Search This Blog

Tuesday, May 1, 2012

Nunhlui thing fe fe!

Tunhmate kha chuan ruihtheihthil khan minti buaive thin khawp mai a. A rim nam leh namlo chi kha ka duh vek zel mai kha ania, alo hoh theih viau mai. Chutiang vang chuan mi nuih leh mahniah pawh insitna tur atam thin viau reng a ni.

1.Tumkhat chu Kulikawn thlanmualah thlan kan lai a, tlak lam, Tlangnuam block (Patan) veng epah ani nghe nghe. Tichuan, kan lai thukta viau tihah chuan thlan hlui kan laichhuak ta nawlh mai a. Kuang chim tawh kan lai chhuak a, mihring ruh leh a thi awrh, 'Rosary' (Catholic tawngtaina) tuiek tawh, dar tuiek hring nghal tawh a awrh pawh chu kan hmu a. Tichuan, kei a phawk chhuak chuan a luruh leh  aban ruh chu hawn ka tum ta roh pek a. Ka rilruk dan chuan a luruh kha bati chhit nan, a ban ruh kha phenglawng siam nan ka ti rilru a ni.

Val upate chuan min khap tak avangin a rukin a hapui ka phawi hram a, chumi chu ka hawn ta thova. Chuti chuan leh, zan lamah a rim namlo chi ka kai chhelh chhawlh tihah chuan ka khum bulah mi pakhat dingrun hian ka hmuta tlat mai a. Ka pindan hi kan inhnuai zawng zawng kha keimahin awm nan ka hmang a. Tichuan thil rimnamlo chi hnathawh ningei tur chuan, chu ka thil hmuh chuan, "Ka ha min pe rawh," rawnti tlat hian kala hre zui. Khum atanga zuang chhuakin kan kawmthlang lungrem ko atang chuan kawngpuiah ka tum thla a, thianpa Madawnga-te (Kulikawn YMA president ni thin) inah ka tlan ta nal nal mai a nih kha.

Ani Madawnga lah, kan thianpa tho Hmingliana motor carburator alh a hup hlum tumna lamah a kut a kang sawrbawk nasat lai, a tui hlup hlup lai alo ni kher bawk. Tichuan, hlau em emin a khumah ka zuanglut, thaw hleithei lovin ka hrilh hlawp hlawp a, ani lah chuan alo hlau ve nasa mai, kan nasalo dun teh e.

 Thianpa Madawnga khumah chuan kamu ve zun mai a, a kut kang natak maiah chuan saphai thau a chulh a,  rizai-kawr ang chi, puan pan takin a khuh dir diar bawk a. Ani mang tha bik vak talo chuan ka hmaiah a kut durh keh chuan min rawn chulh zauh nghe nghe. Inthlahrunna tlem awm nen chuan kaitho lovin ka inhrufai ve mai bawk a. A tuk lamah erawh hlauve tho khan fiamthu thawh nan min hmang ta chiam zui a... rim nam chi emaw, namlo chi emaw lo ruih chhilh chhelh fo kha thalo tak a ni. Hmuh loh tur tur kan hmu duh dawn riau.

2. Kum 1991 kumtawp lam a ni a, Mizoram sports department sponsor-in Delhi leh Himalaya tlang bulthut velah, "National Annual Adventure Festival" a tel  tur zinga thlan kani ve a.  Tichuan kan hunte chu hlim leh nuam takin kan hmang a, Rishikesh, UP atangin Delhi lam kan pan leh ta a.

Delhi atanga Mizoram lam kan pan leh hma, Delhi kan awm hnuhnunber zan chuan kan zing ami, RK-a (Champhai) chuan, "Hawh u Agra i kal ang u," a ti ta roh pek a. Keini ho chuan pawisa kan neih tlem tawh vangin kalloh kan duh a. Ani RK-a chuan kal a rawt tlat avang chuan pawisa  anei anih ringin, kei, Pazawna (Kulikawn), Sangpuii (Chawnpui) leh Rk-a (s/o Vanbawiha, Champhai) te chu Agra kal tumin kan zan chhuah ta a ni.

Auto Rickshaw kan la a, kan tlan thui tawh viau tihah chuan Rickshaw driver chuan Agra a kal theih loh thu leh taxi zawng mai turin minti ta a...Auto Rickshaw tan chuan a hla viau reng mai a. Kan chhuk dawn, chuanman ape tur chu Rk-a chuan khami bak pawisa  aneih loh thu  a sawita mai. Keini lah pawisa kan nei bik der tawh silo, bazar nan kan neih ang ang kan hmang zo tawh si. Tichuan kirlehna tur pawh nei lovin kan hawi kan hawita mai a. Sangpuii tih loh chu kan nu phut hlawm a... a rim nam chi.

Kan piah hla fe ah chuan Delhi police gypsy pahnih an ding chu kan hmu thei a. kan zinga tu emaw ber ngaihtuah chhuah nge ka hre talo, mahse police hnenah chuan kan phei ta chhak chhak mai a ni. Han inthlahtir ngawt kha nithei heklo, kan zing ami pakhat chuan keimah chu, "Vietnam ambassador fapa" angin min sawi ta pek anih kha. A sawi takah chuan chutiang ang deuh a hawiher siam angai ve ta, avan hahthlak tak em. Min hrechhuak anga min hlap zek ang tih hlau chung chung chuan kan betlawn ta a.

