Search This Blog

Tuesday, July 19, 2011

White House tlawh chungchang! -2



White House East Wing gate hmasa ber chu kan lut ve ta reng mai a. Gate kan lut chiah tih chuan Union general William Tecumseh Sherman-a lim chu veilamah chuan lian zet maiin alo ding luah mai a. Sherman hi American civil war a general lar tak niin Atlanta a lak khan Abraham Lincoln a tlin nawn leh phah nghe nghe a ni. A lim hi sakawr chunga a chuanglai, lungrem sangtak a dintir anih bakah, ama lim tho lungrem kiangah hian ke a dingin pali dang a awm bawk. President a thlan an tum pawh a hnial tu a ni.

Tichuan Secret Service lam chuan hlim hmel pu tak chungin kan kalna tur lam minlo kawhhmuh zel a. Check gate dang pan chuan thlur hnihin kan inzui phei ta hlawm a. Chutah chuan kan identity card min phawrh tir ta a, an lehkhabuah chuan kan hming a chuang em tih an en ta a ni. Kan hming an hmuh hnu chuan kan hming zawnah chuan an thai hang zauh a, kalna tur lam min kawhhmuh leh ta a. Phul nuam tak karah chuan kawng kan kan a, gate dang alo awm leh a. Hetah pawh angai ang deuh thoin kan thil ken leh ID min en sak leh a, kal dan tur min hrilh leh ta zel a. A chhawng nasa nek nawk hle mai, fimkhur loh theih ni heklo le! Mobile home ang deuhah hian 'ngil, ding, vei, vei' kalin kawngkharah kan lut leh ta phawt mai. Hetah thung chuan thlawhna tumhmun ang maiin uluk takin X-ray na te nen kan thuam leh paipawn te min en thlithlai sak leh ta a. Zah taka chibai bukin kan kalna tur lam min kawhhmuh ta zel a.

Gate dang mawi angreng tak mai veilam luhna atang chuan kan chhoh kal zel a. Kawngkhar lian zet mai, a hlui tawh hle tih hriat tak, uluk taka enkawl tih hriat ngawih ngawih lawi si chu kan lut ve ta. Hemi pindan hi leidap kan ti dawn nge, ground floor a ni. bang lehlam tawn ve ve chu American mi-un ho thlalak leh an lem kual mawi (framed) taka dahin an tar tlar put mai a. Pindan hmasa berah chuan pasarih chiah ka hmu thung. Step tlem kan lawn chho a, kalna zau tak (Hallway) ah chuan kan phei zel a. Dinglamah chuan "Library" a awm a, chumi veilam chiahah chuan "Vermeil room" an tih chu a awm bawk a. Vermeil room dawt chiahah hian "China room" an tih chu a awm bawk a. Hemi hmalam erawh kal an remti lova!

Chuta tang chuan step zau nuam tak, thlur hniha kal theihna dinglama awmah chuan kan chho ta a. Step tawpah chuan dinglam panga pindan zau tak mai "East Room" an tihah chuan kan lut ta a ni. He room ah hian chhuatphah (Rug) lianpui mai phah anih bakah Meichhitenna (chandeliers) lian pui pui, Crystal mawi tak taka siam, pathum a inkhai lurh lurh hlawm bawk a. He pindan ka luh hian an thil tar chuan min khawih ve hle mai. A chhan chu kha pindan kha President JFK leh President Aby te ruang an lo zalh tawhna anih vang a ni.

East Room atang kil tawp atang chuan "Green Room" an tih chu kan lut phei leh a. Hetah pawh hian pindan leh hmun dang ang bawkin secret service ho chu midang thlithlai awmlo takin an ding ngawi reng bawk a; India pulit ho anglo takin an nelawm phian lawi a! Green Room piah chiah hi "Blue Room" tih ani a, an chhuat phah pawh rawng pawl a ni a, an room hming chawi takin an chhuatphah rawng pawh a dang zel a ni. Red room an tih chu kan lut leh a chhungah hian meichhemna (fireplace) a awm a, mahse a danglamna chu 1818 ami Empire mantel a awm a. Tin, an meichhemna chu sailungvar nalh tak maia chei a ni bawk. Hemi pindanah ngei mai hian ani ka fanu chau deuh tawh chuan "Apa ka chau" tiin "Ladies Chairs" an tihah chuan an thu thuak hman nang a, secret service te an phe rang kher mai. Nuisangin ka fanu Janis hlauh loh turin "Miss khatah chuan thut an phal lova," tiin an hrilh a ni. Hemi room hi President te pawhin party an lo neih na thin a ni awm e.

