Search This Blog

Thursday, June 30, 2011

Veng leh veng, khawlai insual lar lai

Tun hma kha chuan tun aiin kan la mawl hle tih a hriat khawp mai. Hun liam chen ala hlat loh teh reng nen hian mizia leh khawsak phung, veng leh veng inen dan pawh dang tak a ni ta!

Tun hma deuh, keini naupan lai te kha chuan veng huai ber nih hi kan chak thin hle. Chutiang remchang tur chuan kawtthlerah te 16mm movie chhuah chang alo awm leh zauh thin bawk a. Kan veng Kulikawnah chuan Salvation biakin bul, kawnzawl zau lai takah hian screen zarin, kawngpuiah chuan kan thu hmur thin. Cinema hall ah Olivia Hussey channa Romeo and Juliet (1968) an chhuak chiah kha chu Ngunhnam vai kan uar ve a, thianzaho lo pawh, veng leh vengin kan in vai vak mai thin kha ania. Chutah le, Nicky Cruz chanchin, Cross & the Switchblade (1970) Pat Boone leh Erik Estrada te channa an chhuak leh chiah mai kha chuan Aizawl South thalai min ti danglam zo niin ka hria. Bruce lee film ah chhuak leh chiah mai phei kha chu, kungfu lampang kha a lar leh em em ringawt mai a nih kha maw!

Robin Hood an chhuak leh chiah mai kha zawng, thal kan siam leh sup sup mai a. Thal hmawrah lah khan rangva kan khawr a, kan kap thiamlo hlawm hrima tumah intihlum kan awm em lova! Tumkhat chu kan kawmthlang u Mawia te nen kan tangho a, "Dâwka" kan tih Rinawma te chu lehlam anni. Salvation biakin pawn, Pu Thanthuama te in hnaih lama an zunin phen atang chuan Rinawma (Drâwka) chuan thal chuan ka kallai chu min lo tin reng mai hi alo nia. Min kap tur deuh chiah mai chu u Mawia chuan a han kap zat mai a, a ti fuh viau mai. Drâwka (Rinawma) kut-changah chiah a han kap bur vu mai a nih kha. A kut chang ikar taka lut ani bawk a, a kutphah chunglamah chuan a pawng pur mai a, phawi an harsat khawp mai. Tlema tlemah kanlo inkap hlumlo chauh thin chu alo ni e.

Cross & the Switchblade atangin chain a inhlap kan zir chho. Kei ngei pawhin ka pu thirsakawr duhlai, "Eastern Star" company siam chain thalai kha ka chhu chat a, inhlap nan ka pai ru ve ran thin. Rahsi Veng lamah Siam "Kungfu-a" alo lar hle bawk. Ani leh Padinga te ho tangrual chuan Kulikawn Varsangliana (Pu Rotluanga tupa) leh Zothanga te ho huikhawm chu kan inphek nuai ta thin a lawm. Twin-stick kha khawi vengah pawh khan a lar thin hle bawk.

Tumkhat chu Rahsi veng lam chu Kulikawn Presbyterian biakin bulah khian Twin stick (nun- chaku) an rawn vai thla pawp pawp mai a. Keini chuan thirsakawr chain leh thingfak kan keng fur hlawm a; sairawkherh ak pawh an awm nual ang. Chutia an puipa twin-stick rawn vai thla, posi nalh tak mai chu Varsangliana chuan tifuh deuh maiin a thal ta hual mai a. Chutah Pu Denga (Deng-commissiona) fapa RS-a chuan ring tak hian, "Pa Ding," a ti a, Padinga chuan, "Yes" alo ti thuai a. Rs-a vek chuan, "Run" an ti chiah mai chu, Rahsi veng lamah an tlan chhe dul dul ta mai a ni. Insual huai pawl nilo vin, a hmatawngtu pawh ni thin lemlo mah ila, sa him tih hi a awm tak tak thin lo. Red-lu zungbun (Kan chhun chawp) leh brass-knuckle a inhnek kha kan lo inti na lutuk thin lo hlauh a, kan vannei ngawt mai! Tumkhat chu Kulikawn biakin bula Pu Khawthinkhuma tukverh Rashi veng hoin an rawn perh keh a, Pu KT-a chu a thinrim kher asin, a vei vet vet mai mawle.

