Search This Blog

Friday, November 4, 2011

South Hlimen quarry chim (1992)


August thla, kum 1992 ani a. Tui taka ka mutlai chuan kan kawmthlang kawngpuia mi authawm chuan min tiharh chiang kher mai. An te têng tung avang leh tlan hlawp hlawp ri te ka hriat avangin, ngaih thalo takin ka zuang thova ka tlanchhuak nghal a.

Kulikawn Salvation Hall kiangah tlan thlain kâwn a mi awmte chu thil awmzia ka zawt ve ta a. Hlimen quarry a chim vak thu min hrilh bakah, quarry awmna zawn lane phei vel chu a hnawl vek niawma thu an hriat thu chu ka hre ta a ni. Chumi lane phei vel chu mihring chenna in a khah phei vek avangin a lungngaih thlak sa hle mai!

Motor remchangah chuan betin South Hlimen lam pan chuan ka thawk phei ve ta nghal a. Mipui an lo tam hman tawh angreng khawp mai lehnghal a, a hmun luhthlak pawh a harsa lam hret ani tawh. Ka thianpa David-a, Pakos huan neitu te chenna in thlen dawn kawngkawi kan thlen chuan, a ri leh huk mai a. Mipui tlanchhia chuan min nek phar dawrh nghe nghe a ni. Lung lian lemlo chim bang tlem lo alo tla a ni awm e, tumah chu inhliam emaw an awm lemlo niin ka hria.

Ka kalpuite nen chuan quarry chimna bul chu kan zuk thleng ve ta a, thianpa David-a pawh berh nuanin alo buai vut vut hle mai. Vanduaina karah vannei tak mai alo ni nghe nghe a! An thenawm chiah in chu lungchim chuan hriatthiam theih loh khawpin a hnawl a, an in erawh chu a him pial a ni. Chutih karah an thenawm lawk a mite a inah an lo inruk lai (an riah luh lai) alo ni nghe nghe a, an him ve phah ta a nih chu.

Mipui kan zi mur mur a, bul han tan ngaihna vak tuman khan kan hrelo ani ber awm e. Leithil leh lung lian vaklo ala tle zeuh zeuh bawk nen tumah vak khan lungchimna va pawh tha ngam chiah kan la awmlo a ni ber awm e.

Khua a var tha ta bawk a, zawi zawiin, fimkhur takin in chhia leh lungpui lian pui pui kar vel chu kan hai tan ta a. David-a te in hi quarry thlen hma chiah ruam lehlam, khawchhung hnaih lama awm a ni a. Chuta tang chuan kawr lam chu zawh thlain kan chhuk zel a. Kei leh ka kianga kal te chuan vaipa ruang kan hmu hmasa ber a. Ani chu lungpui lian ve tak, sai (elephant) tiat vel lai tur chuan alo delh pherh niaih a. A puanven leh a ke bawr kan hmu hmasa berin ka hria, ka chiang ngam talo. Chupa kiangah chuan vawk pakhat a thi ve bawk nghe nghe a ni.

Chutiang chuan ruang chu a mal mal-in mipui chuan kan phawrh tan ta a. Chutih karah chuan pafa pakhat kha an va han vannei tak em! Lungleng lam hnaih, quarry tawp lama quarry chimin an in a hnawl atang chuan pa pakhat hian a fa puak lai a rawn vak chhuah pui tih an rawn sawi a nih chu. Khami thu khan ka hnuk a ti ulh nasa ngei mai. Tichuan chumi lam chu ka pan phei ve nghal ta a. Aia u te kaihhruaina zelin, hmalak dan tur an sawi ang zelin ka buai ve nasa kher mai.

A ni thum ni chuan concrete in lianpui tlu sawp nuaih kar chu kan dap chhunzawm leh ta a. A kar atang chuan ruang an phawrh nual awm e, a phawrhtu zingah ka tel lova an phawrh zat chiah ka hre ta lo. Engpawh nise, August, kum 1992 hma mai, rei ala nilo, khata Supply office rawktu, boxer Zoramthanga nau an tih mai, khami thir chehna kha police ten an rawn thawh ta bawk a. Concrete chhawng engemaw zat tlu-sawp anih vangin a chhuat/chung te chu inchi 4 emaw tala chhah leh a chhunga thir tlawn (iron rod) rêl anih vangin a cement a chu tuboh-in kan chhu a, a thir chin chu chaicheh lian chuan kan chep bung ta zel a, a tangkai hle a ni. Chaihcheh ha kha keiman ka chep bal/khem nghe nghe awm tak e!

