Search This Blog

Friday, July 15, 2011

White House tlawh chungchang! -1




"White House" han tih chuan enge/khawnge a awm hrelo kan awm meuh awm love. Engpawh nise a chanchin tlemte, tawi te tein i han sawi phawt teh ang aw!

1792: White House sak dan tur ngaihtuah chhuak thiam bera George Washington in a thlan, James Hoban chuan White House sak hna atan.

1800: President John Adams leh a nupui First Lady Abigail Adams te chu White House, in (residence) anga hmang hmasa ber an ni ta.

1814: British sipai ten "War of 1812" an tihah chuan White House an hal.

1817: James Hobanin White House sak that hna a thawk zo.

1846: White House thlalak hmasa ber ni ngeia hriat lak a ni.

1902: President Theodore Roosevelt te chhungkua in an luah ve chiah chu an rual lutuk a, an chenna pawnah "west Wing" chu pisa lailawk atan a hmang.

1948-1952: President Harry Truman chuan sak that hna thawkin leihnuaiah chhawng hnih dang a sak belh.

2000: White House chuan luah anih kum 200 na a lawm.

President Benjamin Harrison khan White House ah electrical wiring a dah thar tir a. Electric a hlauh em avangin a eng timit a, tieng turin electrician hranpa a ruai.

CHHUNGKUA A WHITE HOUSE FAN INPUAHCHAH:

Tunhma, 9/11 hma te kha chuan White House tlawh duh chuan a tlawh theihni in, pawnah intlarin, awlsam takin an lut thei mai thin. Tunah zawng, firfiaka che ten engkim mai harsatna an siam ta si. Chutiang anih tak avang chuan an dan siam angin, kan district (district 6) bialtu Congressman, Roscoe Bartlett hnenah lehkha thawnin, chhungkua a White House tlawh kan duh ve thu ka thlen ve a. A secretary, Faye Powers chuan min rawn biak zawmin tum 4 lai min dil hlawhchham sak ta a ni.

Hetianga White House fan (tour) phalna dil hian kan dil atanga kan duh ni (day) kha ni 30 a karah a awm tur a ni. Chutianga han dil ngawt pawh ani lova, "Security information' fel fai takin kan ziah thlap a tul a, chumi chu Congressman pisa lam chuan min va thawn sak ta thin anih chu. Kan ni (day) duh hun a thlen hma ni 15 ala awm tihin chanchin hriattir kan ni thin. A tawpna berah phei chuan, "Tunkum nipui chhung a khat tlat tawh mai, a pawi hle mai. A hnu lam in duh dawn chuan kan lo dil sak leh ang che u," tiin chanchin min rawn hrilh ta a; a beidawn thlak thei rum rum mai.

Tichuan tumkhat chu ka hmelhriat pakhat Sally Sherman nen kan titina lamah chuan White House fan kan dilna kan hlawhchham hrih thu ka sawi chhuak ta a. Ani chuan, nui ver ver chung chuan, ka puih theih che i ring em? a ti ta roh pek a. Kei chuan ani sawi anih chuan ka rin ngei thu ka sawi ve mai bawk a! Nui sang chung chuan, "Ka thawk alawm," ati ta heu mai anih chu. Rilruah chuan phurtharna a awm duh chiang alawm. Tichuan, Sally chuan "Keimahni ho hi mi 2 hruai theihna min siam sak thin a, remchang hmasa berah lo thun che u ka tum dawn nia, mahse keimah tello pawhin mi 3 chauh a theih dawn," a ti ta a. Ka rilru te te chuan kan chhungkua 4 kan nisi a, ti rilru chung chuan, "Congressman lamah kan dil zel tho alawm," tia inhnemin, "Min tih sak theih chuan ka lawm ngawt ang," tiin a tawngkam tha chu ka umzui ve ta a.

Karkhat emaw a rial hman tih chuan ka biakhlatna (phone) ri khat ve tak mai chu a ri ta ral ral mai le! Washington, DC nambar ani lehnghal a, "Tunge ni ang aw," tih rilru pu chung chuan ka chhang ta a. Sally ngei mai chuan, White House kal theihna July ni 15 zing dar 10:30 atan a tihfel tawh thu min rawn hrilh pah chuan e-mail ah thil hriat tulte a rawn thawn thu a rawn sawi ta anih kha, a ngaithlak anuam hle mai. Rilru hlim takin ka lawmthu ka hrilh a, e-mail chu ka hawng nghal ta bawk a. Pathum chiah kan kal theih dawn vangin kan fanu upa zawk, Judy pawh a hriatthiam hram ka dil lawk tawh chu ka hrilh nawn leh ta bawk a.

Nilaithawhtan chu zanlam hna ka thawh vangin, Zirtawp zing dar 7 a rik chuan inlamah chhungte lam turin hnathawhna hmun, Washington, DC atangin Km 73 (45 miles) vela hla kan chenna hmun chu ka pan ta a. Kan nu pawh a zing tlan alo haw tawh a, ka fanu naupang zawk Janis pawhin breakfast alo ei mek bawk a. Kawr ka thlak a, kan fanu upa zawk kan kal dawn thu kan hrilh a, kan chhuak zui ta a. Zanlam tlaivar bawk motor khalh haw a han khalh kir leh chu mit a thip tha duh phian mai. Kan Freeway/Highway lah hi kan tlan muang hran silova, uluk taka mit han khap that ngam lah ani mang bawk silo. Engpawh nise, ka hnathawhna hmun, Watergate building ral lehlam garage ah chuan motor chu kan hnutchhiah ta a; White House bulah motor dahna awm heklo, taxi kan la ta a ni.

