng thei lova, Gypsy Aizawl kal hrehlo kha khami ni khan a hman leh siloh vang a ni ber.

Cyndi chhungten ka thlen chhoh an lo hre hman tawh chu niin, a sikul ban kan nghak hman talo. GM high sikul thlang kawngpuiah chuan motor tidingin, horn kan pe tuar tuar maia. Ani lo dak chhuak chu kan lo hûi ve bawk a. Athiante pali nen an lo chhuak ta, "Keimah chuan ka zak," a ti ta tût pek a. Sikul uniform nen naupang pangha chu Aizawl lam panin ka hruai chhuak ta a, vengthlang lama an dawr leh a pa Rizapa te dawr vel bawrah chuan towelin a hmai kan khuh thla ta zak zak mai a ni.

Khawzawlah hian kani Biaknemi (w/o Paul Zakhuma Hnauhnar) pasal a nau awm mahse kan fin duh lova, ka thiante a chhungten an hriatloh tur ber inah ka luhpui ta a ni.Ka thianpa chuan Khawzawl thleng min thlah a, Gypsy kan lo nghahna tur ahriat hnu chuan taxi vêk chuan ahaw leh ta a. A kum hma lama min nel vek tu mah nise, chutiang anih takah chuan sawi tur an hrelo hlawm kher mai, an thu ngawi chawt chawt ani ber e.

Gypsy chuan Aizawl kan thleng ta a, in lam chinchang engmah kan hriat loh avangin Chanmari hotel pakhatah kan lut a, chutah chuan riah luh phawt kan rel thlu ta a. Ka thianpa, Addy Lalhriattira Sailo chu ko pheiin chinchang ka hrilh a, ani chu kan in lamah chingchang hrilh turin a kal ta a. Hemi zan hi Cyndi, ka fanu nu nen kan mutdun hmasak ber a ni. A hma kum tea hla hlui, "Aleng ani aw, a leng vawng vawng," tih hla an thianzaho a an lo sak thin thu te min hrilh neuh neuh a, keipawh chuan a kut te chul sakin ngaihnawm ti taka ngaithlain kan muhil ta a ni.


Ka chhungten an duh angin in lamah kan phei ta anih kha. Kan inpuiah an thu tlar dal mai a, sikul uniform nen, an sikul bag nen, kapa chu a nui ru put put ka hmu reng a. Kapa chuan chutia kan thu chu, "Mate, engtin nge i chawm ang le, nangma hlawh pawh i khamlo ani si a, khawia chaw in nge i chawm ang le, " min ti ta phawng mai a. Kapa hian engemaw changte lo chuan "Mate" ti hian min ko ngailo, khami tuma chil ka lem dawk kha kala mitthla thei fo mai. Keilah pek chuan ngaihsam tak maiin, "A bêl ami in," ka ti ve tawl mai a. Kan ngaihtuah kirleh hian kapa u, J.Manliana (Mankebaia) MLA (1966) anih laia Assembly session a midang zawhna, "Mizoramin independence hmuta ila khawia chi nge kan liah ang," an tih a, a niin, "Ele a bûr ami," a tih te pawh ka hrechhuak rum rum mai. Kanu Nguri, kapa Manliana nupui pawh Dawrpui vengthar lam atanga lo leng pheiin, chinchang a rawn ngaihven pahin thurawn tha tak tak min pe bawk a.

Engpawh nise, Cyndi thiante chu an chhungten a mal malin an rawn lam thliah tliah a, an haw zo ta a. Cyndi chhungte lamah pawh palai thlak kan rel ve ta zel a. Kanu lama kan chhung hnai, Pu Vanlalberha (Forest Ranger) leh New market lama kapa thian Machhuana te chu palai turin an inring ta a. Cyndi chhungte lam chuan, "Makpa tur ang hmel pawh kan la hmu hleinem," an tih vanga palai kianga telve turin min chah ang chuan palai ho chu ka zui chho ve ta nghe nghe a.

