Search This Blog

Wednesday, June 1, 2011

Hnathawh leh thil zir karah thildang!



Ka hna pawh ka thawk tluang ve zel a, chutih karah zir belh theih ka dap zel tho bawk a. Zan lama hna thawh a, a tuk lama thawk leh tur han nih chiah chuan hna pahnih inkarah mutna hun neih fumfe alo har phian mai a, haihawt pawh a awl phah duh viauin ka hria; hna lam erawh vanneih thlak takin ka buai phah lem lova.

Ka hna pahnih thawh loh changa inhlawhna dang hmun ngaiah a awmloh chang hi chuan Emmitsburg khua (Maryland state chhung tho) lamah ka va thawk phei fo thin. Emmitsburg a kava kalna thin hi, Catholic Saint, America a piang awm chhun, St. Elizabeth Ann Seton lo khawsakna thin leh an phumna hmun niin tlawhtu pawh khawvel hmun hrang hrang atangin angah hle a ni. Hemi hmunah hian amah Mother Seton hna chu chhunzawm zel niin, in neilo te leh inneilo natna benvawn (Zunthlum etc.) nei bawk si te an enkawl reng a. Biakin lianpui, Basalica a awm bawka a hnuaiah chuan St. Seton chanchin slide show en tur leh museum te a awm bawk a ni.


Biakin then hran dan tlem han sawi lawk ila: Chapel hi sikul emaw mimal in (home) nen inzawmna nei biakin te (small) sawina a ni. Church hi vantlangin inkhawm nana an hman thin, chapel aia lian ani tlangpui. Cathedral hi Bishop pakhat bial chhung (diocese) biakin niin church pangai aiin alian. Basilica hi biakin chi hrangah chuan alian in a sak dan a ropui ber. A chhung chunglam (ceiling) pawh bial chanve (semi circle) angin a kum phut a, cheimawi leh ropui tak niin, inkhawm nan leh kohhran mi te inhmuhkhawmna a ni.

Engpawh nise, St.Seton awmna hmun hi kan awmna khua atangin mel 40 (64.37 km) bawr vel a ni a. Chumi ah chuan volunteer angin, in leh lo neilo te leh a enkawltu te eisiam leh tul dang awm ang ang pui turin ka va kal ve thin a. A chang leh eirawngbawl ho ka pui thin a, chaw tur lo buatsaih te, chhang ur te leh chaw chi hrang hrang anih ang tura remfel te emaw chu choka lamah chuan ka thawk ber thin. Choka pawn lamah chuan dawhkana thleng, thirfian chi hrang hrang leh thirkut te lo remfel te leh an eina hnu, an thleng dah khawm thlengsil ho hnena dah phei te chu min thawhtir ve thin ani tlangpui. Damlo thenkhat te chu zunthlum natna vei nasa lutuk tawh, ke pawh a kal thei tawhlo te, ke tanbun sak hial ngai khawp a zunthlum nasa te an ni hlawm. Chu'ng mite chu an awm hmun atangin chaw eitur tein kan nawr chuak thin a, inleh lo neilo te an nih hlawm avangin an inthlahrun loh nan pawh a tumai pawh chuan hawihhawm an chuha, fiamthu an duh ang zawng an thawh pui thin. An tunhma nun dikloh vanga chutianga awmta te pawh an awm a, an chanchin an zep heklo, inchhir bawk si, chumi hmuna an awm thei an lawmzia nen an ngaihtuahna a inpawlhsawp ve hle thin niin ka hria.

Heta cheng leh enkawl mek an tam avang hian fridge ngawt pawh an nei lian kher mai. Fridge lian, a dung feet 20, avang feet 10 ang chi ngawt pawh 5 a awm a, chumi aia lian, Mizopa in pangai tiat pahnih a awm bawk a, chokaah 10'/10' pahnih ala awm cheu a ni. A enkawl tu sister ringawt hi 190 vel an awm reng a, damlo leh midang an enkawl lai za tel an awm bawk. Office lam hna khawih hi a nghetin panga vel an awm laiin ei leh in leh chutiang kaihhnawih (catering) lam pawh thahnem tak an awm a ni. A inchhunga ke kalna (hallway) hi a vaiin mel 7 (11.2 Kms) laia thui a ni.

Chumi hmun ka thlen tawh hi chuan mahni theih ang tawkin thahnem hi ka ngai ve thin turh turh khawp mai a, rilru pawh a hlim thin kher mai. Kawr var kan ha theuh a, kekawr dum nen, savun pheikhawk kan bun bawk a, apron kan hreng theuh a, Kulikawn Pu Chunga ang maiin viak tha takin kan vei thiak thiak tawh mai thin. Tlailam anih chuan haw a hun ta thin a, a hma lam lo chet nasat nen motor khalh haw a peihawm loh ve duh phian mai. Mahse, haw kawng leh inthlen hnu thleng mai hian rilru chhungrilah hlimna tak tak, Pathian duhzawng thawk ni ngeia inhriatna a awm avangin hah lam a lang leh tawh ngai chuanglo. Ka chhungte paw'n ka hlim zia ka hmel atangin an hmu thei ngei anih ka ring, chumi hmunah chuan tum hnih ngawt a hmunhma fangin anlo kal ve tawh nghe nghe a ni.

