Search This Blog

Wednesday, May 25, 2011

Pathian zarah eng eng emaw ka zir belh ve zel.


White Water sports lama ka hna nghetlo (part time) kha Nipui (Summer) lai chauh thil anih vangin, kumkhatah thla reilo te chhung hnathawh hun kan nei a. Kan hun neih tawp lamah chuan thil zir theih awm tur ka dap ve reng thin. Tunlai khawvelah certified nihna neih loh chuan eng hna mai pawh hi a har vek tawh mai si a, chuvang chuan certificate neih theihna tur ang chi ka dap ve kha a ni a.

Chanchinbu atanga ka hriat, professional body guard tura train theihna hmun ka hmuh chu belhchian chi niin ka hre ta a. All American Executive Protection Training, Virginia lamah chuan Personal Protection Specialist Entry Level Course ti tur chuan ka in register ve ta a. Kan bel chiang tan deuh a, "Afghanistan lamah.." an ti tuah hum ta mai a, ka chhunzawm duh talo a ni. Middle East lam hi ka hriat nial nual avangin ka ngaina lo ve tlat. Engpawh nise, security lam tho chu Maryland state chhungah train chhuah tumin ka inziaklut leh ta a. Heta tang hi chuan October ni 27, kum 2008 khan certificate neiin ka zir chhuak ta a ni. Kan zir dan chiah hi chu sawi zau vaklo mai ila a tha zawk awm e! Tichuan, hote mah nise, silai te chi lampang him taka enkawl danah pawh Maryland state pulit hnuai atangin certificate ka la ve ta zel bawk a. A ho tham viau nangin kan sawi lang ve mai mai ani e.

Tichuan, ka hna ngaihsan ber te zing ami, "Fire fighter" hnaah enchhinna (Physical ability test) an nei dawn a, chuta tling te chu a nghet turin training an pe dawn tih ka hre leh ta hlauh mai. Ka hnathawh pangai pahnih ah te khan thlakhatah ni 8 ve ve zel dan angin chawlh ka khawl zel a. Chawlh la ngai lemlo ta chu kum hnih kum thum hnu chuan kalo khawl ve nual hman mai. Physical ability test neih hma hian High School Diploma - graduate paper kan pek luh hnuah written test kan nei ta a.

Written test nei tur hian high school pakhat kawtah zing atangin kan intlar put mai a. Athen te phei chu zing dar 2 atang te pawhin an lo awm lawk tawh a. Hemi hi a chhan chu mi 300 chiah exam hall an luhtir dawn avangin a kal hmasa sa an vannei ani mai. Keipawh zing dar 4 pelh hretah ka kal ve a, 14na nita in ka inhria. Hemi tuka intlar zat hi mi 3000 kan chuang niawmin ahnuah chuan an sawi ka hre nghe nghe. Tumah innek buai emaw, hmasa zawk nih tuma inchuh an awmlo, a kal tlai te pawh,"Engemaw thulah" ti niawm takin an intlar ve vek mai. Ka rilru te te chuan, "Mi 300 lek an luhtir dawn si a," ka tia mak ka ti zawk viau nghe nghe.