Mission veng leh Kulikawn inrina, Model sikul bulah hian sairawkherhin kan indo thin a. Saihlum leh marble kan hmang thin si a, ami fuh ana duh khawp mai. Na kan sawi tha hreh ve tumhrang si a, a rukin kan tuar tur ut ut mai thin ni khan ka hria. Kan hneh chang a awm a, min hneh chang a awm bawk a. Min hneh chang chuan Khasi veng thleng thleng hian min um phei thin pek a, keini lahin an veng thlanmual pel raka um chang lah kan ngah. Kan at at khan kan atmu kan so a, chhungte lah chuan min ngaihtuah thei em em mai a, alo mawl theih thin hle mai.

Tumkhat pawh Zodin cinema hall ah cinema en tumin kan kal phei a lawm mawle. Zarkawt leh Electric veng ho an lo intibuai nasa mai a. Kan thian zingah chuan Electric veng tlangval sualrawn tawh hi a awm a, ani lah thaza rual alo ni ve khanglang. "Electric veng ho kha in vai paw'n ka cho che u," ati thlarawk pek a, chhan angai leh roh si. Khami tum kha chu hmui a kawisawi tha viau a ni. Kan haw lam chu zalo deuhin kan innuih tut tut reng mai anih kha. Nula rim te khan Kulikawn atangin Chanmari west leh Chaltlang tih vel thleng thleng ke ngata kal chang a tam si, tum loh deuha insual zeuh zeuh kha thil harsa lo tak a ni thin.


Aizawl South lamah chuan Mission veng leh Rashi Veng (Thakthing tlang tih tak) te leh Tlangnuam hi Kulikawn hualtu anni bawk a, kan in khuainuai loh leh intihbuai kha chu a awm ve deuh reng thin. Tlangnuam hi an zia angreng khawp mai, an chiseh lakna kawng kan nih vang erawh anih ka ring hranlo. Tlangnuam Block veng lamah lo chuan veng dang tihbuai an hrat lemlo niin ka hria. Venghnuai ho nen pawh hian Pu F.Lawmkima (ex-minister) te in phei velah hian in umzui tek tek chu a awm zeuh zeuh thin bawk.


Tun hnua kan ngaihtuah kir leh chang hian, nu leh pa te rilru lo hah thin dan tur kha ka hrethiam ve dawn tan chauh niin ka hre thin. Kan fate pawn chhuak mai mai ngawt pawh rilruah an awm reng ania. Keini hunlai kha chuan Chawlhni tlaia sual tur zawng ngawta bazar thleng thleng kan tei phei peih thin kha ngaihtuahawm tur tak kanlo ni awm e. Min kal pel tur kan han nghawk thlarawk pek a, an rawn lehhawi chuan, "Min cho em ni a," tih nghal ngawt mai te kha alo van atthlak tak em. Insualhuai nih te kha intih theihna, nula kianga kan sawi tui theih tak kha a ni ve tlat. A hunlai te te a awm ve zel aniang e!




33 comments:

  1. Lung a va leng ve. Veng leh veng intihbuai hi chu aw. Keipawn veng dang ami kan um hrep tawh!

    ReplyDelete
  2. ngaihnawm leh pek khawp mai..... he tih hun lai kan rual u zawk ten a sawi hi ka ngai thla thin a a ngaihnawm ka ti thei khawp mai............

    ReplyDelete
  3. Veng tina sas hung (a bikin HV) tan chuan mahni veng bik neih a har awm akekekekeke... very ngaihnawm

    ReplyDelete
  4. A ziaktu berin experience i ngah bawk a, a ngaihnawm kher mai. Kan khaw lamah pawh, tunhma chuan veng leh veng insual kha a hluar thin hle. Football khelh te hian boruak a sang duh asin aw. Lung invawm, sairawkherh hmanga indo te pawh an ching. Thal siam kha kan uar thin hle na a, a indo em chu kan indo ngai lo thung. Kan veng tlangval leh pa ho kha, tun hnua ka ngaihtuah let hian, zu an in nam hlek chuan buaina kha an cho hliah hliahin ka hre thin. I thuziak hian nunhlui min tihrechhuak khawp mai.A ziaktu berin experience i ngah bawk a, a ngaihnawm kher mai. Kan khaw lamah pawh, tunhma chuan veng leh veng insual kha a hluar thin hle. Football khelh te hian boruak a sang duh asin aw. Lung invawm, sairawkherh hmanga indo te pawh an ching. Thal siam kha kan uar thin hle na a, a indo em chu kan indo ngai lo thung. Kan veng tlangval leh pa ho kha, tun hnua ka ngaihtuah let hian, zu an in nam hlek chuan buaina kha an cho hliah hliahin ka hre thin. I thuziak hian nunhlui min tihrechhuak khawp mai.

    ReplyDelete
  5. Ngaihnawm ve pangai. Ka Pa hian min hrilh thin a, ngaihnawm ka ti thei khawp mai. Zarkawt Veng an nia, an hunlai a Zarkawt insual hrat ho kha chu an hming pawh ka hriat ve nual phah.

