Search This Blog

Sunday, February 26, 2012

Kamera leh kei!



Ka naupan tet atangin kamera kianga tal tam ka ni a. Kapa hi kum 1970 chho chawhma-lam khan Aizawl a amateur photographer tlemte zing ami a nive thin. Chunglam atanga bihthlak chi, "Yashika kamera" a hmang thin a, tha viauin ka hre thin. Kapa pisa kal chhungin kanu-in thlalak lamah alo chhawk thin a, ka zuive hnak hnak thin a. Kapa pisa bang lohaw chu kan in pindan chhak dinglam, Tlangnuam kawng ân lam a 'darkroom' ah chuan lutin 'roll film' te chu thlalalak damdawi a silin a 'develop' thin a. Dark room chhung, bulb rawng sen thim ruai kar a kapa che vel thlirte kha nuam ka ti thin hle mai. Naupang mai ka nih vangin tihpalh awm thei a tam a, ka awm tam erawh rem a ti ngailo thung.


Kapa lak:

Ka len-deuh hnu chuan thlalak 'roll film' a damdawi a sil dan leh siam dante chu min zirtir chhove ta zel a. Shillong atanga kalo kir leh hnu, kum 1984 ahte kha chuan Darlawn nula tlangval thlalak pawh ka siam ve nual nghe nghe.

Mi hausa chhungkua atanga seilian ka nilo bawk a, mahni pualin kamera hi ka nei har khawp mai. Click III mi hmannu kha ka neih hmasak ber ani awm e. Chu pawh a changa la theilo thin, tang leh tlat mai thin kha a ni a. Chu tih lovah chuan kum 2008 khan digital kamera fahrah ve tak pakhat ka nei ve ta. Pawisa chuangbang neilo tan chuan a leina man tur intuak chhung a rei duh ngei mai!

Kum 2010 ah Minolta siam 10.2MP compact digital kamera ka nei leh a, chu erawh kum 2010 September thla a dil nuam tak mai, "Deep Creek Lake" an tih kam a chhungkaw camp out kan neih tumin kan tibo ta hlauh mai. Kamera nei lova awm nuamlo kati ve tan tawh alo ni reng mai a, rilruah alo lang leh zauh zauh thin. Tichuan BestBuy dawrah kalin ka pocket money tur ka dahthat chuan Sony kawmpani siam, Cyber-Shot 14.1 MP, 25mm wide-angle lens hmang chu ka lei leh ta a.

Mahni inhrêng taka ka khawl atang ngei mai a lei ka nih vangin $200 chuang awrh man lek mah nise ka lawm kher mai. Thla kan lakve te lah chuan thiante'n tawngkamtha-in mawi min han tihsak changte a awm ve thin a, dawnsawn a nuamin a lawmawm thin takzet.


Sony Cyber-Shot hmang a ka thlalak (edit loh):

Ka fanu Janis-i hi Mizoram lam chhunte'n an la hmuh loh vangin hawpui kan tum ve ta a. Janis-i tel a chhungkaw inhmuhkhawm hmasakber tur anih vangin thlate pawh tha ve deuh lak a tha dawn a ka hriat avangin kamera pangai ve tak, keini chhungkua-in kan neihzawh tawk awm tur ka dap tan ta a. Electronics dawrah ka kalkual nasat bakah internet hmangin ka zawng nasa ngei mai. Chumai ani nang, thlalakna lam lehkhabu, "Popular Photography magazine" ka chhiar nasat phah hle mai bawk.

"Nikon (pronounced 'Knee Kon') nge Canon, nge Pentax..." tih ngaihtuahna ka hman bakah, ka chhiar a a zawhkual hrep hnu chuan duh deuh pakhat, Mizo zing a larlo ve tak, ka mitla deuhtu ka hmuta tlat mai. Chumi chu NEX-7 tih ani a, Sony company siam thar a ni. NEX-7 ka hmuhna chu Popular Photography magazine niin, "Camera of the Year 2011" atana anlo thlan chu ani nghe nghe.


NEX-7:

Chu NEX-7 chu 24.3MP niin, te takte, DSLR leh compact inkar ami ani ber awm e. He kamera tetakte hian thil tam tak, kamera dang tih theihloh a ngah kher mai!