Zing dar 8 ah chiah kawngkhar an hawng ta a, felfai takin line siam ang ang chuan kan inzui lut ta hlawm a. Exam hall ah chuan dawhkan ah zawhna leh chhanna tur lehkha, chu bakah pencil leh nawhreh an lo dah sa thlap tih ka hmu thei. Exam hall kawngkaah chuan kan inghak khawm a, kan thutna tur nambar kan neihsa min kawhhmuh tu an awm zela, ka thutna tur chu ka pan ve ta a. Exam tan hun anih hma chuan kan hmaa lehkha te chu khawih loh tura hriattir lawk kan nih angin tuman khawih enah pawh kan enlo niin ka hria. Exam tan a hun ta, zawhna kan en thuak thuak a, ka thiam awm ang ang chu chhan hmasakah ka nei phawt a, chhut ngai chi deuh chu a hnuhnung lama tih atan ka dah hrih hlawm a. Zawhna te hi general knowledge, simple arithmetics, leh English grammer te anni hlawm. Darkar khat aral chuan chhuah ahun ta a, tichuan exam hall atang chuan school chhunga theater lamah chuan min luhtir vek hlawm a. Kan chhana lehkha kha computer a thlunzawm theih chi anih avangin kan thutfel hnu mai chuan envelope uk (brown envelope) ah kan result inkhung chu min rawn pe ta nghal vek a ni. A tling zawng te chu kan kalzel dan tur inziak te chu uluk taka chhiar turin min chah hnu chuan a tling zawng te chuan chumi lam pan tur chuan kan chhuak ta a; keipawh ka tling ve hram.

Maryland Police Training Center ni bawk, Fire Fighters ho training na ni bawk, Frederick khawdaiah chuan ziak lama (written) tling ho chu kan kalkhawm leh ta a. Hetah hi chuan kan tlem ta pharh mai, 50 awrh kan ni ta. Phurna leh zauthauna chuan min hnawh ut ut hian ka hria a, ka thin pawh a phurang kher mai. Ka châk ber te zing ami, an zinga tel ka chak em em thin, ka hna ngaihsan thawk tute, "American Fire Fighters" te chhungkuaa awm theihna hun ka nei ve dawn ta a nih chu. Tichuan, kan "Mentoring class" neih dan tur te leh thil chinchang min hrilh hnu chuan trainingna hmun-ram te min fankual pui a. Chumi hnu chuan rilruah nuam ti takin mittui parawl teuha Pathian hnenah lawmthu sawi chungin inlam pangin ka inkhalh haw ta a ni.


Mentoring class (Physical ability test nei tura inpuahchahna) kan neih hian, PT kan ti nasa thin hle. A hmasa berin kan ruh chuktuah te leh kan tihrawl te kan sawizawi (stretching etc) hnuin, Mel 3 (Km 5 tlinglo hret) kan tlan a. Chumi zawh chuan push-up leh sit-up nasa takin kan ti leh a. Push-up leh sit-up kan tih zawh hian training nan hrim hrima sak, inchhawng sang tak bulah chhukthla in, tui inna hun kan nei. Chumi zawh chuan excalator ang deuha kal rengah chuan 75Lbs (Kg 34.9) kawr ha chungin minute khat leh a chanve min kaltir a, step chhoh paha kawr rit tak hak chu thawk aharin minute a rei duh hle mai. Chumi zawh lehah chuan, "Fire hose" min hnuh tira, meter 50 kan tlanpui hnuah kan tlan tlang zela, laihlawn sei chi kan pawt dawka, kan dah tha leh a, "Attic Crawl" an tih mai, bawm thim zet mai, a chhung han luha kikawi tak leh fimkhur lova intauh bur theihna tam em emah chuan kan kawr kg 34 chuanga rit ha chung chuan kan bawkvak lut leh a. Chumai ala nilo, kan chhuak chiah chu mihring lem rit zet mai hi meter 50 kan hnuk leh a, ceiling pawhchhiat dan kan ti leh thin. Chutah le, inchhawngah khan chhawng 7 kan tlanlawn a, pawnlam banga thir stepah chak takin kan chhuk leh a, hetah hian a kar laka kan din chuan, "Come on come on push on you're the man, motivate motivate" tiin min lo au seka a hahthlak duh kher mai. Lei kan thlenin vawi 20 push-up emaw ti tura min lo ruatsak chu zawm zatin kan ti leh thin. Chutiang chuan physical ability test nei turin kartin thla 3 chhung inpuahchah nan hun kan hmang thin anih chu. Mentoring lai hian luhaia tlu te an awm fo bakah, chauh lutuk vanga thi te pawh an awm zeuh zeuh thin. Pakhat thih chhanah phei chuan kum 2009 khan court in trainer pakhat vangin County lamin $300,000.00 (Rs. 13,500,000.00) an chawi phah nghe nghe a ni. Hei erawh chu trainer fimkhur tawk loh vang anih hmel e.


