Search This Blog

Friday, July 8, 2011

Carnival






Mizorama carnival siam hi Kulikawn YMA tih chhuah a ni a. YMA tiha thlak anih hma, YLA anih lai khan Pu Biaktluanga chu Calcutta lamah lehkha zirin a awm thin a. Chutih lai chuan Maidan hmunah sapho carnival siam a hmuh thin chu Kulikawn vengah a rawn ching chhuak ve ta a ni. Kulikawn/Mizorama carnival neih hmasak ber chu December ni 28, 1939 (Ningani) ah ani nghe nghe.

Keini angin kan hriatthiam ve phak chinah chuan carnival pawh an tih tanna alo rei tawh viau mai a. Chutiang vang chuan Kulikawn carnival chu a phuisuiin, a ropui ve thin hle mai. Carnival neih dawn hnaiah chuan keini rual naupang ho chu ramhnuaiah min tir liam thin a. Hnah lak a tul thin vang a ni. Ke kawng mai anih thin avangin kawngpengah te chuan kan kalna lam hriat theih nan kan kallohna lama "Chhawl" dahna chang te kan inzir ve zel bawk a. Chutiang chuan naupang te pawh phur takin mahni chanpual theuhah vengchhung tan kan tangkai thin hle.

Kan hnah la (Chengel hnah) kan haw chu Pu Lalsangliana (Lianliana pa Suddena ziaktu) te bathlar zau thin takah chuan min dintlar tir thin. Chutah Pu (TV) Lalthanzuala (Patrick Hauhnar (fam) patea) chuan, "Sweetan sweet a sem dawn tih rawh u le," a ti a. A sawi ang chuan keini naupang ho chuan kan sawi thap thap thin a, sweet chu a mal malin min sem thin. Chuta tang chuan tun thleng hian "Sweet-a" tia koh leh hriat anih phah ta nghe nghe. Khatiang chithlum mum min pek khan kan hlim ve tawk em em mai thin. Phur takin kawtthler cheina tur lehkhamawi te chu nu leh nula ho kan cheh pui a, buara hruiah kan belpui thin bawk a. Engkim maiah vengchhung kan tangrual tha thin em em a ni. Venghnuai Sihpui tuikhur kalkawng, tuna Pu Ngurhuzaua MCS te kawmchar lamah hian YMA in in asak sak/chawm, mi ang chiahlo a awm thin a. Chumi thleng chuan mahni tawkah kan buai tlang vek ani ber mai e.

Pu Biaksanga (BS-a) USA a awm nu, Pi Hrangi kha carnival police hotu lemah a tang thin a, a taksa pianphung leh a khawsak lem thiamna chuan mi a chawk hlim thin kher mai. Ani lah chatuan mual min liamsan ta si ale! Carnival tanni alo thleng a, infiamna chi hrang hrang a awm bakah, naupang lawmah merry-go-round te leh magic show te, thil tam tak hmuhnawm leh intihhlimna a awm thin. Naupang kan la ni a, ka nu leh pa ten kan unau min hruaiin, lukhum chhip zum kan khum a, lungkham reng neilo vin, hlim takin kan hun kan hmangral thin. Lapaw chini her vir muai muai te kha kan kil bial laih a, khabe kham thum khawpin kan ei mai thin ni khan ka hria. Gorkhali nu chhang-kual te kha avan ngaihawm thin vele, tui ti tak khan kual khat pawh nei ila kan insem diat diat thin.

St. Pauls zirtirtu thin Pu Zorama (fam) kha Punjabi anga inthuamin, annu kha Punjabi nu anga inthuam bawkin kawtthler an rawn fang ta thin a. Keini naupang ho chuan kan zui dul dul tawh mai thin. Tlangval hoin Red Indian anga inthuam ten cowboy te nen kawng an rawn zawh (parade) a, fancy dress chi hrang hrang hmuh tur atam thin hle. Bazatawna! leh Pu Ruata (ka ni pasal nau) te leh Pu Thanthuama band party member hlui ten Baza (bagpipe) leh khuangpui te vuain mipui min awi thin. Anni hi an peih khawp a, kumhlui thlah zan emaw Kristmas zan emaw hian kan kawmchhak tlang atangin mipui chutiang rimawi chuan an awi peih fo mai, an fakawm takzet a ni.