Chumi atang chuan mi pali vel kan lut ta a. Bawkvakin kan phei zel a, kei aia lut hmasa chuan mi pakhat awmin a hriat thu a rawn sawi a. Ka va thlen ve chuan fiah vak lovin tihian ka hmu. Hmeichhe tleirawl niin ka hria a, a khumza te chu la tha viauin a khum erawh chu chhuatah a sawp thla nuaih a. Chumiah chuan thu kunin a lo awm a. Kan han sawngbawl vel khan, a lu a khup inkara alo awm danah leh a ngum/hnungzang tlem vunchhia a pilh tih loh hliam a neih loh bakah, a ka atanga phuan alo chhuah danah khan rindan ka nei ve mai mai a.

Ka rindan chuan inchung tlusawp khan chhuatah a khum chawpin a sawprawp pui anga, ani rawn thuchhuak chu inchung lam chuan a thutkun tir ta anga, chutia tih luihnaa thu kun nghet tlat ta chu thaw thei lovin a thi ta a nih ka ring. Hetiang lam zirmi ka ni lova ka ring sual maithei bawk! He inchhung atanga kan chhuah hnu lawk hian mi thenkhat an lut leh a. A hmaa kan luhna vel te kha a lo phui vek tawh tiin an rawn chhuak leh a ni. Tlema tlemah keini pawh kan vannei viau awm e.

Engpawh nise, hemi ni vek hian pafa lo bawhvak chhuahna an tih kiangah chuan vaipa ruang an chhar leh a. Chu vaipa ban chu lungpui lian takin a delhbeh tlat avangin kan tum ngial pawhin kan la chhuak thei derlo mai a. Tichuan a ban chu tan mai tha in upa zawk ten thu an rel ta a ni. Kan awmna piah a inah chuan tlangval va tlanin chempui a rawn hawh a. Chu chem chuan vaipa ban kan sat chu a bil (hriamlo) hrep mai chu niin. Vai banah chempui sah a ting ta tuih tuih mai a nih kha. Hun a uihawm si, thirtiang la-in kan chhun bung ta law law a ni. Tlai lamah lah chuan lungpui lo tisawn leh siin ban chauh hmu chu, "Heta hi mihring ban chauh kan chhar e.." tiin an au lauh lauh mai a. A hmaa buaipuitute chu kan inmelh hrak hrak a, engmah erawh kan sawi lem lo.

Keimahni'n kan vai ruang chhar hmasakna ber kiang, Lungleng lam hnaih hretah chuan insawp nuaih kan lai chhuak leh ta a. Hetah chian mipa leh hmeichhia, inpawm rial kan hmaa mite chuan an phawrh leh ta a, an lainat awm kher mai. Damdawiin lam Hlâng (stretcher) ah chuan an ruang dahin kan zawn chho ta a. Kan zawn chhoh lai chuan pa pakhat hi rawn tlan thlain, a nupui a nih leh nih loh a rawn en a. Alu chu a pherh nuaih nangin en a duh tlat avangin ka zawnlai chu a lu kan khuhna ka keu hawn sak ta a. Ani chuan en vawng vawngin a nupui ngei ani tiin, a fawp ta vawng vawng mai a. Han hnar vak anuam chiah si lova a entu tan pawh a lungchhiat thlak bakah a thildang zawng pawhin a nuamlo angreng khawp mai. Ni 7 ni a hmeichhe ruang an hmuh leh kha khipa nupui ngei khi alo ni awm a, a hmai pawh hai theih lovin alo la tha a ni. A zialo zual khawp mai.


