Search This Blog

Tuesday, May 10, 2011

Judy nu (Pali na)



Champhai chho tur chuan kain buatsaih leh ta a. Champhai bus ticket chu va lain, chumi chuan ka chho ta a ni. Ka chhoh tur hi Judy nu chuan alo hriatsa avangin midang paw'n min hriain min hmu mahse pawi em em turah ka ruatlo ani ber.

Champhai chu kan lut chho ta a, IB lamah thlenna ka tihfel hnu chuan inhmuh kan tumna chu rang takin ka pan nghal a. Hemi hmun hi Champhai IB inhlui leh a choka inkara thingkung bul chiah a ni. Hemi thlang chiah hi an in anih avangin a remchang berin kan hriat avanga helai hmun hi thlang kan ni a. Ani Cyndi (Judy nu) pawh chuan a bag pakhat min rawn pe thuai a, "Thil ka theihnghilh lawk," tiin a lut leh zawk chu a rial ta vang vang mai. Keia ngaihna hrelo chu chutah chuan tlai atang chuan chaw pawh ei ta chuanglo chuan ka thu/nghak tlaivar ta thak a. Hun akal muang hle mai, chutiang chuan ni 2 leh zan 3 ka awm a, ka tamchhawl ta reng mai. IB luh dawnah hian hmelhriat an awm nawk a, chumi te hnenah chuan ka kal ta a.

IB luhna bul lane phei hi zu zawrhna vek anih thin avangin chuta ka lut chu an chawhmeh ka temsak bakah, zu liter 5 ka lei a. Zu chu in lo vin, Judy nu (Cyndi) te kawmthlang chiah Mabiaka (buhherkhawl nei, Sangthankima TNT te in lane chho) ami te inah chuan ka khailut ta a ni. Mabiaka chu thil chinchang ka sawipui pah chuan kan thli zel a. Mabiaka chuan Judy nu chu a rukin an inah ka awm thu a han hrilh thei hram a, a lawmawm khawp mai. Judy nu hi an inchhung zunina a zung tur pawh an zui zel tih kan hriat avangin Mabiakan a han hrilhru thei pawh kha lawmawm a tling a ni.

Kei, ni 3 chaw ei tawhlo chu no tlemte ah engmah hre lo vin ka lo let der mai chu niin. Chutah le, ani Judy nu (Cyndi) lah chu anu hmuhloh lai remchang a hmu a a rawn chhuk thei hlauh mai. Kei lah beidawng thinrim zuin engmah hrelo chuan ka lo let reng mai si, atan avan beidawn thlak dawn tak em! Mabiaka nen chuan tuisikin min leih ngat ngat mai a, min kaitho hleithei bawk silo. Chutih lai chuan anu ten a awmlo tih hriain a awmna an rawn chhui chhuak leh hman ta si. Ka thangharh chuan kalo huh phung a, thil awmzia ka hriat chuan inchhirna hlir inchhirna hlir ani ringawt. Rilru beidawnna neih deuh avanga thil tum neihsa puitlin loh nana hman pawizia hi aw. Beidawnna hi kan rilru siam ania, kan rilru siam chu kan rilru vekin kan hneh thei, mahse khalam kha ngaihtuah thleng turin rilru fim ka pu silo, a pawi zo ta anih kha.

Hun leh ni te a herliam zel a, Judy nu lah la chhuak thei ta chuanglo chuan hun aliam a. Ani pawh a beidawng ta aniang, chuti em em a ven uluk mai bawk chu atan pawh a ninawm zozai lutuk hrim hrim awm e. Tichuan lehkha kan dawng leh ta a, tuntum erawh a tawpna tur ani ta! Kan 2 ah a beidawn tawh avangin tlangval pakhat duhtu deuh ahmuh chu, "Ka chhang mai dawn em ni," tih dilna leh inhriattirna (a ni ber ang chu) lehkha a ni ta tlat mai. Han aih ngawt chi ni heklo, ani nun ka tih khawtlai ngawt kha a fel chuang bik lova, ui tak chuang chuan, "Ni e..." tihna lehkha tlar khat emaw lek chu ka thawn kir ve ta a.

