Search This Blog

Tuesday, December 28, 2010

Gauhati ilo fahran!

Gauhati ah khan ka nu laizawn, Peki w/o P.K. Singson te chhungkua an awm hlauh mai a, a lawmawm tak tak a ni. A fa te nen pianghmun ang maiin kan innel a, mikhual na turah pawh ka mikhual loh phah viau nghe nghe. Ka nu laizawn han sawi takah chuan a unaunu tho (cousin) nu Sangi pawh Gauhatiah hian awma pasal neiin, Hotel Bellevue neitu te an ni. Heng te bakah hian kapa in unau anga a neih leh min duhsaktu tam tak, Gauhati mihlun (ti maiang) an awm nual bawk.

Ulubari tlang chhipah Mizoram house a awmlai hian a thlang mai, Nehru Stadium ah chuan India team leh Zimbabwe team ten March ni 22, 1993 khan criket an inkhel alawm mawle. Ticket nei velo tan pawh inchung hmang tangkai an tam ngei mai. Kan thenawm velah chuan an inchungah TV set hnih emaw inchhawpin, entlang (telescope) nen an thlir a, an ri chel chul hlawm. Heta cricket khel tu te hi ka nu Sangi te hotel (Bellevue) ah an thleng hlawm nghe nghe. Criket hi ka tui ve hlawl loh avangin, kan inchung atang chuan lang reng mahse, ka thlir ve lem hlei lova. Ti daih ila, GMC lama nula rim te kha anuam ve thei viau thin, haw lamah mihring luruh ka zawng haw thin fo nghe nghe.

Mizoram house, Ulubari ami kha damlo tam takin hahchawlh nan leh inenkawlna hmun an panna inpui berah an hmang thin. Tum khat chu Mizoram lam atangin nula damlo pakhat an rawn phur thleng hlawl mai a, hetih lai hian ka chhungte chu Aizawl lamah an haw lai ani nghe nghe. Doctor pawh an hmuh hma chuan chu nula thisen cancer nei chu a thi zui ta mai a, a lainat awm hle mai. An sawi dan chuan Aizawl damdawiina an hrilh veleh an rawn chhuk thla nghal a ni awm e. Mak deuh mai chu, khatia thihsuala Mizoram house khuma a awm lai khan, pawn varanda (hallway) velah chuan a mah chu a tei kual a tei kual an hmuh thu an sawi nawk mai. Zan lamah chuan damlo leh an awmpuitu te, room hrang hranga awm te chu room lian ber room no. 1 ah an fuankhawm ta nghe nghe a ni. A tuk lamah Mizo welfare in kuangte siamin, Lunglei lam doctor (hmeichhia), specialist rawn zirlai chuan a rimchhiat harna turin a jection ta a, " a hmel khan min rap tlat nia mawle," a tih ruk se se kha ka mitthlaah a la cham.

Gauhatiah hian nula ka hawn ve alawm mawle, ka tal buai phah ta erh a nih kha. A rawn hruai tur khan ka nu laizawn te inah a chhungte an inghat phawt a. An rawn hruai hnu chuan keini pahnihin kan lo rel lawk angin, a tuk lamah chuan ka thianpa, Biswa nen a Maruti van in, an awmna chu kan pan ta a. Zing dar hnih a pel ang tih awmah chuan Maruti horn chu kan han hmet ri a, a ni chu lo tlan chhuakin Shillong lamah ka thianpa chuan min tlanpui ta nal nal mai a ni. Shillongah chuan ka lehkha zirpui thin, Saiha lam mi, ST-a nau, Sangpuii (Mara) te inah kan lut rawih mai a. A nu lah chuan dawtin, Assam police ho hnenah a fanu ka kidnap angin report alo pe chu niin. A tuk zingah chuan police ho (AP) chu Sangpuii inah chuan Sten gun tuiek, ung tawk nen an lo lut ta rup mai. Keini pahnih lah chuan a nih ang ang kan sawi hnu chuan, a report tu, a nu chu man tur a nih thu an sawi ta a. Keini chuan man lo turin, engkim theihnghilh mai turin kan nawr ta zawk nghe nghe a ni. Chanchin erawh thui sawi zui tur kan nei ta bik chuang lova!

Gauhati pawh Guwahati alo ni ta a, Mizoram house tur pawh Guwahati/Shillong Rd. a (GS road) Maruari in sak, hotel tura an duan an luah leh loh chu Mizoram sawrkar chuan ka pa hoin an en a. An lei hnu chuan khawih tur eng eng emaw a la awm nual avangin an luah mai lova, a insak a that zia ka hmuh chuan Mizoram mipui tan ka lawm rilru ve hle thin. An tui lakna kha lei chhung ami niin, han pump chhuah khan a sen deuh phut thin a, chungte chu an han enchhin tir a, "Hlauhawm a awmlo," ti mahse, han in em atan chuan ka sit ru thei kher mai. Mizoram House te hi, mipui hian mahni ta a ni tih hriain, uluk takin enkawl theuh ilang chuan a hluin, tun ai hian kan hmang tangkai thei viauin ka ring!