Mentoring kan zo ta a, physical ablity test kan zo leh ta bawk a, training hun ani ta. Meialh chi hrang hrang, inchhan chhuah dan chi hrang hrang, Arithmetic, physical, gas ilo lut theilo thuamhnaw ha chunga khawlum lutuk laia meialh (In chhung an hal) kara kal te etc. chu kan zir ta tlut tlut mai anih chu. Nuam ka tiin ka rilru avan hlim tak em. Tanpui ngaite tanpui thei turin, hna tak taka nei thei turin ka inzir mek ani si a. Ka tluang viau a, ka hna pangai lamah pawh duhsakna min hlan lawm lawm lai chuan, "Ka tawnah vanpui a chim," an tih ang mai kha alo thleng ta hlauh mai le. Cancer awm thei mai tura an ngaih avangin zai (surgery) ka ngai ta tlat mai. Inzaina pindan lamah lakluhin ka awm ta anih kha. Tichuan, ka thawh chakna em em, khawvel hna a zawnga ka zah leh ngaihsan ber te zing ami chu thawk theilo vin ka zirmek lai (training) chu ka tlingzo loh phah ta a ni.

Pathianin mal min sawma, engmahlo mai kha, khawvela ram ropui berah fate enkawl theiin min dah. Chu mai ala nilo, nupui fel tak mai, fa pakhat bak hrin belh duh lova ka fa hmasa te min hmangaih sak tu min pe a. Ka rilruk phak ngailoh zirna lama ka temchhinna hrim hrimah pawh ka lawm tawh reng reng e. Azarah kan dam zel anga, zir theih ala awm zel ang chu... Ropuina chungnungbera hnenah awm se, a zarah thil hrang hrang a tih ve theih zel ang chu...

CHHUNZAWM ZEL TUR...

18 comments:

  1. A ngaihnawm khawp mai. I zarah in awmna lam hnathawh dan kalhmangte kan hriatphah a, a bengvarthlak ka ti khawp mai.

    In training pawh chu a hautak hle mai. In exam result chu a chhuak har vak lo a ni maw...haha. A changkàn hmel khawp mai. I rilru a ropui ka ti ngawt mai. Midangte tanpui duhna thinlung i pu leh a tak ngeia i thawkchhuak te, i chunga vanduaina leh harsatna lo thlengte a dam thei ang bera i la thiam leh zel te hi i ngaihsanawm ka ti tak meuh meuh a ni. Pathian pawhin mal a sawm zel che ang a, nakinah mite nunna chhanchhuak thei turin kâng i la thelh zak zak ngei ka beisei!

    ReplyDelete
  2. Congrats Bro! A ropui hle mai.

    ReplyDelete
  3. great.very inspiring and you sure do have a great wife and family.i tumruhna hi a ropui tom.keep making your friends proud.

    ReplyDelete
  4. Ka hman loh deuh avangin rei tak i block ka tlawh lo a, hei a lo tam hman khawp mai.

    Tuna i thuziak hi a ngaihnawmin a challenging khawp mai. I tumruhna a lo lang leh thin. Hun harsa-ah i buai ka ring lo thin bawk. I tling dawn emaw ka ti a, ka lawm hman viau a mahse i lo tluantling thei ta lo a nih hi..pawi hle mai. Mahse i last paragraph hi chhiar a nuam takzet e.

    Happy America!!

    ReplyDelete
  5. TS leh lal brothers , in ti lawmawm utuk.

