Search This Blog

Saturday, February 5, 2011

Ka duh angin ka kal thin

Vawin ka pianchamphaphak ka thlen ni hian ka hun liam tawh te chu nasa takin ka thlir kir leh a. Ka khawvel nun pawh a chanve ka lo hmang ral ve ta der mai tih kan ngaihtuah chhuak tel bawk a. Chhui kir tur ka ngahin, pawi tih leh inchhirna te pawh hun thenkhatah chuan min neih tir bawk a. Hetia nun kawng puanzar ka khar phui hma hian, chiang tak maiin ka nun kawng zawh chhuk chho tak tak te chuan koh kir theih loh nunhlui min dawn kir tir a ni.

Inchhirna thenkhat nei thin mah ila, sawi tham lek niin, lawmna tur alo tam zawk zia te ka ngaihtuah tel bawk a. Nu leh pa te hmangaihna tun hnu chauha kalo hrethiam hi mihring zia ve reng nge, ka thu a kalo kal thin zawk vang tih te ka ngaihtuah tel bawk. Tih tur thaa ka hriat te chu nu leh pa thurawn aia tha tiin chulam zawh chang chu ka ngah thin hle. Khang te kha ka inchhirna zing ami a ni. Ka kawng zawh tur te chu fimkhur inti takin ka chhut ve thin a, hria anga ka awmna kha ka hriat loh vang alo ni reng mai.


Zirlai nih a nulat tlangvalna lama insum alo tul zia leh, inthiar fihlim a lo pawimawh zia ka hre tulh tulh a. Tlangval laia nula ngah (kawp tam nih) te kha a hun laiin nuam ti viau mah ila, a daih rei loh zia leh chhungrila inchhirna thlentu a nih hrechiang tu ka ni tih ka inhre nawn leh bawk. Ruihtheih thil lah a hming kimin khawih loh a hleih ka nei heklo. Mahni thial sen loh kalo thial thinna chuan in sehruhna hlir min thlen a, ka chhak chhuak leh thei hi ka van lawm tak em.


Keima phak tawk baka nasa in, khawvel lamah chen loh a hlei ka nei tawh barin ka ringlo. Khawvel hlimhlawp naah tlan thin mah ila, kum leh tumruhna, chhungte beidawn lohna te avangin, ka tho chhuak leh tih ka chiang. Tu emaw ni thin kha, engmah lo vah ka inchhuah a, engmah lo atangin mi rualpawl tawkah ka chhuak leh ta. A vaia kan en kir leh hian, nun khawlo tam hle mahse, tun hun dam taka ka thlen avang hian ka lawm a ni.

Vawin hian, nu leh pa beidawng ngailo ka neihna leh kan chhungkua chu Pathian mawlsawmna ropui ber alo ni tih ka hre nawn leh a. Kan fate hi kan hlimna leh rilru ti hahtu, kan dam hun chhung thlenga thu neitu an nihna tam tak a awm tih thlengin ka ngaihtuah chhuak bawk. Ropuina chu Pathianin chang se tunah leh chatuan thleng pawhin, pi leh pu ten, "Aia upa te zah thiamin,an thu te awihin zawm fo rawh," an lo tih thin kha sawi mai alo nilo tih thangthar te hian hrethiam mawlh rawh se.

14 comments:

  1. nu leh pa hi kan lei Pathian an ni e..Upat hnuah chauh kan hrethiam sia..buaithlak ni e..

    ReplyDelete
  2. Hei hi a ni... Siamthar leh chu..

    ReplyDelete
  3. Khawvel hlim hlawpna lamah nasa takin tlan thin mah la, hlei hluak takin ruihtheih thil lam lo chen thin pawh ni mah la, i nu tawngtaina khan rah tha a chhuah tho tho dawn. Mihuaisen chu tlu mahse, a hma aia chak zawk leh ropui zawkin a tho leh thin.

    I pianchampha a lo thlen hian i nunhlui te, i thian hlui te, i pian sei lenna vangkhua te, i nu leh pa te pawh i mitthlaah i hmu uaih uaihin ka ring. Piancham thilpek hlan tur che ka nei ve lo, ka theih ve tawk ka duhsakna sang ber ka hlan a che.

    ReplyDelete
  4. Ava han tha em...i chanchin a ngaihnawm e. Inchhir te a hmangaih thin. Misual a thlang a a hmangaih thin. A tha vel vek e. Nu leh Pa,aia upa zah awwww ava tha em Pathian thu awihna bul a ni...

    ReplyDelete
  5. Thianpa, belated happy Birthday!!! Nun inenlet hi a tul thin, inchhirna min siamtu atan ni lovin hmalama kawng min entu atan zawkin. Malsawmna kan dawn zozai avang hian Pathian hnea lawmthu sawi reng tur kan lo ni e.

    ReplyDelete
  6. A va han tha tehlul em!! Nu leh Pa ngaihhlut lehzual nachang hriat phah nan ka hmang ngei ang..aia upa te thu awih hi a lo tha ber mai:an dik reng bik vang ni lo in thil tha leh tha lo min hrilh turin keini aiin tawn leh daihriat an ngah vang ani;chuvang chuan i thil ziah last sentence khi zawm ngei ka tum ang :)

    ReplyDelete
  7. Ka blog min chhiar sak thin avangin ka lawm e.

    ReplyDelete
  8. tha khawp mai ... ka lompui tak zet che... :)

    ReplyDelete
  9. tlaikhaw hnuah ka rawn lawmpui a che, i B'day chu. i thuziak pawh piancham ni-a ziah awm reng a ni e. fr.vakul

    ReplyDelete
  10. Belated happy B'DAy....A ropui lehpek hle mai....





    Godspeed K

    ReplyDelete
  11. Zo Int' Pu ber,
    Hringnun hi i hmuzau/chiang hle mai! I thuziak te hian Sermon au ring dup2 aiin Thu a sawi ril zawk em aw te ka ti rum2... ...:D)

    ReplyDelete
  12. HV fb ah khan ka zawng che a, a result a lo lang hi i nih hmel silo a, Kingpin thana tih khan min lo add jok mai teh. Plz. March 17 hian nupui neih ka tum ve a, in lo haw lai nise a tha tur ania :) i blog chhiar a manhla hle mai. Ziak tha khawp mai.

    -Kingpin

    ReplyDelete