Pasal fel tak mai Thenzawl lam chhuak Hualzika a nei ta a, ani hi J.E hna chelhlai a ni nghe nghe. Tichuan hlim takin an khawsa dun a, kan fanu chungchang pawh kan inhrilh tawn zel tho a. Chanmari West lamah, apa Sena te ina an riak tih ka hriat te hian nula hruaiin an inkiang chu ka zuk kal vel thin a, avan chauh thubarawh thin tak em. Tun hnua kan ngaihtuah leh hian kalo inthedere mai mai thin alo ni tih ka chiang hle mai. Tichuan, fa pawh 2 lai a hrin sak hnu chuan Thisen cancer a nei ta tlat mai le. Natna khuma a awm lai chuan min rawn chah ta a, chu thu chuan min thawn na kher mai. Tuncha chuan Champhaiah awm tawh lo vin, Chaltlang lamah an rawn insawn tawh a, chutah chuan daktawr lam an beidawn tawh avangin amah chu an enkawl mek ani a.

Judy nu te chhungkaw chenna in Chaltlangah chuan ka neih ve phak tawk, artui tray khat te mai keng chuan inthlahrung takin ka han kal ta a. An kawngkhar ka kik a, an pa chuan min lo hawn sak a, Judy nu mutna roomah chuan min hruailut ta a. Kha mi rilru zau leh puitling tak niin ka hria, " Lo inkawm rawh u aw, tih tur ka nei e..." tiin min chhuahsan ta daih a. Khata kan titi na khan tun hnu thleng hian ka tan nghawng tha anei ta anih hi.

Kan sawi zawng zawng hre vek tawhlo mah ila, a thu min chah hnuhnung ber khan min va han hneh tak em! " Judy pa, kan fanu hian a damchhung zawngin pa dang tumah a nei dawnlo. Chuvangin khawngaih takin tumah kut thlak tawh lo la, insual tawh lo la... zu rui buaiin awm tawhlo thei la ka ti ber mai. Kan pathum min pawt then tu pawh zu in chintawk i hriat loh vang a ni ber. Khawngaih takin insual leh zu ruih i fanu vangin i sim thei angem?" tiin ka chhanna nghakin min melh ran ta mai a. Ani lah damlo cher tak maiin khumah chuan amut bal mai a, a kut ka vuana kan mittui chu aluang dun zawih zawih ta mai a. Ka rilru chuan, "Thu tiam ngawt ila, ka tiam anga ka awm leh siloh chuan.." tihna rilru chuan min chhan tir a harsat ngei mai. Thi mai tur lakah ngat phei chuan thutiam chu alo har ngei mai, ka fanu Judy nu, ka hmangaih alo ni kher bawk nen. Huiham, mahse ka thinlungin "Tiam rawh" ati aniang chu, "Awle, miin min tihbuai paw'n khawih let ka tum tawh lo ang e," tiin ka chhang a. Ani chuan ala duhtawk loh avangin min zawt nawn leh a, min zawh nawn lehna, "Zu ruih buai tawh loh," pawh chu ka fanu vangin ka tum tawh dawn thu ka tiam ta a ni. Ka kalsan hma chuan kan fanu min hmangaih pui thei tur nupui nei ngei turin min chah lawm lawm bawk a ni.

Tunah chuan Judy nu chu a pasal te khua Thenzawl thlanmualah, thingbuk mawi tak kiangah hahdam takin a hahchawl ta. Rilru hah leh thlaphanna hmun, khawvel a chhuahsan a. Hun tawp, Pathian in muhil a kaithawh leh hunah atan a kaihthawh ngei ka beisei.

NB: Kapu Laldailova khan, "Mi rinawm te tan intiamkam angai velo, an sawia an bawhzui mai thin," a tih kha kala hre reng. Mahse, bawhzuina hun ka nei tawh dawn silo, tiam tul chu ka tiamta a ni.

16 comments:

  1. A ngaihnawm hle mai. In innghahna hmun atanga kal sawn duh lova i nghak ngat ngat ka hmuh khuh khian, i luhlul tur zia te, i paukhauh zia leh, i thil tih tawhah reng reng, ti mai mai ngailo mi i nih zia a lang chiang khawp mai.

    Judy nu chu a khawngaihthlak hle mai. A hmangaih ber leh a nun ina a thlakhlelh ngawih ngawih, zu vangin a chan che a, "nun khingbai" takin nunbul tan tha leh mahse a damlai ni a rei ta si lo.

    Heti taka inhmangaih dun nisi, in inthen chhan pawh ZU vang mai mai a ni a, in inthen hlim khan ZU nghei hmak la chuan "pa tha tak" i ni mai tur. Mi thenkhat te'n ZU hi fak mawi thin eng ang mahse, zu hi mizo chhungkaw tam tak nun tihrehawm tu leh tichhiaa tikehdarh vektu a ni. Zu avanga chhungkaw kehdarh hi, a tuartu chu naupang an ni thin, tih hi rem leh rem lo chung chungin ka'n lo belh ve lawk teh ang.

