Search This Blog

Tuesday, June 7, 2011

Vanduaina ka chungah!


March ni 18, 2009 anih chuan nidang ang bawkin ka chhun hna, kan chenna apartment complex enkawl hna chu ka thawk leh ta a. Ka thawhpui, George leh Brad te nen chuan hlim takin angai te te kan thawk leh mawp mawp hlawm a. Chhun chawlh kan hmang zo a, chawhnu herah chuan mail (postal mail) kan dawn zingah chuan a nghet lova hna zawnsak thintu (temp' agency) Randstad atangin kan nu chuan tax-return dilna (W-2 form) a hmu ta tlat mai a. Randstad hnuaiah hian kan nu a thawh ngailoh avangin thil felhlel a awm anih ka ring a, coffee break neih zawhah ban hmaa va zawh chian ka rilruk ta nghal a. Hetiang lamah hian fimkhur a tulna chhan chu misual te'n kan nihna (identity) Social Security hmangin emaw, kan chinchang dangin an ruk theih thin vang a ni a, mi tam tak chhiatrupna thlen fo leh thlen mek anih vangin mahni chanchin/chinchang hi thehdarh mai mai hi hlauhawm tak a ni reng a ni.

Engpawh nise, coffee break chu ka thianpa George nen chuan kan chennaah neiin kan hahchawl a. Hahchawlh pah chuan ka lo tih fo thin, ka silai te pakhat, Glock 17 9mm auto-pistol chu ka tifai e ka ti a. Chutih pah chuan George kiangah chuan kan lehkha dawn chu ka sawi pah zel bawk a. Ka tifai zota tihah chuan ka coffee ka lem a, ka che sawn zawk ani mahna, ka silai chhuat lam tin a kan hmeh chuan vawi hnih lai a puak ta thuai thuai mai anih chu. Ka phu nasa kher mai, ka thianpa lah chu a tlan chhuak daih lehnghal a.

Kan thenawm midum nu chuan police ko vatin, mihring inhren luihna (hostage situation) anih maitheih thu alo va sawi niin. Amak a mak a tam police uisathiam SWAT team in min rawn hual nghal ta tuk tuk mai anih chu. Mumang hi a ang khawp mai a, ka hmui kan ner leh ngawt thin. Chhuak ila, an kut a rang hlawm tih lah ka hai bik der silo , min kap nghal zawt zawt mai ang tih a hlauhawm bawk si. Ka tih ngaihna hrelo chu ka hawi ta lawl lawl mai a ni. Tom &Jerry cartoon ka chhuah a, thuthleng seiah chuan ka bawk zal ta a. Hetia ka awmna chhan hi an lo luh hunah ka tih ralkhelh loh nan tha tura ka ngaih vang ni tain ka hria. Pindan lamah chuan kan nau te nufa leh ka fanu Janis an awm a, Janis phei chu ala muhil tui hle mai.

Tichuan, ka rin lawk ang ngeiin kawngkhar an rawn nam a, kalh lova ka dah avangin tichhe lovin an rawn lut mai a, min hnungkhirha, ka thisena alcohol awmzat an en hnuah tanin (jail) lamah min hruai ta a. Tlai lam thil thleng chu a tuk zing khawvar dawn tepah $20,000.00 (Rs.nuai 9 vel) a bailin ka chhuak ta hram a, mut a chhuak ngei mai. Ka nupui leh fanu ka tih thlabar na kha thil pawi tak avan ni chiang tak em! Ka court ni tur an sawn an sawn hnuah October ni 14, 2009 chu an tithlu thei ta hram a, nghah chhung a ninawm duh hle mai. Hetih chhung hian kan nupa chuan tih ngaihna dang hre hek lovi, uluk taka tawngtai fo a ni tawp mai.