White House kan luhtanna tur, 15th Street leh Alexander Hamilton Place inkar hi kan hnathawhna atanga hnaite ani bawk a reilovah kan thleng ve ta mai a. Gate a duty, United States secret service ho kan va bepawp nghal vat a. Kannu purse an hmu chu, "Ken luh theih leh theih lovah khan chiang takin a inziak asin mawle aw. Khawngaih takin dahna tur in zawn hmasak angai ang. Leiah in dah phei chuan bomb squad an ko nghal anga, kan vawiin ni a chhe zo a ni mai," tiin biak nuam tak siin tha deuhin min hrilh ta a. Tha deuha inhrilh pawh ni ila, motorah emaw ka kir leh chu angai ta phawt mai le. Hmanhmawh chung that lohna ka hre leh ta. Lehkha kan neih kha chhiar chiang ila, hetiang kan ni teh nuaih lo tura!

Taxi dang pharin, kan motor dahna hmun lam panin kan tlan leh ta a, kan nu te erawh chuan gate bulah chuan an nufa chuan min lo nghak thung a. Kan hnathawhna hmun kan va thleng chu motor dahna lam aia hnai, kan hotu pakhat, Asst. General Manager pisaah lutin, "Kannu bag hi i pisaah hian kalo dah lawk mai dawn, ka hmanhmawh tawh," ka ti zung zung a, ani pawhin a lo "Aw" ve mai bawk a, "Ka lawm e," ka tia ka chhuak leh ta puat a. White House gate bul ka va thleng leh ta a, kan nu te nen chuan lehkha min pe a, gate hmasa ber chu kan lut ve ta phawt mai le...... Chhunzawm leh tur :)

PIC: WHITE HOUSE THLALAK HMASA BER. A aia liana en duh chuan click mai tur ani e.

22 comments:

  1. Tlawh ve a chakawm hle mai. A bengvar thlakin blog tha tak a nih hi.

    ReplyDelete
  2. Iusb cable chu zawng hmu vat the. Pic ka enduh tawh the mai ania. Hehehh

    ReplyDelete
  3. @Noddy , i ti lawmawm e

    @^-||RaLtE||-^ muang marin mawle :)

    ReplyDelete
  4. Pu HV-a nge nge, a ngaihnawm lehpek mang e. Khawvela ka cham chhunga engti kawng maha ka hmuh ve ngai loh tur White House thlalak nalh tak tak lo tarlang law law ta che le. White House hi Abraham Lincoln an thah hnu khan a hrang an ti lo maw?????

    ReplyDelete
  5. This comment has been removed by the author.

    ReplyDelete
  6. @caribou, tum chuan kawng a awm zel alawm. I zawhna hi sawi chu atam alawm...

    ReplyDelete
  7. ngaihnawm khawp mai... a kimchanga chhiar tur awm thuai se...
    Lynda

    ReplyDelete
  8. ka tlawh ve ngai loh tur, i tlawh a; i hmun tlawh hi insawitheihna tham a ni.

    han ti leh vat la a tha ang. Thu lah hi thluaithlum lem lo hian i ziak kahpup chaw thiam si a, ngaihnawm khawp mai. In nu khi purse a lo ken vang hian vawi khat tal i vin em?

    ReplyDelete
  9. @Rp, vinna chhan tur a awm em ni? vin love...kan chhiar uluk loh zia kan sawi a, kan nui vur vur :P

    ReplyDelete
  10. Ngaihnawm e, innu pic lo dah teh a, :)
    -littlerascal-

    ReplyDelete
  11. @-littlerascal-, a dawt lamah aw, muang marin

    ReplyDelete
  12. good one ... chhiarzom leh chakom khop mai

    ReplyDelete
  13. A bengvarthlakin a ngaihnawm pek hle mai!

    ReplyDelete
  14. Va chang sang thei bik ve ooo. Ka chak ve khawp mai..hehe
    Judy ka khawngaih.. :)..:((

    ReplyDelete
  15. @TS, i fel thin hle mai, ka blog i hmaih ngailo. Ka lawm e.

    @Cobte, nangpawh i fel em em hehehe. Judy chu chance ala awm leh mai turah kan ngai. Tunah Congressman lamin October lam ami tur min dilsak leh mek tho e. Ni e, keini tan pawh anuam lo duh khawp mai, mahse kan hrilh fiah a a hrethiamin ka hria.

    ReplyDelete
  16. I thil tawn eng pawh hi, tha tak leh chhiar nuam takin i ziak thei thin a, a ngaihthlak nawm bik thin, a chhunzawmna ka lo chang reng ang!Kal ve chu ka chak khawp mai, i venneihzia hi :)

    ReplyDelete
  17. nghak leh ngar2 mai ang o...

    ReplyDelete
  18. IsthereloveinspaceJuly 17, 2011 at 9:18 PM

    chhunzawmna chhiar chak awm leh toh hle mai... good post

    ReplyDelete
  19. keipawh white house ka hmu tawh... Chaltlang ah a awm... @HV... i titawp hma thei rabux aw

    ReplyDelete
  20. misual ah k lo chhiar hman chiah2:-)...rawn chhunzawm vat vat teh..thil ho te a in ngaih poh hi keini tan chuan thu bengvarthlak leh gaihnom a tling thin..

    ReplyDelete
  21. Chhiar a manhla hle mai, a bikin a chunga History point pawimawh tak tak khian beng a ti var nafam e :)

    ReplyDelete