    Krista, Firefighter ah kha chuan ka tling talo anih kha. Hlawh tam em em lo mahse ka hna zah ber te zing ami ania, ka train ve reng2 hi ka la chhuang pha tho aniang, ka ziak tui em mai :)

    ReplyDelete
  6. I hna hmuh dan leh i zawn dan te hi a ngaihnawm thin mang e aw. I lo fight nasa takzet a ni tih ka hre ta. Helamah chuan tihpuitu neitha tan chuan hna hmuh a harsa lova, fight vak a ngai lo asin maw le. Hnalak ah hian politician, a bikin Unit President, Block President leh MLA te, hi an inrawlh ve ngai vak lo ani maw???

    A tawpna chu a va lungchhiatthlak ve maw le. Theihtawpin i bei a, a rah seng chauh i hmabak tawh a, chutihlaiin vaduainain a man ta si che a. A zia lo hle mai. I nupui pawh chu a lo fel hle mai a. I thawhrim zia hi Pathianin a hmu reng a, nasatakin mal a la sawm em em ang che.

    ReplyDelete
  7. I phuloh nupui leh fanau te i nei tih i inhria hi i vannei leh zual, mahni in edit hi thil hartak a nia, nang zawng i hlawhtling zel e.

    ReplyDelete
  8. caribou, US ah chuan tling chu tling, tlinglo chu tlinglo. Police/firfighter/sipai ni tur hian high school zo tal nih ngei ngei angai phawt. Chutah hmanrua tamtak hi computerized anih vangin hriatna zau angai viau bawk ang. Nia, ka vanduai ta hlauh a ni, tha mai ang.

    Saitawk, a dik alawm.

    ReplyDelete
  9. A va ngaihnawm in a va zia lo ve aw...hehe.. Han tling la chuan Mizo ah a hmasaber i ni tihna a ni mai ang chu tiraw?? Khalam a Firefighters te kha an ngaihsanawm ka ti, helai nen an inanglo lutuk sia... Fireproof movie te pawh min hriatchhuahtir alawm le.. :)
    I tumruhna leh beih nasat na hi, i chhuanawm ka ti takzet.. Ziak zel rawh, a ngaihnawm. Nangmah atangin zir tur kan lo zawng zel dawn nia.... :)

    ReplyDelete
  10. ngaihnawm thei ngei mai
    _littlerascal-

    ReplyDelete
  11. Hei pawh a ngaihnawm leh bawk. Hna hi i lo zawng nasain i lo inzir nasa hle mai.

    Pathian hian kan tana tha tur zelin rem a ruat thin tih hi rin hmiah mai tur. Fire fighter i training zo thei ta lo pawh chu Pathian remruatna tho a ni ngei ang, lo thawk tala khawi kang thelhna ah emaw khan vanduaina tawkin i lo thi mai dawn te pawh a ni maithei a sin.

    I nupui hi a felin a rilru a zau awm ngawt mai, a hmel pawh a that ngei ka ring :-)

    Han chhunzawm zel teh, kan lo thlir reng a nia.

    ReplyDelete
  12. Ni e, chunglam rorel dan hi amak fo ania, ka vui ngai lemlo.

    ReplyDelete
  13. A va ngaihnawm em. Lo ziak zel rawh aw...

    ReplyDelete
  14. I chanchin ah hian zir tur a va han tam thin teh lul em! Ngaihnawm thin khawp mai. Pathianin i thawh tur diktak hna tha tak ala pe em em ang che.
    In nu pawh mmi tha tak ani tih a hriat. Janis-i min lo piai sak leh teh :)

    ReplyDelete
  15. ^-||RaLtE||-^, biang sen tawlin ka piai sak che :)

    ReplyDelete
  16. tinge ka comments ho hi a lang theih miah loa ...ZB

    ReplyDelete
  17. Ka u pa hi chu "Pa" nih i va tling tak em! Ka duh ang leh kan chang zawng ang hi kan tana tha tur nge tur lo ka hre si lo va, ka tling lo a nih pawn Pathiam remruahah kan dah mai hi a hadam thlak a, rilruna pawh a zia duh.

    ReplyDelete