Search This Blog

Tuesday, February 7, 2012

Chheile!


Vawiin February ni 7, 2012 ngat zawng Lungleng ho tawngkam takin, mak tih hmel putak a "A-si" tih emaw, "Chhei" pui hliah hluah tham nihialin ka hre mai! Washington, DC leh kan awmna khuavel kavan leu kual nasa tak em, ka duh rêng vang erawh ani hauh silo!

Tun hma kha chuan Indian visa dil tur hian Washington DC metro area amite hi chu Indian embassy ah kalin, dilna ziakchawpin an thehlut nghal mai ṭhin kha a ni a. Khatiang ang kha ani tawhlo tih ka hriat thawi chu chiang zawka ka hriat theih nan Indian embassy website ka lutta a. Ka hriat thawi ang ngeiin, embassy lamin dilna chu buaipui tawh lovin agency "Travisa Outsourcing" te chuan anlo buaipui tawh alo ni a. Visa dilna pawh chu an website https://indiavisa.travisaoutsourcing.com/homepage chhungah chuan ziak felsain, khawl hmanga chhut chhuah (print) angai a. Chumi chu thehluh huntur kan siamah chuan thehluh chauh tur hi alo ni a, a kikawi sa nghal hrep mai. Indian visa hi nupui/pasal emaw fate tan emaw chuan a indilsak theih avangin, chhungkaw thil ka zuk mal beih dawn anih ber chu.

Tichuan le, nidang aia hmaah ka fanu mutui laitak chu ka kaitho ta a. Aha a nawh zawhin a hmai ka phihpui a, breakfast chu hmanhmawh takin, zan lama ka hrilh lawk angin, sipai takin eihun chhung bituk thlapin ka nawr hmanhmawh a. Ka rilru tak chuan ka khawngaih reuh khawp mai. Mahse, a skul kal ka thlah hnuah Washington, DC kalkawng ka kal hun tur chu, office kal, kawng tawt lai (rush hour) tak anih dawn avangin ka tlai ang tih ka hlauh vang ani bawk si. Engpawh nise, tur nawn ngai lovin fel tak leh zai rat rat chung chuan a thil eizo chu inthlak turin a pindanah a lut ta a.

Ka kalna tur vel hi motor dahna vang thei tak mai anih vangin ka hnathawhnaah chuan motor ka va dah a. Chuta ṭang chuan hmanhmawh takin taxi hmangin ka kal chhunzawm ta a ni. A hmun ka va thleng chu dilna ka thehluh turah chuan tihsual ka nei palh ta hlauh mai. A hmunah chuan dilna siamthar tul thila hman tur computer an hung thliah nangin, kannu hmingziak (signature) ka mamawh tlat mai si. Tichuan KM 73 a hla kan awmna lam pan chuan ka tlan haw leh nal nal angai ta anih chu, huiham.

In ka thleng, ka printer a nuar ta tlat mai le. Kan chenna piah a Fedex office ah ka tlanlut, sumdawn nana hman tih hriat tak mai a an internet muang fan raih mai hmang chuan Indian visa dilna chu kan buaipui leh ta a. Ka peih fel a, ka hman-man ka pek hnu chuan kan nu hnathawhna, KM 30 dawn chu a signature mamawh vangin ka pan leh ta a. Kawngka rawn hawng zauhin a rawn sign zuai a, ka tlan chhuak leh nghal a.

Ka rilruin, "Kal thlak leh hmain kan enchiang leh lawk teh ang, a hma pawhin enchian hnuah sual ala awm cheuh kha," tizawnga ngaihtuahna neiin kan thlir nawn leh a. Dilna phek (application form) kha a hma ami ang nilo, a thar anih avangin kalo hmuh loh,a hmasaa awmlo, thlalak hnuaiah chuan signature alo ngai leh a nih chu, huiham. Kannu hnathawhna lam bawk pan chuan ka inkhalhchhuak leh ta a. A signature dang ka mamawh thu ka hrilh tur ka phone min chhang tur, a ṭawng urin alei (tongue) alo seh ve bawk.

