Search This Blog

Tuesday, February 22, 2011

Bairabi lam tho

Bairabi ah hian ka tal ve nasa thin hle. Tum khat chu Bairabi Police O.C. GB Gurung te nen Assam ramah Assam police phalna lain Sazuk kah tumin kan chhuak a. Hemi tum hian Pu Gerard-a, keimah, Pu Gurung leh uisathiam thawh tu pasaltha tho Bairabi khua te kan ni.

Assam police station kan thlen chuan kan in report zo a, ngawt zim tak chu kan lut ta a. He ngawah hian Sazuk pali an awm tih kan hriat sa vanga kal kan ni nghe nghe. A khan tha tur ah chuan kan han insem darh char char hlawm a. Chutah uifing neitu chuan a uite hruaiin ngaw chu an hel a, kan hmalam atang chuan Sazuk chu an rawn zim/hnawt phei tan ta a. A uifing te pahnih bauh lauh lauh pawh ka hre thei ta a, ka silai hum pawh chu tharil pawh zauthauna in a khur tan tawh a;heihi kah tur awm hnaih deuha mihring awm danah ka ngai ve mai. Hetih lai tak hi niin ka hria fimkhur angaih lai ber thin chu. Kan hawi lam lamah kan sa men tawh thin si a, fimkhur loh chuan thiante kah palh a hlauhawm em em thin reng a ni.

Chutia kan ui hruaite an rawn bauh lauh lauh lai chuan pakhat zawk chu a khek tuar a, insual thawm kan hre zui ta nghal a. Chutah le, silai a ri ta dur mai a, a reh leh ta vang vang mai le. Kan han nghak deuh vang vanga, thawm dang a awm tak miahloh avang chuan silai kan han ti ri a, ui thawm kan hriatna lam atang pawh chuan vawikhat a rawn ri ve ta a, kan va pan khawm ta a ni. Kan va thlena kan thil hmuh chuan lung a ti chhia in ka nghilh nghal dup ni berin ka hria. Kan ui hruai chu tu emawin alo kap alo ni reng mai, avan lainat awm tak em. A kiangah a fapa (ui fa) chu thutungin a thaw hlap hlap mai a, tap ni awm tak hian a a 'nghit' chik chik a, thawm a siam rit ret reuh a. A ui neitu ber chuan a kaptu um alo tum mek ka thiante chuan an dawm bet bawk, khami tum khan umzuiin umpha sel chuan a kap duh ngeiin ka ring.

Hlawhchhamin Assam police station lam kan pan ta a. Anni chuan tunge ramvak anlo hre reng mai a, Tukuk mi hausa fapa alo ni a. Tichuan, Bairabi lamah tawng miahlo vin kan haw ta a, a neitu chuan a ui duh tak mai, in leh rama a thiantha ber chu pawmin a mittui chu aluang zawih zawih reng maia, thlir zeuh zeuh loh a har si, hmuh avan hreawm tak em. Chu uifing chu kuang mawi tak siam sakin kan vui liam ta a. Tuikuk pa pawh chu police ten manin lei a chawi teuh a, a silai a chawi tel nghe nghe a ni.A kah chhan pawh a ui nen an insual chu a ui thlavang hauhin a kap ta mai niin a sawi nghe nghe.

Tum khat leh chu Pu GB Gurung, Pu Zara (Kulikawn), Pu Gerarda (Skylinks neitu Pu Tony u) leh keimah chuan rel kawng an laihna lamah sakhi an chhuak nasa tih an sawi chu va beih kan rilruk ta a. Vai ho chu an lo thawk mur mur mai a, a then lah thil chhipchhuan pahin an zai lang lang bawk a. Mak deuh mai chu an kiang maiah chuan sakhi te chu ngam takin an lo tla hlawm a. Keini min han hmu chiah erawh chu 'phit' tiin hnim buk karah an lut ta dial a. Mizo hmel an hre hrang ngei mai, hlauh tur leh hlauh loh tur an hre hle mai kan tia, kan nui tet tet hlawm a, a hnu erawh chuan ka ngaihtuah thui hle. Hemi ni atang hian a ni maithei, ramsa hlauha awmloh tumna rilruah ka neih tan kha!