Chutiang teh hrep a tha ani tih nei tawhte leh thlalakna bu meuhin an fakna ka hmuh hnu chuan kan nupa inrawn-in lei kan rawtve ta a. Phur takin biakhlatna (telephone) kala a, ka beta hlawm a. Duhtu (demand) an tam vangin khawi dawrah mah leitur a awmlo. February ni 13 zanah biakhlatna hmangin ka order ta a. Karkhat velah chuan an rawn thawnchhuah theih an beisei avang a 'order' ka ni.

Ka order-ni atanga ni 2 naah chuan 'memory card' leh kamera bawm (case) arawn thleng mai a. Kamera erawh e-mail atanga ka chhuinaah pawh "In process" tih ani reng ta mai. Ngaih thalo tak a ka awmlai chuan e-mail ka dawng ta a. An thu minrawn thawnah chuan March ni 23-ah an rawn thawn theih dawn chauh thu an rawn sawi hi alo ni a. Keini chhungkua, March ni 15 a Mizoram hawtum tan chuan a manganthlak duh hle mai. Ka phone ta sek a, anni lam chuan e-mail ah "re-schedule-ni" rawn thawn leh-in, March ni 2 atangain order awmsa a indawtin an thawn chhuak dawn tih a ni thung. February ni 22 chuan e-mail dang dawng lehin March ni 30 ah an rawn thawn chhuah theih choh hmel thu ani leh ta dawrh maile, huiham. Tu tihdan takah emaw tunlai chu ka puja fuhlo thei khawp mai.

Engpawh chu nise, ka kamera awh ve em em mai chu ka nghakchhuakzo dawn lovin ka inhre ta a. Kan nupa inrawnin NEX-7 order thaichhia-in (cancel), Sony siam tho, A65 DSLR chu kan order leh ta zawk a. Sony A65 ka thlan na chhan chu he kamera hi TIME magazine-in "Invention of the year 2010" a an thlan, an chanchinbu kawmah pawh an chuantir van Sony A55 tih changkan belh (improved version of Sony A55) anih vang a ni. "when you snap a picture, the mirror that's been redirecting the image to your eye and to a focusing sensor pops up momentarily as the image is captured. Until it goes back down, the camera can't focus. Sony's Alpha A55 fixes that with an ingenious translucent mirror that stays put. That means you can shoot up to 10 perfectly focused photos a second and record HD video that never goes blurry." -- Time magazine



Sony A65:


Hei meuh chu Pathian zar a dam chuan March ni 17,2012 ah Mizoram chhungah ka hmetri ve kharh kharh tawh mai dawn a ni. Mi angin man tober ber chi nei zolo mah ila, kan chhungkaw tlin tawk, mahni kutchhuak ngei mai a kan leive theihna hian thinlung chhungah minti lawmve thin hle.


Kamera thar hmang a ka thlalak hmasak ber, a ngai ngaiin:

20 comments:

  1. Camera roll film hmang chi ka neih bak kha chu tun thleng hian camera ka la nei leh ta lo. Kha ka camera neih ve chhun lah kha a chhiatna a rei tawh si. Digital camera hi chu ka awt ve ania aw...

    Khi, i camera tur chu, a that hmel hle mai. Sony camera nge nge hi a that ka ring tlat. Thlalak nalh tak tak i lo post thin dawn nia.

    ReplyDelete
    Replies
    1. caribou, Lei ve ngei teh, nunphung recordna tha tak ania sin.

      Kei hi, thlala-mi chhungkua atanga seilian e tilo chuan thlalak ka thiamlo viau mai. Chumai pawh ani nang, thlalakna lampang hi zirchianna ka nei tamlo viau. Thla hmasa atang erawh kha chuan nitin hunawl ka neih apiangin lehkhabu leh website/blog hrang hrang leh Youtube atangte-in ka dap nasa.

      Ka tlintawk a ka phaktawk awm tur ang anlo siamve hi ka lawm ve hle.. :)

      Delete
  2. Hei bak bak atha le.. Sony leh Olympus hi Mizo te hian kan Hmang uar lo a, Nikon leh Canon hi kan ti bur mai a, kan in tih hmuh lak loh a, SOny leh Olympus hi belh chian an dawl a sin, Sony ngat phei chu Video ah tha tak an ni.