Huiham, diklo a awm tawh lovin ka hria... Washington, DC lam panin ka chhuak leh ta. Zing dar 8 bawr vel aṭanga chutia inkhalhbuai sek chu tunah chuan chawhnu dar 1:40 a ri der tawh mai. Kan chenna khua aṭanga km 40 vel ka thleng tihah chuan motor khalh pahin, "diklo a awm takin," tiin phurhte ṭhutna (passenger seat) chunga file folder chhung chu kan keu let mai mai pek a. "CHHEI" a ni tawp... huiham, ka fanu visa fee tur 'money order' ka ken kha a nilo zawk $30 zawk a ni tih ka hmu leh ta a nih pek chu. Hetah zet zawng ka rilru chuan naktuk lamah chunzawm tawh mai chi nitein ka hre rumrum hman a. Mahse, vawiina ka tihfel loh chuan nithum a zawnin Washington-ah ka kal angai dawn tih ka hre bawk si. Phur surh lo vei tak chuan ka inkhalh kîr leh ta boh boh a.

Indian visa dilna ka thleng ta a, ka hnathawhnaah motor pawh dah tawh lovin, mi karah a inthuah em a dah angaih loh chuan dahna zawn mai ka thlang ta zawk a. An office kawngkhar chu muangchangin ka hawnglui ngat a, rilru a zalo taksi chuan nui deuh sangin clerk hnenah chuan, "Here i am... again" tiin bul ka tan a. Ani chuan hnazo takin dilna chu a mal malin min enfel sak a, kan titi pah zel a, fiamthu alo duh ve phian mai a, ka thawl huai paw'n ka inhre nghe nghe awm e.

Diklo awm lova a hriat hnu chuan kava intlar ve ta ran a. Ka hma chiahah chuan Malaysian American awm nen chuan kan titi a, India ram nita a piang ka ni tih a hriat chuan kawngsir a thil zawrh a eingam leh ngamloh tur thu min zawt a. Ka bawl chho ta a, ani lah chu fiamthu duhve deuh mai lo niin, clerk te zawng zawng chuan kan fiamthu an rawn zawm ta a, kan hlim ta phian mai. Ka hun a thleng ve ta a, clerk chuan mi biangbiak a thiam viau mai a, dawr an nuam hle mai. Ka hah hmel a ti deuh ania'ng chu min zawt ta chawt rêng a, kan hrilh chiah mai chu a nui nasa teh e. Tichuan a tuk tlai lama visa/passport ho lam turin kan inhrilh hnu chuan inthlen hlan nghalhlel takin ka chhuak ta a.

"A-si" chaw ka ei theihnghilh daih mai ka ti. :D

27 comments:

  1. I va han talbuai teh reng ve. Ka va nui nasa em! Ziak ngaihnawm phian mai lehnghal a.
    Tunhnuah chuan, hmanhmawh buai phili chung tawh suh. A hlawk lo teh a nia, intheihnghilh leh tul lo deuhva thil tihsual a awl bik hahaha.."A si"

    ReplyDelete
    Replies
    1. Hmanhmawh loh theih a chakawm khawp mai, mahse hun thlip thlep a thil kal ani si a, khawkar hlat nen hmanhmawh loh chi ani vak bawk silo a ni hahahhaa ka buai teh asin hairehai :D

      Delete
  2. A va ngaihnawm tiap tiap em! I che chhia kan ti dawn mi, i che buai tak hle mai. He'ng lai anga kawng chhia chu ni sela, i buai lehzual ang...haha. Tluang takin, dam takin lo thleng thuai thuai teh u'n.

    ReplyDelete
    Replies
    1. Ts, a phili chi kani ang tih a hlauhawm khawp mai hahaha

      Nia, dam kan hauh anga kanlo thleng thuai turah ngai ang :) MI chakawm....