Gauhati sawi takah chuan Gauhati daiah Tuirial atanga Gauhati thlawhna, Fokker F-27 Friendship, 10.19.1988 atlak tum khan, Zoo Road Mizoram house ah khan kan thleng alawm mawle. Chutih lai vek chuan motor accident a awm a, a driver (vaipa) chu cher khat burin, IV drip khai bawkin inchung bathlarah chuan an muttir a. A mit leh a ka tlemte a kaw phet tih loh chu an cher khat vek ani ber. Keini thianho thleng ve pawh chu room a khah em avangin hmeichhe ho tih loh zawng, pawn bathlarah chuan mut angai dawn ta a nih chu. Kan thianpa pakhat chu zu in bak engmah vak tih peih heklo, midang kan buai lai chuan a ni chu khawngaiha blanket vel lo buaipui a hman em tih ka zawt a. A ni lah chuan, "Min tirh i tum khanglang elaw," a ti ta roh pek a, kan insual chu a ni zui ta mai a. A kutah ka vuana ka theh phar ta alawm mawle. A ni phar, lim kual chu vaipa damlo mu khawng reng dul velah chuan a tlanlawn ta zat zat mai a. Vaipa na ti lutuk chu alo thu chhuak hlawl, a na ti lutuk a sai (khur) char char. Insual thei pawh kan ni tawhlo, pumna urhin vaipa chu kan nuih ta zawk :P

16 comments:

  1. Hei chu ngaihnawm ltk lo tlat...Masi hman dan pui deuh2..nuihzatthlak deuh2 a sin ka lo chan le...lolz....Mahse thra viau tho e....

    ReplyDelete
  2. Thuziak hi chu i lo thiam mang e aw. I dai ram a zau bawk a, a ngaihnawm thei khawp mai. Tikhan ziak zel la, a bu in siam tum rawh. Thlahrang lam pang pawh hi tawn i nei nual tawh lo maw? Thukhuh nei vak lovin lo ziak teh. A ngaihnawm dangdai ve alawm.

    ReplyDelete
  3. I ziak ngaihnawm thei khawp mai. Nula chanchin tel ve ziah erawh hi chuan in nu mitmei min lo ti venthawng thin. Ziak zel teh, Ramfangzauva, Tawnhriatngaha tak tak i lo nih hi.

    ReplyDelete
  4. A ngaihnawm e! i tlangval lai hian i lo che ve feee anih hmel khawp mai! :)

    ReplyDelete
  5. Very ngaihnawm... mahse khum a mut reng lai a, pawn a a tei kual lai lo hmu tu nih chu ka chak vak hranlo. :-P

    ReplyDelete
  6. Ngaihnawm hle mai a...han ziak zel teh aw....

    ReplyDelete
  7. Alejendro: khitih lai khi Mizoram gospel centenary lai kha a ni. Khang hun laia Mizoram House, Ulubari a awm chuan sawi tur an hriat ngei ka ring. ;)

    ReplyDelete
  8. a va ngaihnawm e..Ght Mizoram House lo awm tran dan te khi a bengvarthlak alawm le..mahse i nula hawn chungchang khi ngaihnawm ber...:)

    Lynda

    ReplyDelete
  9. Nunhlui, lung ti leng leh ngaihnawm tak tak i phochhuak thina, i blog hi a ti hlu zual ka ti.

    ReplyDelete
  10. A ngaihnawm thin e!!!

    - wonderboy

    ReplyDelete
  11. Hahaha!! A va rapthlak ve mawle..! Sten gun tuiek, ung tawk nena an lo lut lai chu ka hmu chak ber mai!

    ReplyDelete
  12. a last para a vaipa khi a thi ta em?..khi khi ka nui nasa lutuk...a hrehawm ti tur hmel leh nangni ho in vai a nih avanga in khawngaih em em dawn si lo, nui nasa kha ka mit thlaah ka hmu bok..a hit top

    burgerstud2005

    ReplyDelete
  13. A thih leh thih loh pawh ka hre zuilo, a tukah Shillong lam panin kan chhuah san daih niin ka hria

    ReplyDelete
  14. Eng thil mai pawh hi ngaihnawm khawpin i ziak zel thei mai a nih hi mawle. A dang han phawrh leh teh kan lo chang reng e.

    ReplyDelete
  15. i assamese model nula ruk hi ka hre chak zawk insual tih vel ai chuan :) hei hi ami greenwood wali kha?

    ReplyDelete
  16. Sten Gun tuiek i va tawng thei ve maw le..Tuiek pawh ni se..hmachhawn ral ah chuan nuam vak lo ang a

    ReplyDelete