Kulikawn carnivalah hian tumah awm awl tum a thianglo a ni ber. Ziak emaw ngenna emaw a awm pawh ani chuanglo. Chhungkaw khat ang maia khawsa tlang kan ni a, chuvangin inthuam zuar pawh ni sela, an mamawh naah chuan kawngpui atang pawhin mi inchhungah an pawtlut rawih zel mai; nuam deuh a ni. Kan lo tlangval chho ve ta bawk a, keini pawhin kawngah nula lo kalpui chang kan nei ve bawk a. Tumkhat chu carnival neih laia vengdang nula ka kalpui lai chu u Te-i (Lianliana (fam) nau) chuan "Henry lo kal lawk teh u," a ti a, an inchhungah kan zuilut ve mai a. Chutah chuan mi an lo phu mur mur hi alo ni a. Engmah sawi set set lo chuan u Te-i chuan ka kawr haklai aphelh nghal bawrh bawrh ani ber. Kei chuan min duhna chhan ka hria a, nui vur chung chuan ka inpelh ve sawk sawk zel a. Carnival fancy dress a tel turin vengchhung mipa an hmuh theih remchang an lo ko khawm alo ni a. Ka kalpui nula pawh chuan min pui chhunzawm ve ta zel mai anih chu; tih tur dang nei heklo!

Min thuam dan chuan nuih a tiza fahran lo viau dawn a, kan hlim phian lawi a! Kei, Malsawma leh Te-a (fam) s/o J.Lalhmingliana te unau tih loh kha chu patling thankin thah mai kha nula nalh tak angin min chei ta a nih chu. Ka high heel bun tur kha thianpa Op-a farnu Zothangliani pheikhawk min hawh sak a, kei lah chuan ka rap leka, a thler ta duai a, lehlam khai lauh lauhin ka kal phah ta a ni; ka bun tawk dang awm heklo. Tichuan, Salvation biakin kiang kawn zaulai bera truck an hun chung chu stageah an siam a, kailawnah chuan kan lawn chho ta a. Keimahni darah theuh hian "Miss...." tih a inbel a, kei kha "Miss kawngphei" ka ni ta awm e. Truck hnung lawnna kailawn kan kal chho chu mipui an nui ta hum hum mai pek a, in ngaihbel a awl kher mai. A hnua ka hriat leh dan chuan kan zing ami Pu Sangliana (U Saliana) chu a mini ven kar atang khan apen chhoh pahin a tilmu alo lang tle zeuh zeuh thin alo ni awm e.

Hetiang hian hlim takin Kristmas kan thlahliam a, kumthar kan lo hmuak thin. Rimawi tum thiam chi hrang hrang ten hun an hmang thin a, naupang ber atanga a upa ber thlengin kan hlim tlan theihna tur buatsaih theuh alo ni thin. Vengchhung/khawtlangin thianghlim taka pawisa a tuakna anih bakah Mizoram angah chuan intihhlimna tur awm vak heklo. Khatianga carnival kanlo nei thin kha alo hlu thin ngawt mai. Tunah zawng, eng kanti ta nge, vengchhung pawh tun hma angin kan tangrual tawh lova, carnival leh intihhlimna, Kulikawn kan nih bikna te a chuai zo ta. Thil tamtakah erawh vengchhung tangrual pawl tak kan la ni tho awm e.

Kulikawn, ka veng, ka seilenna, ka chhungte vek ang maia ka en te ho, ka tan an va hlu thin tak em!

PICS: Top-Bottom: The 3 Amigos (Pu J.Lalhminga, ka pa, Pu Ngurhuzauva), Band party: Zonghingliana, Bazatawna leh Pa Ruata, Pi/Nu Hrangi te, Ka nu hovin kei leh ka chhang chiah Mami, Merry-Go-Round

16 comments:

  1. i phawrh tha thei hle mai, hman deuh kha chuan ka kal ve ziah....carnival police ho chu an va thra hlom ve le :D - Kingpin

    ReplyDelete
  2. A va ngaihnawm pek ve! Thlalakte nen thlap lehnghal. Bengvarthlak a tel bawk nen. Thil të neuh neuh ni-a langte pawh i rawn sawi tel leh thlip thlep thin a, i thluak memory card hi eng gb tak ni ang maw?!