Ruang kan hmuhte reng reng hi Hlimen biakin kianga hall chhungah chuan kan zalh zel a ni. Pakhat kan han zalh a, a dang kan va buaipui leh chhungin an lo tam belh hman viau zel mai. An lainatawm dan kha ka mitthla kumkhua tawh ngei ang.

Chutiang chuan Aizawl veng hrang hrang mai bakah, Mizoram hmun hrang, khaw hrang atangin tlawmngai an lo kal khawm tuk tuk reng a. Keipawh kan veng piah mai anih vanginb nitin ka thawk chhuak ve thin. A ni sarih naah kha chuan hnar tuam te pawh a ngai ve ta. Hliam lah an tam, thi lah an tam, a van rapthlak tak em! Khami tum khan mi 67 in nunna an chan a, in 16 a chhe vek a, hliam engemaw zat an awm bawk a ni.

Kei chinchang hrelo ta chu tihian ka ngaihtuahna ka seng ve mai mai zui a. "Engineer ten tha takin lung lak dan tur te, an lak chin tur engkim mai thlithlai thin ni ta sela, a chim angem le," tih hi!

NB: Mi thinlung mu hnu ka kaitho em lovang chu maw. Ziah chak tak2 lah ka ziak telloh phah nual mai lehnghal a!

29 comments:

  1. Chhiat tawhna leh thil thleng rapthlak chanchin ziahna mah ni se, a ngaihnawm ka ti kher mai. Hlimen Quarry chim chungchang hi sawi ka hre zeuh zeuh tawh a, a ziaka chhiar tur ka hmu ngai lo. Tunah i ziak ka rawn hmu ta chiah a, ka hlut hle e.

    ReplyDelete
  2. TS leh Zuala, min chhiarsak a ka lawm e. A ni chiah ka hre thei ta lova a pawi khawp mai, hria ila tha tur a nia. Tin, thu thup/zep then ka ngah mai, kan Mizo zia han thlir a ziah lan ngam tur awm tawk bak ka ziak talo mai.

    ReplyDelete
  3. A ni chu ina ka awm hunah hriat theih ka inbeisei.

    ReplyDelete
  4. A ngaihnawm kher mai, hetih hunlai hian rokhawlhna enge maw avangin ka kal velo. Mizo nuna tlawmngaihna hi a lo hlu mange aw...

    ReplyDelete
  5. Hman deuh khan Hlimen chu ka kal ve a, a hmuna han thlir meuh chuan a chim lai vel boruak tur min mitthla tir thei uarh uarh alawm le.

    A buaipui tu zawkah i tang thei a, a lawmawm ah ngai ila, i thuziak hian a mood ah min chen tir tlat mai..!! huizz

    ReplyDelete
  6. Hlimen leimin hi a rapthlak ngawt mai. A minna hmun pawh hi, ralkhat hlatak atang pawhin a la lang chiang vek vuk hle. A tawlhin a tawlh fai hneh hle niin a lang.

    Kan ram kawngpui dung kawngchhakah ah te hian quarry a tam si a, quarry chim vanga chhiatna a la thlen belh zel ang tih a hlauhawm.

    ReplyDelete
  7. caribou, ka hmuh dan chuan Hlimen hian a sarhu lai tih lovah chuan min fimkhur tirin ka hrelo tlat. :(

    ReplyDelete
  8. Hmmm....Pu Henry, mitthlaah thil tam tak a rawn lang thar leh zut zut mai !! Sawi tur ka nei ve nual mai, he thil thlengah hi chuan, buidilng lian i sawi pawh khi BANANZA ho building kha anih ka ring, khatiang em ema a chim nasat kha an ring lova; building him bera an ngaih ah an tlankhawm ta kha ani hlawm a. A....lungachhe thar dawn tlat.....a light lam lo sawi ve mai ang.

    -Thirchaihcheh lian kha a van lar tak
    - Kiran Bedi kha avan fakawm reuh tak
    - Chhingchhip hovin, lakhuihtheih a tlawn deuh ti tih, tlawm em em maia an lo zuar te kha...ka van ei hnem tak :-)

    Quary siam chungchanga dan mumal tak, fel tak; kenkawh hi chu kan mamawh khawp mai. Saw, hlimen ah ngei pawh lung an lak leh tlut tlut tawh saw. Tin, Melthum leh Hualngo inkara quary te saw a hlauhawm khawp mai.