Champhai thlen dawn hnaihah khian, kawng sir maiah insei zet mai a awm a, chutah chuan Pu Berha chuan min luhpui hlawm a. Anni lah chuan "Kan pastor alo thleng e," an ti mai a, an zai ta mup mup mai a ni. Hmanlai Mizo khual nei niawm ta pawn a mitthla theih. Sailo zaiin an zai a, ahla thu angin an awm zel bawk a, "A zal ta a," an tih leh an han mu vel a, chutiang chuan seki ngatin zu no dawmin an zaiin hlim takin an lam hep hep mai a ni. Anni hi engpawl nge annih ka zawt ta lova an khawsa zia atang kha chuan hmanlai Mizo nun tihnun tum an an hmel ka ti hle mai. Zu leh sa an ei a rui tiha sawi tur ka hmu heklo, an zaia an lama an hlim hle mai. A zai velo te chuan puan te an tah a, a thenin rawng an bawl a, thing lo ek chawrh chawrh ri lah abo chuang heklo.

33 comments:

  1. Abraham lalthlamuanaApril 19, 2011 at 5:43 AM

    A tawi lutuk, min ti vir hriat zel a chak awm........

    ReplyDelete
  2. Hv. A va ngaihnawm ve. Han ziah chhunzawm thuai teh, khamawm loh tak tak a.

    A nuihzatthlak bawk si ka nui ka nui mai-i che 'man' thei ka ti. I ru hnem bawk si, a hmai in khuh vel tur chu-ka la ru ve lo nang a, a boruak hi a danglam duh hmel.

    Tunkar chhung ngeiin i rawn post leh tur a ni ang.

    ReplyDelete
  3. I Thupui khi Judi-nu tih a ni a, Judi chanchin pawh tlem han belh la; hotel-ah hian cindy-i thiante hi khawnge an mut ve? In ina an han thu tlar tur chu ka hmu ve chak- Pu Berha chanchin khi a hrana han umzui tur i hriat bawk chuan- Ngaihnawm ngei.

    ReplyDelete
  4. ka chhiar chhuak thlap e..ka va lo phuah nasa ve...hehehe

    ReplyDelete
  5. Rp, Cyndi khi Judy nu alawm. Nia dam chuan kan ziak zel ang chu.:)

    mapui, misual lam i phuah sual em em hleinem :D tam tak chu hehehehe.

    ReplyDelete
  6. bel ami..he he he pa thei thin.....

    i ziak zel dawn ania

    -ZB

    ReplyDelete
  7. Hv ka hria a lawm. Ka comment dik thlap

    ReplyDelete
  8. Wills Flake cigarrette bawma secret code tawite i ziak khian awmzia a nei thui hle mai maw. Khatih hunlai kha chuan lehkhathawn kha hman lar ber a ni a, midang kuta a tluk luh a hlauhawm vangin love letter pawimawh bik erawh puarak rinawm tak a ngai. Tunlaiah chuan SMS hmangin second khat dan lek lekah thu kan inthawn thei tawh si a.


    I thuziak i tihtawp dan teh ngawt chu, a mak hle mai. Naupang sweet ei tur i kheh sak sauh sauh a, a ka ah thun sak lovin i ak leh daih a ni maw. A ngaihnawm khawp mai. I ziak zawm leh thuai ka beisei e.

    ReplyDelete
  9. Rp, ka confuse che emaw kan ti hman mawle, min chhiar sak thin a, ka lawm lutuk ania.

    caribou, dam han hauh anga karleh lamah aw hehehe :)

    ReplyDelete
  10. A ngaihnawm hle mai a, i hriatrengna pawh thatak ani...Awaiting part awmzel tur :)

    ReplyDelete
  11. Hei chu chapter 1 chauh a nih ngei dawn hi.

    Nupui ru in a thiante 4 ngawt mai ru tel ka vawi khat hriatna he he

    I thutiamah hian i ding nghet thei zel niin ka hria a, i kawppui nula te pawh hian an thlamuanpui thin khawp che in ka ring.