Kan zing a pakhat kha police S.I. anih vangin han chetvel dan tur a thiam hlauh zawk a, min hrechhuaklo mai mai nitain ka hria. Ani  kan police thian tan pawh han tih ngaihna dang vak awm tawh heklo, kan thian zing ami khan a sawi zo vek tawh si a!  Tichuan, police inspector chuan a thutna, Gypsy hma seat min kian a, a hnungah ka thian dangte nen chuan an thu a, Vietnam embassy thleng min thlah ta a. Gate bul kan thlen thleng min thlir zui a, mahse luh tum awm taka kan kal zel vang emawni dawn... min kalsan ta a ni. Tichuan Mizoram house lam panna kawng Rk-a chuan alo hre hlauh mai a, reiloteah chuan Chanakyapuri a Mizoram House chu kan thleng ta a ni.

Vietnam Embassy nen khan Mizoram House a inhnaih tihte kha ka kalpuite khan anlo hre hman tlat. Delhi vawikhat kalna siah chuan an hawizau hman viau a ni. Englekhawle, a chet thin theih hle mai... ngaihtuah kir leh chang hian zah chem chem a awl duh hle. Miin hmai chhana an sawi chhuah chang phei chuan, zalo  leh zak rilru tak a nuih vun vun a awl duh hle. Thaw-te thleng hian a ipik up up thei mai thin.  :)

25 comments:

  1. vietnam ambasador fapa tak2 pawh i an viau tho hi haha, pui rem2 khawp mai

    ReplyDelete
  2. Hetiang hi chhiar a nuam, a ngaihnawm.

    ReplyDelete
  3. Zan reiah keimaha ka'n nuih tut tut chu le.

    ReplyDelete
    Replies
    1. Ilo hlimpui theih chuan a lawmawm....that's the idea :)

      Delete
  4. Hehehehe... Pakhatna zawk hi ka chhiar hunin a zir lo (zir viau) nge ni, mi rap tlat! Zing dar 2:30-a chhiar atan chuan a iaiawm em mai..hahaha

    Pahnihna khi in huai ngawt mai! :D

    ReplyDelete
    Replies
    1. Rk-a khan engkim a risk huai a, a hlauhawm duh khawp mai.

      Delete
  5. hahaha ka mitthla chhin che a ka nui nasa lutuk Ka U
    Story hi i nei ngaihnawm khawp mai.. rawn ziak zel ang che auh :)

    ReplyDelete
  6. A pakhatna khi a pui rep rep hle mai. Chawnte luikama 'hnam pasaltha' ruhro tuilianin a hrut lan, naupang hovin a luruh peta infiam nana an lo hman ngawt kha min tihrechhuak e a...... A hapui a dil che chu i pe let leh ta em? Hriat a va chakawm ve maw le.

    Ambassador fapa anga i han awm vel tur chu hmuh i chakawm hle mai.......

    ReplyDelete
    Replies
    1. caribou, rim namlo rui hmusual kha ania, a thuhrimah pek leh lam chu khawiah...ka phit chhuak a, step a chhuk lovin lungrem chung atangin kawngpuiah ka zuangthla mawle hahaha.

      Ambassador fapa anga ka awmta kha chu chhungril akhur nasa teh e. Rui pawh kan harh kuar kuar mai mawle. hahaha.

      Delete
  7. Pu HV, i blog-a i thuziak ho hi a lehkhabu-in chhuah teh, a tha dawn em mai a... a ngaihnawm ka ti thei khawp mai.

    ReplyDelete
  8. hahahaha.....saaala,chhungte ti harh khawpa kan nuih chu le.....Lal fapa vel khian,min dêk hle mai.....aha mai mai lampawn,arawn kala,alu leh ban chu hawn tala...lu neilo leh ban neilo in arawn kal ngei angah...hahahaha......chet fuhna in mi ati lawma,chet chhiatna in mi ati hlim thung...... :)

    ReplyDelete
  9. Mizo i ni emaw tia, vietnamese daih lo zuk ni che a. Pawisa nei lo ah chuan i lal ber awm e. Hehe

    ReplyDelete
  10. Ka lo chhiar ve e. chhiar a nuam e

    ReplyDelete
  11. Ka lo chhiar ve e. chhiar a nuam e

    ReplyDelete
  12. ka la chhiar chhuak lo,nakin ah ka chhiar leh ang..

    ReplyDelete
  13. Vietnam ambassador fapa khi ... risk huai ve thei tlang bawk maw he he

    I blog a thu reng reng hi chu a thing leh thing lo pawh hi a ngaihnawm vek a nih hi mawle, chhiar man a awm thin e. Han chhunzawm zel teh...

    ReplyDelete
  14. haha lolzzzz min tih nuih huk huk chu le a HIT e ! :)

    ReplyDelete