    ReplyDelete
  9. Middle sikul kan kal laiin he chanchin hi kan lo ralkhat hriat ve thin a, tunah Pu Henry zarah chiangkuang takin kan hre thei hi a lawmawm e. Building chhung atang khan Vaipa pakhat lo la dam an chhanchhuak tih te kha tak tak a ni em?

    ReplyDelete
  10. Thil hi i hrereng thei mai zel a, a tha khawp mai. I thluak hi a la fim tha khawp mai i pawlh nu zing viau na a(i sawi danin).

    Ngaihnawm tak a ni... a dang pawh han ti zel rawh.

    ReplyDelete
  11. ruang zawnga hnatlan pawh ka chakloh zawng tak, an rap awm duh dawn emai.

    ReplyDelete
    Replies
    1. Rap awm love, an lainatawm lutuk. Rap lam a langlo.

      Delete
  12. I zep then ho chu a hran in rawn ziak leh teh a. hehe

    ReplyDelete
  13. Thlan chu ka lai ve ngei mai a..lrpa

    ReplyDelete
  14. sekibuhchhuak , ni e i ramchhuah hma anih ka ring. Khami tum zet kha chu Silchar rûn tum nen khan Mizo kan tanrual ber te zing ami ani hial awm e. Mi fel zia khan hnuk te a tiulh teuh thei tak tak a ni.
    Ka thianpa Davida te kha ni e, Bonanza an inti.


    Xingibera, i sawi khi ka hre lo tlat, pawi lutuk.

    ReplyDelete
  15. kha thil zet kha zawng a rapthlak a ni... he thil thlen hian thawkchhuak rual kan la ni ve lo a, thawh ve tur erawh ka hrelo.. ruang lungin a delh tlat a, an tan bun tih vel mi sawi thawm chu kan hre ve. Quarry hrim hrim hi ka tih.

    ReplyDelete
  16. I hriatrengna hi a tha ngawtin ka hria...Quarry...hmmm...Thenkhat duhamna avangin mi tamtakin an boral phah anih hi. 'Disaster Managment' lamah chuan India hi a la chau mange.

    ReplyDelete
  17. Ka hriat tel lemloh ka hriat belh ta teuh, bengvarthlak khawp mai. A thlalak han dah hnem deuh la tha tur...

    ReplyDelete
  18. R.Lalropuia, Min chhiar sak thin a ka lawm e. Ni e thlalak han dah teuh te pawh a chakawm. Mahse, ruang zawng kan nih vang khan thlalakna lam kha alanglo hrim2 niin ka hria. Khimi thlalak pawh khi mi laksa ka dah hawh mai a ni e. A pawi hle mai.

    ReplyDelete
  19. Nau Henry, rinaiin thil i chhinchhiah thei. Ka chhuang hle mai che. Keep it up. I U Dinpuia

    ReplyDelete
    Replies
    1. U Dinpuia teh nawlh chu,i dam thin maw kha? Min chiarsak a ka lawm e

      Delete
  20. A ngaihnawm bawk sia, a lungchhiat thlak bawk sia.....

    ReplyDelete
  21. ngaihnawm tak a ni, mumal tak a ka vawikhat hriatna

    ReplyDelete
  22. Ngaihnawm hle mai...ram pawna piang leh seilian kn nh avangin a chanchin hi kan hre ve vakloa tha k t hle ani..

    ReplyDelete
  23. Ahun laia naupang chumchiap mai tan chuan thu thar angmai leh thonthu te poh ang dwn2 mai lawm.. a ziak tu hi afakawm ka ti hle mai.. A tlawmngai zing ah atel tam ber hial awm asin mawle..

    ReplyDelete
  24. Ahun laia naupang chumchiap mai tan chuan thu thar angmai leh thonthu te poh ang dwn2 mai lawm.. a ziak tu hi afakawm ka ti hle mai.. A tlawmngai zing ah atel tam ber hial awm asin mawle..

    ReplyDelete