Ka court ni a thleng ta, court lam pan chuan kan inkhalh chhuak ta. Engpawh nise case min awrhtir an tum hi "Reckless endangerment ah pathum" tichuan, "Disorderly conduct" a tel bawk. A hnua judge sawidan chuan kum 15 tan theihna thah an ni hlawm awm e! Chutiang awrh ture tilo chuan hlauh ngaihna vak pawh ka hrelo, kan nu pawh kan fanu Janis paw chungin hlauthawng hmel pawh pulo vin a awm ve mai bawk a. Ka lawyer hman, Chad Weddle berin lungai lo tura min chah avangin ka lungailo ve tawp mai a ni. Ka hlauh loh chhan pakhat chu, zu rui anga chanchinbu a min chhuah kha, ka ruilo tih ka chiang a, silai kha ka tihpuah luih a nilo tihah ka chiang bawk a. Tin, ka nupuiin min thlamuan hneh em bawk a, ka tan khawvelah hian hlauh tur awm hian ka hrelo ani ber awm e.

Court ah rei ve tawk kan thut hnu chuan judge a rawn lut a, kan ding suau a, kan thut leh hnu chuan sawrkar lam dan-hre-mi (Asst' District Attorney) chuan a duh ang ang chu an sawi nghal par par a. Ka ukil (Lawyer) Chad chu ka lamah rawn kun pheiin, "Thaphang suh" (Don't worry) a rawn ti leh sup pek a. Sawrkar lamin an witness, police leh midang an han ko a, police te chuan, ka mit chu zu vangin a sen rum thu te, ka thawah pawh zu anam nasat zia an sawi zel a, ka nui chhuak lek lek thin, mahse ka insum hram hram a ni. Tlaivara hna ka thaw vang khan ka mit alo sen anih chuan thuhran, mit sen chhan tur leh zu ka nam chhan tur kha awmlo lutuk. Nuihzat chang awm zeuh zeuh mahse, tha erawh a zam veleh thin tho mai, mihring mihrinna hian awmna hmun a zirin mihring hi alo tizam ve thei hle mai.

A tawpah chuan judge chuan min dintir ve ta, ka ukil Chad nen chuan kan ding dun ta ran mai a. Judge hmaah ka ukil chuan tul ang ang an sawi hnu chuan ka thisena alcohol awmzat an teh result an hre ta bawk a. Tin, ka silai tin dan zawng leh chhuat zawnah enge awm leh thil dang an han sawi fiah hlawm hnu chuan roreltu chuan, sawrkar lam tan pawi a tih viau thu leh, mahse tihpalh ngei ani ti a thiam min chantir bak sawi tur a hriat loh thu, "My sympathies are with the state" tiin a chhakchhuak ta a nih kha.

Kan nu ka va melh zauh a a mitmeng alo nung sarh mai han hmuh kha avan nuam tak em. Ka thinphu rang tak maia phu tawh chuan ziaawm lam apan tawh a, rilru in Pathian hnenah lawmthu ka sawi ta nghal bawk a ni. Engpawh nise, ka thisena alcohol awmzat kha .02 a ni a, sawrkar danah .08 chunglam hi luhai anga ngaih niin, thil dang tihsual loh pawhin lungin tan theihna a ni. Ka thisen a alcohol awmzat kha thelret (chewing gum) thial emaw, kam thuahna (mouthwash) hman ang vel lek a nih chu.

Tichuan, ka case chu paih nghal vekin a awm a, clerk hnenah paihna lehkha (expunged) kan dil nghal ta a. Ka ukil lah chuan, "Hlauhthawn loh tur ka tih kha," tiin nui sangin min chibai ta a ni. Ka Glock 17 pawh chu fai tha takin min pe kir leh ta zel a... Thu kal hnu mah nise, ka silaiah hian amu ka dahsa ngai loh hrim hrim avangin, ka silai a amu lo awm mai kha mak ve tak chu a ni, khami pindanah khan mi pahnih chiah kan awm bawk si! Engpawh nise, mi pakhat tawrh theih mi pahnihin an tawrh kher hi a tul ber love! Thlamuantu nupui leh Pathian ka nei a, ka lawm em em mai a ni.