    ReplyDelete
    Replies
    1. Ka lawm e. Ni e Olympus hi kamera tha tak niin ka hria.

      Delete
  3. A ngaihnawm mang e! I nu khi a chhe lo zek mai a.. Camera hi ka awt ve ngam leih leih chauh a ni e, neih hun chu a la hla ve ngawt ang!

    ReplyDelete
    Replies
    1. Ts, min chhiarsak thin a ka lawm e. Tuina leh mamawh hi nei ila a tawk viau a ni. Kei pawh thil thleng zen zenlo tur, chhungkua a inhmuhkhawm kan tum vanga khitiang khi ngaihtuah ka ni ve mai. Tul lemlovah chuan Cyber-Shot ka hmanlai pangai hi ka duhtawk viau ania.

      Delete
  4. A ngaihnawm e. Camera hi ka awt ru ve thei hle mai a, neih ngei ka la tum ve ang.

    ReplyDelete
    Replies
    1. Kan thil tawn leh hmuh recordna tha tak niin ka hria a, theih chuan neih ngei thain ka hria.

      Keipawh midang angin manto ber ber chi nei zolo mah ila, phak leh tlin tawk chu kawllai neihve reng hi ka tum a ni.

      Delete
  5. Chuan, a rei tawh bawk a ni ang, i pa chuan thlalak a la thiam lutuk lo a ni mai thei. I nu hmeltha tak thlalak khi han en ta la, a thawip pik thlak ka ti.

    A hnung lam khi a ruak huau va, a hma lam a chêp em em thung. Hmalam hi looking room an ti a, a awl zau zawk tur a ni. En a hahdam bik a. Tin, a lulam pawh khi a zau hlek tur a ni. Head room an ti thung a, head room leh looking room hian thlalak hmuhnawm leh hmuhnawm loh a hril pha tihna a nih chu.

    ReplyDelete
  6. hehehe...kei pawh camera ka awt ve thei sia, high sikul kal kaiin Click III hi ka thianpa ta hlui, tawng zet mai ka leisak a, ka roh ve thei lutuk. Mipa hi chuan electronics things hi chu kan lo lawm a ni. I camera thar chu khalh neuh neuh a va chakawm ve...han hmet pap pap la, keini mittlai nan.

    ReplyDelete
    Replies
    1. Er. Beethugs, hei, vanneih a siamin phaktawk to over-lo ka hmu hlauh a ka lawm khawp mai. :) Click III kha tha ve deuh ania aw hairehai :)

      Delete
  7. Thiam awm zut zut love, ka mumanga inlarna ka hmuh pawh a ni chuang lova. :P

    ReplyDelete
    Replies
    1. I thiam ang, i thlalak han post hlawm teh khai. Mit kham thumin kalo thlir teh ang.

      Delete
  8. Kamera tha tak anih ka ring e. I lokal hun chu lan ve ngei tum ang. Kei pawh ka la nei lo. Phone camera hmang chauhvin ani thla ka la lak, tun thlengin.

    ReplyDelete
    Replies
    1. Pu Hlute,

      Chhungkua inhmawhkhawm mai mai a harsa thin si a, inhmuhkhawm leh hun hriat hekloh. Kan dam kim zel angem tih pawh hriat ni suh. Chutiang vang a lei mai ka ni. Thildang atan chuan eizawnna ni bawk heklo, Cyber-Shot kha ka duhtawk lek mai.

      Delete
  9. ka camera neih hmasak ber chu Hotshot phek thlir thler te kha a nia, a flash awm lo chi lehnghal.. ha ha

    ReplyDelete
  10. DSLR hi chu awhawm ve tak a ni. Keini ang duang tan chuan neih ve ni tak awm ang maw? I thlalak upload lo nghak char char mai ang. :-)

    ReplyDelete
    Replies
    1. Alejendro, Ka lei ang chi khi DSLR anlo ti lova, SLT anlo ti zawk daih anih chu. SLT chu technology thar "single lense translucent camera" tihna a nih awm chu.

      Delete
    2. Hmanah chuan Olympus neih te kha kan intithei ve thei lutuk. Lens liandeuh mai hi a chhawm bawk thin. :-)

      Delete