Hetih lai hian sawi leh sawihnu, sipai thil kaihhnawih lamah leh kan chenna apartment complex a enkawl tul ang ang (maintenance) chu ka thawk zel tho a. Zirna lam ka melh ve reng bawk a, nakin thlenga ka chawr theih tur zirbelh theih dan ka dap pah zel a ni. Mizoram lamah chuan zirna te hi to ve viau mahse tih dan dan ala awm zawk thin. Tun hnua ka pawi tih em em mai ani ta reng a ni. Hun kaltawh koh kir leh theih tawh hekloh le, ka hun tha kalo chhuah zo ta kha a pawi ka ti thin vawng vawng ngawt asin. United States ah chuan high school bak kal tur hian nu leh pa ten fate an pian hma atanga emaw an sen lai atanga an zirna tur a bik taka an khawlsa anih loh emaw, mi hausa tawntaw an nih emaw, an fate an thiamthei a, scholarship an hmu anih loh chuan high school pela lehkha zir hi a ngaihna a awmlo tluk a ni fo thin.

Zirna a to em em a, zirna man (tuition fee) ngawt pawh $35,000 thleng a kumkhat insen theih anih thin vangin zir thui a harsa hle. Mizoram lama awlsam taka lehkha zir theih lai kha angaihawm duh thin hle mai. America rama chhungkaw nawlpui hian kumkhatah $63,091 an lalut niin an chhut a. Chuta tang chuan college kal harsat dan tur zia chu a chhut theih tawh awm e. Chhungte lo inkhawl sa emaw, scholarship hmu thei khawpa lehkha thiam nih emaw, mi hausa tawntaw fa te kan nih ngawt loh chuan credit score thata students loan lak emaw kan hnathawhna hnuai atanga lehkha zir hi thil theih chu ani mai thin. Mahni hnathawhna atanga zir chuan mahni hna nen a inzul chauh a zir theih bawk. Chutiang chuan hun te alo liam zel a, thawhna te pawhin min lo ring ve telh telh a, keipawhin ka hnathawhna atang chuan ka zir chho ve ta zel a.....

PICS: St. Seton Basilica, biakin chhung thenkhat, St.Elizabeth Seton thlan.

15 comments:

  1. i volunteer chu i fakawm khawp mai...rilru nawm tur zia chu ka hrethiam mai...thums up


    US lehkha zir to lutuk hi chu buaithlak ve deuh ani e....keipawh ka lo kal loh phah..heheh

    ReplyDelete
  2. zualbonez is above comment ...haih

    ReplyDelete
  3. I lo va han taima/tuarchhel/tumruh/fak awm/ngaihsanawm/entawntlak/fel tak em ve aw....a dang kalo beisei leh zel e.

    ReplyDelete
  4. Min van fak nasa em em ve mawle. Infak hi nuam viau mahse, min ti zak tep a ni. Mahse, ka lawm e.

    ReplyDelete
  5. America rama lehkha zir man a va lo to reng reng ve maw le. America lama inzir chhuah tum ai chuan, ramdangah zir phawt a, chumi hnuah America ah chuan hna zawng zawk ila a fuh dawn anih chu. Kan ramah hi chuan zirna man hi a la tlawm asin. Mirethei tan pawh college kal ve mai a theih tlat. Kan lo vanneih zia ka hrechhuak e.

    A va han ngaihnawm tak em. Mitaima leh thawh hreh nei lo, tuarchhel tak leh a huna mitlawmngai thei tak i ni tih hi i chanchin ka chhiar tah thin atanga ka hmuh a ni. A ngaihnawm hle mai. Vawi hnih ka chhiar chhuak e.

    ReplyDelete
  6. A ngaihnawmin a bengvarthlak khawp mai. Kei hi, i thuziakte avanga rualawh nachang hre chhovin in awmna lamin ka lung min lèn tan tawh nia!

    ReplyDelete
  7. Ngaihnawm le hle mai, i thuziah chhiar hi chuan a dawt leh chhiar thuai thuai hi a chakawm thin. Han chhunzawm leh vat mai teh.

    Tin, TS-a hi rawn hruai ve mai teh a thawh awm tawk chu a awm ve mai ang, thil rit chawi lam ni lo te :-)
    -triplestar

    ReplyDelete
  8. TS, Mizo thalai te hi a tam thei ang ber, awm nghet kher tur lo pawhin rawn kal teuh thei se ka ti thin teh asin. Mi ten hna an lo thawh nasat zia te, an ram an lo hmangaih zia te, an tawng liam mai loh zia etc. kan hriat zual deuh2 nan te tha ka ti lutuk.

    Tum chuan kawng chi hrang2 a tam ang chu!

    ReplyDelete
  9. Ngaihnawm hle mai. Kal ve ka chak khawp mai.

    ReplyDelete
  10. a ngaihnawmin a bengvarthlak e - Kingpin

    ReplyDelete
  11. This comment has been removed by the author.

    ReplyDelete
  12. A ngaihnawm lutuk, i hun i hmang tha hle a ni.

    ReplyDelete
  13. comment thei lovin i thu ziah kha ka lo la chhiar char char a, ngaihnawm ka la ti reng a nia. Buai a chhuah chuan internet thlen phak lohna lam lamah thangte an tul leh thin atin ni.

    I thuziah hi ka'n comment ang e 'mi mak tak i ni'.
    Han ziak zel teh.

    ReplyDelete