Englekhawle, "China Room" bul atanga kailawn (step) kan chhoh khan chhawng khatna (first floor) kan thleng a ni a. Tichuan, Red Room dawtah chuan "State Dining Room" a awm leh a. Hemi pindan hi a lianin adar zau kher mai. Chawei mi za chuang an leng niin a inziak nghe nghe. A pindan luh chiah hian kan hma zawnah Aby lim, a lu chin chauh lianpui lo inhung kan hmu a. Kan dinglamah chuan mu (Bald eagle) in bang rinchhan dawhkan chu a chhipin a dokang a; dawhkan keah an hmang anih chu. Mu lem hi mawi taka thinga ker ani a, feet 3 emaw laia sang ani maithei. Chutiang chu hmun thuma inhung ka hmu a. Tin, he pindan meichhemna chungah hian President Abraham Lincoln lem lianpui mai, George PA Healy in kum 1869 a a ziak chu an tar ani nghe nghe. Hemi pindan ah hian alawm ram hruaitu pawimawh tak tak te President in chawhlui alo kilpui thinna chu. Kan hawi hu hu bik miahlo ania, chik takin ka thlir kual ve nasa mai.

State dining room dinglam atang chuan "Cross Hall" an tihah chuan kan lut leh ta zel a. Hemi pindan hi East wing ah chuan President in chanchinbu mite a kawmna thin pakhat a ni. Hemi pindan hi alian ber maithei!. Meichhitna lian pui pui a inkhai a, han phei zel chuan "Entrance hall" an tih luh leh dawn chiahin chhuatah chuan, an sak kum/a kan chhiat kum leh sak that anih kum te chu uluk taka kerin a awm a. Entrance hall atang hi chuan pawnlam chhuah ani tawh mai. Pawn ka han dak chhuak a, hmana White House pal hunga pawna thla kan lo lak ve zak zak na thin, mikhual kan lo hruai ve na thin te chu ka zuk hmu a, lung a tilengin, tuna ka chan,a chhunga luh ngei nen chuan a danglam hle tih ka hrechhuak zui a. Pawn kan chhuak ve ta nge nge a, mi lah chuan an cell phone hmangin thla an lo la sup sup mai a. Kei lah chu camera phone neive mah ila USB nei chuang heklo i, thla chu kan la ve nial nual a han dah chhuah theih lah ka nei ta chuang der lova!

White house kan fang ve ta chu ani reng mai a, khawvel ram ropui ber hruaitu chenna chu. Mahse, ka'n ngaihtuah let hian a ram ropuina leh hausakna te aia ka ngaihsan chhan a awm ta tlat mai! Chumi chu heihi a ni: Khawvel ram ropui ber hruaitu chenna e tilo chuan, mi pangai neih baka chei uchuak ka hmu hauhlo ti ila ka sawi sualin ka ringlo. Thil hlu awm te chu an hlui tawh vanga hlu emaw, ramdangin an pek (present) te anni daih mai. Kan hriat lova invenhimna ropui leh nasat dan tur zia chu rinthiam ngaihna pawh a awm lova, chu erawh chu venhimna thil ani daih thung si. "An chapona hi avan tlawm tak em," ka ti ta ber a, ka ngaihsanna a zual sauh bawk.


PICS: hman deuha mikhual kan kalpui tuma kan lak. Pakhat zawk hi White House chhung (President chenna lai tak tello) pindan awmdan te anni. CLICK PIC FOR LARGER SIZE

27 comments:

  1. This comment has been removed by the author.

    ReplyDelete
  2. A va khamawm loh thin em! Kal ve i ti chak zo vek mai.

    ReplyDelete
  3. I ziak chipchiar thiam kher mai, a hmuna kal ang mai niin ka inhria! A ngaihnawm lutuk tlat. I fanu mawlh khi ka lo nghak lian ang e.