    ReplyDelete
  2. A dik khawp mai, Mizo te hi zu inthiam kan vang tak tak ania. Pathian hian min tawngtai saktu te tawngtaina a chhang lovang tih a hlauhawm ngawt asin. Nilo sela, he khawvelah hian ka awm tawh hauhlo maithei a ni.

    ReplyDelete
  3. ngaihnawm hle mai...an kawmthlangah i thianpa te inah i han chatthla leh khanglang a , beidawngness ani ringawt...

    -zb

    ReplyDelete
  4. A ngaihnawmin rilru a khawih kher mai. Hei hi i post ka chhiar tawhah chuan tha ka la ti ber mai. Ka rilru a hneh takzet.

    ReplyDelete
  5. A tawp chhiar thlen hmain vawihnih ka tawp. A ngaihnawm a, rilru a khawih mang e aw...

    ReplyDelete
  6. A tha in chhiar a va nuam tehlul em !

    Cidy pasal khi pa tha tak a nih dawn khi, mahni nupuite pasal hlui hun awl tha tak a pe duh che u khi a MAN ka ti khawp mai, Cindy pawh a duat khawpin ka ring.

    Hmangaih ngawih ngawihte thi mai tur bula awm lai vel khi ka ngaihtuah ringawt pawhin a hrehawm hian ka va han ring tak em. Tunah chuan natna leh tawrhna awm tawh lohnaah a chawl ta RIP

    ReplyDelete
  7. A tha in chhiar a va nuam tehlul em !

    Cidy pasal khi pa tha tak a nih dawn khi, mahni nupuite pasal hlui hun awl tha tak a pe duh che u khi a MAN ka ti khawp mai, Cindy pawh a duat khawpin ka ring.

    Hmangaih ngawih ngawihte thi mai tur bula awm lai vel khi ka ngaihtuah ringawt pawhin a hrehawm hian ka va han ring tak em. Tunah chuan natna leh tawrhna awm tawh lohnaah a chawl ta RIP

    ReplyDelete
  8. chhiar ava hrehawm ve aw....a hmasa ho ang kha ni ta hauhlo mai, khawvel a man ber tan pawh hetiang thil hi chu harsa tak ani ve ang...

    ReplyDelete
  9. I chanchin kan lo hriat belh zel e, chhiar a nuam thin khawp mai, rawn chhunzawm zel teh...

    ReplyDelete
  10. hnuk tepawh a ulh mai dawn lawmle. Ichanchin hi live ngeia. Inpui choka a min hrilh thin lai mitthla ah a cham a, hriat tawh hnu mah nise, ka hriat ang kimlo viau mahse, ka mittui a ko chhuak teuh hle mai. Matea_tmj

    ReplyDelete
  11. sob sob ka chhiar chhuak hram, chhiar a har hle,ka mittui in ka chhiar na a dal, huiha a va na em Judy nu! RIP aw i fanu hmel that zia te hi rawn hmu ve la ka va ti tak em sob sob a sawt tawh si lo......

    ReplyDelete
  12. Ngaihnawm plus touching khawp mai
    I zu ruihchhiat tuia an leih char2 lai che khian ka lo trang ve tawp i harh lo ka lo hlau, hlauh ang ngeiin i harh thei silo!!

    A va ngaihnawm em, I fanu chu a pic min lo entir ve la mawle

    Han update leh thuai2 teh, sadin a tawp a, a nuamlo
    -littlerascal-

    ReplyDelete
  13. sad deuh in tih tur *

    ReplyDelete
  14. -littlerascal- pathumna ah a awm kha....

    ReplyDelete
  15. Pu HV ka en e, thanks
    _littlerascal-

    ReplyDelete
  16. A ngaihnawm hle mai.....nula naupang tak nichunga puitling, fing leh fel tak kha ring zo in, kum a tlin nghak la, i pa ring bawk la Judy nu(Cyndy) in pasal dang a neih hnua gene mutation avanga blood cancer lo insiam hi a thleng lo hiala rinna ka neia.
    A nulat chhia leh tha hriat laia a hmangaih tak nei theiloa a nun a hman aichuan Pathianin a la ta a nih chu.
    A thu chah che chu Pathian Aw a nih ngei ka beisei.

    A ngaihnawm hle mai. God bless u with forgiveness.

    ReplyDelete