Kan phei zel a, mau karah chuan sakhi chal zet mai hi ngawi rengin alo ding reng ka hmu a, ka silai ka lek chho dawn chiah tih chuan ka thianpa chuan, "keiman keiman," tiin kah a rawn chuh ta roh a. A han tin a, a silai mu a tlawlh leh roh si, a ri khauh ah sakhi a tlan leh bawk, kan chan chal kher asin. Tuikuk ho chul ramah kan chhuak chho a. Hetah hian khua chu thim lek lekin,unau-hmelhai vel a ni tawh. Chul hnih emaw kan kal tlang tawh tih chuan Pu Zara chau chuan a silai chu pu peih tawh heklo, a hnuh ten a hnuk ta vel a. Hmehen (flashlight/torchlight) kan hmet enga kan melh kual zel a, mual lehlam thleng te chuan kan han chhun thin a. Sakhi mit ngei mai chu a meng hring ta kalh mai le. Pu Gurung chu silai kah thui ber Enfield Mark111 (303 rifle) keng a ni bawk a, ani chanah kan dah ta a. Pu Zara chuan a hmehen (torchlight) chu chhun sakin, a nghawng atanga a awm a tlang tura riruat/chhutin a kap ta a.

Ral lehlam hnim chu a ri nghal buan buan a, kei lah chulam hawia tlan phei ka rual nghal a. A lo lum thui phian mai a, khutah deuh chuan Thang buk kara alo let reng chu ka zuk hmu ta a. A kawchhung rawn baw chhuak te chu," Sa chek a uihawm," tiin ka hnawh lut leh vel chu min nuih nasa hle mai. Mizoram police silai kah thiam chhuanvawr nge nge, a tumnaah chiah, anghawng atangin a awmah chiah chhuakin a kap fuh a ni, athiam hle mai. Hlim takin, hah pawh hre tawhlo chuan kan Jeep ken ZRM 1006 ah chuan kan lut a, haw pah chuan sihal tlan te kan inthemthiamphei ta a, pahnih chu kan kapthlu leh hram a. Ti daih ila, sihalah hian chi hnih an awm niin ka hria. pakhat chu sen deuh thur niin, a chidang leh chu chhawhchhi buhpawlh rawng lek lek a ni. Rawng sen deuh thur sa chu thang bik riaua hriatna ka neih laiin, a rawng dang zawk chu uisa nen inang hlein ka hre thung.

7 comments:

  1. Ui hi chu a neitu tan an ngainat awm bawk a,in uifing chu a lainat awm hle mai.Ngainat awm luat ah vulh ka duh tawh lo bur.
    Ui sawi tak ah chuan kan ui vulh thin 1 kha a pem kual ve nasa asin. Upper Reublic(1yr)>Khatla(1 yr)>Lunglei(2yrs)>Shillong(2yrs)>Bawngkawn(6mths)>Khatla(2yrs)>Maubawk(2 weeks)>Khatla(6mths)>Kolasib(2mths)..chuan Khatla ah a thi

    ReplyDelete
  2. Zawlnuama kan awm laiin ka u te(in hrang chang tawh) hian alsatian ui an nei a, an ui chu aizawlah an zin san a, lo enkawl turin kan kutah an dah a, an zin san atang chuan chaw a ei duh ta reng reng lo mai a, an in ah te a va kal a, tumah a va hmu tawh si lo, a lungleng lutuk kha a khawngaihthlak khawp mai, a hnu karkhat veklah chuan ui dang nena an infiam lai kha a tlu tawpa a thi ta a ni, kan unauin a thlan kan lai a an in bulah chuan kan phum. Tun thleng hian ka la theihnghilh thei lo.

    Pasaltha ramchhuak silai hnuk khi pui bawn tawp :-)

    ReplyDelete
  3. Hmanah kan alsatian ui (Roko-a) vairengte BDO hian sa pelh nan a hawha, thla 1 vel a bo vang vang ka pa in a va check chu an lo talh daih tawh ...thing mai mai ..

    uisa ei ho hi chu chuta tang chuan ka hmu 'englo' tlat

    ReplyDelete
  4. zualbon, talh tur hrim hrima vulh chu ka ei hreh lo. Mi khawi/vulh pangai (pet) erawh ka ei duhlo hrim hrim, ka lainat tawp.

    ReplyDelete
  5. Hotupa chu, ziak ngaihnawm leh hle mai. Ui hi kan vulh ve thin a, ei en ah ka en ngai lo. Ui hi mihring ranvulh ah chuan an rinawm ber.

    ReplyDelete