Search This Blog

Tuesday, April 17, 2012

Qatar Airways in Mizoram lam...


March ni 15, 2012 zan dar 10:45 bawr velah chuan Qatar Airways thlawhna thar that hmel zet mai QR 52 chuan Dulles International Airport, Washington atangin an khawpui Doha lam kan pan ta a.

Kan thlawkchhuah atanga darkar 8 emaw velah chuan kan piah a thu vaipa chu a thuthmunah a sai ta hlerh hlerh mai le!... a phungzawl chu niin. Flight attendant ten thlawhna chuang list an han en a, doctor tumah an chuang silo, passengerte lah chuan an kil luih ringawt mai si. Ka tih ngaihna hrelo chuan khawihduh chuang lovin ka hriatve ang ang, zu vanga chiri te kanlo enkawl tawh thin ang ka hrilh ve ta mawp mai a ni. "A kiangah khan tumah awmhnaih tir lo ula, a hmai kha hmaizahna hmangin zap ula, a kuthum kha hmet mar sak ula, a bante kha hmehzawi sak rawh u. A tihrawl a zawi chuan alo harh mai ka ring," ka ti a...zu vang anih hmel loh avangin silipar seh tir lam erawh ka sawi tello! Attendant pakhat Tracy Lua chuan training ka nei tawh em tih min zawt a, "emergency response chu ka train zo tawh a mahse, hetah khawih theihna ka neih ka hrelo," tiin ka chhang a. Ka sawi ang chuan an sawngbawl ta thova, vanneih a siamin alo harhchhuak ve ta hlauh mai a, a nuamve duh phian mai.


Tichuan Qatar khawpui Doha kan thlen hun tur hi an local time tlai dar 6:20 tur a ni. Mahse, Dulles lamah khan anlo muang khawtlai deuh ningei tur a ni, Kolkata lam pan a thlawhchhuah leh hun pawh darkar khat emaw lek anih vang chuan minlo thlawh san daih tawh mai chu alo ni a. A thawkte ka'n zawh lah chuan "a thlawhsan daih tawh che u alawm," anti mai si, a manganthlak duh viau a ni.

Qatar Airways a thawkte chuan kan ticket min laksak a, an han vir vat vat a, an thu rawn ken erawhin lung a tiawi lemlo hle mai. Mumbai lam kan thlawh duhloh chuan naktuk lam a kan thlawh a ngai dawn tih min hrilh ta hau mai le. Aizawl kha ni 17 ami tur ticket kan neisa bawk si, lu ahai duh hle mai. Mumbai atanga Kolkata thlawk lehnghal tur min siamrem sak theih dawn chuan Mumbai lam kan thlawk mai ang kan ti ta a. Tichuan Kolkata a March ni 17 India zing dar 2:15 thleng tura ingai chuan Mumbai lam kan pan ta nul nul mai anih chu...huiham.

Mumbai chu zing dar 4 bawr velah kan thleng ve ta a, a lum uap churh mai nen lungawina tur neih lemloh nen tawng pawh a peihawm tawh meuhlo a ni ber e. Tichuan, Qatar Airways a thawk chuan minlo ko chat a, min hruai kual a, Kolkata ticket min peihfel sak vek thu min hrilh a. Kan lawm dawn viau nangin a thlawhchhuah hun khan Kolkata atanga Aizawl thlawk tur a nang hman dawn tlatlo mai. "Kolkata atanga Aizawl thlawk tur kan nih inhre si a, tinge he ticket hi min laksak..." tiin dam tak si, thutak zetin ka zawt a. Ani chuan Qatar lam atanga an rawn tihdan anih chu min hrilh a. Kei, ka ngaihdan a ni hauh talo mai le. Ticket dang min laksak ka phutta tlat mai a, kannu hah tawh pawh chuan an hotupa chu kan cart a nawr tir ta nghe nghe a.

Dar 5 a ri tep tihah chuan kan beidawng dawnlo, kan ngenngawl hle tih an hria ania'ng chu, an han inberawn a Kolkata dar 9:45 bawr vela thleng tur Jet Airways chu min laksak ta nge nge a. Wine umkhat min pek an tum a, kan la duh teuhlo mai, kan nu-in "huh" tiin kut zaizirin a huisawn sak a nih kha.