    ReplyDelete
  4. This comment has been removed by the author.

    ReplyDelete
  5. TS, i nghak peih ngut ang maw heheheh

    ReplyDelete
  6. Ngaihnawm hle mai. Camera phone i nei a, USB i nei lo.... memory card kha phawrh la, card reader hmangin thun mai la maw le. Ka han ti thla rawk a, internal memory chauh hmang chi anih chuan a theih si loh ang maw?? I thlalak chu lak chhuah dan a awm ka ring hrim hrim. Kei chuan thlalak mawlh kha ka en chak a nia.. A tihdan tur han ngaihtuah tha teh.

    ReplyDelete
  7. caribou, helam phone ah hian a tlangpuiin memory card a awmlo. Phone pangai ang tawp ani ber mai. Battery a awm a, chu2 ani mai :( Ka lak ve pawh kawngka pawn kan chhuah hnu a ni. A chhungah chuan lak an phal teuhlo mai.

    ReplyDelete
  8. more.... more ......

    ReplyDelete
  9. tunah chuan kimchang tawkin chhiar tawh bawka...rawn zin hunah pawh White House chu tlawh kher ngaih tawh dawn loh hi....:)....

    ReplyDelete
  10. siamsiam: Ka momo tur kha a siamna chawpin ilo ei zo vek ange aw. Ilo chhiar a ka lawm lutuk e

    ReplyDelete
  11. g@othica: Mahni chhungte pawh ka hmu tawk a ni e. Ka thlithlai tui lutuk mah mah tep a ni :)

    ReplyDelete
  12. In va han vannei lel lul ve aw...

    ReplyDelete
  13. hihihihih...first female President ani lek ek anih chu hahaha v v like

    -zualbonez

    ReplyDelete
  14. Ka va duh khawp lo ve.. Thlalak rawn dah thei la chu keini tan pawh a fiah deuh tur. :)

    ReplyDelete
  15. @Maisek: Tunlai angah chuan kan vannei khawp mai.


    @Sangpuiipa: khita mi khi han click keuh la, kan kalna hmun chu a chiang maiin ka ring tlats.

    ReplyDelete
  16. I ziak chipchiar thiam a, chhiar anuam zual, kal ve a chakawm khawp mai. In vannei mange! :) Thlalak te nen awm phei se chuan, a taka kal ang mai kan ni dawn sia, kei pawh i fanu khi ka lo ngak ve ange! :)

    ReplyDelete
  17. Ngaihnawm dap dap e. I family pawh ka hmu ve ta-chhungkaw duhawm tak in ni e.

    ReplyDelete
  18. This comment has been removed by the author.

    ReplyDelete
  19. IsthereloveinspaceJuly 22, 2011 at 12:08 AM

    chhiar a man hle hle mai

    ReplyDelete
  20. Kal ve a chakawm.. Thlalak chu dah dan han ngaihtuah hram teh. Ka enchak hle mai.

    ReplyDelete
  21. hairehai ! ngaihnawm hle mai..i rawn zawm zel loh chuan pawi zawk ang :)))

    ReplyDelete
  22. US kal hun chu kal ve dan ngaihtuah a ngai a ni. Nang in min pui thei ang a. Mahse,ka dam chhung hian US ka kal ka ring chuang lo. HeheUS kal hun chu kal ve dan ngaihtuah a ngai a ni. Nang in min pui thei ang a. Mahse,ka dam chhung hian US ka kal ka ring chuang lo. Hehe

    ReplyDelete
  23. Thianpa, nang hi thluai thlum lem si lova ngaihnawm taka ziak i thiam riau mai! mitthlain ka chhui ve zut zut mai alawm. Encarta atangin ka fang ve tawh..hehe

    ReplyDelete
  24. Muante, nangni nen kal ho ni ila tha tur. Kei aiin i ziak fiah thiam zawk ngei awm si a.

    ReplyDelete
  25. Va ngaihnawm ve, thil chi hrang htang hi min hlui thin a, a khawmawm loh thin hle mai, a chhunzawmna kan lo nghak reng e

    ReplyDelete