    ReplyDelete
  3. @Kingpin & TS, in va fel vele, in lo lut thin a ka lawm e.

    ReplyDelete
  4. I ziak chhuak thiam angreng ka ti, a rei tawh tehlul nen. A tak ngeia i thil tawn atangin 'nun' min hrilh thin a, a hlimawm a, a ngaihnawm khawp mai. Veng dang nula i kalpui i sawi khi i bialnu a ni em lovang chu maw...

    ReplyDelete
  5. @dolerich hmelhriat, carnival chhima lo kal, ka teikual pui ani ber awm e.

    ReplyDelete
  6. Ngaihnawm leh pek ve, i hriatna hi a tha khawp mai, chuan in merry-go round khi hihi a hlui ve tlak2 tawh hle mai

    Chuan....i Nu khi a van hmelthat hmel ve aw!!!

    _littlerascal-

    ReplyDelete
  7. he post chu a va hlu ve :)

    -zualbonez

    ReplyDelete
  8. A chhiar a nuam-in a ngaihnawm khawp mai, Carnival tih vel hi ka lo la hre ngai hauh lo mai, Keini pian hma thil ani ngei ang, a bengvar thlak khawp mai, khitiang Old Picture hi ka tan chuan Picture thar ber ber te aiin a hlutna a nep chuang hauh lo, a tha lutuk e

    ReplyDelete
  9. Pic khi size lian zawka en duh tan click mai theih a ni e.

    Inti lawmawm thin mange, ka thuziak fahrah ve te teah fuihna thu min pe thin a. Ka lawm e

    ReplyDelete
  10. A ngaihnawm leh pek mang e. I rilru chak dan leh thil chipchiar taka i hriat rei thin dan em em hi chu aw. Zirna (education) line hi tluang takin zawh chho zel la chuan, i turu ngawtin ka ring thin. In carnival hman thin chu a nawm hmel khawp mai. I nu khi, a nulat lai chuan a hmel a that ka ring khawp bawk mai. hriat rei thin dan em em hi chu aw. Zirna (education) line hi tluang takin zawh chho zel la chuan, i turu ngawtin ka ring thin. In carnival hman thin chu a nawm hmel khawp mai. I nu khi, a nulat lai chuan a hmel a that ka ring khawp bawk mai.

    ReplyDelete
  11. IsthereloveinspaceJuly 12, 2011 at 9:52 PM

    tha leh hle mai, a lunglen thlak hel mai i thil sawi ho chuan... ziak zel ang che

    ReplyDelete
  12. Archive i va nei tha ve. Thil lah hi i hre rei thei em em mai lehnghal. Tluk loh rim i nam mang e. Nikum lawka ka inluahna nu hming ngaihtuahin ka buai buai a nia, kei chu. Ka OT ta mah mah e.

    ReplyDelete
  13. Rp Pachuau, Min chhiarsak peih thin a, nangni ang te hian alawm min ngaihtuah chhuah tir thin. Fuihtu tha tak awm hi angai ve ania. Ka lawm e

    ReplyDelete
  14. I blog hi ka bookmarK ngat ania.. Kulikawn Carnival hi thian za ho in kan rawn chhim ve ziah thin, 90's chho vel khanI blog hi ka bookmarK ngat ania.. Kulikawn Carnival hi thian za ho in kan rawn chhim ve ziah thin, 90's chho vel khan

    ReplyDelete
  15. i blog hi k chhiar tan ve chiaha..hei lo poh hi mizo thil hlui tha tak tak ala awm teuh ka ring, chhjar a manhla dawn khop e..i blog hi k chhiar tan ve chiaha..hei lo poh hi mizo thil hlui tha tak tak ala awm teuh ka ring, chhjar a manhla dawn khop e..

    ReplyDelete