Kolkata kan thleng a, Janis zun alo chhuak leh hman, zunin lama an tlan laiin keiin kan thuamhnaw kalo lakhawm a, vaipa kainpuih tir a, rang takin Aizawl lam thlawk tur awmna lamah kan innawr lut ta a. Kan thuamhnaw an han buk a, kanlo keng hnem em em mai alo ni a. US atanga India kal hian mi pakhatin bungrua kg 30, pahnih an kengthei a, Kolkata to Aizawl ah chuan chutiang alo ni derlo mai a, a chuangbang avangin cheng sang 8 dawn kan chawi phah ta a ni.

Imphal ah min tumpui leh te te a, darkar chanve emaw hnu chuan Mizoram lam kan pan veta tak tak ta a. Tichuan chawhnu dar 2 dawnah chuan Mizoram tlang kheng reuro, thingkung awm silova hring ve nghel site pawh anlo lang ve ta a. Lo halna hnuhma ram kheng reuro te chuan ngaihtuahna ati kal thui hle mai. Lengpui chu dar 2:30 bawr velah chuan kan tum ve ta a, thla a muang ta sawng sawng a.

Bungrua kan la dawn a, chunglam kan hawi chho, Pu James Lalsiamliana, David Ralte leh Tsa te an lo nui seu mai ka han hmu chuan min chhawk hahdam chiang ngei mai. Anni hi ka thiante niin, unau ang mai a ka ente anni hlawm nghe nghe. Ka chhungte lamah ka fapa Jacob, u Tirh-a leh makpa Chhara thawhpuite anlo awm nual mai bawk a, a nuam ham ham hle mai. Airport a restaurant ah pu James-an thil tui tak tak eitur min hlui a, lawmawm tak a ni, kan puar pang mai. Tichuan zawi muangin thlalak chhoh pah zelin Aizawl kan lut chho ta a. Son of The Soil chuan a chhuahna khua a thleng leh ta a ni.

13 comments:

  1. Experience dangdai tak hi a hunlai chuan nuam lem lo mahse a hnu lama sawi tur min hriattirtu a ni leh hlauh thung si, A ngaihnawm e

    ReplyDelete
    Replies
    1. Van mengrei ve thianpa. I thil tur kha i duhzawng ani em ang chu maw?

      Delete
  2. Replies
    1. Min chhiarsak a ka lawm e.

      Direct flight anih loh chuan Qatar Airways hian tumah thlawhlo sela ka duhsak. An tum hun leh thlawhchhuah leh hun a inhnaih lutuk a... buaithlak tak a ni. Kirleh lam ka ziah leh hunah ka sawi chiang ang. :)

      Delete
    2. Qatar chu sawiloh, Cachar Airways ah pawh kan la thlawh phak loh hi.. :-P

      Delete
  3. Kha leh chen i chhuahbo san hnu Zoram leilung i rah leh ni khan i rilru a helhhawlh nasa ve khawpin ka va ring e. Cutihlaiin David Ralte, Tsa leh Shailendra te'n nghakhlel tak chunga an lo hmuak che hmel hmuh chu a va nuamin a va thlamuanthlak dawn ve le.

    ReplyDelete
    Replies
    1. caribou, kan dak chhova, anlo nui sang hlawm a... bungraw rit tak tak nawr pawh kha a phurawm surh tawh mai asin. :)

      Delete
  4. I rawn kir leha i tawnhriat i rawn pho chhuah hun tur nghakhlel takin ka lo thlir reng a. I rawn chhawp chhuak leh a a lawmawm e. September thla MSA Day ah in chhungkua hmel ka hmuh leh ngei ka ring e.

    ReplyDelete
  5. A ngaihnawm hle mai... medical lam hi chu tlem lo hriat ve hi a lo tangkai dawn hle anih hi...:)

    ReplyDelete
    Replies
    1. Maisek, David Ralte hi a hre khawp mai :)

      Delete
  6. Khawiah pawh kal la I zin kawng chanchin i ziak hi ngaihnawm ti em emin kan chhiar thei reng mai a, thu chu i lo thiam a ni e. Harsatna han tawh nasat lai tak hi a hnu lama sawi nuam lai tak an ni lawi si! A ngaihnawm e.

    ReplyDelete
  7. A ngaihnawm khawp mai. I all round bawk a, thlawhna chhungah leh zel pawh hmanna i lo awm a nih hi..haha. I lo thlen hlim khan kan lo sawi a, i zuan han zan leh han fit zak zak zia kha... Ka mitthlaah a la châm. I châm chhung khan hun hlimawm leh hriatreng tlak ka hmang a ni. Ka lawm khawp mai.

    ReplyDelete
    Replies
    1. Ts, tuan a fum tawh hahaha, iti lawmawm reng reng e. Khang hun kha ka theihnghilh leh tawh ngai lovang.

      Delete