    ReplyDelete
  12. A ngaihnawm hle mai. Next part pawh chhiar a chakawm e.

    Chuan i topic hming "Judy nu" tih leh i permalink hming "ka fa hmasa ber" tih hi... :D i post i publish hnu ah a title i thlak leh a ni maw? :D

    ReplyDelete
  13. Thu inthup awm te hi atha ve alawm hehehe

    ReplyDelete
  14. mihring adventurous tak hi chu i ni ve chiang alawm. Judy pawh kum 21 a ni ve tawh dawn a nih chu. Part 2 te lo awm zel ang chu

    ReplyDelete
  15. Keipawh ka nupui kha ka ruk ve ngat ania. Tumlawk pawh ni lemlovin. I thuziah chuan ka experience ve toh thil pakhat min hriatchhuah tir zawk mai...

    2000 kum khan ka thianpa nupui tur Pangzawl ami ka va ruk pui ve pek alawm mawle. An landline telephone-ah kan han bia a, amah ni ngeia kan hriat hian alo la a, an aw a inang em em mai si.. (a nu alo ni a). Aw zangkhai vah hian "E, inlo thleng tawh maw? A nu ka nia, hei mami'n inlo kal dawn tih min hrilh a, inrualin Hnahthialah pheive kan tum a, kan insiam peih vek tawh" alo ti pek anih kha. Kan haw leh nghal vang vang. Amah chauh phurh haw tum nak alaiin a chhungkuaa phurh te chu a teuhlo.. Kha nu tluka mawl kha awwww

    ReplyDelete
  16. Ekhai..van ngaihnawm dangdai ve oo..

    ReplyDelete
  17. Va ziak ngaihnawm thiam ve o, Nupui i lo sun tawh a ni maw! Thlalak ami khi Cyndi chu a ni em?

    ReplyDelete
  18. Hlua, Ramdinthari (Cyndi) chu ni e

    ReplyDelete
  19. Thawnthu hi ziak ta la, a plot i nei tha viauin ka ring. Tichuan, chu lehkhabu lei hmasatuah chuan kei ka lo tang ang!

    ReplyDelete
  20. Ngaihnawm ka va ti teh reng em! Ka chhiar zawng pawhin ka ang phuauin ka chhiar!! Pu HV, Part II, III leh IV han ziak zel rawh le!

    ReplyDelete
  21. Ngaihnawm leh pek. Beisei loh deuhvin a tawp thut.

    ReplyDelete
  22. keimah, ilo lut ve ani maw, ka lawm lutuk.

    @Zaia & dolerich leh midang te, in ti lawmawm e.

    ReplyDelete
  23. Hv. Ka thiam ber lo nain i profile about me-a 'Aizawl apiang' tih hi 'Aizawla piang' tih zawk tur a ni e. 'Apiang' hi chu, 'kan tih apiangah mal min sawm fo thin' tih ang chi kha ni e. Rinte-a hi i nau tak tak em ni?

    ReplyDelete
  24. post t -1 chu a ngainawm khawp mai, a thar tur ka chan chhung hian koreant serial tihtop thut thin ka chan ber awm e...ziak zel teh khai

    ReplyDelete
  25. Dinthari tih lampang hi i lawmve hrim hrim....

    ReplyDelete
  26. Eheu...ngaihnawm dawn e. Pahnihna lo ngaichang leh phawt teh ang.

    ReplyDelete
  27. Vanglai nei pui bik rem rem mawle....ngaihnawm lutuk....

    ReplyDelete
  28. Henry, judith-i chuan a nu a chhun hle mai a,an khabe bawr te.thlalak a mi khi a nih ngai chuan hei hi judith-i pawh ti la emo ka ti hrim2 kei chuan. i hmangaih hle a ni tiro?

    ReplyDelete
  29. A ngaihnawm, nuih aza bawk....hahahahahhahaha

    ReplyDelete