    ReplyDelete
  6. caribou, a hunlai te te hi a awm a tiraw.

    Alejendro, Zarkawtah chuan Zokhuma (?) em ni kha aw, kan Karate zirpui thin kha insual chu a huai thei khawp mai.

    ReplyDelete
  7. hahah kulikawn billy idola

    -zb

    ReplyDelete
  8. ngaihnawm khawp mai
    Insual i hrat hmel sia i vanglaiin, i ha te a bal nual lo maw? halem a thren ah i vuah ka ring tlat lolz

    -littkerascal-

    ReplyDelete
  9. Keini chu a entu-per. Ka huai loh vang chauhah ka ngai. Mission veng tleirawl nen kha chuan tumkhat chu kan innuai ve chat chat tawh.

    Nang zawng i tuichilh hmel bik tlat; huai chu huai an ni a, engkimah an huai mai. A fukna a hran mai thin chauh a ni. Insuala dawih deuh chu kawng dangah pawh an huai chuang lo...ka ngaihdan

    ReplyDelete
  10. @-littkerascal- : Khem leh khi chu a awm nual, mahse ha lem a awm miahlo ania hairehai.

    @Rp Pachuau : tuichilh love, a hunlai kha a awm ve a, loh theih lova tel ngaihna chen pawh a awm; tuai kan nih ngawt loh chuan. Khawlai len te hian tum miah loh pawhin ka sawi ang deuh khian, min nghawk sak sak hi a tam a, pumpelh theih loh chen a awm fo thin. Kei phei chu miin insual min cho hian ka thiam naah pawh ngaihdam ka dil hmasa fo mai. Tih luih erawh chuan tawp chin ka hre lehlo thung. Thiante thlavang hauh vangin mi kut ka thlak fo zawkin ka ring, keimah vang nilo vin.

    Alo at theih veh veh khawp mai.

    ReplyDelete
  11. Hahaha... a ngaihnawm ka ti hle mai. I lo dai zau bik mange. Zuala chuan a ngam miah lo ang...:)

    ReplyDelete
  12. A va ngaihnawm pek ve aw.. Sairawkherh hmanga insual leh indo hi a hlauhawm duh khawp mai. Thala inkah pawh a hlauhawm duh ngawt ang le.. Kan changkang chho zel a. Naupang tan silai lem a lo awm a, mit chhiat phah hiala inkap palh an awm thute kan hria a. In lo vannei ngawt mai!A va ngaihnawm pek ve aw.. Sairawkherh hmanga insual leh indo hi a hlauhawm duh khawp mai. Thala inkah pawh a hlauhawm duh ngawt ang le.. Kan changkang chho zel a. Naupang tan silai lem a lo awm a, mit chhiat phah hiala inkap palh an awm thute kan hria a. In lo vannei ngawt mai!

    ReplyDelete
  13. TS, thal kan uar hma hian "Perhkhet" hmangin kan indo thin a. Mary Mount School naupang leh Tlangnuam sikul naupang te kha kan indo nasa thin. Kulikawn pheiah te khankan uar viau thin. Mitdel phah pawh an awm nawk alawm.

    ReplyDelete
  14. Chhim lamah khan a lar deuh bik em ni chu aw ka ti thin. Chawlhni tlai vela khalaia insual vel kha. patan leh cp road lun lai; 1990-1995 khan, kan vengah hian chawlhni tlai tin, zurui inti buai an awm deuh ziah.

    ReplyDelete
  15. Pu HV, nang kulikawn tlangval in Saikhamakawn tlangval sekibuhchhuak sairukherh a i perh lai chanchin te rawn ziak la? :D

    A ngaihnawm hleeeeee mai i post hi.

    ReplyDelete
  16. kei hi vengthlang tlangval ka nia, mission veng tlangval hovin kan hriat phak tawk velin 'people' an han ti zauh a, a bak chu insual kha a ni tawh mai.. gud pos
    -saint sammoo-

    ReplyDelete
  17. kei hi vengthlang tlangval ka nia, mission veng tlangval hovin kan hriat phak tawk velin 'people' an han ti zauh a, a bak chu insual kha a ni tawh mai.. gud pos
    -saint sammoo-

    ReplyDelete
  18. Mizohican, Saikhamkawnah sual tur an awm ka hre ngailo. Kei chu Patan hran lai ber pawhin tuman min tibuai ngai vaklo... ka nel hlawm vek mai a. Tumkhat erawh chu Patan luh dawnin hrui an lo thlunga, "Kawngpui inta bik anilo, min dang thei lovang," ka ti a, kan inti buai ve tep. "Zu i in dawn loh chuan kal rawh," min ti ve mai a tawpah.