Court lehkha leh chanchin belhchhah tlem chhiar duh tan ahnuaia link hi:

24 comments:

  1. Ka tawrh nise ka thinur ngawt ang. Thiam channa proof i nei thra em a nih hi. Arms chelek chungchang ah a hma aiin i fimkhur phah bawk anga.. I tana thra zawk tur reng a, khuanu rel a ni e.. ti ila i haw em lo ang chu.

    ReplyDelete
  2. Saitawk, haw teuhlo mai. Police ah pawh a tha bika inzir, SWAT meuh lo thawk chhuak kha chu engmah lova chantir an hreh ni ngei tur ania, case min awrh tir an tum nasa em mai. Mahse, redneck town ah pawh a ngaihna ngang a awmlo a ni ber e.

    Ni e, ka fimkhur phah sawt ang.

    ReplyDelete
  3. Tih palh ah pawh khi ti khawp a an fimkhur anih chuan, DAN chung a leng tumah an om thei dawn lo anih khi a, eng pawh nise i fimkhur leh zual theih na tur a tan a Pathian remruat te poh ani mah na...

    ReplyDelete
  4. A va ngaihnawm mai mai ve aw.. I vanduaina thu hi ngaihnawm ka ti lutuk tlat. Mahni thiamna ngei ngei pawh ni se thiam loh i chan vek chuan kum 45 chhung lawih tanna tham a ni a, damchhung tluk a nih mai chu. A zamawm ve duh ngawt ang. I Glock pistol i sawi chhuah hi chuan zualbonez ka hrechhuak ziah..he2.

    Hei zet hi chu a ngaihnawm a ni. Chhiar ninawm a awm lo reng reng. Thawnthu tawi tha deuh an phuahchawp ang chi hi a takin i tawng a, i ziak a, thawnthu tawi ngaihnawm takah a lo chang ta a nih hi.

    ReplyDelete
  5. TS, hlau miahlo vin, a zam ruk ve theih tho nia mawle hairehai.

    ReplyDelete
  6. Hetiang dinhmunah hian ka la ding ve ngai lo va, i hlauthawng lutuk lo niin i sawi a, (tlem zam deuh mah la)hei hi ka notice khawp mai. I nupui hi hmuh a chakawm a nih hi. Nupui nih a tlin awm hle mai....i vannei ka ti.

    ReplyDelete
  7. ka comment theilo
    -zualbonez

    ReplyDelete
  8. dolerich, kan hmachhawn tur hi chu hmachhawn dawn rau rau chuan hlaulo vin hmachhawn tawp hi a fuh berin ka hre fo. Zam ve theih tehreng e a, mahse he thilah hi chuan hlauh tur a awmin ka hrelo a ni!

    ReplyDelete
  9. I thuziak hi, hun chep tak karah, tukin zing khan ka chhiar thuak thuak a. I thil tawn te reng reng hi a lo bon thei bik hle mai. Tihian ziak zel la, nakinah a buin la chhuah teh ang che. I hringnun kawng bumboh ve tak thin atang hian inzirna tur ka ngah khawp mai.

    Pawi sawi miah si lova pistol tih puah ringawt te chu a ho tehreng nen, an va la thutak em em ve maw le. Pistol i han tihpuah palh laia i buai tur zia ka mitthla thiam e. Mizoram chhung chu nise, pistol tha tak i kawl tih hriat a ni reng awm si a, kan va awt dawn che ve le aw.

    ReplyDelete
  10. Va ngaihnawm thin ve maw le. I nun hi a complicate ve hle mai maw? Silai hi vawi khat mah ka la hmet puak lo maw le; nang zawng chengrang chawi Vala i nih duh hmel hle mai a.

    ReplyDelete
  11. Rp, tuina leh lawmzawng (toy) a inanglo thei viau ania.

    ReplyDelete
  12. A lo rei ve ta hle mai a. SWAT meuh rawn kal chu a bon hle mai :P

    ReplyDelete
  13. I blog a i thu ziak ho zawng zawng hi chhiar thin a, ngaihnawm ka ti thin hle mai. Hnam dang kara awma rilru hahna leh manganna han tawh hi chuan Nupui te hian min lo thlamuan thei thin khawp mai. An tan pawh thlamuan awm nih ve hi a tul ka ring klhawp mai.