      Delete
  3. Ka va nui nasa e. He ni zet hi chu i theihnghilh tawh ngai dawn lo anih hi. I buai lai vel chu video camera hmanga lo latu awm se, a hmuh a nuam ang chu aw..... Tak taka, kum upatna hian haihawtna hi a lo keng tel ve anih dawn hi. Kei pawh, tunhmaa ka tih ngai reng reng loh, mobile phone theihnghilh, wallet theihnghilh, etc ka uar ta riau mai. Nizan pawh kawngkhar ka khar theihnghilh a, zanlai pelh hnuah ka va khar that kha.... kan nu chuan hria se, a sa khawp ang.

    ReplyDelete
    Replies
    1. caribou, kapa ang emin mahni pen kenlai kala zawng velo hram hahahha

      Delete
    2. Khai aw.... i pa chuh.... han ti ngawt ila, kan thianpa pakhat pawh, a chem humlai a zawng chiam tawh tak asin.

      Delete
    3. Alo invai pilh phung ange hahaha

      Delete
  4. Lalbuaia leh Labuaii Pa nih hi i tlin mange, mahse keipawh hetianga chet buai hi ka ngah tawh mai..he he he...

    ReplyDelete
  5. lolzz!! i va che chhe em em ve :D i che buai ve pangBAL(tunlai tawng takin) ni maw haha

    ReplyDelete
  6. Ka ngaihtuahna a lo lut ve thung : Pa ber nih i tlin hle mai, buai tak chung pawhin fate enkawl leh ngaihtuah i thulh der silo.

    ReplyDelete
  7. Ha ha haa!! Pu HV, i va buai tak ve le! Hetiang ni hi a awm tlat a sin! I buai dan tur ka ngaihtuah a, ka nuih i tihzat rualin ka khawngaih rum rum che. Mahse, a tawp lamah i tluang ta phian a, thinrim aiah nui chungin i hna i zo thei chu ka lawmpui che.

    India ram chu ni se chawhnu tlai lama nui chunga biak theih hi office hna thawkah hian an tam tawh lo mai thei...tih lam daih ka lo ngaihtuah!!

    ReplyDelete
    Replies
    1. Tlai lam tlip hreawm chu mahniin kan tuar mai hehehe. Ni e, dawr hi an nuam sarh reng mai asin

      Delete
  8. A hlimawm phian hi. A ngaihnawm tel bawk.

    ReplyDelete
  9. I va che buai tak ve mawle!!. Frederick leh DC kawng chu i hre bel tlun tawh ang chu! I hmanhmawh lutuk lamah Speed Camera a de zueh zeuh loh ka beisei!

    I ziak ngaihnawm buaichuar khawp mai!.

    ReplyDelete
  10. Khitia hmanhmawh avanga tullova tlankual vak vakna hun sen ral ai khi hmanhmawh miahlovin awm hmun ah i ngaihtuah fel thei zawk ngei awm sia...."A-si"

    Rilru hmanhmawh lutuk hi chuan hmanhmawh lo aiin kan che muang zawk duh fo reng asin. :)

    A ngaihnawm phian e.

    ReplyDelete
    Replies
    1. Rilru hmanhmawh lova thiltih pawh hian a hmun han then hian tihdan (dik tho) aia tha leh fuh zawk alo awm chang a awm thin alawm le. March thla ami tur daih ania, March ni 12 ah pawh dil ila kan la tlai chuang lovang. Khami ni khan tih tur ka duan tawh anih bakah a tuk lam ka hnahawh etc nen khaihlaklo tura ka chet a tul tlat a ni zawk e. :)

      A chet buai theih viau a ni. Ka kum chanve vel i nih hunah expi i nei ve tan mahna hairehai :P

      Delete
    2. hairehai....Tho thlawk lai thlir i ang a nih mai chu..!!!

      Delete
    3. Sahdal a tlari peng peng awm i nih zawk kha a hairehai :D

      Delete
  11. I frustrate hmel hniang hnuang khi haha!! I che buaichuar nen hian in hmeh eee...

    ReplyDelete
  12. Kan lo chhiar ve e. A tawpah chuan i che fel ta thlap tihna a nih chu.

    ReplyDelete