    ReplyDelete
  19. A ngaihnawm hle mai a, keini lam tan chuan HIstory tha tak a ni ringawt a lawm le...Veng leh veng in tihbuai hun laia an sawi ka hriat chu Faklukawlha(L) Electric Veng ami kha a nia, Pu HV, i lo insual pui hial toh lo maw? Haha, veng leh veng insual ah khan thihpui em chu an awm ngai lem lo tihna a niang maw?
    Han ziak zel teh....

    ReplyDelete
  20. Kei hi Mission Veng tlangval ka nia..people

    ReplyDelete
  21. Sandman's Zo blogger-a Post of the week awm reng a ni e. Tunlai angin Glock han nei mai la, tual i that hnem awm mange!

    -kawlhawk

    ReplyDelete
  22. Ngaihnawm hle mai. Sairawkherh chuan vawi khat kan indo ve tawh :-)

    By the way, 2nd para, 2nd line-a 16mm movie khi a va te awm ve a? I type sual a nih ka ring tlat.

    ZerO

    ReplyDelete
  23. '87 vel, Serchhip kan awm lai pekin, Chawlhni tlai tin insual an awm ziah, en peih a thu ni mai. A hun lai a awm aniang e, tunlaiah chuan arpa pawh an insual duh tawh lo a, theh chawp an ngai a ni lawm ni :D

    ReplyDelete
  24. ZerO, type sual lo khiah :)

    @Varte, khatiang lai bawr chho vel khan ka tam ve lutuk Serchhip ah. IB ah khan ka thleng mai thin. A nuam ka ti ve thei khawp mai, a khawmi te an fel a.

    ReplyDelete
  25. Rahsi Veng Pu Dinga i tih hi Pu Thangdinga (L) kha a mi le aw?

    Rascal Crowe

    ReplyDelete
  26. Ngaihnawm hlemai, kan naupanlai khan an la ching deuha, vawikhat chu bethlehem veng tlangval bek ah sairawkherhin an perh a, a thal tawp. An man a an shock rawn luai luai. lolz

    ReplyDelete
  27. Ngaihnawm hle mai. Kulikawn hovin carnival an siam thin kha ka la hria... halpuah nen an indo lem thin...hmuhnawm kan ti thei rap mai...in veng hi chu tih bung bung lam hi in uar in ka hria!

    ReplyDelete
  28. @ascal Crowe Pu Dinga nilo vin, Padinga, b/o R-a (fam) leh Nuseni (samsiam).

    @Maisek, Mizorama carnival tichhuak tu chu kan veng alawm. Ni e mipui tanrual, thawhho, thiltih ho etc. na lam hi kan uar khawp mai.

    ReplyDelete
  29. A van han ngaihnawm mai mai tak em aw! a mood ah min hruai peng hneh hle mai, i hriatreng na chu a tha kher mai. In naupan lai chanchin chipchiar takin i rawn ziak chhuak dap theia, i ngaihsan awm khawp mai. Ka huai lem loa, mahse ka la hriat chian ve kha chu, kan class sual huai midang bulah, amah a awm lohlaiin ka lo cho ve ringawt a, an lo hrilh leh sia, kan insual ta chiam mai anih kha, kawngthlangah kan inthehthlak siak thin a, a hnuai ka awm laiin, ka peuh tawh lo tiin, a hnuaia a tan in, ka peih tawh lo, kan tia, 'ka bang' kan in chhawk a, tumah in min thelh an tum silo, a hahthlak duh ngei mai. Insual chu achak zawk nih pawn, kan na, a chaklo zawk nih phei chuan a na lehzual, hahahaha

    ReplyDelete
  30. Pu H.V America a zirna chungchang leh thildang zawh ka duh che a,khawngaihin i email i.d min hrilh thei em?

    ReplyDelete
  31. @hmelthatea, Ka naupan la chuan ngamloh ten min vel a, sairawkherhin ka perh a, a hnuah min vel leh a, chutiang reng reng hahahaha.

    @jona, Google thuai mai la a tha lawm ni le aw. I duh ang tak i hmuh theih zawk ka beisei. Mahse, ka last name @gmail.com

    ReplyDelete
  32. IsthereloveinspaceJuly 12, 2011 at 10:08 PM

    ngaih nawm hle mai... Children park a thian ho a kal dul2, veng leh veng in sual hunlai vel kha chu ka hre pha ve vuai2. ziak zel roh

    ReplyDelete