    ReplyDelete
  14. Tute silai titlu palhin mi a kah hlum ngawt ai chuan nghawng a nei lian deuh a nih chu, in ramah chuan. i nupui fel takin a thlamuan che a, i lamah a tang tlat a, tin nangmahin an puhna che zawng zawngah i fihlim zia i chiang bawka confi takin i awm thei ta ni berin a lang. Thil fel tawk lo deuh chu awm sela i zam ve viau maithei a ni. Dikna hi a dingchang thin tih a chiang e.

    Thil dang lehah chuan i pistol thlalak hian ka mit a la khawp mai, pistol leh chemte hi ka lawm reh thei lo, a tak nei ve pha ta lo chuan internet atang hian a thlalak ka downlad treuh zel :-0

    ReplyDelete
  15. Hemi chanchin kan lo hriat tirh khan ( rf:misual) zu rui ang deuhte khan i thang a, rilru alo na deuh hman. A hnuah thu chiang zawk i rawn post leh ta kha ani a, ka thaw hawk.

    SWAT in an hual rap rap nih chu a nuam hran lo vang. Uluk taka tawngtai tih laite khi ka la fuh :-) In nu hi chu mi inrintawktak ani tih alang reng. I fanu thlabar tur erawh a khawngaihthlak.

    Meigou ho pawh hi an over ve deuh thin, engngemaw hlekah, abuse, sue tite hi an uar lutuk a.

    ReplyDelete
  16. i blog a chhiar theih chi zawng2 chu ka phone screen 1.5 inch. Lek atang hian ka chhiar zo vek. Mit a thip duh hle. Computer ka van awt ve em! Mison veng thlang a piang leh seilian ka ni a.. I soi thenkhat, patan, vaipuanpho. Etc. Ka hre ve. Chhiar a nawm phah hle. Tuna i nupui hi a fel hmel e... A chanchin tlem tal han post teh plz.
    Saint sammoo.

    ReplyDelete
  17. Eh! va ngaihnawm leh ta ve heipawh... Thiamloh chantir luih talh tum tu che ho khi bleh... min lo cho rawh :)

    I nupui hi chu NU nih a va han tling tak em!
    I Glock chu inleng neih laiin hrufai tawh suh. hehe :)

    ReplyDelete
  18. Nun tam tak i nei ani. A ngaihnawm vek.

    ReplyDelete
  19. Ka nunkawng chho hi diary ang chiahlo deuh autobiography ang deuh mah zawka ziaka dah thlap hi ka thianpa fuihna zarah thain ka hria a. Chumi vang chuan ziak lama ngaihnawm turin thiam lemlo mahila kan ziak pawp pawp zel mai a ni.

    Min chhiar sak thin avangin ka lawm e.

    ReplyDelete
  20. a engamah hma-in silai hi ka tih em em ringawt nia! I vanduaina chanchin ziak i ni na-a a ngaihnawm ka tih tlat pek chu a..

    ReplyDelete
  21. Silai i lawm lutuk aa.. :D
    Pathian zarah, i tang lo hlauh chu a tihzia hle mai. Lo tang ta daih la chu tuna i blog te pawh hi chhiar tur a awm lo emaw kha a nia nga...:)
    Tawngtaina chhangtu Pathian hnenah lawmthu chu awm mawlh mawlh rawh se..

    ReplyDelete
  22. Cobte, lawm zawng a inang vek theilo. A thenin motor an lawm a, a thenin eiruk akekekeke

    ReplyDelete
  23. SWAT ho han in hual tir ve re re ka va chak ve(vawi 1 pian manah)ha..ha

    ReplyDelete
  24. coffee ah zu anlo pawlh sak che aniang a lolzzzzzzzzzzz jk... mouthwash a alcohol awm pawh hian keichu ka mitmeng ati sen rum zel hihihi

    ReplyDelete